Danẹlị 12 - FỊAFỊA BAỊBỤLỤ

Kunoma Mẹ Ḅo Ḅa Tẹ Fịtẹ-apụ Ma Saakị Ḅa

¹ Pịna-pịna ferefere kapa sụa enjẹlị ḅe ḅẹẹm, “Anị sakị mẹ ḅụ opu enjẹlị Mayịkẹlị ḅe, ị́ atomi ḍụarịḅọ ḅe tolu-sịẹ ḅa. Anịtẹso kpọma ḅụụ-fụka sakị ḅo ḅa, si tẹịn ye sịẹ-sịẹ ma tarị paka kụra ḅio. Anị sakị mẹ ḅụ, ị́ atomi mamgba tẹ ẹrẹ Tamụnọ ḍiri ḅio kẹẹ wararị apụ ma ḅọrọma ḅa.

² Ini ḅẹ tọnwa-apụ tẹ fịị tẹrẹmẹ sakị mẹ laa apụ fị-ḅụ-saakị tẹ ḍumo ḅa: jen-apụ sime gbamaso ḍumo tọrụ-ḅẹlẹ nyana ḅa, tẹ jen-apụ sime gbamaso tọrụ-tuu ḅụụ-fụka da ḅa.

³ Ye-nimi sịḅịdapụ ma So-tọrụ ḅẹ bele kẹ ḅịya ḅa. Tẹ ini tẹ tọnwa-apụ toluma tẹ in kuraye mịẹ apụ ma lolia ma kịka tẹ ḅịya ḅẹẹ-sakị ḅẹẹ-sakị la ḅa.”

⁴ Ori ị̀ ḅẹẹm, “Tẹ mịọkụ, Danẹlị, ḍiri mẹ gbaịn tẹ ye-oḅoloye kẹ anị oḅolo wẹrị nwenii tomikiri mẹ ḅẹ kunoma la. Mịọkụ mẹ ḅụ tọnwa-apụ ịna ịnyọ fama tẹ ḅụụkụrọma tẹ mịọkụ pakarị ye mẹ fiearị nimi ḅẹ ḍọkị ḅa.”

⁵ Anịtẹso à maa owiapụ ẹrịm ịn tọrụ akaka sịẹsime wararị, gbọrụḅọ gbọrụ akaka gbọrụ akaka.

⁶ Ini ḅẹ gbọrụḅọ tọrụ mẹ ọgọnọ-jụ ḅele tẹ sịẹsime enjẹlị ḅe gbelam, “Ndẹẹ anị ala mu la ḅẹ sakị, nwenii ma ḅụụ-gbiripuma paka aị ma ḅo kunoma?”

⁷ Enjẹlị ḅe nwẹnị ori maa aḅara saakị so da tẹ tẹmẹ-la ḅara kẹ Sime-gbamaso Tamụnọ ḅe ẹrẹ ḅụ ye minini. Ò ḍukoarị tẹ à naam, “Tẹra akụra na pakịrị na mie anị la ḅarịye. Tamụnọ atomi ma ḅaa ḅẹ ḍọkị mẹ kunoma ḅẹ sakị, mịna aị mamgba paka fama ḅa.”

⁸ Ò ḍuko ye à naam kụma anị fiearị ye à naa-a. Mie ḅụ à gbelam, “Kụma, ị̀ nyanaḅọ, ndẹẹ arịmgba ḅo kunoma ḅẹ ḅara?”

⁹ Ọ̀ pakịrịm, “Danẹlị, mịọkụ kẹ soo, kẹ gotẹ ọkọ ḅẹẹarị, mịna ẹkwẹn ma kẹ ḅọị tẹ kikima ḅẹ aị, nwenii kunoma mẹ ḅo.

¹⁰ Ịn tọnwa-apụ mịẹ kpaịnma ḅa. Si-sịḅịḅio-sụa apụ anị fiearị ye naa ḅịa kụma in si-sịḅịḅio-sụa tọrọkọ-tọrọkọ mu ḅa; ini tẹ ye nimi wararị apụ ma kịngẹ anị fiearị ye naa ḅa.”

¹¹ Ini ene-ene ḅẹ agba ma dasịẹma ḅẹ sakị mẹ ḅụ ọkị mu, anie “Ḅalafama Sịḅị-jịrịmaye Mẹ” ḅụ ọkị mu, ḍin tẹra ẹndẹ inia asi finji na oyia aḍin na ḅọrọ ḅa.

¹² Ḅioḅẹngbọ kẹ ḅụụ ḅụ gbana na-iḅi ḅara sime nwenii ḍin tẹra ẹndẹ sonio asi finji na jei aḍin na ḅọrọ ḅarị apụ ma anie ḅioḅẹlẹ tẹ apụ!

¹³ “Tẹ ị́yẹrị, Danẹlị, ḅioḅẹngbọ kẹ ḅụụ ḅụ gbana na-iḅi ḅara sime mu kunoma mẹ la. Anịtẹso ị́ fịị ḅa, kụma ị́ saakị tẹ ị́ gbẹẹ-ye nyana ḅa, sakị kunoma mẹ ḅụ.”