Danẹlị 1 - FỊAFỊA BAỊBỤLỤ

Danẹlị Na Ori Ikiapụ Na Gboloma Ịlụkụ Danẹlị Na Ori Ikiapụ Na Babịlonịya Ḅẹ Amadaḅọ Ḅe Warị Angam

¹ Jehohakịnị Juda da tẹ tẹrẹị karama kụra mẹ ḅụ, Nebukadineza, Babịlonịya ḅẹ Amadaḅọ ḅe owu kẹ Jeruselemu paka tẹ ọmụapụ kẹ opu ama mẹ ikelema-korom.

² KỊNỊNYANAḄỌ ḅe minini ọ̀ pịrị tẹ ori Ama-da Jehohakịnị kun tẹ pịkị Tamụnọ-warị mẹ ḅẹ ngọ ma ḅẹ jaị fọịn ọkịm. Ori ikoliapụ ḅara kẹ jen-apụ ọkị ọ́ ḅụ sụa so ori atamụnọ ma warị mum Babịlọnị ḅụ, tẹ fọịn so ngọ ma kẹ ọ̀ tẹkẹarị tamụnọ-warị mẹ ḅẹ ye koko aḅio ḅụ kokom.

³ Amadaḅọ ḅe tọn ọ́ fịrịmẹnjị-opuḅọ Asịpịnazị pịrịm ori Izirẹlị ḅụ kun-ḅo apụ ma ogboku ja asawọ tẹ amada-furo mẹ na ja karakara afuro na ḅụ paka apụ sẹlẹ-pakama-ḅoo.

⁴ Ịn tọrụ-gbẹ apụ sọọ, ye nimii, iḅiọkụ ḍikiḍiki pakama-ḅo tẹ sarama ye ḍawọ ḅo ḅẹ apụ, oju ḅụ gbọrụ ḅẹkụ sọ ofori apụ, mịẹ tẹ ini ama-da warị mẹ ḅio fịrịmẹnjị gbẹẹ apụ sọ ḅarị ḅara. Asịpịnazị ḅe pịkị in toluma tẹ ịn Babịlonịya ama-ḅịḅị mẹ go ḍịn, pịkị kẹẹ ḍịn ḅẹ ḅara.

⁵ Amadaḅọ ḅe pịkị tọnm mịnẹ ene-ḅaaene-ḅaaene amada-warị ḅẹ apụ ma fịarị gbọrụ fịye ḅara mẹ na iru mẹ na mie ịn kẹ ini sọ pịrị ḅarịye. Tẹ tẹra akụra ḅọrọ tẹ ḅẹḅẹ, ịn saakị fịrịmẹnjị amadaḅọ ḅe pịrị ḅẹ ḅara.

⁶ Ịn sẹlẹ ọkị apụ ogboku Danẹlị na Hananaya, Misẹlị na Azaraya na simem, inimgba Juda ḅụ ḅom.

⁷ Sịḅịda fịrịmẹnjịḅọ ḅe ịwọ ẹrẹ kẹ ịn pịrịm: Bẹlịtisaza, Sẹdarakị, Mẹsakị na Abẹdinigo na.

⁸ Danẹlị ò ḅioḅẹngbọ ḅụ tọn kụrọmam mịnẹ ori ọ̀ Tamụnọ nimi ọrụ ḅụ amịna ḅụụ kẹ fịafịa-a ḅara wẹrị ḅịa amada-warị mẹ ḅẹ fịye fị na anị ḅẹ iru ḅuu na ḅụ, mie ḅụ ori Asịpịnazị tẹkẹm mịnẹ ọ̀ ḅarasụa ọ̀ pịrị,

⁹ tẹ Tamụnọ mịẹ tẹ Asịpịnazị ḅe Danẹlị ḍiki-sịḅịjịrịm.

¹⁰ Anịsọ Asịpịnazị paa amadaḅọ ḅe gotẹ ḅalafaam, mie ḅụ ọ̀ Danẹlị ḅẹm, “Amadaḅọ ḅe tọn-pẹlẹ tẹ í fị ḅẹ ye na í ḅuu ḅẹ ye na, tẹ ḍiki-tọrụ ḅụ í oju osi asawọ ma oju iḅi ḅara iḅi-a ḅẹḅẹ, ẹbịsịya ori ị̀ ḅaa ḅa.”

¹¹ Mie ḅụ Danẹlị nwẹnị Asịpịnazị tọnm tọrụ kẹ ori na ori tẹra ikiapụ ma na ḅụ wẹrị nwẹn ḅẹẹ ḅọ ḅe dama-mu.

¹² Ori mẹẹ, “Oyi aḍin kẹ wa daaḍiki. Ọgụ fịye kẹ wa pịrị fị tẹ minji kẹ wa pịrị ḅuu.

¹³ Anịtẹso wa kẹ osi asawọ ma tẹ amada-warị mẹ ḅẹ fịye fịarị apụ ma na tọnma ḍiki, tẹ ị́ kẹ wa ẹrị ḅara ḍiki kọn-pẹlẹẹ.”

¹⁴ Ọ̀ ḍụkụ tẹ ini oyi aḍin kẹ anị daaḍikim.

¹⁵ Oyi aḍin ma ḅo laa sakị, ḍiki-tọrụ ḅụ ini oju iḅi pịkị kụrọ osi apụ mamgba tẹ amadaḅọ fịye mẹ fị sime apụ ma nẹngịm.

¹⁶ Mie ḅụ anị sakị ọkị tọrọkọ mu ò minini ịn pịrị tẹ ini ọgụ fịye mẹ fịm amadaḅọ ḅe pịrị ye mẹ nakara.

¹⁷ Tamụnọ ye-ḍawọ-ḍịịn na ḍiri-ẹrị-tolu-ḅọrọ na ḅụra ḅara kẹ sịḅịḅio ḅẹ oru kẹ ye-kuromaḅo na kẹ inia asawọ ma pịrịm. Kẹ sụa ḅụ, ọ̀ pịkị ịkịan na ḍawọ na puu nimi kẹ Danẹlị pịrị ḅụramam.

¹⁸ Tẹra akụra ma kunoma ḅụ, anie amadaḅọ ḅe tọn ḅara mẹ, Asịpịnazị asawọ mamgba kẹ Nebukadineza tọrọkọ ḅom.

¹⁹ Amadaḅọ ḅe inimgba na ẹkwẹnm, tẹ Danẹlị, Hananaya, Misẹlị na Azaraya na ẹkwẹn ọ̀ pịrị ḅara ọ̀ ḅụ kụrọ nyana ḅẹ jụmọ-jụmọ nẹngịm. Mie ḅụ in ḅo amada-warị mẹ ḅẹ apụ sọm.

²⁰ Anị ḅẹrẹ nyana-a amadaḅọ ḅe gbela-ye gbela-ye sọ, anịanịa ḅụụ-fụkama ye tẹ ò ḍukoye-ḍukoye sọ, mịna inia apụ ma oyia asakị kẹ anị nimi bebe ọ̀ daarị yọ mẹ ḅụ sime ḅịrị-ẹrịḅọ anịanịa majịkị-mịẹḅọ goḅọ-goḅọ nẹngịm.

²¹ Danẹlị amada-warị mẹ ḅụ sime tẹ fịrịmẹnjị nwenii Pasịya ḅẹ Amadaḅọ Sayịrọsị ḅo owu kẹ Babịlọnị sọ tẹ anị nẹngịma sakị lam.