Ḅẹrẹkọn-apụ 9 - FỊAFỊA BAỊBỤLỤ

Ini Abimẹlẹkị Kẹ Amadaḅọ Mịẹm Sẹkẹmụ Ḅụ

¹ Abimẹlẹkị, Jerubalị owiḅọtụḅọ ḅẹ nwẹnị so Sẹkẹmụ ḅụ ò iyingi owiapụ-amịnapụ ḍọkụma-mu tẹ ini na bebe ò iyingi paka-furo mẹmgba ḅẹẹ,

² “Ó ḅeri ḅio Sẹkẹmụ ḅẹ apụ mamgba gbela, ‘Tiye ọmịna aḅụụ iḅitẹịn? Jerubalị owiapụ-awọmẹ kịnị atesi oyi finji mamgba ḅẹrẹtọn ọ́ pịrị, anịanịa gbọrụḅọ ḅẹrẹtọn ọ́ pịrị?’ Ọ́ pịkị kẹ ḅiokoroma mịnẹ yẹrị anie ọmịna mgbe na, ọmịna oju meni na.”

³ Ò iyingi owiapụ-amịnapụ ma nwẹnị ò gotẹ mịna ẹkwẹn-aḅịḅị mamgba kọn Sẹkẹmụ ḅẹ apụ ḅẹrẹtọn-apụ mamgba aḅeri ḅio suu; tẹ ịna atẹmẹ nwẹnị Abimẹlẹkị ḍukamẹnjị ḅụ sịrẹrẹ, gbala ini mẹẹ, “Ori anie wamịna iyimbere” ẹrẹsị.

⁴ Ịn nwẹnị Balị-Biritị warị ḅio seleḅa pakịrị tesi oyi finji pakama-ḅo ọ̀ pịrị, aniemẹ tẹ Abimẹlẹkị kẹ inima tẹ ò ḍukamẹnjị papaa ngoro-ngoro-atomi ọkọ ye mẹ.

⁵ Ọ̀ nwẹnị Ọfara ḅụ ọ̀ ḍa warị mu, tẹ gbọrụ ḍụḅarị ọgọnọ ḅụ Jerubalị owiapụ-awọmẹ kịnị atesi oyi finji ma ḅaa; kụma Jotamụ furo pẹlẹ owiḅọtụḅọ ḅe nwẹnị kọn, gbala ori ọ̀ ḅụụ ḅọịm ẹrẹsị.

⁶ Tẹ Sẹkẹmụ ḅẹ apụ mamgba na, Bẹtị-Milo ḅẹ apụ mamgba na nwẹnị ḅo gboloma, tẹ Abimẹlẹkị kẹ mu amadaḅọ mịẹ Sẹkẹmụ ḅụ ịḅalị mẹ ḅụ sime ịn kẹ oku nwẹn-sịn opu sịn mẹ akaka.

⁷ Ini anị ḍuko Jotamụ pịrị tẹso, ọ̀ nwẹnị mu Gẹrịzimu Tụndụ mẹ ḅẹ sịḅị mẹ ọgọnọ-jụ sịẹsime, tẹ oloku pakama tẹ ịn ḅẹẹ, “Ọmịnị ì pokii, ọmịnị Sẹkẹmụ ḅẹ apụ, mịẹtẹ Tamụnọ ó poki ḅẹ ḅara.

⁸ Gbọrụ sakị ḅụ opu asịn ma pulo kẹ ama-da ịn pịrị ḅẹ gbọrụḅọ sịḅị sara ḅẹ mum; tẹ ịn nwẹnị olivu opu sịn mẹ ḅẹẹ, ‘Ama da wa pịrịị.’

⁹ Kụma olivu opu sịn mẹ nwẹnị ịn ḅẹẹ, ‘Àrị ị̀ ḅụụ paka-ḅo anị pulo mẹ tẹ oru-atamụnọ ma na, tomi na, ḅụụ ḅụ kụn nyanarị ye mẹ wẹrịso tẹ mu yọngọ ama-ḅara na, ere-ḅara na, ọḅụ-na-kuḅu-na da-da opu asịn ma pịrị ḅẹ?’

¹⁰ Opu asịn ma nwẹnị ịla opu sịn mẹ ḅẹẹ, ‘Ị́yẹrị ḅo ama-da wa pịrịị.’

¹¹ Kụma ịla opu sịn mẹ nwẹnị ḅẹẹ, ‘Àrị à kọn-arị ḅẹlẹ mẹ na, ị̀ iḅi sịnmgbọlụ mẹ na wẹrịso tẹ mu yọngọ ama-ḅara na, ere-ḅara na, ọḅụ-na-kuḅu-na da opu asịn ma pịrị ḅẹ?’

¹² Tẹ opu asịn ma nwẹnị mu kụrọ mẹ ḅẹẹ, ‘Ị́yẹrị ḅo ama-da wa pịrịị.’

¹³ Kụma kụrọ mẹ nwẹnị ịn ḅẹẹ, ‘Àrị ị̀ ḅụụ paka-ḅoarị iru mẹ tẹ oru-atamụnọ ma na, tomi na tọrụ ḅẹlẹmarị ye mẹ wẹrịso tẹ mu yọngọ ama-ḅara na, ere-ḅara na, ọḅụ-na-kuḅu-na da-da opu asịn ma pịrị ḅẹ?’

¹⁴ Anịtẹso opu asịn mamgba nwẹnị mu nangị piri mẹ ḅẹẹ, ‘Ị́yẹrị ḅo ama-da wa pịrịị.’

¹⁵ Tẹ nangị piri mẹ nwẹnị opu asịn ma ḅẹẹ, ‘Ọ́ karakara minini ḅụ amadaḅọ sọ ọ́ pịrị kẹ pulo kẹ ị̀ sịḅị sararị ḅẹḅẹ, ó ḅo à kikima wararị anga ḅụ sịḅị kikimaa; kụma anieofori-ofori, yee kọrị fịnị nangị piri mẹ ḅio paka-ḅo tẹ Lẹbanọnị ḅẹ ịn kẹ sida sịn-arị asịn ma dọkịma guluguluma.’ ”

¹⁶ “Anịẹrẹsị mịọkụ ọ́ nwẹnị Abimẹlẹkị kẹ amadaḅọ sọma sakị ḅụ karakara minini na, kụn na ḅụ ye mịẹm ḅẹḅẹ, tẹ iḅi ḅara kẹ Jerubalị na, ọ̀ warị na mịẹ, tẹ ọ̀ mịẹ aị ma na gbẹẹya ḅara kẹ ye mịẹ ọ̀ pịrị-pịrị,

¹⁷ kẹ gotẹ ọkọ ḅẹẹarị, ị̀ ḍa owu sọ ọ́ pịrịm, tẹ fịị kẹ ọ̀ sịḅị ogbo gbana, tẹ Midiyanị ḅara ḅụ ọ́ ḍụa-ḅọrọmam;

¹⁸ kụma mịmgba ọmịnị ị̀ ḍa ḅe warị ḅụ si anga ḅụ saakị tẹ, tẹ ori owiapụ-awọmẹ, kịnị atesi oyia apụ finji ḅaa tẹ gbọrụ ḍụḅarị ọgọnọ ḅụ, tẹ Abimẹlẹkị, ọ̀ fịrịmẹnjị-ẹrẹḅọtụḅọ iyi owiḅọtụḅọ kẹ Sẹkẹmụ ḅẹ apụ amadaḅọ sọma tẹ, ori anie ọmịna mịnaḅọ ẹrẹsị.

¹⁹ Ọ́ nwẹnị anịtẹrẹmẹ, mịmgba ḅụ karakara minini na, kụn na nyana Jerubalị na, ọ̀ warị na pịrị ḅara kẹ ye mịẹm ḅẹḅẹ, anịrẹ ọmịnị Abimẹlẹkị ḅụụ ḍerekuu, tẹ yee ori sọ ọmịna aḅụụ ḅioḅẹlẹ.

²⁰ Kụma anieofori-ofori, yee kọrị fịnị Abimẹlẹkị ḅụụ paka-ḅo tẹ Sẹkẹmụ ḅẹ apụ ma na, Bẹtị-Milo ḅẹ apụ na dọkịma guluguluma; anịsakị yee Sẹkẹmụ ḅẹ apụ ma na, Bẹtị-Milo ḅẹ apụ ma na ḅụụ kọrị fịnị paka-ḅo tẹ Abimẹlẹkị dọkịma guluguluma.”

²¹ Jotamụ nwẹnị ori iyimbere Abimẹlẹkị ḍiki-ḅalafa gotẹ ḍumo mangị kọn, tẹ mangị-so Biya mu tẹ anịjụ sime.

²² Abimẹlẹkị tẹra akụra kẹ ḅẹrẹtọn Izirẹlị pịrịm.

²³ Tamụnọ nwẹnị gbọrụ si-tẹmẹ kẹ Abimẹlẹkị na, Sẹkẹmụ ḅẹ apụ ma na ogboku fịrịma; tẹ Sẹkẹmụ ḅẹ apụ ma nwẹnị kịnị pikirima ḅara kẹ Abimẹlẹkị na mịẹ;

²⁴ mịẹtẹ ịn kẹ Jerubalị owiapụ-awọmẹ tesi oyi finji ma mịẹ akụ ye mẹ ḅo, tẹ ịna ọmbie mẹ Abimẹlẹkị ịna iyimbere ḅẹ tẹ ịn ḅaa ḅọ ḅe ọgọnọ gbana, pịkị Sẹkẹmụ ḅẹ apụ ma tẹ ḅarasụa ọ̀ pịrị tẹ ori ori owiapụ-amịnapụ ma ḅaa apụ ma ọgọnọ gbana ḅẹ ḅara.

²⁵ Sẹkẹmụ ḅẹ apụ ma nwẹnị kịnị kẹ tụndụ asịḅị ma ọgọnọ-jụ ḅụ ḅọị tẹ owu kẹ Abimẹlẹkị ẹbị, tẹ ini tẹ anị etela ḅụ ịna akaka mẹnjịma ḅọrọarị apụ mamgba aị pụkọ-pụkọ ọkịm; tẹ ịn nwẹnị anị ḍuko Abimẹlẹkị pịrị.

²⁶ Gali, Ẹbẹdị owiḅọtụḅọ ḅe na ori na gbọrụ ḍaḅọ iyi owiapụ na nwẹnị mẹnjị Sẹkẹmụ sọ-ḅo; tẹ Sẹkẹmụ ḅẹ apụ ma ḅiokpọ kẹ ori ọgọnọ gbana,

²⁷ Ịn nwẹnị paka piri sọ, tẹ ịna girepu-aḍụọ ma ḅio girepu-asịnmgbọlụ ma kobiri tẹ arị nanga, tẹ alalị fị. Ịn nwẹnị ịna oru-tamụnọ warị ḅio sọ-mu tẹ fị-na-ḅuu-na, tẹ Abimẹlẹkị fie sima.

²⁸ Galị, Ẹbẹdị owiḅọtụḅọ ḅe nwẹnị ḅẹẹ, “Abimẹlẹkị anie tụḅọ, anịsakị Sẹkẹmụ ḅụ wamịnị tọ apụ tẹ wa fịrịmẹnjị ọ̀ pịrị ḅẹ? Karakarayee, Jerubalị owiḅọtụḅọ ḅe na, ọ̀ ḍa Zibulu na ịn fịrịmẹnjị Emọ, Sẹkẹmụ ḍa ḅe atomi pịrịm. Anị-a kụma wa tiegotẹ fịrịmẹnjị ọ̀ pịrị na-iḅi?

²⁹ Mịna atomi ma paa ì ḅara ḅụ emi namịna! Mimgbe anịrẹ arị Abimẹlẹkị sikima ḅa. Àrị Abimẹlẹkị ḅẹẹ ḅa, ‘Ị́ ọmụ-ogbo mịẹ gburo-gburoma tẹ paka-ḅoo.’ ”

³⁰ Zibulu opu ama mẹ ḅẹ ḅẹrẹtọnḅọ ḅe Gali, Ẹbẹdị owiḅọtụḅọ ḅẹ ẹkwẹn-aḅịḅị ma naa tẹso, ori ịganị nwẹnị saakị.

³¹ Ọ̀ nwẹnị fịrịmẹnjịapụ kẹ Abimẹlẹkị fịrịma Arụma ḅụ, tẹ ḅẹẹm, “Ḍikii, Gali, Ẹbẹdị owiḅọtụḅọ ḅe na ori iyimbere amẹẹ na Sẹkẹmụ ḅo tẹẹ, ini opu ama mẹ sukuruma ị́ ẹngbẹsẹarị.

³² Anịẹrẹsị mịọkụ ḍin ḅụ ị́yẹrị na owiapụ ma tẹ ị́ ḅụụ emi apụ ma na mu tẹ piri ma ḅio sime koruu.

³³ Anịtẹso dede-ḅio otuka mẹ puu-paka gbọrụ sakị, iḅi ḅiri saakị tẹ ọ́ mangị opu ama mẹ muu; anịsakị ori na, owiapụ ma tẹ ọ̀ ḅụụ emi apụ ma na ḅo ị́ da-paka ḅẹ sakị, ị́ sakị mẹ sime ị́ pịrị ḅara kẹ ịn mịẹ ḅa.”

³⁴ Anieḅụ Abimẹlẹkị na owiapụ mamgba tẹ ọ̀ ḅụụ emi apụ ma na ḍin ḅụ saakịm, tẹ nwẹnị ini ogbo ḅụ owu kẹ Sẹkẹmụ paka ḅẹ koru.

³⁵ Gali, Ẹbẹdị owiḅọtụḅọ ḅe nwẹnị paka-mu opu ama mẹ ḅẹ mẹnjị sọ-muarị ogigo-ḅọkọ mẹ ḅụ sịẹsime; tẹ Abimẹlẹkị na owiapụ ma tẹ ori na emi apụ ma na nwẹnị ḅọịtẹ owu ẹbị anga mẹ ḅụ saakị.

³⁶ Gali owiapụ ma ẹrị tẹso, ọ̀ nwẹnị Zibulu ḅẹẹ, “Ḍikii, owiapụ tụndụ asịḅị ma ḅụ ideri-ḅoarị!” Zibulu nwẹnị ọ̀ ḅẹẹ, “Ịrụa ḅio paka-paka tụndụ ma tẹmẹ mẹ mie tomi sime-ḅara sime tẹ ị́ ẹrị ye.”

³⁷ Gali nwẹnị sin ẹkwẹn tẹ ḅẹẹ, “Ḍikii, jine wararị kiri mẹ ḅẹ ogboku ḅụ owiapụ ideri-ḅoarị, anịsakị gbọrụ ogbo fụḅara-ḍiki-ḅịrịapụ opu sịn ịn kẹ oku nwẹn-sịn ye mẹ sime pakịrị ḅụ ḅoarị.”

³⁸ Anịtẹso Zibulu nwẹnị ọ̀ ḅẹẹ, “Ndẹẹ ị́ ḅịḅị mẹ mịọkụ, ị́yẹrị ḅe tẹ ḅẹẹm, ‘Abimẹlẹkị anie tụḅọ, tẹ wa fịrịmẹnjị ọ̀ pịrị ḅẹ?’ Mịna apụ ma anie tomi ma tẹ í ḍiki-sima apụ ma ini-a? Mịọkụ paka-mu tẹ ini na owu mẹ sọọ.”

³⁹ Tẹ Gali nwẹnị Sẹkẹmụ ḅẹ owiapụ ma kẹ sịḅịda tẹ paka-mu Abimẹlẹkị na owu sọ.

⁴⁰ Abimẹlẹkị ò ḍukam, tẹ ori ọ̀ tọrọkọ ḍumo-mangị kọnm; tẹ tọnwa apụ ḅịkịm, ye ịn lama mu ogigo-ḅọkọ mẹ ḅẹ mẹnjị-ḅọrọ-sọ-anga anga mẹ lam.

⁴¹ Abimẹlẹkị nwẹnị Arụma ḅụ sime; tẹ Zibulu nwẹnị Gali na, ori owiapụ-amịnapụ ma na dee pakama, anie mịẹtẹ ịn ḅarị inetẹ Sẹkẹmụ ḅụ sime tọrọkọ mu-a.

⁴² Anị palị ene ḅụ, owiapụ ma nwẹnị paka piri ma ḅio sọ-mu. Ịn nwẹnị anị ḍuko Abimẹlẹkị pịrị.

⁴³ Ọ̀ nwẹnị ori atomi ma ọkị tẹ ịn kẹ tẹra ogbo ḍie, tẹ piri ma ḅio sime koru; ọ̀ nwẹnị ḍiki tẹ owiapụ ma ẹrị ini opu ama mẹ ḅio paka-ḅoarị, tẹ ọ̀ nwẹnị saakị tẹ owu kẹ ịn paka, tẹ ịn ḅaa.

⁴⁴ Abimẹlẹkị na ogbo mẹ tẹ ori na sime ye mẹ na nwẹnị fọnya mangị tọrọkọ mu tẹ opu ama mẹ ḅẹ ogigo-ḅọkọ mẹ ḅụ sịẹsime, tẹ maa ogbo ma fọnya mangị mu tẹ ini ma tẹ piri ma ḅio simearị apụ mamgba la tẹ ịn ḅaa fama.

⁴⁵ Abimẹlẹkị anị ene mẹmgba kẹ opu ama mẹ na owu sọm; ori opu ama mẹ ọkịm, tẹ tomi tẹ anị ḅio sime apụ ma ḅaam; tẹ ọ̀ nwẹnị ama mẹ fama tẹ fụn kẹ anị sara gbaịn.

⁴⁶ Sẹkẹmụ ḅẹ Kụrọtẹ Gele Warị mẹ ḅẹ apụ mamgba anị naa tẹso, ịn nwẹnị Ẹlị-biriti warị mẹ ḅẹ kụrọ tẹịn anga mẹ ḅio sọ-mu.

⁴⁷ Ịn nwẹnị ḍuko Abimẹlẹkị pịrị mịnẹ Sẹkẹmụ ḅẹ Kụrọtẹ Gele Warị mẹ ḅẹ apụ mamgba mu anịjụ kobiri gboloma tẹ.

⁴⁸ Abimẹlẹkị na ọ̀ ḅụụ emi apụ mamgba na ori na nwẹnị iwo Zalimọnị Tụndụ mu; Abimẹlẹkị nwẹnị ọ̀ ḅara ḅio ḅụ gbọrụ kumbu ọkị, tẹ kẹ ye ọfịn sin ḅẹ fịnị gbọrụ puku pẹlẹ koroma, tẹ anị ọkị tẹ kẹ ori apana gbana. Ọ̀ nwẹnị ori na sime owiapụ ma ḅẹẹ, “Ọ́ fọnya á mịẹ tẹ ọmịnị ẹrị ye mẹ mịẹ.”

⁴⁹ Anieḅụ tomi ma ḅụ ọrụḅọ-ọrụḅọ nwẹnị ọ̀ fịnị puku pẹlẹ koroma, tẹ Abimẹlẹkị ḍikima tẹ anị kẹ warị mẹ ḅẹ kụrọ-tẹịn anga mẹ sịrẹrẹ, tẹ ịn nwẹnị kọrị fịnị kẹ arị ḅụ sụa, tẹ fịnị kẹ warị mẹ ḅụ kụrọ-tẹịn anga mẹ ḅụ sụa; anie mịẹtẹ Sẹkẹmụ ḅẹ Kụrọtẹ Gele Warị mẹ ḅẹ apụ mamgba sọ fịịm, owiapụ na, ereme na, kịnị maa ẹndẹ oyia asi finji pembe apụ.

Abimẹlẹkị Fịị Owu Ḅio

⁵⁰ Anịtẹso, Abimẹlẹkị mu Tẹbẹzi ikelema-koro tẹ owu kẹ Tẹbẹzi paka, tẹ anị ọkịm.

⁵¹ Kụma gbọrụ kụrọtẹ gele warị opu ama mẹ ḅio simem, tẹ opu ama mẹ ḅẹ apụ mamgba ḍumo-mangị kọn anị ḍọkụma-mum; owiapụ na, ereme na mamgba nwẹnị anị ḅio ḅụ ḅọkọ ịkasị ịna aḅụụ pịrị, tẹ ịn nwẹnị gele warị mẹ ḅẹ isun kpọlị.

⁵² Abimẹlẹkị nwẹnị ḅo kụrọtẹ gele warị mẹ la, tẹ owu kẹ anị paka, tẹ fịnị kẹ anị dọkịma ḅẹ ḅara kẹ sọma ḅọkọ mẹ kpeki.

⁵³ Gbọrụ ẹrẹḅọ nwẹnị ọgọnọ-jụ ḅẹ ye gbẹẹ ḍụḅarị kẹ Abimẹlẹkị gbin tẹ ọ̀ sịḅị-okpolomokpo kọsịma.

⁵⁴ Anịtẹso ọ̀ nwẹnị fọnya ḅara kẹ ori ọmụ-aị dogiarị asambịrịma owiḅọ ḅe sịn, tẹ ọ̀ ḅẹẹ, “Í okologie sin tẹ kẹ ị̀ ḅaa, anieofori tomi ḅofa ì gbolomaye ḅụ ḅẹẹ, ‘Gbọrụ ẹrẹḅọ mie ọ̀ ḅaa ye’ ” Tẹ ori asambịrịma owiḅọ ḅe nwẹnị okologie kẹ ò temi toluma, tẹ ọ̀ fịịm.

⁵⁵ Izirẹlị ḅẹ owiapụ ma Abimẹlẹkị fịị tẹ mẹ ẹrị tẹso, ọrụḅọ-ọrụḅọ nwẹnị so mḅọ ama mu.

⁵⁶ Mị-ḅara mie Tamụnọ kẹ Abimẹlẹkị gbẹẹ ḅara ọ̀ kẹ ọ̀ ḍa mịẹ si ḅụ tẹ ori amịnapụ owiapụ kịnị atesi oyi finji ma ḅaa ye mẹ ḅụ.

⁵⁷ Tamụnọ pịkị mịẹ tẹ Sẹkẹmụ ḅẹ apụ ma ḅẹ si-sịḅịḅio mẹmgba pịkị-ḅo ịna sịḅị ọgọnọ gbanam, anịsakị Jotamụ, Jerubalị owiḅọtụḅọ ḅe wori-nume mẹ ḅo ini ọgọnọ gbanam.