Ḅẹrẹkọn-apụ 8 - FỊAFỊA BAỊBỤLỤ

Ịn Kẹ Midiyanị Ḅẹ Apụ Ma Nẹngịma Kunoma Sakị Mẹ

¹ Iferemu ḅẹ owiapụ ma nwẹnị Gibiyọnị ḅẹẹ, “ị́ tiegotẹ mị-ḅara mẹ kẹ wa mịẹ, í Midiyanị na owu sọ ḅẹ mu sakị ị́ wa sịn-a?” Ịn nwẹnị ye ḅụụ ḅụ akụ ḅara kẹ si ẹkwẹn kọn ọ̀ pịrị.

² Kụma ọ̀ nwẹnị ịn ḅẹẹ, “Ọmịnị mịọkụ mịẹ ye kẹ à mịẹ ye na tọnma kụma, ọmịnị mịẹ ye tẹịnm. Iferemu furo-ḅẹ-apụ ḅara-kọnma kolokolo ḅo girepu-asịnmgbọlụ ma iḅitẹịn kẹ Abiyeza furo-ḅẹ-apụ fịye-pẹlẹ-ogie kẹ soku pakama-ḅo girepu-asịnmgbọlụ ma nẹngịm.

³ Tamụnọ Midiyanị ḅẹ ọmụ-alapụ ma, anie Orẹbụ na Zẹyibu na kẹ ọmịna aḅara-ḅio ḅụ ọ́ pịrị tẹẹ; àrị inetẹ tiye mịẹ tẹ kẹ ọmịnị mịẹ ye na tọnma ḅe?” Ò miemẹ ḍuko tẹso, anịtẹrẹmẹ ịna ịganị ọ̀ ḅụụ ḅụ deinm.

⁴ Gidiyọnị ḅo Jodanị mẹ lam, tẹ kịnị jeia asi ma tẹ ọ̀ ḅụụ sọ apụ ma na ori na anị saḅa-ḅọrọm, ịnyọ ịn ta tẹ, anịsọ ịn paa ḍukarị.

⁵ Anieḅụ ọ̀ nwẹnị Sukọtị ḅẹ owiapụ ma ḅẹẹ, “Àrị ọ́ tẹkẹm, ọ́ fịturu akpo kpo kẹ tomi ma tẹ ì ḍuka-ḅo apụ ma pịrịị; kẹ gotẹ ọkọ ḅẹẹarị, ịnyọ ịn ta tẹ, anịsakị à Ziba na, Zalimuna na, Midiyanị ḅẹ amadapụ ma ḍukarị.”

⁶ Kụma Sukọtị ḅẹ fịrịmẹnjị-opuapụ ma mẹẹ, “Wa fịye kẹ ị́ ọmụ-ogbo pịrị ḅe ye mẹ mịọkụ Ziba na, Zalimuna na, ini ọmịna ḅara-ḅio emi?”

⁷ Gidiyọnị nwẹnị ḅẹẹ, “Iḅim, KỊNỊNYANAḄỌ ḅe Ziba na, Zalimuna na kẹ ị̀ ḅara ḅio ḅụ ị̀ pịrị sakị, arị ịkpa mẹ ḅẹ anangị ma na, piri-ḅio-ḅẹ ịga nangị ma na kẹ ọmịna oju-meni ma kpịra ḅa.”

⁸ Anịjụ ḅụ ọ̀ nwẹnị iwo Pẹnụwẹlị mu, tẹ gbọrụ ḅara mẹ kẹ ẹkwẹn ịn pịrị; tẹ Pẹnụwẹlị ḅẹ owiapụ ma nwẹnị Sukọtị ḅẹ apụ ma kẹ ọ̀ pakịrị ḅara kẹ ọ̀ pakịrị.

⁹ Anieḅụ ọ̀ nwẹnị Pẹnụwẹlị ḅẹ owiapụ ma ḅẹẹ, “Á sin dein ḅụ ḅo sakị, á mị kụrọtẹ gele warị mẹ kan sara ḅa.”

¹⁰ Mịọkụ Ziba na, Zalimuna na, Kakọ ḅụ ịna ọmụ-ogbo, kịnị maa ẹndẹ oyia asi finji ofori, kịnị maa puku (15,000) pembe apụ ma tẹ ịrụa-saakịarị-anga ḅẹ apụ ma ḅẹ ọmụ-ogbo mẹmgba ḅụ kọn wararị apụ ma na emi; kẹ gotẹ ọkọ ḅẹẹarị, kịnị jei apuku (120,000) tẹ okologie mẹ sin apụ ma ḅịkị tẹ.

¹¹ Gidiyọnị nwẹnị Noba na, Jọgụbeya na ḅụ ịrụa-saakịarị-anga ḅẹ ịkpa-mẹnjịapụ-etela mẹ ḅụ iwo mu tẹ owu kẹ ọmụ-ogbo mẹ paka, anị kẹ gotẹ ọkọ mịẹ ye, ọmụ-ogbo mẹ ḍikiḍiki ye ofori.

¹² Ziba na, Zalimuna na nwẹnị ḍumo-mangị kọn; tẹ ori ịn ḍukam, tẹ Ziba na, Zalimuna na, Midiyanị ḅẹ maa amadapụ ma na ọkịm; tẹ ọ̀ nwẹnị ọmụ-ogbo mẹmgba kẹ tẹmẹ-naịn-naịn ḅio su.

¹³ Anịtẹrẹmẹ Gidiyọnị, Johasị owiḅọtụḅọ ḅe Heresị ḅẹ kpọlị iwo anga mẹ ḅụ owu mẹ ḅụ pịkịma-som.

¹⁴ Ọ̀ nwẹnị Sukọtị ḅẹ gbọrụ asambịrịma owiḅọ ọlọ, tẹ ye kẹ ò gbela, tẹ ọ̀ nwẹnị Sukọtị ḅẹ fịrịmẹnjị-opuapụ ma na, omongiapụ ma na kẹ kẹẹ koroma ọ̀ pịrị, tẹra apụ ofori kịnị inia si.

¹⁵ Anịtẹso Gidiyọnị nwẹnị ḅo Sukọtị ḅẹ owiapụ ma la tẹ ịn ḅẹẹ, “Ó Ziba na Zalimuna na tẹ ọmịnị ma gotẹ ḅio akụma si ẹkwẹn kọn ị̀ pịrị tẹ ḅẹẹm, ‘Ziba na Zalimuna na ini ị́ ḅara-ḅio emi, tẹ wa fịye kẹ ị́ atomi tẹ ịnyọ fa tẹ apụ pịrị ḅẹ?’ ḅẹẹ apụ ma ḍikii.”

¹⁶ Ọ̀ nwẹnị opu ama mẹ ḅẹ omongiapụ ma ọkị, tẹ ịkpa mẹ ḅẹ anangị ma na, piri-ḅio-ḅẹ ịga anangị ma na ọ̀ pịkị nwẹn ọkị tẹ kẹ ḍawọye kẹ Sukọtị ḅẹ owiapụ ma tolumam.

¹⁷ Ọ̀ Pẹnụwẹlị ḅẹ kụrọtẹ gele warị mẹ kan saram, tẹ opu ama mẹ ḅẹ owiapụ ma ḅaam.

¹⁸ Anịtẹso ọ̀ nwẹnị Ziba na, Zalimuna na ḅẹẹ, “Owiapụ ma tẹ Tabọ ḅụ ọ́ ḅaa apụ ma ịn tọ-anga ḅụ emi?” Ịn nwẹnị pakịrị, “Í sime-ḅara, mie ịna ḅụụ ọrụḅọ-ọrụḅọ sime-ḅara; ini amadaḅọ owiapụ-awọmẹ kịkam.”

¹⁹ Ọ̀ nwẹnị ḅẹẹ, “Ini anie ì owiapụ-amịnapụ, ì iyingi iyi owiapụ-awọmẹ; KỊNỊNYANAḄỌ ḅe ḍumo wararị ḅara ḅụ, ọmịnị ịn ḅọrọmam, tẹ ịn ḍumo namịna arị ọ́ ḅaa ḅịa.”

²⁰ Tẹ ọ̀ nwẹnị ọ̀ tarị owiḅọtụḅọ Jita ḅẹẹ, “Saakị tẹ ịn ḅaa.” Kụma asambịrịma owiḅọtụḅọ ḅe ori okologie sin ḍụkụ-a; anị kẹ gotẹ ọkọ mịẹ ye, ọ̀ ḅalafaarị, ọ̀ paa asambịrịma wararị ẹrẹsị.

²¹ Anịtẹso Ziba na, Zalimuna na nwẹnị Gibiyọnị ḅẹẹ, “Ị́yẹrị ḅarana saakị, tẹ wa ḅaa; kẹ gotẹ ọkọ ḅẹẹarị, owiḅọ ḅe sime-ḅara mie ori ịnyọ sime-ḅara.” Tẹ Gibiyọnị nwẹnị saakị tẹ Ziba na, Zalimuna na ḅaa; tẹ ọ̀ nwẹnị ḅiriaị ma tẹ ịna ike-sụa-anama ma akọngọ sime aị ma ọkị.

²² Anịtẹso Izirẹlịapụ ma nwẹnị Gidiyọnị ḅẹẹ, “Ị́yẹrị na, ị́ owiḅọtụḅọ na, ị́ taa-tụḅọ na sọ ḅẹrẹtọn wa pịrịị, kẹ gotẹ ọkọ ḅẹẹarị, ị́ wa ḍụa-ḅọrọma pakama-ḅo tẹ Midiyanị ḅara ḅụ.”

²³ Gidiyọnị nwẹnị ịn ḅẹẹ, “À ḅẹrẹtọn ọ́ pịrị ḅịa, anịsakị ì owiḅọtụḅọ sọ ḅẹrẹtọn ọ́ pịrị ḅịa; KỊNỊNYANAḄỌ ḅe mie ḅẹrẹtọn ọ́ pịrị ḅarịye.”

²⁴ Kụma Gidiyọnị nwẹnị pịkị ịn ḅẹẹ, “Yee arị ọmịna ḅara ḅụ ye ḅii; ọmịna aḅụụ owiḅọ goḅọ-goḅọ ọmụ ḅio mḅọ ọkị ḅerisụa-aị ma kẹ ị̀ pịrịị.” (Kẹ gotẹ ọkọ ḅẹẹarị, ịn golu ḅerisụa-aị nyanam, ini anie Isimẹlị furo-ḅẹ-apụ ẹrẹsị.)

²⁵ Ịn nwẹnị pakịrị, “Wa nụnụ-a ḅara kẹ arị kẹ ị́ pịrị ḅa.” Tẹ ịn nwẹnị gbọrụ opu kapa finjima anya koroma, tẹ owiḅọ goḅọ-goḅọ ori ọmụ ḅio ḅẹ ḅerisụa-aị ma kẹ anị ḅio wakị wakị sụam.

²⁶ Golu-golu ḅerisụa-aị ma tẹ ò ḅii aị ma ḅẹ iku anie golu kpo ini ẹndẹ, sọnọa si finji iku; ḅiriaị ma na, pọkọsụa-aị ma na, Midiyanị ḅẹ amadapụ ma sụa-sụa pọpụlụ nwẹn-sịn tọrụ sụa opu akapa ma na, ịn kẹ ịna ike-sụa-anama akọngọ ma sụa aị ma sikima.

²⁷ Gidiyọnị nwẹnị golu mẹ ḅụ ye ọkị tẹ kẹ oru-fụḅara tẹmẹ tẹ kẹ ori opu ama Ọfịra ḅụ koroma; tẹ Izirẹlị mẹmgba nwẹnị anịanga mu-mu anị ḅụ sẹfị tii mẹ kọn, tẹ anị ḅo ḍiein sọ Gidiyọnị na ọ̀ paka-furo na pịrị.

²⁸ Mị-ḅara mie ịn mịẹtẹ Midiyanị kẹ Izirẹlịapụ ma tọrọkọ sịḅị-tuu ḅara, tẹ ḅarị jen-maaịn kẹ ịna asịḅị saakị ya. Tẹ ama mẹ Gidiyọnị ene ma ḅụ kụra amesi kẹ ịnyọsaram.

Gidiyọnị Fịịm

²⁹ Jerubalị (anie Gidiyọnị) Johasị owiḅọtụḅọ ḅe so mu ò soku-ḅẹ warị ḅio angam.

³⁰ Mịọkụ Gidiyọnị ò soku na ḅarana iyi owiapụ-awọmẹ tesi oyi finji nyanam, ọ̀ tọnwa ereme simem ẹrẹsị.

³¹ Anịsakị ori oloḅọ tẹ Sẹkẹmụ ḅụ sime ḅọ sọ gbọrụ owiḅọtụḅọ iyi ọ̀ pịrịm, tẹ ori Abimẹlẹkị kẹ ẹrẹ kẹ ò kurom.

³² Tẹ Gidiyọnị, Johasị owiḅọtụḅọ ḅe nwẹnị iḅi ḅara kẹ omongi kpọọ tẹrẹmẹ fịị, tẹ ịn nwẹnị Ọfara ḅụ ọ̀ ḍa Johasị ḍuḅu ḅio ò ḍiḅi Abiyeza ḅẹ apụ ma ḅụ.

³³ Gidiyọnị fịị gbọrụ sakị Izirẹlịapụ ma vuunma pịkị tẹ sin Balị ma ḍukamẹnjị sẹfị tii mẹ kọnm, tẹ Balị-Bẹriti kẹ ịna oru-tamụnọ sọmam.

³⁴ Tẹ Izirẹlịapụ ma KỊNỊNYANAḄỌ ịna Tamụnọ ḅe tẹ inina fịya-a apụ mamgba ḅara ḅụ pakịrị goyegoye ḅụ ịn ḍụa ḅọrọma ḅo ḅe kẹ ḅiokoroma-a;

³⁵ tẹ iḅi-yemịẹ-ḅara nyana kẹ Jerubalị, anie Gidiyọnị furo mẹ pịrị-a iḅi mẹmgba tẹ ọ̀ mịẹ kẹ Izirẹlị pịrị tẹ ye mẹ ḅụ.