Ḅẹrẹkọn-apụ 7 - FỊAFỊA BAỊBỤLỤ

Gidiyọnị Midiyanị Ḅẹ Apụ Ma Nẹngịmam

¹ Anịtẹso Jerubalị (anie Gidiyọnị) na tomi mamgba tẹ ori na sime apụ ma na nwẹnị ḅaso ḅio saakị tẹ Harọdị ḅẹ ngụngụḅa mẹ akaka ḅụ akpụrụ-warị pike; anịsakị Midiyanị ḅẹ akpụrụ-warị mẹ ịna ọgọnọ-jụ emi More ḅẹ tụndụ mẹ akaka tụndụ ogboku mẹ ḅụ.

² KỊNỊNYANAḄỌ ḅe nwẹnị Gidiyọnị ḅẹẹ, “Ị́ ḅụụ sọ atomi ma ịn ḅakam Midiyanị ḅẹ apụ ma kẹ ịna ḅara ḅio ịn pịrị ḅụ. Anieofori Izirẹlị kẹ ịna aḅụụ boma ị̀ pịrị tẹ ḅẹẹ ḅa, ‘Wamịnị ḅarana wamịna aḅụụ ḍụa-ḅọrọmam’

³ Ọkọẹrẹsị mịọkụ kpo-kpo gbolo tomi ma ḅeri ḅio suu tẹ ḅẹẹ, ‘Ḅẹḅọ-ḅẹḅọ tẹ ḅalafaarị tẹ oju-sẹkịarị ḅọ goḅọ-goḅọ yee mḅọ pịkịma-so ama mu.’ ” Gidiyọnị ịn daaḍikim, tẹ kịnị maa apuku na jeia ẹndẹ finji (22,000) pịkịma-som, tẹ kịnị gbọrụ puku na sọnọa ẹndẹ finji (10,000) nwẹnị kọọn.

⁴ Tẹ KỊNỊNYANAḄỌ ḅe nwẹnị Gidiyọnị ḅẹẹ, “Tomi ma paa ḅaka wararị; ịn kẹ ideri minji mẹ suku mu, anịsakị arị anịjụ ịn daaḍiki ị́ pịrị ḅa; tẹ oriḅe tẹ arị ị́ ḅẹẹ ḅa, ‘Ḅị tomḅọ ḅe ị́ ḅụụ sọ tẹ mu ḅa’ kẹ ḅẹẹ ḅọ, ḅẹẹ ḅọ ị́ ḅụụ sọ tẹ mu ḅa; anịsakị ḅẹḅọ-ḅẹḅọ tẹ àrị ị́ ḅẹẹm, ‘Ḅị tomḅọ ḅe ori ị́ ḅụụ so tẹ mu ma’, kẹ ḅẹẹ ḅọ ḅẹẹ ḅọ mu ḅịa.”

⁵ Anieḅụ ò tomi ma kẹ ideri minji mẹ suku ḅom; tẹ KỊNỊNYANAḄỌ ḅe nwẹnị Gidiyọnị ḅẹẹ, “Ḅẹḅọ-ḅẹḅọ tẹ obiri ḅẹlẹ kẹ minji ḅuu ḅara kẹ minji mẹ ḅuuḅọ, ḅuuḅọ, ị́ mḅọ sikima koroma ḅa; anị gbọrụ ḅara ḅụ ị́ pịkị ḅụọ-kụkụ kẹ kparakị tẹ ḅuuḅọ, ḅuuḅọ sikima koroma ḅa.”

⁶ Inima tẹ ịna aḅara kẹ minji ḍuu-ḍuu ịna aḅịḅị lama tẹ ḅẹlẹ kẹ ḅuu apụ ma kịẹn-ḅịḅị anie kịnị jeia asi (300); kụma tomi ma ḅụ kirikọn-apụ mamgba ḅụọ-kụkụ kẹ kparakị tẹ minji ḅuum.

⁷ KỊNỊNYANAḄỌ ḅe nwẹnị Gidiyọnị ḅẹẹ, “Kịnị jeia si ma tẹ ḅẹlẹ kẹ minji mẹ ḅuu apụ ma mie à kẹ ị́ ḍụa-ḅọrọma tẹ Midiyanị ḅẹ apụ ma kẹ ị́ ḅara-ḅio ḅụ ị́ pịrị ḅarịye; anịsakị ye osi apụ ma mamgba ọrụḅọ-ọrụḅọ so amịna ama mu.”

⁸ Anieḅụ ọ̀ nwẹnị tomi ma ajongo ma na, ịna ọdụ ma na ọkị ịna aḅara ḅụ; tẹ ọ̀ nwẹnị Izirẹlị ḅụ kirikọn-apụ mamgba ọrụḅọ-ọrụḅọ kẹ ori akpụrụ-warị fịrịma; kụma nwẹnị kịnị jeia asi ma kẹ wẹrị; anịsakị Midiyanị ḅẹ akpụrụ-warị mẹ tụndụ ogboku mẹ ḅụ ịna suku-ḅio emi.

⁹ Anị gbọrụ ḍin mẹ ḅụ KỊNỊNYANAḄỌ ḅe nwẹnị ọ̀ ḅẹẹ, “Saakịị, tẹ ideri-mu owu kẹ akpụrụ-warị mẹ pakaa; kẹ gotẹ ọkọ ḅẹẹarị, arị anị kẹ ị́ ḅara-ḅio ḅụ ị́ pịrị tẹ.

¹⁰ Kụma ideri-mu ị́ ḅalafamarị ḅẹḅẹ, ị́ fịrịmẹnjịḅọ Pura kẹ ị́ ḅụụ sụa tẹ ideri akpụrụ-warị mẹ mu.

¹¹ Ị́ ịn ḍukoarị ye naa ḅa, anịtẹso saakị tẹ ideri-mu owu kẹ ọmụ-ogbo mẹ paka ḅẹ ịnyọ ị́ aḅara ma ḅụ sọ ḅa.” Anịtẹso ọ̀ nwẹnị Pura ọ̀ fịrịmẹnjịḅọ ḅe kẹ ọ̀ ḅụụ sụa tẹ ideri-mu ọmụgbin-apụ ma tẹ akpụrụ-warị mẹ ḅio ḅele tẹ sime anga mẹ ḅụ sime.

¹² Anịsakị Midiyanị ḅẹ apụ ma na, Amalẹkị ḅẹ apụ ma na, Ịrụa-saakịarị-anga ḅẹ apụ mamgba na nwẹnị tomina-ogbo ḅara kẹ igurube sara ḅara kẹ tụndụ ogboku mẹ ḅụ ḅin ma-mu wararị; ịna ike-sụa-anama ma ogbo mẹ onwi tẹ tọrụ akaka ḅụ sara wararị onwin sime-ḅara, gbala kịẹnkịẹn-ọkụ-ofori ḅara.

¹³ Gidiyọnị ḅo la tẹso, ḍikii, gbọrụ owiḅọ ọ̀ kọn gbọrụ ḍawọ ḍuko kẹ ò pembe ḅọ pịrịarị, tẹ ori mẹẹ, “Ḍikii à gbọrụ ḍawọ kọnm; tẹ ḍikii, ḅe sakị ịn bali kẹ mịẹ wararị fịturu gbọrụ kpo ikelekele ḅo Midiyanị ḅẹ apụ ma ogbo ḅio korom, tẹ ḅo akpụrụ-warị mẹ bịan tẹ anị ḅịkịm, tẹ anị nwẹnị akpụrụ-warị mẹ pịkị-tungbo, tẹ anị pụrẹịma anya koro.”

¹⁴ Ò pembe ḅọ ḅe nwẹnị ọ̀ pakịrị, “Miemẹ anie Izirẹlị ḅẹ gbọrụ owiḅọ, Gidiyọnị, Johasị owiḅọtụḅọ ḅe sikima jen gberie-sọ gberie-a; ọ̀ ḅara-ḅio mie Tamụnọ Midiyanị na, ọmụ-ogbo mẹmgba na kẹ suu tẹ ye.”

¹⁵ Gidiyọnị ịn ḍukoarị ḍawọ mẹ na, anị fieye na naa tẹso, ọ̀ nwẹnị sunsin Tamụnọ pịrị; tẹ pịkịma so Izirẹlị ḅẹ akpụrụ-warị mẹ mu, tẹ ḅẹẹ, “Ọ́ saakịị, kẹ gotẹ ọkọ ḅẹẹarị, KỊNỊNYANAḄỌ ḅe Midiyanị ọmụ-ogbo mẹ kẹ ọmịna ḅara-ḅio ḅụ ọ́ pịrị tẹẹ.”

¹⁶ Ọ̀ nwẹnị kịnị jeia asi ma kẹ tẹra kpo ḍie, tẹ ọdụ na, ye ḅio ḅụ ofori ajongo ḅio pọnjị tẹ kọrịarị tọnjọ kẹ sụa wararị, ḅẹ ajongo kẹ inimgba aḅara-ḅio sụa fama.

¹⁷ Ọ̀ nwẹnị ịn ḅẹẹ, “Ọmịnị ì ḍikii, tẹ ọkọ mịẹ; à ḅo akpụrụ-warị mẹ akaka la sakị à mịẹ ḅarị ḅara ọmịnị ọkọ mịẹ.

¹⁸ Yẹrị na inima tẹ ị̀ ḅụụ sọ apụ mamgba na ọdụ mẹ ofuro tẹ ḅẹḅẹ, anịtẹrẹmẹ ọmịnị sọ akpụrụ-warị mẹ ḅe anga-anga mamgba ḅụ ọdụ ma ofuroo, tẹ olokuu, ‘Sime KỊNỊNYANAḄỌ ḅe na, Gidiyọnị na pịrịm.’ ”

¹⁹ Anieḅụ Gidiyọnị na inima tẹ ọ̀ ḅụụ sọ kịnị sọnọa si ma na ori na nwẹnị ḅo akpụrụ-warị mẹ akaka la ḍin ogbo ḅụ ḍin-koruapụ paa ḍima tẹ saakị koru tẹso; tẹ ịn nwẹnị ọdụ ma ofuro, tẹ jongo ma tẹ ịna aḅara-ḅio sime ajongo ma fomu-fomu ḅaa.

²⁰ Tẹra akpo ma nwẹnị ọdụ ma ofuro, tẹ jongo ma fomu-fomu ḅaa, nwẹnị ịna ere-ḅara ḅụ pọnjị atọnjọ ma ọlọ, tẹ ịna ama-ḅara kẹ ọdụ ma ọlọ tẹ ofuro ḅẹ ḅara; tẹ ịn nwẹnị oloku, “Sime KỊNỊNYANAḄỌ ḅe na, Gidiyọnị na pịrị gbọrụ okologie!”

²¹ Ini aḅụụ ọrụḅọ-ọrụḅọ amịna sime anga ḅụ sịẹsime akpụrụ-warị mẹ ikelema-korom; tẹ ọmụ-ogbo mẹmgba nwẹnị mangị; ini owu pakama tẹ ḍumo mangị kọnm.

²² Ini ọdụ jeia si ma ofuro tẹso, KỊNỊNYANAḄỌ ḅe nwẹnị inina fịya-a ọmụ-ogbo mẹ mịẹtẹ ọrụḅọ-ọrụḅọ okologie sin mḅọ pembe ḅọ na, ọmụ-ogbo mẹmgba pịrị, tẹ ọmụ-ogbo mẹ nwẹnị ḍumo-mangị kọn Zẹrẹra da-mu ḅụ Bẹtị-sita jụjụ-ḅio la, pịkị Tabatị akaka ḅụ mu Ebẹlị-mẹhola jụjụ-ḅio la.

²³ Ịn nwẹnị Izirẹlịapụ ma sịn pakama-ḅo Nafutali ḅụ na, Asa ḅụ na, Manasẹ mẹmgba na ḅụ, tẹ ịn Midiyanị ḅẹ apụ ma ḍukam.

²⁴ Gidiyọnị oku-mẹnjịapụ kẹ Iferemu tụndụ ọgọnọ ḅẹ opu sịẹ mẹmgba fịrịma ikelemam, ḅẹẹarị, “Ọmịnị ideri-ḅo Midiyanị ḅẹ apụ ma na owu sọọ, tẹ minji ma kọrị-ọkị mu Bẹtị-bara jụjụ-ḅio la, tẹ Jodanị mẹ sọ ọkịị.” Anị ḅara mie ini Iferemu ḅẹ apụ mamgba sịn pakama-ḅo tẹ ịn minji ma kọrị-ọkị mu Bẹtị-bara jụjụ-ḅio la, tẹ Jodanị mẹ sọ ọkị ḅara.

²⁵ Ịn nwẹnị Midiyanị ḅẹ maa sịḅịdapụ Orẹbụ na, Zẹyibu na ọkị; Orẹbụ Ịkụ mẹ ḅụ ini Orẹbụ ḅaam, tẹ Zẹyibu ḅẹ iru mịẹ anga mẹ ḅụ, ịn Midiyanị ḅẹ apụ ḍukarị ogbo ḅụ ịn Zẹyibu ḅaam, tẹ ịn nwẹnị Orẹbụ na, Zẹyibu na asịḅị ma ọkị-ḅo Gidiyọnị pịrị Jodanị mẹ saḅa anga ḅụ.