Ḅẹrẹkọn-apụ 6 - FỊAFỊA BAỊBỤLỤ

Gidiyọnị

¹ Izirẹlịapụ ma si kẹ KỊNỊNYANAḄỌ ḅe mịẹm, tẹ ò nwẹnị sọnọma akụra kẹ ịn kẹ Midiyanị ḅara-ḅio su tẹ ịn kụrọ ḅara kẹ ini na mịẹ.

² Midiyanị ḅara kụrọ Izirẹlị ḅara nẹngịm; tẹ Midiyanị ḅẹ apụ ma gotẹ Izirẹlịapụ ma ịḅụkụ ma tẹ tụndụ ma ḅụ simearị aị ma na, fukuru ma na, ḅụụ ḅọị kụrọ-kụrọtẹ ayọ mịẹ ịna aḅụụ pịrịm.

³ Anị kẹ gotẹ ọkọ mịẹarị, Izirẹlịapụ ma sịnmgbọlị ḍiḅi sakị, ḍiḅi sakị Midiyanị ḅẹ apụ na, Amalẹkị ḅẹ apụ na, Ịrụa-saakịarị-anga ḅẹ apụ ma na ḅo, ḅo tẹ owu kẹ ịn paka ḅa.

⁴ In ḅo akpụrụ-warị pike in ẹngbẹsẹ tẹ kiri mẹ ḅio paka aị ma ḅaa ma-mu Gaza akaka sime jụjụ-ḅio la ḅa, tẹ anana-o, pootẹ-nambulo-o, anịanịa yedogi-nama sọ kọnma tẹ ịn kẹ anga ḅịa Izirẹlị ḅụ.

⁵ Kẹ gotẹ ọkọ ḅẹẹarị, ini ịna opu anama ma na, ịna akpụrụ-awarị ma na, kẹ ḅo ḅarị ḅara kịẹn-ḅịḅị ḅụ igurube ḅo ḅara; ini na, ini ike-sụa-anama ma na kịẹnkịẹn-ọkụ-ofori; anị ḅara ḅụ ini ḅẹ sọ ḅo ḅụ ịn kiri mẹ gulugulumam.

⁶ Midiyanị gotẹ Izirẹlị ḅo iderima lama; tẹ Izirẹlịapụ ma nwẹnị ḅarasụa gotẹ owu KỊNỊNYANAḄỌ ḅe pịrị.

⁷ Izirẹlịapụ ma Midiyanị ḅẹ apụ ma gotẹ owu KỊNỊNYANAḄỌ ḅe pịrị tẹso,

⁸ KỊNỊNYANAḄỌ ḅe nwẹnị gbọrụ ịkịankoroḅọ kẹ Izirẹlịapụ ma fịrịma; tẹ ọ̀ nwẹnị ịn ḅẹẹ, “Mie KỊNỊNYANAḄỌ ḅe ḍuko yee, Izirẹlịapụ tẹkẹarị Tamụnọ ḅe: àrị Ijiputi ḅụ ọ́ ḅọrọma ḅom, ọmịnị omoni-sọ anga mẹ ḅio ọ́ pakama-ḅom,

⁹ tẹ Ijiputi-ḅẹ-apụ ma ḅara mẹ ḅụ na, inima tẹ ó ponoma apụ mamgba ḅara na ḅụ ọ́ ḍụa-ḅọrọmam, tẹ ọmịna tọrọkọ in dee pakama, tẹ ịna ama mẹ kẹ ọ́ pịrịm.

¹⁰ À nwẹnị ọ́ ḅẹẹ, ‘Yẹrị anie KỊNỊNYANAḄỌ ọmịna Tamụnọ ḅee; ọ́ mangịma kẹ Amọrayịtị apụ ma inima tẹ ọmịnị ama ḅio angarị apụ ma oru-atamụnọ ma pịrị ma.’ Kụma ọmịnị ị̀ pọkọ poki-a.”

¹¹ Mịọkụ KỊNỊNYANAḄỌ ḅe enjẹlị ḅe ḅo Ọfara ḅụ ịn kẹ oku nwẹn-sịn opu sịn mẹ tẹ sime Johasị Abiyeza ḅẹ ḅọ ḅe pịrị ye mẹ suku lẹgị-simem, ori owiḅọtụḅọ Gidiyọnị kẹ Midiyanị ḅẹ apụ ma ḅọịma ḅara ḅụ iru mịẹ anga mẹ ḅụ ịn kẹ witi sịn mbịaka pembe sịnmgbọlị ma fomu-fomu sararị ogbo.

¹² KỊNỊNYANAḄỌ ḅe enjẹlị ḅe nwẹnị ḅụụ pakama ò ḍie tẹ ọ̀ ḅẹẹ, “KỊNỊNYANAḄỌ ḅe í ịna emii, ị́yẹrị ḅiokpọtẹ ọmụgbin ḅara-ḅaatẹ opu tomḅọ.”

¹³ Gidiyọnị nwẹnị ọ̀ ḅẹẹ, “Àrị ị́ tẹkẹm, sịḅịdaḅọ, KỊNỊNYANAḄỌ ḅe wamịnị na emi nwẹn ḅẹẹ kụma, mie mẹmgba tiegotẹ ḅo wamịna ḅụụ pakaarị. Ndẹẹ ọ̀ ḅụụ-gbiripuma amịẹaị ma tẹ wamịna ḍapụ ma ḍuko wa pịrị-pịrị aị ma, tẹ ḅẹẹm, Ijiputi ḅụ wa ọkị-ḅo ḅọ ḅe KỊNỊNYANAḄỌ ḅe ori-a? Kụma mịọkụ KỊNỊNYANAḄỌ ḅe wa kẹ wakị nguma tẹ, wa kẹ Midiyanị ḅara-ḅio suu tẹ.”

¹⁴ KỊNỊNYANAḄỌ ḅe nwẹnị vuunma pịkị ọ̀ da tẹ ọ̀ ḅẹẹ, “Mie í gburo-gburotẹ ịnyọ mẹ ḅụ muu, tẹ Midiyanị ḅara ḅụ Izirẹlị ḍụa-ḅọrọmaa. Fịrị mẹ kẹ ị́ fịrịmarị ḅọ ḅe yẹrị-yaa?”

¹⁵ Gidiyọnị nwẹnị ọ̀ ḅẹẹ, “Àrị ị́ tẹkẹm KỊNỊNYANAḄỌ, à tọ-ḅara kẹ inetẹ Izirẹlị ḍụa-ḅọrọma ḅe? Ḍikii, Manasẹ furo ḅẹ ì kpoo mẹ anie ịnyọ nyana-a tẹịn kpọ, anịsakị ì furo ḅụ yẹrị pịkị ịrụ tẹịnm.”

¹⁶ KỊNỊNYANAḄỌ ḅe nwẹnị ọ̀ ḅẹẹ, “Àrị ị́nịna sime ḅa, anịsakị gbọrụ tomḅọ ḅaa ḅara ị́ nwẹn kẹ Midiyanị ḅẹ apụ ma ḅaa ḅa.”

¹⁷ Gidiyọnị nwẹnị ọ̀ ḅẹẹ, “Mịọkụ arị ị́ ḅụụ ḍiki-ḅụụjịrị ḍọkị-ẹrị tẹ ḅẹḅẹ, gbọrụ elekima kẹ ị̀ ḍie mịnẹ ị̀nịna ẹkwẹn-arị ḅọ ḅe ị́yẹrị.

¹⁸ Àrị ị́ tẹkẹm, mịanga so ma nwenii àrị ị́ ḍọkụma-ḅo tẹ à kẹ ị́ pịrị ḅẹ ye pakama-ḅo tẹ kẹ ị́ tọrọkọ koroma.” Ọ̀ nwẹnị ḅẹẹ, “À sime nwenii ị́ pịkịma-ḅo ḅa.”

¹⁹ Anieḅụ Gidiyọnị so ọ̀ warị ḅio mu tẹ asambịrịma gbọrụ kala oḅori ḅaa tẹ sọọ, tẹ fịturu sunmaye ofori ḅara kẹ fịturu ye fịlawa gbọrụ kala akpa kẹ kịkị yem; ọ̀ nwẹnị fịye mẹ kẹ gbọrụ kana ḅio sụa tẹ ọdụ fụlọ mẹ kẹ gbọrụ ḅẹlẹ ḅio sụa tẹ arị kẹ oku nwẹn-sịn opu sịn mẹ suku ḅo tẹ kẹ ọ̀ pịrịm.

²⁰ Tamụnọ enjẹlị ḅe nwẹnị ọ̀ ḅẹẹ “Nama mẹ na, fịturu sunmaye sọ-a akịkị ma na ọkị tẹ kẹ mị ịkụ mẹ ọgọnọ gbana, tẹ ọḍụ fụlọ mẹ kẹ arị ọgọnọ sara.” Tẹ ọ̀ nwẹnị ọkọ mịẹ.

²¹ Anịtẹso KỊNỊNYANAḄỌ ḅe enjẹlị ḅe nwẹnị ọ̀ ḅara ḅio sime mkpara mẹ ḅịḅị mẹ sụn-pakama mu nama mẹ na, fịturu sunmaye sọ-a akịkị ma na lama; tẹ fịnị nwẹnị ịkụ mẹ ḅụ kọrị paka-ḅo meni mẹ na, sunmaye sọ-a akịkị ma na dọkịma fama, tẹ KỊNỊNYANAḄỌ ḅe enjẹlị ḅe nwẹnị ọ̀ tọrụ-ogbo ḅụ ịmaịn.

²² Anịtẹrẹmẹ Gidiyọnị tọnma nimim mịnẹ ori anie KỊNỊNYANAḄỌ ḅe enjẹlị ḅe; tẹ Gidiyọnị nwẹnị ḅẹẹ, “yei KỊNỊNYANA-TAMỤNỌ, Ewuu! Kẹ gotẹ ọkọ ḅẹẹarị, mẹkịnẹ mie à tọrụ kẹ KỊNỊNYANAḄỌ ḅe enjẹlị ḅe na ẹrịya-ẹrịya tẹ yee!”

²³ Kụma KỊNỊNYANAḄỌ ḅe nwẹnị ọ̀ ḅẹẹ “Dein sime ị́ pịrịị; ḅalafa ma, ị́ fịị ḅịa.”

²⁴ Anịtẹso Gidiyọnị nwẹnị anịjụ gbọrụ agbamịẹ-anga nama KỊNỊNYANAḄỌ ḅe pịrị, tẹ ẹrẹ kẹ anị kuro — KỊNỊNYANAḄỌ Ḅe Anie Dein. Ọkị ḅo mịmgba la anị paa sịẹsime wararị Ọfara sime Abiyeza ḅẹ apụ ma pịrị anga mẹ ḅụ.

²⁵ KỊNỊNYANAḄỌ ḅe nwẹnị anị ḍin mẹ ḅụ ọ̀ ḅẹẹ, “Ị́ ḍa owi-nambulo ḅe ọkịị, pịkị sọnọma akụra sịḅị ḅụ ḅọrọtẹ nambulo kẹ maaịn karama ọkịị, tẹ Balị ebeka mẹ tẹ ị́ ḍa nyana wararị ye mẹ kan sara, tẹ Asịra fụḅara mẹ tẹ anị akaka simearị ye mẹ pẹlẹ-gbin.

²⁶ Anịsakị mịanga kụrọ-tẹịn anga mẹ ḅẹ sịḅị ọgọnọ ḅụ ḍụḅarị kẹ ọrụtọn-tọn arị sime na-iḅi ḅara mẹ koroma tẹ kẹ gbọrụ agbamịẹ-anga nama kẹ KỊNỊNYANAḄỌ ị́ Tamụnọ ḅe pịrị; anịtẹrẹmẹ maaịn karama nambulo ḅe ọkị tẹ Asịra oru-fụḅara mẹ tẹ ị́ pẹlẹ-gbin ḅarịye mẹ kẹ fịnị apakịrị sọma tẹ anị kẹ dọkịma-agba mịẹ.”

²⁷ Anieḅụ Gidiyọnị nwẹnị ori afịrịmẹnjịapụ ḅụ oyi owiapụ ọkị, tẹ KỊNỊNYANAḄỌ ḅe ḍuko ọ̀ pịrị ḅara mịẹm; kụma eneḅaka ḅụ anị mịẹ mẹ ori ọ̀ paka-furo na, ama mẹ ḅẹ owiapụ ma na ḍiki-ḅalafa ḅara ḅakam ẹrẹsị, ò ḍin ḅụ anị mịẹm.

²⁸ Ama mẹ ḅẹ owiapụ ma ḅaso ḅio saakị tẹso, ịn nwẹnị ḍọkị-ẹrị mịnẹ Balị ebeka mẹ kaan-sara wararị, anịsakị anị akaka sime Asịra oru-fụḅara mẹ pẹlẹ koro wararị, tẹ maaịn karama owi-nambulo ḅe ịn nwẹn kẹ agba mịẹ wararị agbamịẹ-anga mẹ tẹ nama tẹ ye mẹ ọgọnọ.

²⁹ Ịn nwẹnị jụmọ-jụmọ gbela, “Tụḅọ miemẹ mịẹ?” Ịn ḍọkị tẹ gbela fama tẹso, ịn nwẹnị ḅẹẹ, “Gidiyọnị, Johasị owiḅọtụḅọ ḅe mie miemẹ mịẹ yee.”

³⁰ Anịtẹso ama mẹ ḅẹ owiapụ ma nwẹnị Johasị ḅẹ, “Ị́ owiḅọtụḅọ ḅe ọkị-ḅo, mịẹtẹ ọ̀ fịị ḅẹ ḅara, kẹ gotẹ ọkọ ḅẹẹarị, ò Balị ebeka mẹ sukuruma-gbin, tẹ Asịra fụḅara mẹ tẹ anị akaka sime ye mẹ pẹlẹ-gbin tẹ.”

³¹ Kụma Johasị nwẹnị inimgba tẹ ọ̀ da-paka ḅẹ ḅụụ tẹlẹma apụ ma ḅẹẹ, “Ọ́ ḅẹrẹ ịgbanị Balị pịrị ḅẹ? Anịanịa ọ́ mịẹye ḅụ sịẹ ọ̀ pịrị ḅẹ? Ḅẹḅọ-ḅẹḅọ tẹ ḅẹrẹ ịgbanị ọ̀ pịrị-ḅọ pịrị-ḅọ ini mḅọ ḅaa ḅa dede-ḅio mẹ ḅụ. Ori nwẹnị tamụnọ ḅẹḅẹ yee ọ̀ ḅẹrẹ ịgbanị amịna ḅụụ pịrị, kẹ gotẹ ọkọ ḅẹẹarị, ori ebeka mie ịn sukuruma-gbin ye.”

³² Anịẹrẹsị anị ene mẹ ḅụ ọkị mu ịn nwẹnị Jerubalị kẹ ò kuro, aniemẹ fiearị mịnẹ, “Yee Balị ọ̀ ḅụụ na ọ̀ ḅẹrẹ ịgbanị,” ori ori ebeka sukuruma-gbin ye ẹrẹsị.

³³ Anịtẹso Midiyanị ḅẹ apụ mamgba na, Amalẹkị ḅẹ apụ ma na, pịkị Ịrụa-saakịarị-anga ḅẹ apụ ma na nwẹnị kobiri ḅo gboloma, tẹ Jodanị mẹ saḅa-koro ḅụ Jẹzirili Tụndụ Ogboku mẹ ḅụ akpụrụ-warị pike tẹ sime.

³⁴ Kụma KỊNỊNYANAḄỌ ḅe kụrọ mẹ ḅo Gidiyọnị ḅụụ sọm, tẹ ori ọdụ mẹ ofurom, kẹ Abiyeza ḅẹ apụ ma sịn pakama-ḅo tẹ ini ò ḍuka mu.

³⁵ Ori oku-mẹnjịapụ kẹ Manasẹ mẹmgba fịrịma ikelemam tẹ ini ini sọ sịn pakama-ḅom tẹ ịn sọ tẹ ò ḍuka-mu ḅẹ ḅara. Ori oku-mẹnjịapụ kẹ Asa na, Zẹbulọnị na, Nafutali na fịrịmam; tẹ ịn nwẹnị ịwọ ini na bịama ḅẹ mu.

³⁶ Anịtẹso Gidiyọnị nwẹnị Tamụnọ ḅẹẹ, “Ị́ wẹrịtẹ ḍuko tẹ ḅara, ị̀ ḅara ḅụ ị́ Izirẹlị ḍụa-ḅọrọma ḅarị ḅẹḅẹ,

³⁷ ḍikii, à nama isuke kẹ ḍori ḅịtẹ kẹ mgbọlị sẹlẹ kiri mẹ ḅụ anyarị, igirigi nwẹnị nama isuke kẹ ḍori ḅịtẹ mẹ ngẹrị ọgọnọ sara, tẹ kiri mẹmgba nwẹnị samụnọ wararị ḅẹḅẹ, anịrẹ à nimi ḅa mịnẹ ị̀ ḅara ḅụ ị́ Izirẹlị ḍụa-ḅọrọma ḅa ị́ wẹrịtẹ ḍuko tẹ ḅara.”

³⁸ Anị nwẹnị ọkọ paka. Jen ene-ḅaa ḅẹ dede-ḅio ḅụ ọ̀ saakị tẹ nama isuke kẹ ḍori ḅịtẹ mẹ inwima tẹso, ọ̀ nwẹnị nama isuke kẹ ḍori ḅịtẹ mẹ ḅụ iḅiọkụ igirigi inwima pakama-ḅo anị ḅio paka-ḅo minji nwẹnị gbọrụ bọlị ḅinma.

³⁹ Anịtẹso Gidiyọnị nwẹnị Tamụnọ ḅẹẹ, “Yee ị́ ịganị kọrị ị̀ ọgọnọ sarama, yee à pịkị paa mị gbọrụ sakị mẹ kẹ ẹkwẹn; arị ị́ tẹkẹm, yee à pịkị nama isuke kẹ ḍori ḅịtẹ mẹ kẹ mị gbọrụ sakị mẹ ngẹrị ḅụ daaḍiki arị ị́ tẹkẹm, yee nama isuke kẹ ḍori ḅịtẹ mẹ samụnọ tẹ yee igirigi kiri mẹmgba pisima fama.”

⁴⁰ Anị ḍin mẹ ḅụ Tamụnọ nwẹnị ọkọ mịẹ, nama isuke kẹ ḍori ḅịtẹ mẹ ngẹrị ọgọnọ samụnọm, tẹ igirigi kiri mẹmgba pisima famam.