Ḅẹrẹkọn-apụ 5 - FỊAFỊA BAỊBỤLỤ

Dibora Na Barakị Na Nume-su Tamụnọ Bomam.

¹ Anịtẹso Dibora na, Barakị Abinohamụ owiḅọtụḅọ ḅe na anị ene mẹ ḅụ nume-su Tamụnọ bomam:

² Ọ́ KỊNỊNYANAḄỌ ḅe bomaa! Izirẹlị ḅẹ tọrọkọ-tarịapụ ma tọrọkọ-tarịm, tomi ma ḅarana ịna aḅụụ pakama-ḅom.

³ Ọ́ naa, ọmịnị amadapụ! Ó ḅeri-tokolomaa, ọmịnị sịḅịdapụ! À nume su KỊNỊNYANAḄỌ ḅe pịrị ḅa, àrị akwa farị KỊNỊNYANAḄỌ ḅe pịrị ḅa, ori Izirẹlịapụ tẹkẹarị Tamụnọ ḅe.

⁴ KỊNỊNYANAḄỌ, ị́yẹrị ḅe Seya ḅụ saakị mu sakị, inn, ị́ Idọmụ ye-yọ ḅụ kụrọ ḅụọ kẹ mẹnjị sakị, tomikiri mẹ ḅalafa ḅụ jikem, tẹ So ma eene koromam, inn, kpiti So-tọrụ ma ḅụ minji saram.

⁵ Tụndụ ma sịkịrị-faam, KỊNỊNYANAḄỌ ḅe tọrọkọ ḅụ, Sayịnayị sọ jikem, KỊNỊNYANAḄỌ Izirẹlịapụ tẹkẹarị Tamụnọ ḅe tọrọkọ ḅụ.

⁶ Samuga, Hamatị owiḅọtụḅọ ḅe ene ma na, Jahẹlị ene ma na ḅụ, tomi ḅarị opu-etela ma mẹnjị-na-koro-na-a, tẹ ye-muapụ ḅọị-etela ma ḍọkị mẹnjịm.

⁷ Kala-ama ma ḅio tomi gbiin-koro simem, Izirẹlị ḅụ in gbiin-koro simem nwenii yẹrị Dibora saakịm, iyingiḅọ ḅara à nwẹn kẹ Izirẹlị ḅụ saakịm.

⁸ Ini oru-atamụnọ sẹlẹ-ọkị sakị, anị sakị ọmụ korom ogigo-aḅọkọ ma ḅụ. Izirẹlị ḅẹ kịnị sọnọa puku ogbo-ḅio (40,000) ḅụ kịnị ekpeke anịanịa sụḅa ẹrị-a!

⁹ Ị̀ tẹmẹ paka-so Izirẹlị ḅẹ ḅẹrẹtọn-apụ ma ḍọkụma-mum, inima tẹ ḅarana tomi ma ogbo-ḅio amịna aḅụụ pakama-ḅo apụ ma, Ọ́ KỊNỊNYANAḄỌ ḅe bomaa.

¹⁰ Anị gboloma ye ḍukoo, ọmịnị ma tẹ pịna-pịna yedogi-anama ọgọnọ dọkụarị apụ, ọmịnị ma tẹ yela kiri-dẹẹ-aị ọgọnọ lẹgịarị apụ, pịkị ọmịnị ma tẹ etela mẹ ḅụ mẹnjịarị apụ.

¹¹ Ó pokii! Minji ḍuu anga ma ḅụ akwa-farịapụ KỊNỊNYANAḄỌ ḅe owu-ḅara-iḅi mẹ ḍuko siin ḍukoarị, Izirẹlịapụ ma owu-ḅara-iḅi ma! Anịtẹso KỊNỊNYANAḄỌ ḅe atomi ma mẹnjị ogigo-aḅọkọ ma mum.

¹² Saakịị, saakịị, Dibora! Saakị, saakị tẹ nume suu! Saakịị, Barakị Abinohamụ owiḅọtụḅọ, kun-ḅara ḅio sime apụ ma dogi-soo!

¹³ Anịtẹso opu atomi ma ḅẹ kọn apụ ma mẹnjị iderim, KỊNỊNYANAḄỌ ḅe atomi ma ò gotẹ mẹnjị iderim, opu apụ ma na owu-sọ ḅẹ ḅara.

¹⁴ Iferemu ḅụ ịn saakị mẹnjị Amalẹkị sọ-mum, ị́yẹrị Benijamịnị na ị́ amịnapụ na ḍukamẹnjịarị; Mahaka ḅụ ḅẹrẹtọn-apụ mẹnjị ideri-ḅom. Anịsakị Zẹbulọnị ḅụ anị apụ ma tẹ tọrọkọ-tarịḅọ ḅe mkpara mẹ dogiarị apụ ma ḅom.

¹⁵ Ịsaka sịḅịdapụ ma Dibora na simem, Barakị sọ árị na simem; tẹ ịn fọnya mangị tụndụ-ogboku mẹ mum. Kụma Rubẹnị furo mẹ ogbo-ḅio ḅụ ḅio ḅii ḅakam.

¹⁶ Í tiegotẹ anana-ogbo ma ḅio simearị, anana-ogbo ma sịn ḅẹ ḅara poki mụnọọ? Rubẹnị furo mẹ ogbo-ḅio ḅụ ḅio ḅii ḅakam.

¹⁷ Gadi Jodanị mẹ ọgọnọ-jụ simem; anịsakị Danị, ò tiegotẹ opu onwi-arụ ma na sime? Asa dụmma opu tọrụ mẹ agara paa lẹgị simem, tẹ ọ̀ ḅụọ sịẹma akiri ma ḅụ gbene-sime wararị.

¹⁸ Zẹbulọnị tomi anie ịna aḍumo sịkị fịị pịrị apụ; Nafutali apụ sọ ọkọ mịẹm, ọmụ-siri mẹ ḅụ.

¹⁹ Amadapụ ma ḅom tẹ owu sọm, Tanakị ḅụ Mẹgido ḅẹ aminji ma akaka; anịtẹso Kenanị ḅẹ amadapụ ma owu sọm, kụma ini ọmụ ḅio ḅo seleḅa dogi-so-a.

²⁰ Lolia ma So-ḅio sime tẹ owu sọm; ịna mẹnjị etela ma ḅụ ịn Sisera na owu sọm.

²¹ Kisiyọnị ofion-minji mẹ in ọfịn som; seri ḅoarị ofion-minji mẹ, Kisiyọnị ofion-minji mẹ. Mẹnjị muu, ị̀ tẹmẹẹ; kụrọ kẹ mẹnjị muu!

²² Anịtẹso asụ ma ịna aḅụọ ḅẹ okuro ma kẹ ḍosi-ḍosi kiri mẹ tẹịn-tẹịn fiema ma-ḅom.

²³ KỊNỊNYANAḄỌ ḅe enjẹlị mẹẹ: Mirọzị worii, akụ ḅara kẹ anị ḅio sime apụ worii, kẹ gotẹ ọkọ ḅẹẹarị, ịn ḅo ḅarasụa KỊNỊNYANAḄỌ ḅe pịrị-a, ịn ḅarasụa KỊNỊNYANAḄỌ ḅe pịrị tẹ opu-apụ ma na owu sọ-a.

²⁴ Ereme ḅụ boma tẹịn ḅọ anie Jehuyẹlị, Hẹba, Kenayịtị ḅọ ḅe ta ma, Akpụrụ-warị ḅio angarị ereme ḅụ boma tẹịn ḅọ

²⁵ Ò minji ḅiim, tẹ árị ndo-minji kẹ ọ̀ pịrịm, opu-apụ bọlị ḅio á kpootẹ gilogilo ndo-minji ọkị-ḅo ọ̀ pịrịm.

²⁶ Á gbọrụ ḅara-ḅio akpụrụ-warị dọlịa ọkịm, tẹ árị ama-ḅara kẹ namakọrịapụ amana ọlọm; á gbọrụ ḅara kẹ Sisera ḅakụm, árị ọ̀ sịḅị tolum, árị ọ̀ fụḅara kanm, tẹ anị ḅakụ tolumam.

²⁷ Ọ̀ wẹrẹwẹrẹ saram, ọ̀ ḅịkịm, ori á ḅụọ suku ḅụ paa emii; á ḅụọ-suku ḅụ ọ̀ wẹrẹwẹrẹ saram, ọ̀ ḅịkịm; ọ̀ wẹrẹwẹrẹ sara anga, anịjụ ọ̀ ḅịkị fịịm.

²⁸ Ikiḅa-ḅọkọ ḅụ á toluma ḍikim, Sisera iyingi ma kangịra mẹ ḅụ ḍiki tẹ olokum: “Ò kirimẹnjị-ọmụarụ mẹ tiegotẹ pịkịma-ḅo ḅụ mị ḅara kẹ alamarị? Ò kirimẹnjị-ọmụarụ ḅụọ fie mẹ tiegotẹ sime alamarị?”

²⁹ Á ye-nimi tẹịn ereme pakịrịm, ẹn-ẹn, á miemẹ ḍuko, sin ḍuko á ḅụụ pịrịm.

³⁰ In ọmụ ḅio fọịn ḅo ye mẹ dogi-dogi ḍie-a? Gbọrụ ẹrẹḅọtụḅọ anịanịa maa apụ sime owiḅọ goḅọ-goḅọ pịrịm; sime Sisera pịrị ọmụ ḅio fọịn ḅo ḅirimatẹ tọrụ iḅi aḅịtẹ, ọmụ ḅio ḅo ḅirimatẹ tọrụ-tọrụ kẹ ḅaa iḅi aḅịtẹ, tọrụ-tọrụ kẹ ḅaa ḅirimatẹ ḅịtẹ maa awarị sime ị̀ kọngọ pịrị?

³¹ Yei KỊNỊNYANAḄỌ ị́nịna fịya-a apụ mamgba ọkọ kẹ fịị faa! Kụma ị́ ikiapụ ma otuka mẹ amịna kụrọ kẹ puu-paka ḅara kẹ ḅịya pakaa. Ama mẹ nwẹnị kụra amesi kẹ ịnyọsara nyana.