Ḅẹrẹkọn-apụ 4 - FỊAFỊA BAỊBỤLỤ

Dibora Na Barakị Na Kenanị Amadaḅọ Sisera Nẹngịmam.

¹ Ehudu fịị tẹso, Izirẹlịapụ ma pịkị siin si kẹ KỊNỊNYANAḄỌ ḅe mịẹm.

² Anie ḅụ KỊNỊNYANAḄỌ ḅe mịẹtẹ Jabini, Kenanị ḅe amadaḅọ ḅe tẹ Hazọ ḅụ sime tẹ ama-da ḅọ ḅe ịn nẹngịmam. Ori ọmụ-ogbo ḅẹ ḅẹrẹtọnḅọ ḅe anie Sisera, oriḅe tẹ Harosẹtị-agoyimụ ḅụ sime ḅọ ḅe.

³ Anịtẹso Izirẹlịapụ ma nwẹnị ḅarasụa gotẹ owu KỊNỊNYANAḄỌ ḅe pịrị: gbala ori ikulele kirimẹnjị-ọmụarụ maa ẹndẹ sọnọa si finji (900) nyanam, tẹ guda-guda ḅara kẹ si kụra ḅụ ịn ponomam ẹrẹsị.

⁴ Mị sakị mẹ ḅụ, gbọrụ ẹrẹḅọ simem. Árị ẹrẹ Dibora, ịkịankoro-ẹrẹḅọ; á di ẹrẹ Lapidọtị tẹ á ḅẹrẹkọn Izirẹlị pịrị simem.

⁵ Iferemu tụndụ ọgọnọ ḅẹ sịẹ mẹ ḅio, Rama na Bẹtẹlị na ogboku ịn kẹ Dibora Eneme sịn anga suku-ḅio mie á lẹgị-lẹgị ye; tẹ Izirẹlịapụ ma ḅẹrẹkọn gotẹ á dama-ḅo ḅo yee.

⁶ Gbọrụ ene ḅụ, á nwẹnị fịrịma ịn mu Barakị, Abinohamụ owiḅọtụḅọ ḅe sịn ḅoo. Oriḅe anie Nafutali ḅẹ ḅọ Kẹdẹsị ama ḅụ. Ò ḅo tẹso á nwẹnị ọ̀ ḅẹẹ, “KỊNỊNYANAḄỌ Izirẹlịapụ tẹkẹarị Tamụnọ ḅe tọn ị́ pịrịarị, ‘Muu, Nafutali furo na Zẹbulọnị furo na ḅụ kịnị gbọrụ puku, sọnọ ẹndẹ finji (10,000) ọkị, tẹ ị́ atomi kobiri Tabọ Tụndụ ḅụ.

⁷ Anịsakị à Sisera, Jabini ọmụ-ogbo mẹ ḅẹ ọmụ-alapụ ma sịḅịdaḅọ ḅe na ò kirimẹnjị-ọmụarụ ma na, ori ọmụgbin-apụ ogbo-ogbo ma na, kẹ ọ̀ ḅụụ sụa nụnụ pakama-ḅo ḅa, ori ị́nịna bịama ḅẹ ḅara Kisiyọnị Tọrụ mẹ akaka, anịsakị arị ọ̀ kẹ ị́ ḅara-ḅio ḅụ ị́ pịrị ḅa.’ ”

⁸ Barakị nwẹnị á pakịrị, “Ị́ ị̀ ḅụụ so tẹ mu ḅarị ḅẹḅẹ, à mu ḅa; kụma ị́ ị̀ ḅụụ sọ tẹ mu ḅịa ḅẹḅẹ, à mu ḅịa.”

⁹ Á nwẹnị ḅẹẹ, “Tụkụma ḅara ḅụ arị ị́ ḅụụ sọ tẹ mu ḅa; etela mẹ tẹ í muarị anga mẹ, anị, sime-ḅara, sime-ḅara ebube mẹ ḅarị í nye sọ ḅịa, kẹ gotẹ ọkọ ḅẹẹarị, KỊNỊNYANAḄỌ ḅe Sisera kẹ ẹrẹḅọ ḅara-ḅio dẹrịma ḅa.” Anịtẹso Dibora virikama saakị tẹ Barakị ḅụụ sọ tẹ Kẹdẹsị mum.

¹⁰ Tẹ Barakị nwẹnị Zẹbulọnị na, Nafutali na sịn Kẹdẹsị ḅo; tẹ kịnị gbọrụ puku na sọnọa ẹndẹ finji (10,000) nwẹnị ò ḍuka mu; tẹ Dibora ọ̀ ḅụụ sọ tẹ mum.

¹¹ Mịọkụ Hẹba, Keni ḅọ ḅe ọ̀ ḅụụ puu-sikima tẹ Keni apụ, Mozizi fụanḅọ ọgọḅọ Hobabu ḅụụ paka-ḅo apụ ma ḅụ, tẹ ori akpụrụ-warị ḅelema mu, Zayananimu ḅio ịn kẹ oku nwẹn-sịn opu sịn mẹ jụjụ-ḅio pikem, anịjụ mẹ tẹ Kẹdẹsị na kpeki wararị anga mẹ.

¹² Ịn ḍuko Sisera pịrịm mịnẹ Barakị Abinomụ owiḅọtụḅọ ḅe Tabọ Tụndụ mu tẹ ḅẹẹ tẹso,

¹³ Sisera nwẹnị ori ikulele kirimẹnjị-ọmụarụ mamgba, maa ẹndẹ sọnọa si finji (900) ma na, Arosẹtị Agoyimu ḅụ mu Kisiyọnị Tọrụ mẹ la ḅụ ori atomi ma tẹ ori na simearị apụ mamgba na sịn pakama-ḅo.

¹⁴ Anịtẹso Dibora nwẹnị Barakị ḅẹẹ, “Saakịị! Kẹ gotẹ ọkọ ḅẹẹarị, mịmgba anie ene mẹ tẹ KỊNỊNYANAḄỌ ḅe mịẹtẹ ị́ Sisera nẹngịma ḅa ene mẹ. Muu, KỊNỊNYANAḄỌ ḅe ị́ tọrọkọ tarị paka-muarị!” Anieḅụ kịnị gbọrụ puku sọnọa ẹndẹ finji (10,000) ma Tabọ Tụndụ ḅụ Barakị ḅụụ sọ tẹ ò ḍuka ideri-ḅom.

¹⁵ Barakị owu mẹ saakị sakị, KỊNỊNYANAḄỌ ḅe nwẹnị Sisera na, ò kirimẹnjị-ọmụarụ mamgba na, ori ọmụ-ogbo mẹmgba na tọrụ-ḅalaḅalama. Sisera nwẹnị ò kirimẹnjị-ọmụarụ mẹ ḅio koro tẹ ḅụọ kẹ ḍumo-mangị kọnma so.

¹⁶ Barakị kirimẹnjị-ọmụarụ ma na, ọmụ-ogbo mẹ na ḍuka mu Arosẹtị Agoyimu lam, tẹ Sisera ọmụ-ogbo mẹmgba ọmụ mẹ ḅio fị famam, kpọkpọ gbọrụ tomḅọ sọ kọn-a.

Jehuyẹlị Sisera Ḅaam

¹⁷ Kụma Sisera ḅụọ kẹ ḍumo-mangị kọnma so mu Hẹba, Kenayịtị ḅọ ḅe ta Jehuyẹlị ma akpụrụ-warị mẹ ḅio sọm; gbala dein Jabini, Hazọ ḅẹ amadaḅọ ḅe na, Hẹba, Kenayịtị ḅọ ḅe warị mẹ na ogboku emi ẹrẹsị.

¹⁸ Jahẹlị nwẹnị Sisera dama-mu tẹ ori na bịama ḅẹ paka-ḅo, tẹ ọ̀ ḅẹẹ, “Ị̀ nyanaḅọ, ḅoo; ị̀ akpụrụ-warị sọ-ḅoo. Gbọrụ ḅalafa sọ nyana ma.” Anieḅụ ọ̀ nwẹnị árị akpụrụ-warị mẹ ḅio sọ-mu, tẹ á nwẹnị asaba-ḅịtẹ kẹ ọ̀ gbaịn.

¹⁹ Ọ̀ nwẹnị á ḅẹẹ, “Àrị ị́ tẹkẹm, minji kalịye kẹ ị̀ pịrị à ḅuu, kẹ gotẹ ọkọ ḅẹẹarị, minji ḅuu ị̀ tarị-ḅaarị.” Anieḅụ á nwẹnị ndo-minji sụa akpa finji tẹ anị kẹ ọ̀ pịrị ḅuu, tẹ pịkị ọ̀ gbaịn.

²⁰ Ọ̀ nwẹnị á ḅẹẹ, “Akpụrụ-warị mẹ ḅọkọ ḅụ sịẹsime, tẹ kịnị ḅo tẹ, ‘mịanga kịnị emi?’ kẹ í gbela-gbela, ḅẹẹ Ẹn-ẹn.”

²¹ Kụma ọ̀ ḅụụ-lọkọ kẹ ḅọlọlọ tẹ gbọrsịḅị mono fa wararị. Jahẹlị Hẹba ta ma nwẹnị ịn kẹ akpụrụ-warị mẹ kpọ kụrọmarị wararị dọlịa na, amana na ọkị á ḅara-ḅio ḅụ, tẹ kẹmẹ-kẹmẹma mẹnjị sọma ọ̀ ḍọkụma-mu, tẹ dọlịa mẹ ḅakụ ọ̀ fụḅara-akaka suu nwenii anị kaan-tolu mu kiri ḅio ḍiḅi. Ọ̀ nwẹnị fịị.

²² Barakị Sisera ḍuka ma-ḅoarị ogbo, Jahẹlị nwẹnị mẹnjị ori na bịama ḅẹ mu tẹ ọ̀ ḅẹẹ, “Ḅoo, anịsakị arị oriḅe tẹ ị́ ḍọkịarị ḅọ ḅe kẹ í ḍie ḅa.” Anieḅụ ori arị akpụrụ-warị ḅio sọ-mum; anịsakị Sisera anịjụ fịtẹ koro-sime wararị, tẹ ịn kẹ akpụrụ-warị mẹ kpọ kụrọmarị dọlịa mẹ paa ọ̀ fụḅara ḅụ emii.

²³ Mị-ḅara mie Tamụnọ anị ene mẹ ḅụ kẹ Jabini, Kenanị ḅẹ amadaḅọ ḅe mịẹtẹ ori Izirẹlịapụ tọrọkọ sịḅị-tuu ḅara.

²⁴ Izirẹlịapụ ma kụrọ tọrọkọ-tọrọkọ mu nwenii ịn Jabini, Kenanị ḅẹ amadaḅọ ḅe ḅaa-gulugulumam.