Ḅẹrẹkọn-apụ 3 - FỊAFỊA BAỊBỤLỤ

Kẹ Izirẹlị Daaḍiki Ḅẹ Kọnma Wararị Opu Asịẹ Ma

¹ Mịọkụ KỊNỊNYANAḄỌ ḅe ja opu asịẹ kọnmam, gbala ọ̀ kẹ Kenanị ḅụ gbiin wararị ọmụ ma ḅẹ gberie-sọ nimi-a ḅẹ Izirẹlịapụ ma daaḍiki ḅẹ ẹrẹsị.

² Anị gotẹ ọkọ mịẹ ye, mịẹtẹ Izirẹlịapụ ma ḅụ ḅụọ-ḅụọ ma ọmụ nwẹn-sịn ye nimi, mịẹtẹ ori ọmụ kẹ jen-a jen-a jene amụ anị nimi-a apụ ma toluma ḅẹ ḅara.

³ Ọ̀ kọnma asịẹ ma anie Filisiteniapụ sọnọa ama ma na, Kenanị ḅẹ apụ ma na, Sayịdọnị ḅẹ apụ ma na, Hivayịtị apụ tẹ Lẹbanọnị tụndụ ọgọnọ sime apụ ma na, Balị-hamọni tụndụ ḅụ ọkị mu mẹnjị Hamatị sọarị ḅọkọ mẹ jụjụ-ḅio la.

⁴ Ịn sime ịn kẹ Izirẹlị daaḍiki pịrịm, kẹ nimi Izirẹlị KỊNỊNYANAḄỌ ḅe tọn aị ma tẹ ò Mozizi ḅụụ ḅụ tọn ịna ḍapụ pịrị aị ma ini ọ̀ ḅịḅị poki ḅarị ḅoto.

⁵ Anieḅụ Izirẹlịapụ ma Kenanị ḅẹ apụ ma na, Itayịti apụ ma na, Amọrayịtị apụ ma na, Pẹrịzayịtị apụ ma na, Hivayịtị apụ ma na, Jebusayịtị apụ ma na ogbo-ḅio angam.

⁶ Ini ịna eremịna-awọmẹ ọkị simem, tẹ ịna soku-ḅẹ eremịna-awọmẹ kẹ ịna owiapụ-awọmẹ pịrị simem; tẹ ịn nwẹnị fịrịmẹnjị ịna oru-atamụnọ ma pịrị.

Ọtụnịyẹlị Izirẹlị ḍụa-ḅọrọmam

⁷ Izirẹlịapụ ma KỊNỊNYANAḄỌ ḅe ḍiki-tọrụ ḅụ siye mịẹm, fịrịmẹnjị-mẹnjị Balị ma na, Asiroti mẹ na pịrị ḅụ KỊNỊNYANAḄỌ ịna Tamụnọ ḅe kẹ ḅioḅọrọmam.

⁸ Ọkọẹrẹsị, KỊNỊNYANAḄỌ ḅe ịganị kẹngẹma Izirẹlị da-pakam, tẹ ọ̀ nwẹnị ịn kẹ Kusani Rusatemu, Mẹsopotemịya ḅẹ amadaḅọ ḅe ḅara-ḅio dẹrịma, tẹ Izirẹlịapụ ma ninea kụra kẹ fịrịmẹnjị Kusani Risatemu pịrịm.

⁹ Kụma Izirẹlịapụ ma owu KỊNỊNYANAḄỌ ḅe pịrị tẹso, KỊNỊNYANAḄỌ ḅe ḍụa-ḅọrọmaḅọ saakị pakama-ḅo Izirẹlịapụ ma pịrịm, ori ḅe tẹ ịn ḍụa ḅọrọma ḅọ ḅe. Ḅieḅe anie Kẹlẹbụ iyimbere, ori ọḅụjụ paka Kenazị owiḅọtụḅọ Ọtụnịyẹlị.

¹⁰ KỊNỊNYANAḄỌ ḅe kụrọ mẹ ḅo ori ọgọnọ gbanam tẹ ọ̀ ḅẹrẹkọn Izirẹlị pịrịm. Ọ̀ paka ọmụ mum, tẹ KỊNỊNYANAḄỌ ḅe Kusani Risatemu, Mẹsopotemịya ḅẹ amadaḅọ ḅe kẹ ọ̀ ḅara-ḅio ọ̀ pịrịm, tẹ ori owu-ḅara-iḅi nyanam Kusani Risatemu ḅụụ ḅụ.

¹¹ Anieḅụ ama mẹ kụra amesi kẹ ịnyọsara nyanam. Anịtẹso Ọtụnịyẹlị, Kenazị owiḅọtụḅọ ḅe fịịm.

Ehudu Mohabụ Ḅụ Izirẹlị Ḍụa-ḅọrọmam.

¹² Izirẹlịapụ ma siin KỊNỊNYANAḄỌ ḅe ḍiki-tọrụ ḅụ siye mịẹm; tẹ KỊNỊNYANAḄỌ ḅe nwẹnị ịnyọ kẹ Egilọnị, Mohabụ ḅẹ amadaḅọ ḅe pịrị kẹ Izirẹlị na owu sọọ, gbala ịn KỊNỊNYANAḄỌ ḅe ḍiki-tọrụ ḅụ siye mịẹm ẹrẹsị.

¹³ Ọ̀ nwẹnị Amọnị ḅẹ apụ ma na, Amalẹkị ḅẹ apụ ma na kobiri ọ̀ ḅụụ pịrị tẹ mu Izirẹlị nẹngịma; tẹ ịn nwẹnị Jeriko, Enimikoro opu ama mẹ ọkị nyana.

¹⁴ Tẹ Izirẹlịapụ ma maa kụra fa si kẹ fịrị mẹnjị Egilọnị, Mohabụ ḅẹ amadaḅọ ḅe pịrịm.

¹⁵ Kụma Izirẹlịapụ ma owu KỊNỊNYANAḄỌ ḅe pịrị tẹso, KỊNỊNYANAḄỌ ḅe ḍụa-ḅọrọmaḅọ saakị pakama-ḅo ịn pịrịm. Ḅieḅe anie Ehudu, Gira Benijamịnị furo-ḅẹ-ḅọ ḅe owiḅọtụḅọ ḅe; ọ̀ kọndọ wararị. Ọ̀ ḅara ḅụ mịẹ Izirẹlịapụ ma sịẹ oso igbigi kẹ Egilọnị, Mohabụ ḅẹ amadaḅọ ḅe fịrịmarị.

¹⁶ Ehudu nwẹnị nangwọ opu ogie na gbasị ḅarị maa atọrụ okologie tẹmẹ ọ̀ ḅụụ pịrị; tẹ ọ̀ nwẹnị anị kẹ ori ama-ḅara ḅẹ ḅụọ-ẹtẹnẹ ḅụ kpọọ, ọ̀ kapa suku-ḅio.

¹⁷ Ò mu ama-oso-igbigi kẹ Egilọnị, Mohabụ ḅẹ amadaḅọ ḅe pịrịm. Mịọkụ Egilọnị anie ḍụḅa lamatẹ owiḅọ.

¹⁸ Ehudu ama-oso-igbigi mẹ pịrị fama tẹso, ò tomi ma tẹ ama-oso-igbigi mẹ dogi apụ ma fịrịma tẹ in som.

¹⁹ Kụma oriḅe na ọ̀ ḅụụ na nwẹnị vuunma ọḅụ pịkị ịn ḅụụ ḅụ ye kẹẹ wararị aḍụḅarị ḅụ Giligalị kpeki anga ḅụ, tẹ nwẹnị ḅẹẹ, “yei amadaḅọ, à ḅọị oku nyana ị́ pịrị wararị.” Amadaḅọ ḅe nwẹnị tọn, “Kịnị ẹkwẹn ma”; tẹ simetẹ fịrị mẹnjị ọ̀ pịrịarị apụ mamgba nwẹnị ọ̀ tọrọkọ mẹnjị paka fama.

²⁰ Ori ngẹrị ori isun ọgọnọ ḅẹ deintẹ kala-ḅio ḅụ lẹgị-sime wararị ogbo, Ehudu nwẹnị ọ̀ dama-ḅo, tẹ ḅẹẹ, “À Tamụnọ ḅara ḅụ oku da ḅo ị́ pịrị wararị.” Tẹ ọ̀ nwẹnị ọ̀ lẹgịye ọgọnọ ḅụ saakị.

²¹ Ehudu nwẹnị ori ere-ḅara kẹ ama-ḅara ḅẹ ḅụọ-ẹtẹnẹ ḅụ okologie mẹ sin ọkị tẹ kẹ ò furo ḅio temi su:

²² ogie tọrụ mẹ sọ-mu fama tẹ ogie sịḅị mẹ sọ sọ-mu tẹ ḅẹlẹkị mẹ ogie tọrụ mẹ gbaịnm; gbala ori ò furo mẹ ḅio okologie mẹ nụnụ siin-a ẹrẹsị oḅokuaị nwẹnị paka-ḅo.

²³ Anịtẹso Ehudu nwẹnị paka mẹnjị-toluḅọrọ-anga mẹ ḅio mu, tẹ isun ọgọnọ ḅẹ kala-ḅio mẹ ḅẹ aḅọkọ ma gbaịn ọ̀ pịrị tẹ arị ịkasị.

²⁴ Ò so tẹso, fịrịmẹnjịapụ ma nwẹnị ḅo; ini isun ọgọnọ ḅẹ kala-ḅio mẹ ḅẹ aḅọkọ ma ẹrịm mịnẹ arị ịkasị wararị tẹso, in ḅiotọnm, “ọ̀ paa ọ̀ ḅụụ sụn-arị deintẹ kala-ḅio mẹ ḅụ.”

²⁵ In koru-koru-siḅiya, nwenii ịnyọ nwẹnị ịn ta; kụma ọ̀ paa isun ọgọnọ ḅẹ kala-ḅio mẹ ḅẹ aḅọkọ ma finji-a tẹso, ịn nwẹnị sambị mẹ ọkị tẹ arị finji; tẹ ḍikii, ịn nyanaḅọ ịna kịnịnyanaḅọ ḅe anịjụ fịtẹ kiri-ḅio ḅọlọlọ sime wararị.

²⁶ In koruarị ogbo Ehudu mangị-som, tẹ ịn ḅụụ ḅụ ye kẹẹ wararị aḍụḅarị ma ọgọnọ-jụ ḅọrọ tẹ mangị-so Sera mum.

²⁷ Ò mu laa tẹso, ọ̀ Iferemu tụndụ ọgọnọ ḅẹ opu sịẹ mẹ ḅio ọdụ ofuro; tẹ Izirẹlịapụ nwẹnị Iferemu tụndụ ọgọnọ ḅẹ opu sịẹ mẹ ḅụ ori na ideri mu, ori ịna sịḅịdaḅọ ḅara ḅụ.

²⁸ Ọ̀ nwẹnị ịn ḅẹẹ, “Ọmịnị ì ḍuka-ḅoo, kẹ gotẹ ọkọ ḅẹẹarị, KỊNỊNYANAḄỌ ḅe Mohabụ ḅẹ apụ, ọmịnị na fịya-a apụ ma kẹ ọmịna ḅara-ḅio ọ́ pịrị tẹẹ.” Anieḅụ ini ò ḍuka ideri mum; tẹ nwẹnị Jodanị mẹ ḅẹ kpongbo mịẹ tẹ ḅụọ kẹ mẹnjị saḅa anga ma ọkị tẹ Mohabụ ḅẹ apụ ma ẹngbẹsẹ, tẹ ḍụkụ tẹ gbọrụ tomḅọ sọ saḅa ḅọrọ-a.

²⁹ Anịsakị mẹ ḅụ ịn Mohabụ ḅẹ apụ ma ḅụ ḅẹ kịnị gbọrụ puku sọnọa ẹndẹ finji (10,000) pembe apụ ḅaam, inimgba kụrọtẹ iḅi oju nyana-nyanatẹ atomi; gbọrụ tomḅọ sọ mangị-soa.

³⁰ Anieḅụ Izirẹlị ḅara-ḅio Mohabụ sịḅị-tuum anị ene mẹ ḅụ. Tẹ ama mẹ kụra inia si kẹ ịnyọsara nyanam.

Samuga

³¹ Ọ̀ ḅọrọ tẹso ọkụma, anie Samuga, Anati owiḅọtụḅọ ḅe tẹ nambulo deema ḅịḅị-pịọpịọtẹ-sịn kẹ Filisiteniapụ ḅụụ kịnị ẹndẹ oyia asi finji ḅaa ḅọ ḅe; anịsakị ori sọ Izirẹlị ḍụa-ḅọrọmam.