Ḅẹrẹkọn-apụ 20 - FỊAFỊA BAỊBỤLỤ

Izirẹlị Ḅụụ Tẹlẹma Ọmụ Pịrịm

¹ Anịtẹso Izirẹlịapụ mamgba Danị ḅụ ọkị mu Biyasẹba la, Gilẹdị ḅẹ ama mẹ kẹ sụa, nwẹnị paka-ḅo, tẹ gbọrụ tomḅọ ḅara kẹ Mizipa ḅụ kobiri KỊNỊNYANAḄỌ ḅe pịrị.

² Izirẹlị ḅẹ afuro mamgba, ḅẹ tọrọkọ-tarịapụ mamgba Tamụnọ atomi ma tomina-ogbo mẹ ḅio ịna aḅụụ ḍie-pakamam, kịnị puku amesi oyi finji (400,000) anie ḅụọ kẹ mẹnjị tẹ okologie kẹ ọmụgbin-arị apụ.

³ Mịọkụ Benijamịnị furo-ḅẹ-apụ ma naa tẹ mịnẹ Izirẹlịapụ ma iwo Mizipa mu tẹ. Izirẹlịapụ ma nwẹnị ḅẹẹ, “Ḍuko wa pịrịị, ndẹẹ mị si-sịḅịḅio mẹ ḅo mịẹ ḅara?”

⁴ Livayị furo ḅẹ ḅo, ẹrẹḅọ ma tẹ ịn ḅaa ḅọ ma diḅọ ḅe nwẹnị pakịrị tẹ ḅẹẹ, “Yẹrị na, ị̀ ịgwa-ẹrẹḅọ ma na Gibiya tẹ sime Benijamịnị pịrị anga ḅụ ḍin mẹ kẹ sime ḅẹ ḅom.

⁵ Gibiya ḅẹ owiapụ ma nwẹnị saakị ị̀ da-paka, tẹ ḍin ḅụ warị mẹ ikelema-koro; ini ị̀ ḅaa ḅẹ ḅiim, tẹ kụrọ ḅara kẹ ị̀ ịgwa-ẹrẹḅọ ma ọlọtẹ á kanm, tẹ á fịị tẹ.

⁶ Á nwẹnị ị̀ ịgwa-ẹrẹḅọ ma ọkị tẹ à kẹ pakịrị-pakịrị keni, tẹ á kẹ Izirẹlị nyana tẹ simearị opu sịẹ mẹmgba fịrịma ikelema-koro, gbala ini Izirẹlị ḅụ tọn-tọnye na, kịnị kẹ ḅio kuroma-a ye na mịẹ tẹ ẹrẹsị.

⁷ Ó ḍikii, ọmịnị Izirẹlịapụ, ọmịnị-mgba ó nyana tẹ ḍuko ḅẹ ye ḍuko, tẹ mịanga ḅịḅị-kẹ-ogbosọọ.”

⁸ Tomi mamgba nwẹnị gbọrụ tomḅọ ḅara kẹ saakị tẹ ḅẹẹ, “Wamịna aḅụụ so amịna akpụrụ-warị mu ḅẹ ḅọ ofori, anịsakị wamịna aḅụụ gbọrụḅọ-sọ pịkịma so mḅọ warị mu ḅịa.

⁹ Kụma mịọkụ mie wa kẹ Gibiya mịẹ ḅarịye: wa apịan sụa ḅụ mu owu kẹ ịn paka ḅa.

¹⁰ Anịsakị Izirẹlị ḅẹ afuro mamgba ikelema-koro kịnị sọnọa si ḅụ, wa oyia apụ ọkị ḅa; kịnị maa ẹndẹ oyia asi (1,000) ḅụ, kịnị sọnọa si, anịsakị kịnị gbọrụ puku sọnọa ẹndẹ finji (10,000) ḅụ, kịnị maa ẹndẹ oyia asi finji, tẹ ịn fịye ọkị-ḅo ọkị-ḅo tomi ma pịrị ḅa, mịẹtẹ ịn ḅo sakị, ịn Benijamịnị ḅẹ Gibiya mịẹ wararị kuroma nyana-a siye mẹmgba tẹ ini Izirẹlị ḅụ mịẹ tẹ ye mẹ kẹ ịn gbẹẹ ḅẹ ḅara.”

¹¹ Izirẹlị ḅẹ owiapụ mamgba nwẹnị owu kẹ opu ama mẹ paka ḅẹ kobiri gbala gbọrụ tomḅọ ḅara kẹ in ḅo gbolomam.

¹² Izirẹlị ḅẹ afuro ma nwẹnị kịnị kẹ Benijamịnị furo mẹmgba fịrịma ikelema, tẹ ḅẹẹm, “Miemẹ anie tọ-ḅara sime si-sịḅịḅio tẹ ọmịna ogboku kiri ọkị?

¹³ Anịẹrẹsị mịọkụ ó Gibiya ḅụ nguronguro atomi ma pakama-ḅoo, mịẹtẹ wa ịn ḅaa ḅẹ ḅara, tẹ Izirẹlị ḅụ siye saakị sin.” Kụma Benijamịnị furo-ḅẹ-apụ ma ịna mịnapụ Izirẹlịapụ ma pọkọ poki ḅẹ ḅịa.

¹⁴ Benijamịnị furo-ḅẹ-apụ ma nwẹnị opu ama ma ḅio paka-ḅo gboloma tẹ so Gibiya ḅụ paka Izirẹlịapụ ma na owu sọ ḅẹ mu.

¹⁵ Benijamịnị furo-ḅẹ-apụ ma anị ene mẹ ḅụ ịna opu ama ma ḅụ okologie siin tẹ kẹ owu sọ ḅẹ kịnị tẹra apuku sọnọ ẹndẹ finji (26,000) pekeletẹ sẹlẹ pakama-ḅom, anie Gibiya ḅụ sime apụ ma tẹ ịn pekeletẹ sẹlẹ kịnị ẹndẹ jeia si finji (700) ma sikima.

¹⁶ Mịna apụ mamgba ogbo-ḅio ịn sẹlẹ wararị kịnị ẹndẹ jeia si finji tẹ kọndọ wararị apụ emii; ọrụḅọ-ọrụḅọ inetẹ ḍiki ḅụ ḍụḅarị pakịrị kẹ inume gbọrụmgbọ gbin pẹlẹ ḅa ḅara ye da ḅụ tẹ anị anị gbarị ḅịa.

¹⁷ Anịsakị Benijamịnị sikima, Izirẹlị ḅẹ owiapụ kịnị puku amesi oyi finji (400,000) tẹ okologie siin tẹ kẹ owu sọ ḅẹ apụ pekeletẹ sẹlẹ pakama-ḅom; inimgba owu-akọnịapụ.

Ịn Benijamịnị Furo-ḅẹ-apụ Ma Na Gbin Ọmụ Mẹ

¹⁸ Izirẹlịapụ ma saakị tẹ iwo Bẹtẹlị mu tẹ Tamụnọ ḅịḅị gbelam, “Wamịna-aḅụụ tụḅọ tarị iwo mu owu kẹ Benijamịnị furo-ḅẹ-apụ ma paka ḅẹ?” KỊNỊNYANAḄỌ ḅe nwẹnị pakịrị, “Juda tarị mu ḅa.”

¹⁹ Anịtẹso Izirẹlịapụ ma nwẹnị dede-ḅio ḅụ saakị, tẹ owu kẹ Gibiya paka ḅẹ akpụrụ-warị pike.

²⁰ Izirẹlị ḅẹ owiapụ ma nwẹnị paka owu kẹ Benijamịnị paka ḅẹ mu; tẹ Izirẹlị ḅẹ owiapụ ma nwẹnị Gibiya ḅụ owu kẹ ịn paka ḅẹ owu ọgbụrụ mẹ sụn.

²¹ Benijamịnị furo-ḅẹ-apụ ma nwẹnị Gibiya ḅụ paka-ḅo, tẹ anị ene mẹ ḅụ Izirẹlị ḅẹ owiapụ ma ḅụ kịnị maa puku, jeia ẹndẹ finji (22,000) ḅaam.

²² Kụma tomi ma, Izirẹlị ḅẹ owiapụ ma, nwẹnị ḅiokpọma, tẹ sin tarị ene ḅụ ini ọgbụrụ mẹ sụn anga mẹ ḅụ owu ọgbụrụ mẹ sụn.

²³ Tẹ Izirẹlịapụ nwẹnị iwo mu KỊNỊNYANAḄỌ ḅe tọrọkọ tẹmẹ-la ḅara kẹ owu nwenii ḅoḅiri-so la; tẹ ịn nwẹnị KỊNỊNYANAḄỌ ḅe ḅụụ ḅụ gbela, “Wa pịkị sin wamịna amịnapụ Benijamịnị furo-ḅẹ-apụ ma na owu sọ kẹ kpeki mu ḅarị mọ?” KỊNỊNYANAḄỌ ḅe nwẹnị pakịrị, “Ó mu owu kẹ ịn pakaa.”

²⁴ Anieḅụ Izirẹlịapụ ma nwẹnị maaịn karama ene ḅụ sọma kpeki owu kẹ Benijamịnị furo-ḅẹ-apụ ma paka ḅẹ ḅo.

²⁵ Benijamịnị nwẹnị Gibiya ḅụ paka mu ini na owu sọ maaịn karam ene mẹ ḅụ, tẹ Izirẹlịapụ ma ḅụ owiapụ maa puku, sọnọ ẹndẹ finji (18,000) ḅaam; mịnapụ mamgba anie owiapụ tẹ okologie siin tẹ kẹ owu sọarị apụ.

²⁶ Anịtẹso Izirẹlịapụ mamgba, bebe ọmụ-ogbo mẹ nwẹnị iwo so tẹ Bẹtẹlị ḅo, tẹ tẹmẹ-la ḅara kẹ owu. Ini anịjụ KỊNỊNYANAḄỌ ḅe tọrọkọ lẹgị-simem, tẹ ḅuru-ịmọ nwenii ḅoḅiri-so lam, tẹ KỊNỊNYANAḄỌ ḅe tọrọkọ dọkịma-agba na, dein-pịrị-agba na mịẹm.

²⁷ Izirẹlịapụ ma nwẹnị KỊNỊNYANAḄỌ ḅe ḅụụ ḅụ gbela, gbala arị ene ma ḅụ Tamụnọ Ọḅọkụ Igbe mẹ anịjụ emi ẹrẹsị,

²⁸ anịsakị Finihasi, Ẹlịyeza owiḅọtụḅọ pịkị Erọnị taa-owiḅọtụḅọ ḅe anie anị tọrọkọ sime tẹ fịrịmẹnjịarị tẹ ḅẹẹm, “Anịsọ wa paa siin mu wamịna amịnapụ Benijamịnị furo-ḅẹ-apụ ma na owu sọ ḅarị mọ, anịanịa wa anị dasịẹma?” KỊNỊNYANAḄỌ ḅe nwẹnị pakịrị, “Ọmịnị iwo muu; kẹ gotẹ ọkọ ḅẹẹarị, ḅaa arị ịn kẹ ọmịna ḅara ḅio ḅụ ọ́ pịrị ḅa.”

²⁹ Anieḅụ Izirẹlị nwẹnị kịnị kẹ ḅọị Gibiya ikelema-koro tẹ owu ẹbị.

³⁰ Izirẹlịapụ ma nwẹnị tẹrẹị karama ene ḅụ iwo mu owu kẹ Benijamịnị furo-ḅẹ-apụ ma paka, tẹ osi asakị ma ḅụ ịn ḅụụ wẹrị-wẹrị ḅara kẹ ḅụụ tẹlẹma tẹ ịna ọmụgbin-apụ kẹ Gibiya da.

³¹ Benijamịnị furo-ḅẹ-apụ ma nwẹnị tomi ma na owu sọ ḅẹ paka mu, tẹ ịn nwẹnị opu ama mẹ ḅụ ịn nụnụ ḅelema, tẹ osi asakị ma ḅụ ini ịn ḅaa ḅara kẹ saakị tomi ma ḅẹ jen-apụ ḅaa; opu etela ma ḅụ arịḅẹ gberie iwo Bẹtẹlị da-mum, osi etela Gibiya da-mum, na opu ama mẹ akaka finji wararị anga mẹ na ḅụ, Izirẹlị ḅe kịnị asuei pembe apụ ịn nwẹn ḅaam.

³² Benijamịnị furo-ḅẹ-apụ ma nwẹnị ḅẹẹ, “Ịn tarị sakị mẹ ḅụ mangị ḅara kẹ wamịna tọrọkọ ḅụ mangị tẹ.” Kụma Izirẹlịapụ mẹẹ, “Yee wa ḍumo-mangị kọn, tẹ opu ama mẹ ḅụ ịn nụnụ ḅelema opu etela ma lama.”

³³ Tẹ Izirẹlị ḅẹ owiapụ mamgba nwẹnị ịna sime anga ḅụ saakị paka-ḅo, tẹ Balị-tama ḅụ ịna aḅụụ tẹlẹmam, anị sakị Izirẹlị ḅẹ owiapụ tẹ ḅọịtẹ ama mẹ ẹbị sime apụ ma nwẹnị ịn sime Geba ḅụ ịrụa-ideriarị-anga mẹ ḅụ fọnya mangị paka-ḅo.

³⁴ Izirẹlị mẹmgba ḅụ sẹlẹmatẹ kịnị gbọrụ puku, sọnọ ẹndẹ finji (10,000) nwẹnị paka-ḅo owu kẹ Gibiya paka, tẹ owu mẹ nwẹnị kụrọ; kụma Benijamịnị furo-ḅẹ-apụ ma nimi-a mịnẹ fị-na-fa-na ịna ọgọnọ kpeki tẹẹ,

³⁵ KỊNỊNYANAḄỌ ḅe Izirẹlị tọrọkọ ḅụ Benijamịnị nẹngịmam; tẹ Izirẹlị ḅẹ owiapụ ma anị ene mẹ ḅụ Benijamịnị ḅẹ kịnị tẹra puku, maa ẹndẹ finji, na kịnị jeia si (25,100) na ḅaam mịnapụ mamgba anie okologie siin tẹ kẹ owu sọ ḅẹ apụ,

³⁶ Anieḅụ Benijamịnị furo-ḅẹ-apụ ma nwẹnị ẹrị mịnẹ ini in inoma tẹ. Izirẹlị ḅẹ owiapụ ma nwẹnị kiri kẹ Benijamịnị pịrị, gbala ịn ḅioḅẹngbọ kẹ ḅọịtẹ ama ẹbị apụ ma tẹ sime Gibiya ẹbịarị apụ ma ọgọnọ gbana wararị ẹrẹsị.

Izirẹlị Ḅẹ Apụ Ma Kẹ Owu-ḅara-iḅi Nyana Ḅara

³⁷ Ḅọịtẹ ama ẹbị ḅụ sime apụ ma nwẹnị fọnya mangị Gibiya mu tẹ gala-gala, tẹ okologie mẹ kẹ opu ama mẹ ḅẹ apụ mamgba ḅaa.

³⁸ Mịọkụ, Izirẹlịapụ ma na, ḅọịtẹ ama ẹbị apụ ma na ogboku ḅẹ elekima anie, ịn mịẹtẹ opu ama mẹ ḅio onwi turee-tureema so tẹ ḅẹḅẹ,

³⁹ Izirẹlịapụ ma pịkịtẹ owu ḅio sọ ḅa. Mịọkụ mẹ Benijamịnị saakị Izirẹlịapụ ḅaa tẹ kịnị asuei pembe apụ ḅaam; ini mẹẹ, “Tụkụma ḅara ḅụ ini ịn ḅaa tẹ wamịna tọrọkọ ḅụ, tarị owu mẹ ḅio anị sime-ḅara.”

⁴⁰ Kụma onwi elekima mẹ gbọrụ ḅụụ ḅụ opu ama mẹ ḅụ saakị saakị paka tẹso, Benijamịnị furo-ḅẹ-apụ ma nwẹnị tọrụ pịkị ịna ọḅụjụ ḍiki tẹ ẹrịm bebe opu ama mẹ dọkị fa tẹẹ.

⁴¹ Anịtẹso Izirẹlị ḅẹ owiapụ ma nwẹnị vuunma pịkị, tẹ Benijamịnị ḅẹ owiapụ ma ekpe nwẹnị tukutuku, anị kẹ gotẹ ọkọ mịẹarị, ini ẹrịm mịnẹ fịị na fa na ịna ọgọnọ gbana kpeki tẹ.

⁴² Anịẹrẹsị ịn nwẹnị vuunma ịna ọḅụjụ pịkị Izirẹlị ḅẹ owiapụ ma tọrọkọ in gbin, ịkpa mẹ da-muarị pakịrị ḅụ; kụma owu mẹ mu ịn gbaịnm, tẹ inima tẹ opu ama ma ḅio paka-ḅo apụ ma ịna ogbo-ḅio ḅụ ịn simam.

⁴³ In Benijamịnị furo-ḅẹ-apụ ma ḍukam, tẹ ịn pẹlẹ-pẹlẹ tẹ ịn nanga kiri gbinma Noya ḅụ ọkị mu ịrụa-saakịarị-anga mẹ ḅụ Gibiya na dama-dama jụjụ-ḅio lam.

⁴⁴ Benijamịnị ḅẹ owiapụ ma ḅẹ kịnị maa apuku sọnọa ẹndẹ finji (18,000) ḅịkịm, inimgba ọmụgbin ḅara-ḅaatẹ owiapụ famam.

⁴⁵ Ịn nwẹnị vuunma pịkị tẹ ḍumo-mangị kọn ịkpa mẹ da-mu Rimọnị ḅẹ ịkụ mẹ la; oyi maa ẹndẹ finji na, kịnị oyia asi na, (5,000) ịn nwẹn pẹlẹ-ḅaam ịna aḅụụ opu etela ma ḅụ, tẹ ịn nwẹnị kụrọma ịn ḍuka mu Gidọmụ la, tẹ ịna aḅụụ kịnị sọnọa ẹndẹ (2,000) ḅaa.

⁴⁶ Anị ḅara ḅụ inimgba tẹ anị ene mẹ ḅụ Benijamịnị furo-ḅẹ-apụ ḅụ fịị apụ kịnị tẹra apuku, maa ẹndẹ finji na kịnị oyia asi na (25,000) tẹ okologie sin owu sọarị apụ, inimgba ọmụgbin ḅara-ḅaatẹ owiapụ famam.

⁴⁷ Kụma kịnị ẹndẹ, oyia asi finji (600) vuunma pịkị tẹ ḍumo-mangị kọn ịkpa mẹ da-mu Rimọnị ḅẹ ịkụ mẹ lam, tẹ inia akalụ kẹ Rimọnị ḅẹ ịkụ mẹ ḅụ angam.

⁴⁸ Izirẹlị ḅẹ owiapụ ma nwẹnị vuunma ọḅụ pịkị tẹ Benijamịnị furo-ḅẹ-apụ ma da-paka tẹ okologie mẹ kẹ tomi na, nama na tẹ ịn ḍọkị-ẹrị aị mamgba ḅaa fama. Anịsakị ama tẹ ịn ḍọkị-ẹrị ama mamgba ịn fịnị kẹ sụa dọkịmam.