Ḅẹrẹkọn-apụ 19 - FỊAFỊA BAỊBỤLỤ

Livayị Furo Ḅẹ Ḅọ Ḅe Na Ori Ịgwa-ẹrẹḅọ Na

¹ Arị ene ma tẹ amadaḅọ Izirẹlị ḅụ ofori sakị mẹ, Livayị furo ḅẹ gbọrụḅọ igoni kẹ Iferemu tụndụ ọgọnọ ḅẹ opu sịẹ mẹ ḅio iḅere-iḅerea anga ama ọḅụjụ pakịrị bịan simem, oriḅe tẹ Juda ḅio Bẹtịlịhẹmụ ḅụ gbọrụ ịgwa-ẹrẹḅọ ọkị ḅọ ḅe.

² Ori ịgwa-ẹrẹḅọ ma ọ̀ ḅụụ ḅụ ịganị nyanam, tẹ á nwẹnị ò koroma-so Juda ḅio Bẹtịlịhẹmụ ḅụ á ḍa warị mu, tẹ ini akalụ kẹ anịjụ simem.

³ Anịtẹso á di ḅe nwẹnị saakị tẹ á ḍuka mu, ḅio deinma iḅi ẹkwẹn kọn á pịrị, tẹ á pịkịma-ḅo ḅe ḅara. Ori ọ̀ fịrịmẹnjịḅọ na, maa yedogi-anama na kẹ sụa mum. Ọ̀ nwẹnị á ḍa warị la; tẹ ẹrẹḅọtụḅọ ma ḍa ori ẹrị tẹso, ọ̀ nwẹnị ḅioḅẹlẹ kẹ ori na bịama ḅẹ ḅo.

⁴ Ẹrẹḅọtụḅọ ma ḍa, ò fụanḅọ (ọgọḅọ) ḅe nwẹnị mịẹtẹ ò sime, tẹ ọ̀ tẹra aḍin kẹ ori na simem; anị ḅara mie ịn kẹ fị, pịkị ḅuu tẹ anịjụ sime-ḅara.

⁵ Inia aḍin karama ene ḅụ ịn nwẹnị dede-ḅio dede-ḅio kẹ saakị, tẹ ọ̀ nwẹnị so ḅẹ ḅara kẹ ḅụụ tẹlẹma; kụma ẹrẹḅọtụḅọ ma ḍa nwẹnị ò fụanḅọ ḅe ḅẹẹ, “Fịye kalịye fị tẹ ịnyọ kẹ í ḅioḅẹngbọ mẹ pịrịị; ịnyọ ị́ ḅụụ pakaa, anị tẹrẹmẹ ị́ inetẹ mẹnjị-so ḅa.”

⁶ Anieḅụ maa owiapụ ma nwẹnị lẹgị-sime tẹ fị pịkị ḅuu gboloma; tẹ ẹrẹḅọtụḅọ ma ḍa nwẹnị owiḅọ ḅe ḅẹẹ, “Sisi ḍin mẹ kẹ mịanga sime tẹ tọrụ-ḅẹlẹ nyanaa.”

⁷ Owiḅọ ḅe saakị tẹ so ḅẹ tẹso, ọ̀ fụanḅọ ḅe ọ̀ mịẹ nwenii ò siin anịjụ simem.

⁸ Sọnọa ḍin karama ene ḅụ ò so ḅẹ tẹ dede-ḅio, dede-ḅio saakịm; tẹ ẹrẹḅọtụḅọ ma ḍa nwẹnị ḅẹẹ, “Ịnyọ kẹ í ḅioḅẹngbọ mẹ pịrịị; sisi ye fịị, tẹ sime nwenii ene tuukoro.” Anieḅụ ini maa apụ ma ye fịm.

⁹ Owiḅọ ḅe na, ori ịgwa-ẹrẹḅọ na, ọ̀ fịrịmẹnjịḅọ na saakị tẹ so ḅẹ tẹso, ò fụanḅọ, ẹrẹḅọtụḅọ ma ḍa, nwẹnị ọ̀ ḅẹẹ, “Ḍikii, mịọkụ ene mẹ ḅo ḅoḅiri-so la tẹ; arị ị́ tẹkẹm, ḍin mẹmgba kẹ simee. Ḍikii, ene mẹ gbaịn tẹ; mịanga sime tẹ í ḅioḅẹngbọ ḅụ ị́ tọrụ-ḅẹlẹ nyana; anịsakị ḅaa, ị́ nwẹnị dede-ḅio, dede-ḅio kẹ saakị ị́ mẹnjị kọn tẹ so ị́ ama mu.”

¹⁰ Kụma owiḅọ ḅe ḍin mẹ kẹ sime-a; ọ̀ saakị tẹ som, tẹ ḅo Jebusi na dama-dama anga lam (anie Jeruselemu). Ori na sime aị anie, ịn ye kẹ dẹẹ wararị maa yedogi-anama na, ori na emi ori ịgwa-ẹrẹḅọ ma na.

¹¹ Ịn ḅo Jebusi kpeki sakị ene mẹ ḅẹlẹma ḍin mu tẹ, tẹ fịrịmẹnjịḅọ ḅe nwẹnị ọ̀ sịḅịdaḅọ ḅe ḅẹẹ, “Mịọkụ ḅoo, yee wa mie Jebusayịtị apụ opu ama mẹ ḅio agba tẹ ḍin mẹ kẹ anị ḅio sime.”

¹² Ọ̀ sịḅịdaḅọ ḅe nwẹnị ọ̀ ḅẹẹ, “Wamịnị igoniapụ, tẹ sime Izirẹlịapụ pịrị-a apụ opu ama mẹ agba tẹ anị ḅio sọ-mu ḅịa; kụma wa ḅọrọ so Gibiya mu ḅa.”

¹³ Ọ̀ nwẹnị ọ̀ fịrịmẹnjịḅọ ḅe ḅẹẹ, “Ḅoo, yee wa sọma mịna anga ma ḅẹ gbọrụ anga Gibiya, anịanịa Rama kpeki tẹ ḍin mẹ kẹ sime.”

¹⁴ Anieḅụ ịn nwẹnị mẹnjị-ḅọrọ so ịna etela da; Gibiya kpeki, sime Benijamịnị pịrị anga ḅụ ịrụa mẹ ịna sịḅị ḅụ tuuiderim.

¹⁵ Ịn nwẹnị pịkị anịjụ agba, tẹ sọ mu Gibiya ḅụ ḍin mẹ kẹ sime ḅẹ ḅara. Ọ̀ nwẹnị mu opu ama mẹ ḅẹ ama-ogbo ḅụ lẹgị-sime; gbala gbọrụ owiḅọ sọ ọ̀ da ọ̀ warị suu tẹ ò ḍin mẹ kẹ sime-a.

¹⁶ Gbọrụ omongitẹ owiḅọ nwẹnị ḅoḅiri-so ḅụ ọ̀ ḍụọ ḅio ọ̀ kọrịnama kọrị fama tẹ ḅọrọ; owiḅọ ḅe anie Iferemu tụndụ ọgọnọ ḅẹ opu sịẹ mẹ ḅụ sime ḅọ, tẹ igoni ḅara kẹ Gibiya ḅụ simearị; ye-yọ mẹ ḅẹ apụ anie Benijamịnị furo-ḅẹ-apụ.

¹⁷ Ọ̀ nwẹnị ọ̀ tọrụ saakị tẹ opu ama mẹ ḅẹ ama-ogbo ḅụ igoni-muḅọ ḅe ẹrị; omongitẹ owiḅọ ḅe nwẹnị ò gbela, “Ị́ tọ-anga muarị? Anịsakị ị́ tọ-anga ḅụ sime tẹ ḅo?”

¹⁸ Ọ̀ nwẹnị ọ̀ pakịrị, “Wa Juda ḅẹ Bẹtịlịhẹmụ ḅụ ḅọrọ so à sime tẹ ḅo anga, anie Iferemu tụndụ ọgọnọ ḅẹ opu sịẹ mẹ ḅẹ iḅere-iḅerea ama ọḅụjụ pakịrị muarị; à Juda ḅio Bẹtịlịhẹmụ mum, tẹ à so ị̀ ama muarị; anịsakị ị̀ da amịna warị ḅio su gbọrụḅọ-sọ ofori.

¹⁹ Wa samụnọtẹ-osuka na, nama-afịaị na nyana wamịna yedogi-anama pịrị wararị, ì fịye na, iru na, ị́ fịrịmẹnjị-ẹrẹḅọtụḅọ ma na, ị́ fịrịmẹnjịapụ ma na simearị asambịrịma owiḅọtụḅọ ḅe na fị ḅẹ fịye emi. Wa gberie-sọ ḅii-a.”

²⁰ Omongitẹ owiḅọ ḅe nwẹnị ḅẹẹ, “Dein sime ị́ pịrịị; arị í ḅiiarị aị mamgba mịẹ ị́ pịrị ḅa ị́yẹrị paa ḍin mẹ kẹ ama-ogbo mẹ ḅụ sime ma.”

²¹ Anieḅụ ori ori ọkị-ḅo ọ̀ warị ḅio sunm, tẹ nama afịaị kẹ yedogi-anama ma pịrịm; tẹ ịn nwẹnị ịna aḅụọ-suku sịkịrị tẹ ye fị tẹ pịkị ḅuum.

²² Ini ọkọ kẹ tọrụ-ḅẹlẹarị ogbo, opu ama mẹ ḅẹ ngoro-ngoro owiapụ nwẹnị ḅo warị mẹ gbori ikelema-koro tẹ ḅọkọ mẹ ḅakụ ḅakụtẹ warị nyanaḅọ ḅe ḅẹẹ, “Ḅo ị́ warị sọ owiḅọ ḅe pakama-ḅoo, mịẹtẹ wa ori na gboloma ḅẹ ḅara.”

²³ Warị nyanaḅọ ḅe nwẹnị paka ịn dama-mu tẹ ḅẹẹ, “Ẹn-ẹn, ị̀ amịnapụ, ọ́ mị-ḅara kẹ si-sịḅịḅio-sụa ḅara kẹ ye mịẹ ma; ọmịnị ẹrịarị mịnẹ ḅieḅe ị̀ warị ḅio sọ-ḅo tẹ ḅẹẹ-sakị ó mị ḅụụ-jịrịma si mịẹye mẹ mịẹ ma.

²⁴ Ḍikii! Ị̀ ẹrẹḅọtụḅọ amụ ḅụụ-gboloa ḅọ na, ori ịgwa-ẹrẹḅọ na mịanga emii; yee á mịọkụ ịn pakama-ḅo. Ọmịnị ịn kan, tẹ ó ḍiki tẹ kẹ inina mịẹ na-iḅi ḅara mịẹ; kụma ḅị tomḅọ ḅe ḅụụ ọ́ nwẹn sime ḅụụ-jịrịma siye mịẹ ma.”

²⁵ Kụma owiapụ ma ò poki-a. Anieḅụ Livayị furo-ḅẹ-ḅọ ḅe nwẹnị ori ịgwa-ẹrẹḅọ ma ọlọ tẹ á pakama ịn pịrị; tẹ ịn nwẹnị kụrọ ḅara kẹ arị ọlọtẹ arị na nimi-a, tẹ bebe ḍin mẹmgba kẹ á wori nwenii ḅo dede-ḅio la. Ene mẹ saakị finji koroarị ogbo, ịn nwẹnị á wẹrịso tẹ á so.

²⁶ Ḅaaso ḅụ ene finji-koroarị ogbo ẹrẹḅọ ma nwẹnị ḅo owiḅọ ḅe warị ḅọkọ á sịḅịdaḅọ ḅe sime anga mẹ ḅụ ḅịkị-koro tẹ sime nwenii ene nwẹnị finji-koro.

²⁷ Á sịḅịdaḅọ ḅe dede-ḅio mẹ ḅụ saakị tẹ warị mẹ ḅẹ aḅọkọ ma finji tẹ paka ò muarị anga mu ḅẹ tẹso, ori ẹrịm ori ịgwa-ẹrẹḅọ ma anịjụ warị mẹ ḅẹ ḅọkọ mẹ ḅụ ḅọlọlọ wararị, tẹ árị aḅara ḅọkọ mẹ suku ḅụ emi.

²⁸ Ọ̀ nwẹnị á ḅẹẹ, “Saakịị, yee wa nwẹnị mẹnjị.” Kụma pakịrị ḅịḅị ofori. Anịtẹso ọ̀ nwẹnị á saakị yedogi-nama mẹ ọgọnọ gbana; tẹ owiḅọ ḅe nwẹnị saakị tẹ so ori ama mu.

²⁹ Ò ḅo ọ̀ warị ḅio sọ tẹso, ọ̀ nwẹnị gbọrụ kala-ogie ọkị, tẹ ori ịgwa-ẹrẹḅọ ma ọkị tẹ eleke-eleke ḅụ á kẹ oyi maa apakịrị finji keni, tẹ á kẹ Izirẹlị ḅẹ oyi maa afuro finji mamgba fịrịma ikelema.

³⁰ Anị ẹrị apụ mamgba nwẹnị ḅẹẹ, “Anị ene mẹ tẹ Izirẹlịapụ Ijiputi ḅẹ ama ḅio paka-ḅo sakị ḅụ nwenii ḅo mịmgba la gbala-gbala nwẹn sime ye amụ paka-a, anịanịa tọrụngbọ kẹ ẹrị. Ọmịnị anị kẹ ḅiokoromaa, kẹ ḅịḅị-kẹ-ogbosọọ, tẹ ẹkwẹẹn.”