Ḅẹrẹkọn-apụ 18 - FỊAFỊA BAỊBỤLỤ

Mayịka Na, Danị Furo Mẹ Na

¹ Arị ene ma ḅụ Izirẹlị ḅụ amadaḅọ ofori. Anịsakị arị ene ma ḅụ Danị furo-ḅẹ-apụ ma pịkị ịn sime ḅẹ anga ḍọkị amịna aḅụụ pịrịarị, kẹ gotẹ ọkọ ḅẹẹarị, ọkị-ḅo anị sakị mẹ la Izirẹlị ḅẹ gbọrụ furo sọ amụ ḅịkị ịn pịrị-a.

² Anieḅụ Danị furo-ḅẹ-apụ ma nwẹnị Zora na Ẹsịtahọlị na ḅụ ịna bebe furo mẹ ḅẹ kịẹn-ḅịḅị ḅụ ịnyọ nyana sọnọ apụ fịrịma in mu ama mẹ ẹnyẹ tẹ anị sime-ḅara ḍọkị nimi; tẹ ịn nwẹnị ịn ḅẹẹ, “Ó mu tẹ ama mẹ sime-ḅara ḍikii.” Ịn nwẹnị ḅo Iferemu tụndụ ọgọnọ ḅẹ opu sịẹ mẹ ḅio Mayịka warị la, tẹ anịjụ sime.

³ Ịn Mayịka warị mẹ ḅụ simearị ogbo ịn nwẹnị Livayị furo ḅẹ asambịrịma owiḅọ ḅe pọkọ lekiri; tẹ ịn nwẹnị pịkị akaka da, tẹ ò gbela, “Tụḅọ ị́ kẹ mịanga ḅo? Mị yọ mẹ ḅụ í tiye mịẹarị? Ị́ tọ kọrịnama nyana mịanga?”

⁴ Ọ̀ nwẹnị ịn pakịrị, “Mị-ḅara mie Mayịka kẹ ị̀ na mịẹ ḅara: ori ị̀ ọkọ tẹ á ḅo ori agbamịẹḅọ sọ tẹ.”

⁵ Ịn nwẹnị ọ̀ ḅẹẹ, “Wa ị́ tẹkẹm, Tamụnọ ḅịḅị ḅii wa pịrị, mịẹtẹ wa nimi igoni mẹ tẹ wa paka-muarị ye mẹ wamịnị na iḅi ḅarị ḅoto.”

⁶ Agbamịẹḅọ ḅe nwẹnị ịn ḅẹẹ, “Ó dein na muu. Igoni mẹ tẹ ó muarị ye mẹ KỊNỊNYANAḄỌ ḅe tọrụngbọ anị ḅụ emi.”

⁷ Anịtẹso sọnọa owiapụ ma som, tẹ ḅo Lahisi la, tẹ tomi ma tẹ anịjụ simearị apụ ma ẹrịm, ịn ye ḅụụ la-a ḅara kẹ Sayịdọnị ḅẹ apụ ma anga ḅara angarị ḅara, kpaịntẹ ye-yọ fiema-a, ye kẹ ḅiotọn pịrị-a, pịkị tomikiri simearị ye ḅụ gberie-sọ ḍọkị-a tẹ ngọ-kọn sara wararị ḅara na, ịn wẹrịtẹ Sayịdọnị ḅẹ apụ ma ḅụụ ala-jụ simearị, tẹ gbọrụḅọ-sọ na gbọrụ mịẹye sọ nyana gboloma-a ḅara mẹ na ẹrịm.

⁸ Ịn ḅo Zora na, Ẹsịtahọlị na ḅụ ịna amịnapụ la tẹso, ịna amịnapụ ma nwẹnị ịn gbela, “Ó tiye nyanatẹ ḍuko ḅẹ?”

⁹ Ịn nwẹnị ḅẹẹ, “Ọ́ saakị tẹ yee wa mu owu kẹ ịn paka; kẹ gotẹ ọkọ ḅẹẹarị, wa ama mẹ ẹrị tẹ, tẹ ḍikii, anị iḅi lamatẹ kiri nyana wararị. Ọ́ mịẹ ḅẹ ye ofori? Ọ́ sakị fama-a ḅara kẹ muu, tẹ sọ-mu tẹ ama mẹ nyana.

¹⁰ Ó mu sakị, ó ḅo kịnị ye kẹ ḅiotọn pịrị-a apụ la ḅa. Ama mẹ finjima wararị; inn, Tamụnọ anị kẹ ọmịna aḅara-ḅio ọ́ pịrị tẹ, ye-yọ tẹ tomikiri ḅụ ofori ye ofori ḅẹ anga.”

¹¹ Zora na, Ẹsịtahọlị na ḅụ Danị furo mẹ ḅẹ kịnị ẹndẹ oyia asi finji nwẹnị ọmụ-aị kẹ ḅụụ tẹlẹma tẹ saakị paka.

¹² Ịn nwẹnị iwo mu Juda ḅụ ịn kẹ Kiriyati-jeharimụ sịn ama ḅụ akpụrụ-warị pike. Aniemẹ sịḅị ẹrẹsị ịn Mehanẹdanị kẹ anịjụ mẹ sịn ḅo mịmgba lam; ḍikii, Kiriyati-jeharimụ ḅụ ịrụa-ideriarị-anga ḅụ anị emi.

¹³ Ịn nwẹnị anịjụ mẹnjị ḅọrọ so Iferemu tụndụ ọgọnọ ḅẹ opu sịẹ mẹ mu, tẹ ḅo Mayịka warị mẹ lam.

¹⁴ Anịtẹso sọnọa owiapụ ma tẹ mu ama mẹ ẹnyẹ tẹ Lahisi opu sịẹ mẹ sime-ḅara ḍiki ḅẹ mu apụ ma nwẹnị ịna amịnapụ ma ḅẹẹ, “Ó gbeke nimi mịnẹ mịna awarị ma ḅio saratẹ kẹ ye ḅii ḅẹ ḍụḅarị apakịrị na, ḅara kẹ kara kpokobia na, tẹmẹ tẹ ye na emii? Anịẹrẹsị mịọkụ ọmịnị ọ́ mịẹ ḅẹ ye kẹ ḅiokoromaa.”

¹⁵ Ịn nwẹnị anịjụ pịkị agba, tẹ Livayị furo ḅẹ asambịrịma owiḅọ ḅe warị ḅo, Mayịka ama mẹ ḅụ tẹ ori angarị ḅara kẹ ò gbela.

¹⁶ Mịọkụ Danị furo ḅẹ kịnị ẹndẹ oyia asi finji ma tẹ ọmụ-aị kẹ ḅụụ tẹlẹma wararị apụ ma ogigo-ḅọkọ mẹ ḅẹ mẹnjị-ḅọrọ-anga mẹ ḅụ sịẹsime wararị.

¹⁷ Sọnọa owiapụ ma tẹ mu ama mẹ ẹnyẹ-apụ ma nwẹnị iwo mu, tẹ ḅara kẹ kara kpokobia mẹ na, ye ḅii ḍụḅarị apakịrị ma na, tẹmẹ wararị kpokobia mẹ na ọkị ọmụ-aị kẹ ḅụụ tẹlẹma wararị kịnị ẹndẹ oyia asi finji ma ogigo-ḅọkọ mẹ ḅẹ mẹnjị-ḅọrọ-anga mẹ ḅụ sịẹsime wararị ogbo.

¹⁸ Mịna owiapụ ma mu Mayịka warị ḅio ḅara kẹ kara kpokobia mẹ na, ye ḅii ḍụḅarị apakịrị ma na, tẹmẹ wararị kpokobia mẹ na ọkị tẹso, agbamịẹḅọ ḅe nwẹnị ịn gbela, “Ó tiye mịẹarị?”

¹⁹ Ịn nwẹnị ọ̀ ḅẹẹ, “Ị́ ḅịḅị gbaịn, Gbọrụ ẹkwẹn sọ kọnma, tẹ wa ḍuka ḅo tẹ ḍaḅọ na, agbamịẹḅọ na sọ wa pịrịị. Ị́ agbamịẹḅọ sọ bebe gbọrụ furo na, Izirẹlị furo na pịrị, anịanịa agbamịẹḅọ sọ gbọrụ tomḅọ warị pịrị na tiye iḅitẹịn?”

²⁰ Agbamịẹḅọ ḅe nwẹnị tẹmẹ ḅioḅẹlẹ kọn; ọ̀ nwẹnị ye ḅii ḍụḅarị apakịrị ma na, ḅara kẹ kara kpokobia mẹ na ọkị tẹ tomi ma ogbo-ḅio sọ.

²¹ Anieḅụ ịn pịkị tẹ ḍọkọḍọkọ-awọmẹ ma na, opu anama ma na, ngọ ma na kẹ ịna tọrọkọ ḅụ wẹrị tẹ som.

²² Ịn Mayịka warị mẹ ḅụ ḅele lama tẹso, Mayịka nwẹnị ọ̀ warị mẹ na kpeki tẹ simearị owiapụ ma sịn pakama-ḅo tẹ ịn nwẹnị Danị furo-ḅẹ-apụ ma ḍuka tẹ mu ịn la.

²³ Ịn nwẹnị oloku Danị furo-ḅẹ-apụ ma pịrị, tẹ ịn nwẹnị vuunma pịkị tẹ Mayịka gbela, “Tiye ị́ ḅụụ-fụkama tẹ ị́ nwẹn pembe tomi ogbo kẹ ị́ ḅụụ sụa tẹ ḅo?”

²⁴ Ọ̀ nwẹnị pakịrị, “Ọmịnị oru-atamụnọ ma tẹ à mịẹ aị ma na, agbamịẹḅọ ḅe na ọkị so tẹ, kirikọntẹ à nyana ye tiye? Ọ́ tọ-ḅara kẹ anịtẹrẹmẹ ì gbelarị, ‘Tiye ị́ ḅụụ-fụkama?’ ”

²⁵ Danị furo-ḅẹ-apụ ma nwẹnị ọ̀ ḅẹẹ, “Ḍụkụ tẹ wamịna ogboku ḅụ ini ị́ pọkọ naa ma, anieofori ḅụụ-sịnịsịnị apụ ḅofa owu kẹ ị́ paka tẹ í ḍumo na, ị́ warị suku ḅẹ aḍumo ma na kẹ sụa fàma.”

²⁶ Anịtẹso Danị furo-ḅẹ-apụ ma so ịn muarị anga mum; tẹ Mayịka ọ̀ ḅụụ ḅụ ịn kụrọ ḅaka ḅara ẹrị tẹso, ori ọḅụ pịkị tẹ so ori ama mum.

²⁷ Ịn Mayịka mịẹ koroma aị ma na, agbamịẹḅọ ḅe tẹ sime ọ̀ pịrị ḅọ ḅe na ọkị tẹso, Danị furo-ḅẹ-apụ ma nwẹnị ḅo Lahisi, gbọrụ atomi ḅara, kpaịntẹ, ye-yọ fiema-a, ye kẹ ḅiotọn kịnị pịrị-a apụ la, tẹ nwẹnị okologie mẹ kẹ ịn ḅaa, tẹ fịnị kẹ opu ama mẹ dọkịma.

²⁸ Ịn ḍụa-ḅọrọmaḅọ sọ ofori, gbala anị Sayịdọnị ḅụ ḅele wararị ẹrẹsị, anịsakị ịn pịkị gbọrụḅọ-sọ na ye mịẹ gboloma-a. Ama mẹ sime Bẹtị-rehobu pịrị tụndụ-ogboku ḅụ anị simem. Ịn nwẹnị siin opu ama mẹ nama, tẹ anị ḅio sime.

²⁹ Ịn nwẹnị ịna atẹngịḅọ Danị ẹrẹ kẹ anị kuro, tẹ Danị kẹ ẹrẹ kẹ anị sịn, oriḅe tẹ Izirẹlị ḅụ ini iyi ḅọ ḅe; kụma tarị sakị ḅụ opu ama mẹ ẹrẹ anie Lahisi.

³⁰ Danị furo-ḅẹ-apụ ma nwẹnị ḅara kẹ kara ye mẹ kẹ sịẹma ịna aḅụụ pịrị; tẹ Jonatanị, Gasọmụ owiḅọtụḅọ pịkị Mozizi taa-owiḅọtụḅọ ḅe na ori owiapụ-awọmẹ na agbamịẹapụ sọ Danị furo-ḅẹ-apụ ma pịrị nwenii ama mẹ mu kun-ḅara ḅio sọ ene mẹ lam.

³¹ Mị-ḅara mie Tamụnọ warị mẹ Silo ḅụ sime mu la sakị, la sakị ḅụ in kpokobia mẹ tẹ Mayịka ḅara kẹ kara ye mẹ kẹ sịẹma wẹrị mu la ḅara.