Ḅẹrẹkọn-apụ 17 - FỊAFỊA BAỊBỤLỤ

Mayịka Kpokobia Tẹmẹm Tẹ Ò Soku-ḅẹ Agbamịẹḅọ Tọnm

¹ Iferemu tụndụ ọgọnọ ḅẹ opu sịẹ mẹ ḅụ Mayịka fị gbọrụ owiḅọ simem.

² Ori ò iyingi ḅẹẹm, “Seleḅa pakịrị maa ẹndẹ jeia si finji (1,100) ma tẹ ini ị́ ḅara ọkị tẹ ị́ anị ḅụ ye karị tẹ pịkị anị ḍuko ị̀ aḅeri ḅio sọ su ye mẹ, ḍiki seleḅa mẹ ị̀ ḅara emi; yẹrị anị ọkịm.” Ò iyingi nwẹnị ḅẹẹ, “Ì owiḅọtụḅọ, KỊNỊNYANAḄỌ ḅe í bomaa.”

³ Ọ̀ nwẹnị seleḅa pakịrị maa ẹndẹ jeia si finji (1,100) mẹ pịkịma ò iyingi pịrị; tẹ ò iyingi ma nwẹnị ḅẹẹ, “Arị ị̀ ḅara ḅụ seleḅa mẹ mịẹ fịafịama KỊNỊNYANAḄỌ pịrị ì owiḅọtụḅọ ḅe pịrịm ò kpokobia kara tẹ anị tẹmẹẹ; anịẹrẹsị mịọkụ arị anị pịkịma ị́ pịrị ḅa.”

⁴ Anieḅụ ori igbigi mẹ pịkịma ò iyingi pịrị tẹso, ò iyingi ma nwẹnị seleḅa pakịrị oyia asi ọkị, tẹ anị kẹ seleḅa tẹmẹḅọ pịrị oriḅe tẹ kpokobia kara tẹ kẹ anị tẹmẹḅọ ḅe; tẹ anị Mayịka warị ḅio simem.

⁵ Mayịka nwẹn-sịn owiḅọ ḅe nwẹnị gbọrụ nkpu nyana, tẹ ọ̀ nwẹnị kẹ saratẹ ye ḅii ḅẹ ḍụḅarị apakịrị kẹngẹ, tẹ nwẹnị ori owiapụ awọmẹ ḅụ gbọrụḅọ kun oriḅe tẹ ḅo ori agbamịẹḅọ sọ ḅọ ḅe.

⁶ Arị ene ma ḅụ Izirẹlị ḅụ amadaḅọ ofori; ọrụḅọ-ọrụḅọ mḅọ tọrụ ḅụ kuraye-kuraye mịẹm.

⁷ Tẹ arị sakị mẹ ḅụ gbọrụ ene, Juda furo ḅụ, Livayị furo ḅẹ gbọrụ asambịrịma owiḅọ simem Bẹtịlịhẹmụ ḅụ; tẹ ori igoni kẹ anịjụ bịanm.

⁸ Owiḅọ ḅe nwẹnị Juda ḅụ Bẹtịlịhẹmụ ama mẹ ḅụ so ori inetẹ sime ḅẹ gbọrụ ye-yọ ḍọkị-ẹrị ḅẹ anga mu, tẹ ori ọkọ kẹ igoni mẹ muarị ogbo, ọ̀ nwẹnị ḅo Iferemu tụndụ ọgọnọ ḅẹ opu sịẹ mẹ ḅio Mayịka warị bịan.

⁹ Mayịka nwẹnị ò gbela, “Í tọ-anga sime tẹ ḅo?”. Ọ̀ nwẹnị ọ̀ pakịrị, “Yẹrị Livayị furo-ḅẹ-ḅọ Juda ḅio Bẹtịlịhẹmụ ḅụ anịsakị á mu arị inetẹ gbọrụ sime yọ ḍọkị-ẹrị ḅẹ anga ḅụ bịan ḅa.”

¹⁰ Mayịka nwẹnị ọ̀ ḅẹẹ, “Ị̀ na simee, tẹ ḍaḅọ na, agbamịẹḅọ na sọ ị̀ pịrịị, anịsakị á seleḅa oyi apakịrị kẹ ị́ pịrị kụra, kụra ḅụ pịkị kapa na ị́ fị ḅẹ fịye na.”

¹¹ Mayịka na sime mẹ nwẹnị Livayị furo-ḅẹ-ḅọ ḅe ḅụụ-ḅẹlẹ; tẹ asambịrịma owiḅọ ḅe nwẹnị ḅo ori owiapụ-awọmẹ ma ḅẹ gbọrụḅọ sime ḅara sime.

¹² Mayịka nwẹnị ala kẹ Livayị furo-ḅẹ-ḅọ ḅe kun, tẹ asambịrịma owiḅọ ḅe nwẹnị ḅo ori agbamịẹḅọ sọ, tẹ nwẹnị Mayịka warị ḅio sime.

¹³ Anịtẹso Mayịka nwẹnị ḅẹẹ, “Mẹkịnẹ à nimi tẹ mịnẹ KỊNỊNYANAḄỌ ḅe ị̀ mịẹtẹ à lolo ḅa, kẹ gotẹ ọkọ ḅẹẹarị, à Livayị furo ḅẹ gbọrụḅọ nyana tẹ agbamịẹḅọ ḅara ḅụ.”