Ḅẹrẹkọn-apụ 15 - FỊAFỊA BAỊBỤLỤ

Samụsịnị Na Filisiteniapụ Na Ịgbanịya Nyanam.

¹ Sakị kẹlẹ ḅọrọ tẹso, ịn kẹ witi sịn fịye soku sakị mẹ ḅụ, Samụsịnị nwẹnị asambịrịma gbọrụ oḅori ọkị tẹ toluma ọ̀ ta ḍiki ḅẹ mu; tẹ ọ̀ nwẹnị ḅẹẹ, “À mono-ḅio mẹ ḅụ sọ ị̀ ta ḍọkụma-mu ḅa.” Kụma á ḍa ḍụkụtẹ ọ̀ sọ-mu-a.

² Á ḍa ḅe nwẹnị ḅẹẹ, “Karakara-ḅara-ḅụ á ḅiotọnm mịnẹ ị́ gbọrsịḅị á ḍiki-ḅioḅu tẹ; anieḅụ arị á kẹ ị́ ikiaḅọ pịrịm. Á ịyịmbara tụḅọ árị ọḅụjụ paka ẹrẹḅọtụḅọ iḅi á nẹngị-a. Àrị ị́ tẹkẹm, árịma nakara, á ịyịmbara ọkị simee.”

³ Samụsịnị nwẹnị ḅẹẹ, “Filisiteniapụ ma gbolomaye, mị sakị mẹ, à siye kẹ ịn mịẹ ḅẹ sakị, kịnị ye kẹ ị̀ ọlọ ḅịa.”

⁴ Anieḅụ Samụsịnị nwẹnị mu pụnụ jeia si kun, tẹ fịnị-kọrịma-aị ọkị; tẹ ọ̀ nwẹnị ịn pịkị, tẹ maa amgbọ maa amgbọ etemi kpọọ kpọ gboloma tẹ fịnị-kọrịmaye kẹ maa amgbọ goyegoye etemi ogboku sụa.

⁵ Ọ̀ fịnị kẹ fịnị-kọrịma-aị ma ḅụụ sụa tẹso, ọ̀ nwẹnị pụnụ ma wẹrịso tẹ ịn mangị Filisiteniapụ ma mbịaka aḍụọ ma olivu aḍụọ ma na ḅio sọ-mu, tẹ sịẹ-sịẹ wararị mbịaka ma na, olivu asịn ma na kẹ sụa dọkịma

⁶ Anịtẹso Filisiteniapụ ma nwẹnị gbela, “Tụḅọ miemẹ mịẹ?” Ịn nwẹnị ḅẹẹ, “Samụsịnị, Timina ḅẹ ḅọ ḅe fụanḅọ (ọgọḅọ) ḅe, ọ̀ gbala ọ̀ ta ọkịm, tẹ á kẹ ori ikiaḅọ pịrị tẹ ẹrẹsị.” Tẹ Filisiteniapụ ma nwẹnị ḅo fịnị kẹ arị na, á ḍa na dọkịma.

⁷ Samụsịnị nwẹnị ịn ḅẹẹ, “Miemẹ anie ọ́ mịẹ ye ḅẹḅẹ, á ye karịm, arị ọmịna ọgọnọ ḅụụ ḅụ gbẹẹfị ḅii ḅa, anịsakị aniemẹ ḅọrọ tẹrẹmẹ, á so ḅa.”

⁸ Ye ḅụụ ịnọ ḅara ḅụ, ò gburo-gburoma ịn ḅaa lamam, tẹ nwẹnị ideri mu Ẹtamụ ḅẹ ịkụ mẹ ḅẹ fukuru mẹ ḅio sime.

Samụsịnị Filisiteniapụ Ma Nẹngịmam

⁹ Anịtẹso Filisiteniapụ ma nwẹnị iwo ḅo Juda ḅụ kobiri tẹ akpụrụ-warị pike, tẹ Lehi gbaịn tẹ wasama.

¹⁰ Juda ḅẹ owiapụ ma nwẹnị ịn ḅẹẹ, “Ó tiegotẹ owu kẹ wa paka ḅẹ iwo ḅo?” Ịn nwẹnị pakịrị, “Wa iwo ḅo Samụsịnị fịna tẹ ọ̀ kẹ wa mịẹ ḅara kẹ ọ̀ mịẹ ḅẹ ḅom.”

¹¹ Anịtẹso Juda ḅẹ owiapụ sọnọma ẹndẹ oyia asi nwẹnị ideri Ẹtamụ ḅẹ ịkụ mẹ ḅẹ fukuru mẹ mu, tẹ Samụsịnị ḅẹẹ, “Í nimi-a mịnẹ Filisiteniapụ ma mie ḅẹrẹtọn wa pịrịarị? Í tiegotẹ anịtẹrẹmẹ miemẹ tẹ ị́ kẹ wa mịẹ ye mẹ mịẹ?” Ọ̀ nwẹnị ịn pakịrị, “Ịn wẹrịtẹ kẹ ị̀ mịẹ ḅara, mie à kẹ ịn mịẹ ḅara.”

¹² Ịn nwẹnị ọ̀ ḅẹẹ, “Wa ideri-ḅo ị́ fịna ḅẹ ḅom, mịẹtẹ wa ị́ kẹ Filisiteniapụ ma aḅara-ḅio ịn pịrị ḅẹ ḅara.” Samụsịnị nwẹnị ịn ḅẹẹ, “Ọ́ ḅụụ-pikima ị̀ pịrịị mịnẹ ọmịnị ḅarana ị̀ ḅaa ḅịa.”

¹³ Ịn nwẹnị ọ̀ ḅẹẹ, “Ẹn-ẹn; fịna ngẹrị mie wa ị́ fịna tẹ ị́ kẹ ịn pịrị ḅarịye, ịna aḅara ḅio ḅụ wa ị́ ḅaa ḅịa.” Anieḅụ ịn nwẹnị ịwọ-jaja maa ḍiki kẹ ọ̀ fịna, tẹ ịkụ mẹ ḅụ ori ọkị-ḅo.

¹⁴ Ò ḅo Lehi la tẹso, Filisiteniapụ ma nwẹnị oloku-ma ori na bịama ḅẹ ḅo; tẹ KỊNỊNYANAḄỌ ḅe kụrọ nwẹnị ḅo ori ọgọnọ gbana, tẹ ḍigi ma tẹ ori aḅara kọngọ ḅụ sime aị ma nwẹnị ḅo epein tẹ fịnị ḅụụ ḅụ sọ tẹ ye sime-ḅara sime, tẹ ịn kẹ ọ̀ fịna aị ma nwẹnị ori aḅara ḅụ sanị sara.

¹⁵ Ọ̀ nwẹnị gbọrụ yedogi-nama amgba ḅẹ ịwọ-jaja mgbe ḍọkị-ẹrị, tẹ nwẹnị ọ̀ ḅara nụnụ sin tẹ anị saakị ọkị, tẹ ori anị kẹ kịnị maa ẹndẹ oyia asi finji ḅaam.

¹⁶ Tẹ Samụsịnị nwẹnị ḅẹẹ, Gbọrụ yedogi-nama ḅẹ ḅekeke-mgbe mẹ, àrị anị kẹ ịn kẹ sara mịẹ kpolimam; Gbọrụ yedogi-nama ḅẹ ḅekeke-mgbe mẹ, àrị anị kẹ kịnị maa ẹndẹ oyia asi finji ḅaam.

¹⁷ Ori ẹkwẹn fama tẹso, ori ọ̀ ḅara-ḅio simearị mgbe mẹ kẹ gbin ngumam; tẹ ịn nwẹnị anịanga mẹ sịn Ramati-lehi.

¹⁸ Minji ḅuu nwẹnị ọ̀ tarị lama, tẹ ọ̀ nwẹnị KỊNỊNYANAḄỌ ḅe sịn, tẹ ḅẹẹ, “Ị́yẹrị mie ị́ fịrịmẹnjịḅọ ḅe ḅara mẹ ḅụ mị gburo-gburotẹ ḍụa-ḅọrọma mẹ pịrị ḅọ; anịsakị mịọkụ á minji ḅuu pọkọ tarị ḅụ fịtẹ ḅịkị ḅụụ-pẹlẹaapụ ma aḅara ma ḅio sọ ḅẹ?”

¹⁹ Tamụnọ nwẹnị pokolo wararị anga mẹ tẹ Lehi ḅụ simearị anga mẹ kan finji tẹ minji nwẹnị anị ḅụ sara paka-ḅo; tẹ ò minji mẹ ḅuu tẹso, ọ̀ tẹmẹ nwẹnị pịkịma-ḅo ọ̀ ḅụụ sọ, tẹ ịnyọ siin ọ̀ ḅụụ sọm. Anịẹrẹsị ịn kẹ anị kuro ẹrẹ Enakore; anị Lehi ḅụ emi ḅo mịmgba lam.

²⁰ Filisiteniapụ ma ene ma ḅụ Samụsịnị si kụra kẹ ḅẹrẹkọn Izirẹlị pịrịm.