Ḅẹrẹkọn-apụ 14 - FỊAFỊA BAỊBỤLỤ

Samụsịnị Na, Timina Ḅụ Ḅo Ẹrẹḅọtụḅọ Ma Na

¹ Samụsịnị ideri Timina mum, tẹ Timina ḅụ Filisiteni ḅẹ eremịna-awọmẹ ma ḅẹ gbọrụḅọ ẹrịm.

² Anịtẹso ọ̀ nwẹnị iwo ḅo, tẹ ḍuko ọ̀ ḍa na ò iyingi na pịrị, “Á Filisiteni ḅẹ eremịna-awọmẹ ma ḅẹ gbọrụḅọ ẹrịm Timina ḅụ; mịọkụ ọmịnị à sime ḅọ ị̀ pịrịị, àrị árị na sime.”

³ Kụma ọ̀ ḍa na, ò iyingi na nwẹnị ọ̀ ḅẹẹ, “Ị́ amịnapụ ma eremịna-awọmẹ ma ogbo-ḅio, anịanịa wamịna atomi mamgba ogbo-ḅio gbọrụ ẹrẹḅọ sọ ofori, tẹ í mu ḅụụ-pẹlẹa Filisiteniapụ ḅụ ẹrẹḅọ ọkị sime ḅẹ-ḅiiarị?” Kụma Samụsịnị nwẹnị ọ̀ ḍa ḅẹẹ, “Á sime ị̀ pịrịị, kẹ gotẹ ọkọ ḅẹẹarị, árị ị̀ ḅụụ-ḅẹlẹ lamam.”

⁴ Ọ̀ ḍa-na-iyingi-na nimi-a mịnẹ anị KỊNỊNYANAḄỌ ḅe ḅụụ ḅom; kẹ gotẹ ọkọ ḅẹẹarị, ò Filisiteniapụ ma da-paka ḅẹ gbọrụ ḅọkọ ḍọkịarị. Anị sakị mẹ Filisiteniapụ ma ḅẹrẹtọn Izirẹlị pịrịarị.

⁵ Anịtẹso Samụsịnị nwẹnị ọ̀ ḍa na, ò iyingi na ḅụụ sọ tẹ ideri Timina mu, tẹ ọ̀ nwẹnị ḅo Timina ḅẹ kụrọ aḍụọ ma la. Tẹ gbọrụ asambịrịma ọkụkụ nwẹnị ọ̀ da-paka tẹ ekire.

⁶ KỊNỊNYANAḄỌ ḅe kụrọ mẹ nwẹnị Samụsịnị ọgọnọ gbana, tẹ ọ̀ nwẹnị oḅori tụḅọ kanị-kọsịma ḅara kẹ ọ̀ ḅara-ḅio gberie-sọ ofori ḅara kẹ ọkụkụ ḅe kanị-kọsịma. Kụma ọ̀ mịẹ ye mẹ, ò ḍuko ọ̀ ḍa-na-iyingi-na pịrị-a.

⁷ Anịtẹrẹmẹ ọ̀ nwẹnị ideri-mu ẹrẹḅọ ma na ẹkwẹn tẹ á nwẹnị iḅiọkụ Samụsịnị ḅụụ-ḅẹlẹ.

⁸ Sakị kẹlẹ ḅọrọ tẹso, ọ̀ nwẹnị pịkịma á sime ḅẹ mu, tẹ ọ̀ nwẹnị ọkụkụ ḅe fịtẹ oju mẹ ḍiki ḅẹ pịkị akaka pịrị. Ori ẹrịm akama ogbo na ḅẹm na ọkụkụ ḅe oju mẹ ḅụ gbori tẹ emii.

⁹ Ọ̀ nwẹnị ḅẹm mẹ kpọrọrọ siin ọkị ori aḅara-ḅio sụa, tẹ nwẹnị anị taḅa ma-mu; tẹ ọ̀ nwẹnị ḅo ọ̀ ḍa na, ò iyingi na la, tẹ kẹlẹ kẹ ịn pịrị, tẹ ịn taḅam. Kụma ò ḍuko ịn pịrị-a mịnẹ ọkụkụ ḅe fịtẹ oju mẹ ḅụ ọ̀ ḅẹm mẹ siin ọkịm.

¹⁰ Ọ̀ ḍa ideri ẹrẹḅọ ma dama-mum, tẹ Samụsịnị nwẹnị anịjụ kopini afịaị sọ; gbala anị ḅara mie asambịrịma owiapụ ma mịẹ-mịẹ ḅara ẹrẹsị.

¹¹ Tomi ma ori ẹrị tẹso, ịn nwẹnị ọ̀ ḅụụ-sọnsọnma ḅẹ kịnị asuei ọkị-ḅo ọ̀ pịrị.

¹² Samụsịnị nwẹnị ịn ḅẹẹ, “Yee à sịḅịḅio pikirima gbọrụ ḅii-ḅịḅị kẹ ó gbela mịọkụ; ọmịnị inetẹ kopini afịaị sọnọma aḍin ma ḅụ anị puu-finji ị̀ pịrị-pịrị, à sịnịnị opu akapa suei na, alalị fị opu akapa suei na kẹ ọ́ pịrị ḅa;

¹³ kụma ọmịnị inetẹ anị puu-finji ị̀ pịrị-a ḅẹḅẹ anịrẹ ọmịnị sịnịnị opu akapa suei na, alalị fị opu akapa suei na kẹ ị̀ pịrị ḅa.” Ịn nwẹnị ọ̀ ḅẹẹ, “Ị́ sịḅịḅio pikirima ḅii-ḅịḅị mẹ ḍuko, tẹ wa anị naa.”

¹⁴ Ọ̀ nwẹnị ịn ḅẹẹ: Pẹị-pẹị ḅọ ḅẹ ḅụụ, taḅa-taḅa ye paka-ḅom. Kụrọḅọ ḅe ḅụụ, mẹnị-mẹnị ye paka-ḅom. Tẹra ḍin sakị ḅụ ini inetẹ sịḅịḅio pikirima ḅii-ḅịḅị mẹ puu-finji-a.

¹⁵ Inia aḍin karama ene ḅụ, ịn nwẹnị Samụsịnị ta ḅẹẹ, “Oḅori kẹ í di sịn tẹ ọ̀ sịḅịḅio pikirima ḅii-ḅịḅị mẹ puu-finji wa pịrị, anieofori wa fịnị kẹ ị́yẹrị na, ị́ ḍa warị na ḅụ sụa dọkịma ḅa. Ị́ wamịnị igoinma ḅẹ tẹ wa sịn mịanga ḅo?”

¹⁶ Samụsịnị ta nwẹnị ọ̀ tọrọkọ tẹmẹ la ḅara kẹ owu tẹ ọ̀ ḅẹẹ, “Ḍiki-ḅioḅu mie í ì ḍiki-ḅioḅuarị ye, ị́ ị̀ ḅẹlẹma-a; ị́ sịḅịḅio pikirima ḅii-ḅịḅị kẹ ị̀ ama ḅẹ apụ ḅii tẹ, kụma ị́ anị puu-finji ị̀ pịrị-a.” Tẹ ọ̀ nwẹnị á ḅẹẹ, “Ḍikii, amụ à ḍuko ị̀ ḍa, anịanịa, ì iyingi pịrị-a. Tiegotẹ à ḍuko ị́ pịrị ḅẹ?”

¹⁷ Sọnọma aḍin ma tẹ ịna kopini afịaị mẹ ọkị sakị mẹ ḅụ á tẹmẹ-la ḅara kẹ ọ̀ tọrọkọ owum tẹ sọnọma aḍin karama ene mẹ ḅụ ọ̀ nwẹnị ḍuko á pịrị gbala árị ọ̀ ḅụụ-fụkama kụrọmam ẹrẹsị. Anịtẹso á nwẹnị sịḅịḅio pikirima ḅii-ḅịḅị mẹ ḍuko arị ama ḅẹ apụ pịrị.

¹⁸ Anieḅụ sọnọma aḍin karama ene mẹ ḅụ tẹrẹmẹ ịrụa mẹ tuuideri, opu ama mẹ ḅẹ owiapụ ma nwẹnị ọ̀ ḅẹẹ, “Tiye mẹnị-mẹnị ḅẹm nẹngị? Tiye kụrọ ọkụkụ nẹngị?” Samụsịnị nwẹnị ịn ḅẹẹ, “Ọmịnị ị̀ asambịrịma nambulo ḅe kẹ kiri mẹ soku-a namịna, mimgbe ọmịnị ị̀ sịḅịḅio pikirima ḅii-ḅịḅị mẹ ḍọkị pakama-ḅo ḅịa.”

¹⁹ KỊNỊNYANAḄỌ ḅe kụrọ mẹ nwẹnị ḅo ori ọgọnọ gbana, tẹ ọ̀ nwẹnị ideri Asịkẹlọnị mu, tẹ ama mẹ ḅẹ owiapụ asuei ḅaa tẹ ịna aị fọịn ọkị, tẹ alalị fị opu akapa ma kẹ anị apụ ma tẹ sịḅịḅio pikirima ḅii-ḅịḅị mẹ ḍuko apụ ma pịrịm. Kụrọ ịganị ḅụ ọ̀ nwẹnị ọḅụ pịkị so ọ̀ ḍa warị mu.

²⁰ Ịn nwẹnị Samụsịnị ta ma kẹ ori ikiaḅọ tẹ ọ̀ ḅụụ ḅụ iḅitẹịn owiḅọ pịrị.