Ḅẹrẹkọn-apụ 13 - FỊAFỊA BAỊBỤLỤ

Samụsịnị Iyi Mẹ

¹ Izirẹlịapụ ma pịkị siin KỊNỊNYANAḄỌ ḅẹ ḍiki-tọrụ ḅụ siye mịẹm; tẹ KỊNỊNYANAḄỌ ḅe kụra mesi kẹ ịn kẹ Filisiteniapụ ma ḅara-ḅio ịn pịrịm.

² Danị ḅẹ apụ ma furo ḅụ, Zora ḅẹ gbọrụ owiḅọ simem, ori ẹrẹ Manoha; ọ̀ ta furo pụụn wararị tẹ ini awọ iyi-a.

³ KỊNỊNYANAḄỌ ḅe enjẹlị nwẹnị ḅụụ-pakamaa ḍie, tẹ á ḅẹẹ, “Ḍikii, í furo pụụn wararị tẹ ị́ awọ iyi-a, kụma í sime-kọn tẹ gbọrụ owiḅọtụḅọ iyi ḅa.

⁴ Anịẹrẹsị ị́ ḅụụ ẹbịị, tẹ iru, anịanịa ọfịrị-iru ḅuu ma, pịkị fịafịa-a gberie-sọ fị anịanịa pẹị ma,

⁵ kẹ gotẹ ọkọ ḅẹẹarị, ḍikii, ị́ sime-kọn tẹ gbọrụ owiḅọtụḅọ iyi ḅa. Gbọrụ sịḅị-sẹịn ogie sọ kẹ ọ̀ sịḅị sẹịn ma, kẹ gotẹ ọkọ ḅẹẹarị, tụḅọ ḅe ḅụụ saakị Tamụnọ piri tẹ fịrị mẹnjị ọ̀ pịrị gotẹ ye karị amịna ọgọnọ gbanatẹ ḅọ sọ ḅa, ori iyi gbọrụ sakị ḅụ; anịsakị ọ̀ saakị Filisiteniapụ ma ḅara ḅụ Izirẹlị ḍụa-ḅọrọma ḅa.”

⁶ Anịtẹso ẹrẹḅọ ma nwẹnị ḅo ḍuko á di pịrị, “Gbọrụ Tamụnọ tomḅọ ị̀ ḍọkụma-ḅom, anịsakị ọ̀ tọrụkuḅu mẹ Tamụnọ enjẹlị tọrụkuḅu sime-ḅara simem, tẹmẹ-naịn-naịnma lamarị; arị ò sime tẹ ḅo anga kẹ ò gbela-a, ọ̀ pịkị ori ẹrẹ go ị̀ pịrị-a.

⁷ Kụma ori ị̀ ḅẹẹm, ‘Ḍikii, ị́ sime kọn tẹ gbọrụ owiḅọtụḅọ iyi ḅa; anieḅụ iru, anịanịa ọfịrị-iru ḅuu ma; anịsakị fịafịa-a gberie-sọ fị anịanịa pẹị ma, kẹ gotẹ ọkọ ḅẹẹarị, tụḅọ ḅe ḅụụ saakị Tamụnọ pịrị tẹ fịrịmẹnjị Tamụnọ pịrị gotẹ ye karị amịna ọgọnọ gbanatẹ ḅọ sọ ḅa ori iyi gbọrụ sakị ḅụ ọkị mu ọ̀ fịị ene la.’ ”

⁸ Anịtẹso Manoha nwẹnị tẹmẹ la ḅara kẹ KỊNỊNYANAḄỌ ḅe ḅara ḅụ ḅii, tẹ ḅẹẹ, “Yei KỊNỊNYANAḄỌ, arị ị́ tẹkẹm, yee Tamụnọ tomḅọ ḅe tẹ ị́ fịrịma ḅọ ḅe siin wa ḍọkụma-ḅo, tẹ wa owiḅọtụḅọ ḅe tẹ iyi ḅẹ tụḅọ ḅe na mịẹ ḅarịye kẹ wa toluma.”

⁹ Tamụnọ Manoha pọkọ pokim, tẹ Tamụnọ enjẹlị ḅe siin ẹrẹḅọ ma ḍọkụma-ḅom, á piri-ḅio lẹgị-sime wararị ogbo; kụma á di Manoha na arị na ofori.

¹⁰ Ẹrẹḅọ ma nwẹnị fọnya ḅara kẹ mangị mu ḍuko á di pịrị, “Ḍikii, owiḅọ ḅe tẹ osi eneḅaka ḅụ ị̀ ḍọkụma-ḅo ḅọ ḅe pịkị ḅụụ pakama ị̀ ḍie tẹ.”

¹¹ Tẹ Manoha nwẹnị saakị tẹ ọ̀ ta ḍuka mu, tẹ ḅo owiḅọ ḅe la tẹ ọ̀ ḅẹẹ, “Owiḅọ ḅe tẹ ẹkwẹn kẹ ma ẹrẹḅọ ma pịrị ḅọ ị́yẹrị?” Ọ̀ nwẹnị pakịrị, “Yẹrịị.”

¹² Manoha nwẹnị ḅẹẹ, “Mịọkụ ị́ ẹkwẹn-aḅịḅị ma ḅo karakaraye sọ sakị, tụḅọ ḅe ḍumo ḅụ ò ye-mịẹ-ḅara tọ-ḅara sime ḅẹ, anịsakị ọ̀ tọ kọrịnama kọrị ḅẹ?”

¹³ KỊNỊNYANAḄỌ ḅe enjẹlị ḅẹ nwẹnị Manoha pakịrị, “À kẹ ẹrẹḅọ ma ḅẹẹ aị mamgba, anieḅụ yee árị á ḅụụ kịẹn.

¹⁴ Ḅẹẹye-ḅẹẹye tẹ girepu-ḍụọ ḅụ paka-ḅo ye goyegoye á fị ma, yee árị iru anịanịa ọfịrị-iru ḅuu ma, anịanịa ḅẹẹye-ḅẹẹye tẹ fịafịa-a ye fị anịanịa pẹị; à tọn á pịrị aị mamgba yee árị arị kẹ elekima sụa.”

¹⁵ Manoha nwẹnị KỊNỊNYANAḄỌ ḅe enjẹlị ḅe ḅẹẹ, “Àrị ị́ tẹkẹm, yee wa kẹlẹ kẹ ị́ wẹrị, tẹ gbọrụ kala oḅori ḅaa tẹ kẹ igoni kẹ ị́ kọn.”

¹⁶ Kụma KỊNỊNYANAḄỌ ḅe enjẹlị ḅe nwẹnị Manoha ḅẹẹ, “Ị́ ị̀ kẹ wẹrị wẹrị, àrị í fịye mẹ fị ḅịa; kụma ị́ nwẹnị dọkịma agba mịẹ ḅẹ tẹlẹma ḅẹḅẹ, anị mịẹ KỊNỊNYANAḄỌ ḅe pịrịị.” (Anị kẹ gotẹ ọkọ mịẹarị, Manoha nimi-a mịnẹ ori anie KỊNỊNYANAḄỌ ḅe enjẹlị.)

¹⁷ Manoha nwẹnị KỊNỊNYANAḄỌ ḅe enjẹlị ḅe gbela, “Tiye ị́ ẹrẹ, mịẹtẹ ị́ ẹkwẹn-aḅịḅị ma ḅo karakaraye sọ sakị, wa kụn kẹ ị́ pịrị ḅẹ ḅara?”

¹⁸ KỊNỊNYANAḄỌ ḅe enjẹlị ḅe nwẹnị ọ̀ gbela, “ị́ tiegotẹ ị̀ ẹrẹ kẹ ị̀ gbelarị, ị́yẹrị sọ ẹrịarị mịnẹ anị ḅụụ-gbiripumarị?”

¹⁹ Anieḅụ Manoha kala oḅori ḅe na ọ̀ ḅụụ sụa agbamịẹ sịnmgbọlụ mẹ na ọkịm, tẹ anị kẹ ịkụ mẹ ọgọnọ agba mịẹ ori KỊNỊNYANAḄỌ ḅe tẹ ḅụụ-gbiripuma-aị kọrịarị ḅọ ḅe pịrịm.

²⁰ Tẹ fịnị-ḅẹlẹ mẹ agbamịẹ-anga mẹ ḅụ kọrị iwo so da-mu tẹso, KỊNỊNYANAḄỌ ḅe enjẹlị ḅe nwẹnị agbamịẹ-anga mẹ ḅẹ fịnị-ḅẹlẹ mẹ ḅio iwo, Manoha na, ọ̀ ta na bio-bioma ḍikiarị ogbo; tẹ ịn nwẹnị ịna atọrụ-kuḅu kẹ ḅịkị kiri mẹ ḅio koro.

²¹ KỊNỊNYANAḄỌ ḅe enjẹlị ḅe ḅarị jen-maaịn kẹ ḅụụ kẹ Manoha na, ọ̀ ta na ḍie-a. Anịtẹrẹmẹ Manoha nimim mịnẹ ori anie KỊNỊNYANAḄỌ ḅe enjẹlị.

²² Manoha nwẹnị ọ̀ ta ḅẹẹ, “Tụkụma ḅara ḅụ wa fịị ḅa, kẹ gotẹ ọkọ ḅẹẹarị, wa tọrụngbọ kẹ Tamụnọ ẹrị tẹ.”

²³ Kụma ọ̀ ta nwẹnị ọ̀ ḅẹẹ, “KỊNỊNYANAḄỌ ḅe wa ḅaa ḅẹ-ḅii namịna, mimgbe ọ̀ wamịna aḅara ḅụ dọkịma-agba na, mgbọlụ agba na ọkị ḅịa, anịanịa mịna aị mamgba kẹ wa ḍie, anịanịa mịọkụ nwẹn sime aị ḍuko pakama wa pịrị.”

²⁴ Ẹrẹḅọ ma nwẹnị gbọrụ owiḅọtụḅọ iyi, tẹ Samụsịnị kẹ ẹrẹ kẹ ò kuro; anịsakị tụḅọ ḅe ḍụḅam, tẹ KỊNỊNYANAḄỌ ḅe ò bomam.

²⁵ KỊNỊNYANAḄỌ ḅe kụrọ mẹ nwẹnị saakị ịnyọ kẹ ọ̀ pịrị tẹ ò sukuruma Danị Akpụrụ-warị ḅio Zora na Ẹsịtahọlị na ogboku.