Ḅẹrẹkọn-apụ 12 - FỊAFỊA BAỊBỤLỤ

Jẹfụta Iferemu Ḅẹ Apụ Na Sọ Kamụ

¹ Iferemu ḅẹ owiapụ ma ọmụgbin ḅara kẹ ḅụụ tẹlẹmam, tẹ nwẹnị saḅa-ḅọrọ Zefọnị mu tẹ Jẹfụta ḅẹẹ, “Í tiegotẹ saḅa-ḅọrọ mu Amọnị ḅẹ apụ ma na owu sọ tẹ wa sịn tẹ wa ị́ ḅụụ sọ tẹ mu-a? Wa ị́ ọgọnọ fịnị kẹ ị́ warị ḅụ sụa dọkịma ḅa.”

² Jẹfụta nwẹnị ịn ḅẹẹ, “Yẹrị na, ị̀ atomi na, Amọnị ḅẹ apụ ma na kụrọ lamatẹ kamụ-sọm; tẹ àrị ọ́ sịn sakị ó ḅo ịna aḅara-ḅio ị̀ ḍụa-ḅọrọma-a.

³ Tẹ àrị ọmịnị ị̀ ḍụa-ḅọrọma ḅịa mẹ ẹrị tẹso, à fịị kẹ ị̀ sịḅị ọgọnọ gbanam, tẹ saḅa-ḅọrọ mu owu kẹ Amọnị ḅẹ apụ ma pakam; tẹ KỊNỊNYANAḄỌ ḅe ịn kẹ ị̀ ḅara-ḅio ḅụ ị̀ pịrịm; ọmịnị anịtẹrẹmẹ tiegotẹ mịmgba ị̀ ḍọkụma-ḅo tẹ owu kẹ ị̀ paka ḅẹ ḅo?”

⁴ Anịtẹso Jẹfụta nwẹnị Gilẹdị ḅẹ owiapụ mamgba kobiri tẹ Iferemu na owu sọ; tẹ Gilẹdị ḅẹ apụ ma nwẹnị Iferemu ḅaa, anị kẹ gotẹ ọkọ mịẹ ye, Iferemu ḅẹ apụ ma ḅẹẹm, “Ọmịnị Gilẹdị ḅẹ apụ, ọmịnị anie Iferemu ḅẹ karakara nimi-a mangị-omoni, Iferemu na Manasẹ na ogbo-ḅio.”

⁵ Gilẹdị ḅẹ apụ ma nwẹnị Jodanị mẹ ḅẹ kpongbo mịẹtẹ ḅụọ kẹ mẹnjị saḅa anga ma ọkị tẹ Iferemu ḅẹ apụ ma ẹngbẹsẹ. Anịsakị Iferemu ḅẹ mangị-omoni ma ḅụụ ḅẹḅọ-ḅẹḅọ ḅẹẹm, “Yee á mẹnjị saḅa,” nwẹn ḅẹẹ ḅẹẹ, Gilẹdị ḅẹ owiapụ ma ọ̀ ḅẹẹm, “ị́yẹrị kọkọ Iferemu ḅẹ ḅọ?” Ọ̀ nwẹnị “Ẹn-ẹn” ḅẹẹ ḅẹẹ,

⁶ ini ọ̀ ḅẹẹm, “ọkọ ḅẹḅẹ Sịhịbọlẹtị sịịn,” kẹ gotẹ ọkọ ḅẹẹarị, ori inetẹ anị ḅẹẹ kurama ḅịa, ọ̀ nwẹnị “Sịbọlẹtị” ḅẹẹ; anịtẹso ọkụma, ini ori ọlọ tẹ Jodanị mẹ ḅụ kpongbo mịẹ tẹ ḅụọ kẹ mẹnjị-saḅa anga ma ḅụ ọ̀ ḅaa tẹ. Anịsakị mẹ ḅụ anị anga Iferemu ḅẹ apụ ma ḅụụ fịị apụ kịnị sọnọ apuku, sọnọ ẹndẹ finji.

⁷ Jẹfụta sonio akụra kẹ ḅẹrẹkọn Izirẹlị pịrịm. Anịtẹso Jẹfụta, Galẹdị ḅẹ ḅọ ḅe fịịm, tẹ ini ori opu ama ḅụ ò ḍiḅim Gilẹdị ḅụ.

Ibisayị Na, Ẹlọnị Na, Abidọnị Na Ḅẹrẹkọn Izirẹlị Pịrịm Ibizanị Na Ẹlọnị Na Abidọnị Na Ḅẹrẹkọn Izirẹlị Pịrịm

⁸ Jẹfụta ḅọrọ tẹso, Bẹtịlịhẹmụ ḅẹ Ibizanị ḅẹrẹkọn Izirẹlị pịrịm.

⁹ Ori owiapụ-awọmẹ asuei na eremịna-awọmẹ asuei na iyim. Ori eremịna-awọmẹ asuei ma kẹ ja ama ḅụ ịya pịrị pakamam, tẹ ja anga ḅụ eremịna-awọmẹ asuei ịya ḅo ori owiapụ-awọmẹ pịrịm. Ọ̀ sọnọma kụra kẹ ḅẹrẹkọn Izirẹlị pịrịm.

¹⁰ Anịtẹso Ibizanị fịịm, tẹ ịn Bẹtịlịhẹmụ ḅụ ò ḍiḅim.

¹¹ Ibizanị ḅọrọ tẹso, Ẹlọnị, Zẹbulọnị ḅẹ ḅọ ḅẹ ḅẹrẹkọn Izirẹlị pịrịm; tẹ ori oyia akụra kẹ ḅẹrẹkọn Izirẹlị pịrịm.

¹² Anịtẹso Ẹlọnị, Zẹbulọnị ḅẹ ḅọ ḅe fịịm tẹ ini Ahijalọnị, Zẹbulọnị ḅẹ ama ḅio ò ḍiḅim.

¹³ Ẹlọnị ḅọrọ tẹso, Abidọnị, Piratọnị ḅẹ Hilẹlị owiḅọtụḅọ ḅe ḅẹrẹkọn Izirẹlị pịrịm.

¹⁴ Ori owiapụ-awọmẹ amesi na taa-owiapụ-awọmẹ asuei na iyim, inima tẹ yedogi-anama tesi ọgọnọ dọkụ apụ ma tẹ ò ninea akụra kẹ ḅẹrẹkọn Izirẹlị pịrịm.

¹⁵ Anịtẹso Abidọnị, Piratọnị ḅẹ Hilẹlị owiḅọtụḅọ ḅe fịịm,, tẹ ini Iferemu, Amalẹkị ḅẹ apụ ma tụndụ ọgọnọ ḅẹ opu sịẹ mẹ ḅio Piratọnị ḅụ ò ḍiḅim.