Ḅẹrẹkọn-apụ 11 - FỊAFỊA BAỊBỤLỤ

¹ Mịọkụ Jẹfụta Galẹdị ḅẹ ḅọ anie gburo-gburotẹ owu-kụrọnịḅọ, kụma ori anie sẹfị gbọrụ ẹrẹḅọ iyi owiḅọtụḅọ. Galẹdị anie Jẹfụta ḍa.

² Gilẹdị ta sọ owiapụ-awọmẹ iyi ọ̀ pịrịm; ọ̀ ta ma owiapụ-awọmẹ ḍụḅa tẹso, ịn nwẹnị Jẹfụta sukuruma pakama, tẹ ọ̀ ḅẹẹ, “Wamịna ḍaḅọ warị-ḅio ị́ ḍuu fị ḅịa, kẹ gotẹ ọkọ ḅẹẹarị, ị́yẹrị anie jen ẹrẹḅọ iyi owiḅọtụḅọ,”

³ Anịtẹso Jẹfụta nwẹnị ori owiapụ-amịnapụ ma ḅụ ḍumo-mangị kọn, tẹ Tọbụ nwẹn-sịn ama ḅụ sime; tẹ papaa ngoro-ngoro-atomi nwẹnị kobiri mu Jẹfụta gbori-ikelemakoro, tẹ ọ̀ ḅụụ sọ tẹ mu ama gbaịn gbaịntẹ fọịn.

⁴ Sakị kẹlẹ ḅọrọ tẹso, Amọnị ḅẹ apụ ma nwẹnị ọmụ kẹ Izirẹlị da-paka.

⁵ Amọnị ḅẹ apụ ma nwẹn kẹ ọmụ kẹ Izirẹlị da-paka tẹso, Gilẹdị ḅẹ omongiapụ ma nwẹnị mu Tọbụ ama mẹ ḅụ Jẹfụta ọkị-ḅo ḅẹ mu.

⁶ Ịn nwẹnị Jẹfụta ḅẹẹ, “Ḅo wamịna tọrọkọ-tarịḅọ sọọ, mịẹtẹ wa Amọnị ḅẹ apụ ma na owu sọ ḅẹ ḅara.”

⁷ Kụma Jẹfụta nwẹnị Gilẹdị ḅẹ omongiapụ ma ḅẹẹ, “Ọmịnị ị̀ ḍiki-ḅioḅu tẹ ị̀ ḍa warị ḅụ ị̀ dee pakama-a? Ó tiegotẹ mịọkụ ó mu ḅụụ-fụka ḅio sọ tẹso, ọkụma ị̀ ḍọkụma-ḅo?”

⁸ Gilẹdị ḅẹ omongiapụ ma nwẹnị Jẹfụta ḅẹẹ, “Anie wa gotẹ mịọkụ pịkị ị̀ da tẹ ye, mịẹtẹ ị́ wamịnị na so tẹ mu Amọnị ḅẹ apụ ma na owu sọ ḅẹ ḅara tẹ wamịnị Gilẹdị ḅụ sime apụ mamgba kẹ sịḅịdaḅọ sọọ.”

⁹ Jẹfụta nwẹnị Gilẹdị ḅẹ omongiapụ ma ḅẹẹ, “Ọ́ nwẹnị arị Amọnị ḅẹ apụ ma na owu sọ gotẹ ị̀ kẹ sin ama ḅo tẹ KỊNỊNYANAḄỌ ḅe ịn kẹ ì pịrị-pịrị, arị ọmịna sịḅịdaḅọ sọ ḅa.”

¹⁰ Gilẹdị ḅẹ omongiapụ ma nwẹnị Jẹfụta ḅẹẹ, “KỊNỊNYANAḄỌ ḅe wamịna ogboku ogbo-sịẹḅọ sọ ḅa, tụkụma ḅara ḅụ wa ị́ ḅẹẹ ḅara mịẹ ḅa.”

¹¹ Anieḅụ Jẹfụta Gilẹdị ḅẹ omongiapụ ma ḅụụ sọ tẹ mum, tẹ tomi ma ọ̀ kẹ sịḅịdaḅọ na, ịn kẹ tọrọkọ-tarịḅọ na sọmam; tẹ Jẹfụta, Mizipa ḅụ KỊNỊNYANAḄỌ ḅe tọrọkọ ori ẹkwẹn mamgba kọnm.

¹² Anịtẹso Jẹfụta nwẹnị oku-mẹnjịapụ kẹ Amọnị ḅẹ apụ ma amadaḅọ ḅe fịrịma tẹ ḅẹẹ, “Àrị ị́nịna tọ ịgbanịya nyana tẹ ị́ ị̀ ḍọkụma-ḅo tẹ ị̀ ama na owu sọ ḅẹ?”

¹³ Amọnị ḅẹ apụ ma amadaḅọ ḅe nwẹnị Jẹfụta oku-mẹnjịapụ ma pakịrị, “Anị kẹ gotẹ ọkọ pakarị, Izirẹlị Ijiputi ḅụ paka-ḅoarị sakị ini ị̀ ama ḅụ Anọnị mẹ ḅụ ọkị mu Jabọkụ mẹ la, tẹ mu Jodanị mẹ la ọkịm; anịẹrẹsị dein ḅara ḅụ mịọkụ anị pịkịma ị̀ pịrịị.”

¹⁴ Jẹfụta nwẹnị siin oku-mẹnjịapụ kẹ Amọnị ḅẹ apụ ma amadaḅọ ḅe fịrịma,

¹⁵ tẹ ọ̀ ḅẹẹ, “Mị-ḅara mịẹ Jẹfụta ḅẹẹ ḅara: Izirẹlị Mohabụ ḅẹ ama mẹ, anịanịa Amọnị ḅẹ apụ ma ama mẹ ọkị so-a,

¹⁶ kụma ini Ijiputi ḅụ ḅo la sakị, ịkpa mẹ mie ịn mẹnjị tolu mu Awụ Tọrụ mẹ la tẹ ḅo Kadẹsị la ye.

¹⁷ Izirẹlị nwẹnị anịtẹrẹmẹ oku-mẹnjịapụ kẹ Idọmụ ḅẹ amadaḅọ fịrịma, tẹ ḅẹẹm, ‘Wa ị́ tẹkẹm, minini wa pịrị tẹ wa ị́ ama ḅio mẹnjị tolu’, kụma Idọmụ ḅẹ amadaḅọ poki ḍụkụ-a. In nwẹnị pịkị Mohabụ ḅẹ amadaḅọ sọ dama-mu, kụma ọ̀ minini-a. Anieḅụ Izirẹlị Kadẹsị ḅụ simem.

¹⁸ Anịtẹso ini ịkpa mẹ mẹnjị-tolum, tẹ mẹnjị Idọmụ ḅẹ ama mẹ na, Mohabụ ḅẹ ama mẹ na ikelema-koro tẹ ḅo Mohabụ ḅẹ ama mẹ ḅẹ ịrụa-saakịarị-anga mẹ ḅụ Amọnị mẹ ḅẹ osi pakịrị anga mẹ lam, tẹ akpụrụ-warị pike tẹ simem; kụma ịn mẹnjị Mohabụ ye-yọ sọ-mu-a, kẹ gotẹ ọkọ ḅẹẹarị, Anọnị mẹ anie Mohabụ oke.

¹⁹ Izirẹlị nwẹnị anịtẹrẹmẹ oku-mẹnjịapụ kẹ Siyọnị Amọrayịtị apụ ma amadaḅọ, Ẹtịlọnị ḅẹ amadaḅọ ḅe fịrịma; tẹ Izirẹlị nwẹnị ọ̀ ḅẹẹ, ‘Wa ị́ tẹkẹm, minini wa pịrị wa ị́ ama ḅio mẹnjị tolu so wamịna opu sịẹ mu.’

²⁰ Kụma Siyọnị Izirẹlị minini-a ò ye-yọ ḅụ mẹnjị tolu mẹ anieḅụ Siyọnị ori atomi mamgba kobiri ḅo gbolomam, tẹ Jehazi ḅụ akpụrụ-warị pike tẹ Izirẹlị na owu sọm.

²¹ Tẹ KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, nwẹnị Siyọnị na, ori atomi mamgba na kẹ Izirẹlị ḅara ḅio ḅụ ọ̀ pịrị; tẹ ini ịn nẹngịmam; mị-ḅara mie Izirẹlị kẹ Amọrayịtị apụ ma tẹ anị opu sịẹ mẹ ḅụ sime apụ ma ama mẹ ọkị nyana ḅara.

²² Ịn nwẹnị Amọrayịtị apụ ye-yọ mẹmgba, Anọnị Tọrụ mẹ ḅụ ọkị mu Jabọkụ la, pịkị ịkpa mẹ ḅụ ọkị mu Jodanị Tọrụ mẹ la ọkị nyanam.

²³ Anieḅụ KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, mie Izirẹlịapụ ma tọrọkọ Amọrayịtị apụ ma dee-siin ye; tẹ ị́ ḅo arị ọkị nyana ḅẹ tẹ?

²⁴ Ị́ oru-tamụnọ Kẹmosi kẹ ị́ pịrị ye ị́ ọkị í nye sọma ḅịa? Anịsakị KỊNỊNYANAḄỌ wamịna Tamụnọ ḅe wamịna tọrọkọ dee-siin tẹ kẹ wa pịrị ye pịrị ye, wa ọkị nyana ḅa.

²⁵ Mịọkụ ị́ kẹ iḅi Balakị, Zipọ owiḅọtụḅọ, Mohabụ ḅẹ amadaḅọ ḅe nẹngị ye emi? Jen ene ori Izirẹlị na ye-nụnụa, anịanịa mu ini na ọmụgbin tẹ?

²⁶ Izirẹlị kụra jeia si kẹ Ẹsịbọnị na arịḅẹ kala-ama ma na, Arowa naarị ḅẹ kala-ama ma na, opu ama mamgba tẹ Anọnị Tọrụ agara ma ḅụ sime aị ma ḅụ sime sakị ị́ tiegotẹ anị sakị mẹ ḅụ siin arị ọkị nyana-a?

²⁷ Ọkọẹrẹsị amụ à si kẹ ị́ mịẹ-a, tẹ ị́ iri ye kẹ ị̀ mịẹ tẹ ọmụ kẹ ị̀nịna gbin ḅụ; KỊNỊNYANAḄỌ ḅe, ḄẸRẸKỌNḄỌ ḅe, mịmgba ḅụ tọn-pẹlẹẹ, Izirẹlịapụ ma na, Amọnị ḅẹ apụ ma na ogboku.”

²⁸ Kụma Amọnị ḅẹ apụ ma amadaḅọ ḅe oku mẹ tẹ Jẹfụta kẹ ọ̀ fịrịma ye mẹ poki tẹ kẹ ye mịẹ-a.

Jẹfụta Minini Ịlọ

²⁹ Anịtẹso KỊNỊNYANAḄỌ ḅe kụrọ mẹ ḅo Jẹfụta ọgọnọ gbanam, tẹ ọ̀ nwẹnị Gilẹdị na, Manasẹ na mẹnjị tolu ḅọrọ so Gilẹdị ḅẹẹ Mizipa mu, anịsakị Gilẹdị ḅẹ Mizipa ḅụ ọ̀ mẹnjị ḅọrọ Amọnị ḅẹ apụ ma ḍọkụma-mum.

³⁰ Jẹfụta nwẹnị ịlọ minini KỊNỊNYANAḄỌ ḅe pịrị tẹ ḅẹẹ, “Ị́yẹrị nwẹnị Amọnị ḅẹ apụ ma kẹ ị́ ḅara-ḅio ḅụ ị́ pịrịm ḅẹḅẹ,

³¹ anịrẹ ḅẹḅọ-ḅẹḅọ tẹ arị Amọnị ḅẹ apụ ma ḅụ owu-ḅara-iḅi ḅụ pịkịma-ḅo sakị ị̀ warị mẹ ḅẹ aḅọkọ ma ḅụ tarị paka-ḅo ị̀nịna bịama ḅẹ ḅọ goḅọ-goḅọ KỊNỊNYANAḄỌ ḅẹ nye sọ ḅa, anịsakị àrị mḅọ kẹ dọkịma-agba mịẹ ḅa.”

³² Anieḅụ Jẹfụta saḅa-ḅọrọ Amọnị ḅẹ apụ ma ḍọkụma-mum owu kẹ ịn paka ḅẹ ḅara; tẹ KỊNỊNYANAḄỌ ḅẹ ịn kẹ ọ̀ ḅara-ḅio ḅụ ọ̀ pịrịm.

³³ Ọ̀ nwẹnị Arowa ḅụ ịn ḅaa ma-mu Miniti akaka la, opu ama ma ḅẹ si, pịkị mu Ebẹlị-keramimu jụjụ-ḅio la, ḅẹlẹma gburo-gburotẹ kịnị ḅaa ḅara ḅụ. Mị-ḅara mie Amọnị ḅẹ apụ ma kẹ Izirẹlịapụ ma tọrọkọ sịḅị-tuu ḅara.

Ịn Jẹfụta Ẹrẹḅọtụḅọ Kẹ Agba Mịẹm

³⁴ Anịtẹso Jẹfụta ọ̀ warị ḅom Mizipa ḅụ. Ḍiki kụma, ori ẹrẹḅọtụḅọ mie akwa farị-farị sẹkị ma-ḅo ori na bịama ḅẹ paka-ḅo yee; árị ngẹrị mie tụḅọ tẹ ori iyi ḅọ; á sikima jen owiḅọtụḅọ anịanịa ẹrẹḅọtụḅọ sọ ofori.

³⁵ Tẹ ori árị ẹrị tẹso, ọ̀ nwẹnị ori akapa kan, tẹ ḅẹẹ, “Yaayoo, ị̀ ẹrẹḅọtụḅọ! Ị́ ị̀ kalama lama tẹẹ; anịsakị ị́ ḅo gburo-gburotẹ ḅụụ-fụka pakama-ḅo ị̀ pịrị ḅọ sọ tẹẹ; kẹ gotẹ ọkọ ḅẹẹarị, àrị ị̀ ḅịḅị finji tẹ ịlọ minini KỊNỊNYANAḄỌ ḅe pịrị tẹẹ, anịsakị à ḅarị à minini tẹ ịlọ mẹ pịkịma ọkị ḅịa.”

³⁶ Á nwẹnị ọ̀ ḅẹẹ, “Ị̀ ḍa, ị́ nwẹnị ị́ ḅịḅị finji kẹ KỊNỊNYANAḄỌ ḅe pịrị tẹ ḅẹḅẹ, ị́ wẹrịtẹ ị́ ḅịḅị ḅụ ẹkwẹn pakama tẹ ḅara mẹ kẹ ị̀ mịẹ, mịọkụ mẹ tẹ KỊNỊNYANAḄỌ ḅe ị́nịna fịya-a apụ, Amọnị ḅẹ apụ ma ḅụụ ḅụ gbẹẹfị ḅii ị́ pịrị tẹ ye mẹ ḅụ.”

³⁷ Á nwẹnị á ḍa ḅẹẹ, “Minini tẹ miemẹ mịẹ ị̀ pịrịị, maa akalụ kẹ ị̀ wẹrịsoo, mịẹtẹ à mu tụndụ ma ọgọnọ ị̀ ikiapụ na mẹnjị ikelekele tẹ ị̀ ḅụụ-gboloa mẹ kururu tẹ owu pakama.”

³⁸ Ọ̀ nwẹnị ḅẹẹ, “Muu.” Tẹ ọ̀ nwẹnị maa akalụ kẹ à fịrịma pakama, tẹ árị árị ikiapụ na som, tẹ tụndụ ma ọgọnọ ḅụ á ḅụụ-gboloa mẹ kururu tẹ owu pakamam.

³⁹ Maa akalụ ma kunoma ḅụ á pịkịma á ḍa ḍọkụma-ḅom, oriḅe tẹ á kẹ ọ̀ wẹrịtẹ ori ịlọ minini ḅara mẹ mịẹ ḅọ ḅe. Gbala-gbala amụ á gbọrụ owiḅọ sọ nimi-a. Tẹ anị nwẹnị ḅo Izirẹlị ḅụ ama-anganga-ḅara sọ,

⁴⁰ mịnẹ Izirẹlị ḅẹ eremịna-awọmẹ ma kụra-kụra ḅụ mu inia aḍin kẹ owu-owu kururu Jẹfụta Gilẹdị ḅẹ ḅọ ḅe ẹrẹḅọtụḅọ ma pịrị ḅa.