Ḅẹrẹkọn-apụ 10 - FỊAFỊA BAỊBỤLỤ

Tola

¹ Abimẹlẹkị fịị ḅọrọ tẹso, Tola anie Pua owiḅọtụḅọ pịkị Dodo taa-owiḅọtụḅọ ḅe Izirẹlị ḍụa-ḅọrọma ḅẹ saakịm. Ori Ịsaka furo-ḅẹ-ḅọ, tẹ Iferemu tụndụ ọgọnọ ḅẹ opu sịẹ Sama nwẹn-sịn ye mẹ ḅio ḅụ ò simem.

² Si tẹra kụra finji ọ̀ nwẹn kẹ ḅẹrẹkọn Izirẹlị pịrịm. Anịtẹrẹmẹ ọ̀ fịịm, tẹ ịn Samaya ḅụ ò ḍiḅim.

Jayẹ

³ Ọ̀ ḅọrọ tẹso, Jayẹ Gilẹdị ḅẹ ḅọ ḅe tẹ si maa akụra finji kẹ ḅẹrẹkọn Izirẹlị pịrị ḅọ ḅe saakịm.

⁴ Ori owiapụ-awọmẹ asuei iyim, inima tẹ yedogi-anama suei ọgọnọ ḅụ dọkụ apụ ma; in pịkị opu ama suei nyanam, Aviti-Jeya ịn nwẹn kẹ arị sịn ḅo mịmgba lam, arị aị ma tẹ Gilẹdị ama ḅio simearị aị ma.

⁵ Tẹ Jeya fịịm, tẹ ini ò ḍiḅim Kamọnị ḅụ.

Jẹfụta

⁶ Izirẹlịapụ ma sin KỊNỊNYANAḄỌ ḅe ḍiki-tọrụ ḅụ siye mịẹm, tẹ fịrịmẹnjị Balị ma na, Asịtarọtị, Siriya ḅẹ oru-atamụnọ ma na, Sayịdọnị ḅẹ oru-atamụnọ ma na, Mohabụ ḅẹ oru-atamụnọ ma na, Amọnị ḅẹ apụ ma oru-atamụnọ ma na, Filisiteniapụ ma oru-atamụnọ ma na pịrịm; tẹ ịn KỊNỊNYANAḄỌ ḅe sịkịm, tẹ fịrịmẹnjị ọ̀ pịrị-a.

⁷ KỊNỊNYANAḄỌ ḅe ịganị nwẹnị kẹngẹma Izirẹlị ọgọnọ sara tẹ ori ịn kẹ Filisiteniapụ ma ḅara ḅio na, Amọnị ḅẹ apụ ma ḅara-ḅio na dẹrịma.

⁸ Ini ịn gbẹẹ kọsịmam, tẹ Izirẹlị ḅẹ awọmẹ ma ponomam anị kụra mẹ ḅụ. Maa akụra fa si ịn nwẹn kẹ Izirẹlịapụ mamgba tẹ Jodanị mẹ ọgọnọ-jụ Amọrayịtị apụ ma ama mẹ ḅio Galẹdị ḅụ sime apụ ma ponomam.

⁹ Amọnị ḅẹ apụ ma Pịkị Juda na, Benijamịnị, Iferemu warị mẹ na sọ owu so ḅẹ gotẹ Jodanị mẹ saḅam, anie mịẹtẹ Izirẹlị nwẹnị kpọma ḅụụ-ḅalaḅala lama.

¹⁰ Izirẹlịapụ ma nwẹnị owu KỊNỊNYANAḄỌ ḅe pịrị ḅẹẹarị, “Wa ị́ ḅụụ ḅụ si mịẹ tẹẹ, kẹ gotẹ ọkọ ḅẹẹarị, wa wamịna Tamụnọ ḅe sịkị tẹ, tẹ fịrịmẹnjị Balị ma pịrị tẹ.”

¹¹ KỊNỊNYANAḄỌ ḅẹ nwẹnị Izirẹlịapụ ma ḅẹẹ, “Ijiputi-ḅẹ-apụ ma na, Amọrayịtị apụ ma na, Amọnị ḅẹ apụ ma na, Filisiteniapụ ma na ḅụụ ḅụ arị ọ́ ḍụa-ḅọrọma-a?

¹² Sayịdọnị ḅẹ apụ ma sọ, na Amalẹkị ḅẹ apụ ma na, Mahoni ḅẹ apụ ma na ó ponoma tẹ ọmịnị owu ị̀ pịrị tẹ arị ịna ḅara ḅụ ọ́ ḍụa-pakama-ḅom.

¹³ Anịsọ ọmịnị ị̀ sịkịm tẹ fịrịmẹnjị oru-atamụnọ pịrịm; anịẹrẹsị à ḅarị jen-maaịn kẹ ọ́ ḍụa-ḅọrọma ḅịa.

¹⁴ Ó mu owu oru-atamụnọ ma tẹ ọ́ sẹlẹ-ọkị tẹ aị ma pịrịị; yee ini ọmịna ḅụụ-ḅalaḅala sakị ḅụ ọ́ ḍụa-ḅọrọma.”

¹⁵ Izirẹlịapụ ma nwẹnị KỊNỊNYANAḄỌ ḅe ḅẹẹ, “Wa si mịẹ tẹẹ, ị́ ḍiki tẹ ị́ ḅụụ iḅi ḅara, iḅi ḅara kẹ wa mịẹ; wa ị́ tẹkẹm paa mịmgba mẹ ḅụ wa ḍụa-ḅọrọmaa.”

¹⁶ Anieḅụ ịn nwẹnị ini ogbo-ḅio ḅụ igoni oru-atamụnọ ma tan-siin tẹ fịrịmẹnjị KỊNỊNYANAḄỌ ḅe pịrị; tẹ Izirẹlị tọrụsiẹrị mẹ nwẹnị ḅo ọ̀ ḅụụ-ḅẹsọọ.

¹⁷ Anịtẹso Amọnị ḅẹ apụ ma ḅụụ tẹlẹma owu pịrị tẹ mu Gilẹdị ḅụ kobirim; tẹ Izirẹlịapụ ma nwẹnị ḅo gboloma, tẹ Mizipa ḅụ kobiri.

¹⁸ Gilẹdị ḅẹ apụ ma na, sịḅịdapụ ma na nwẹnị jụmọ-jụmọ gbela, “Owiḅọ ḅe tẹ suku-saakị owu mẹ kẹ Amọnị ḅẹ apụ ma paka ḅarị ḅọ tụḅọ? Ori Gilẹdịḅụ simearị apụ mamgba sịḅịdaḅọ sọ ḅa.”