Ḅẹrẹkọn-apụ 1 - FỊAFỊA BAỊBỤLỤ

Juda Na Simiyọnị Na Afuro Ma Kọn Wararị Kenanị Ama Ma Nẹngịmam.

¹ Jọsụwa fịị ḅọrọ tẹso, Izirẹlịapụ ma KỊNỊNYANAḄỌ ḅe gbelam, “Tọ furo-ḅẹ-apụ wamịna ogboku tarị owu kẹ Kenanị ḅẹ apụ ma paka tẹ ini na owu sọ ḅẹ?”

² KỊNỊNYANAḄỌ ḅe nwẹnị pakịrị, “Juda furo-ḅẹ-apụ mẹ tarị mu ḅa. Àrị ama mẹ kẹ ḅara-ḅio ḅụ ịn pịrị tẹẹ.”

³ Juda furo mẹ nwẹnị ịna mịnapụ Simiyọnị furo-ḅẹ-apụ ma ḅẹẹ, “Ó ḅo wamịna ḅụụ sọ tẹ wa ịn ḍie wa pịrị ye-yọ mẹ mu, tẹ Kenanị ḅẹ apụ ma na owu sọ; wamịnị sọ ọkọ kẹ ọmịna ḅụụ sọ tẹ ịn ḍie ọ́ pịrị ye-yọ mẹ mu ḅa.” Anieḅụ Simiyọnị furo ḅa apụ ma ịna ḅụụ sọ tẹ ini na mum.

⁴ Anịtẹso Juda mum, tẹ KỊNỊNYANAḄỌ ḅe KENANỊ ḅẹ apụ ma na, Pẹrịzayịtị apụ ma na kẹ ịna ḅara-ḅio ịn pịrịm; tẹ Bizẹkị ḅụ ịn kịnị gbọrụ puku, sọnọa ẹndẹ finji (10,000) nẹngịmam ịna aḅụụ ḅụ.

⁵ Ịn ḅo Adonibẹzẹkị lam Bizẹkị ḅụ, tẹ ori na owu sọm, tẹ Kenanị ḅẹ apụ ma na, Pẹrịzayịtị apụ ma na nẹngịmam.

⁶ Adonibẹzẹkị ḍumo-mangị kọnm; kụma ini ò ḍukam, tẹ ori ọlọm, tẹ ori opu aḅara-atụngbalị na, ori opu aḅụọ-tụngbalị na pẹlẹ-siinm.

⁷ Tẹ Adonibẹzẹkị nwẹnị ḅẹẹ, “Opu ḅara-atụngbalị na, opu ḅụọ-atụngbalị na pẹlẹ so tẹ amadapụ tesi oyi finji ị̀ dẹbịlẹ suku fịaị ọkọsọrọ kolokolo kolokolom; à wẹrịtẹ mịẹ tẹ ḅara, mie Tamụnọ kẹ pịkị ị̀ gbẹẹ tẹ ḅara.” Ini ọ̀ kẹ Jeruselemu ḅom, tẹ anịjụ ọ̀ fịịm.

Juda Furo Mẹ Jeruselemu Na, Hẹbụrọnị Na Nẹngịmam

⁸ Juda ḅẹ apụ ma owu kẹ Jeruselemu paka tẹ anị ọkịm. Ini ịn ḅaam, tẹ fịnị kẹ opu ama mẹ dọkịmam.

⁹ Anịtẹrẹmẹ mie Juda ḅẹ apụ ma ideri Kenanị ḅẹ apụ ma tẹ tụndụ ọgọnọ ḅẹ opu sịẹ mẹ ḅio angarị apụ ma na, Samụnọtẹ sịẹ mẹ ḅio angarị apụ ma na, lẹgịtẹ-kiri mẹ ḅẹ ama ḅio sime apụ ma na owu sọ ḅẹ mu ye.

¹⁰ Juda ḅẹ apụ nwẹnị mu Kenanị ḅẹ apụ ma tẹ Hẹbụrọnị (mịọkụ Hẹbụrọnị mẹ tarị anị ẹrẹ Kiriyati-aba) angarị apụ na owu sọ; tẹ ịn nwẹnị Sisayị na, Ayimanị na, Talịmayị na nẹngịma.

Ọtụnịyẹlị Dẹbaya Ḅẹ Opu Ama Mẹ Nẹngịmam

¹¹ Juda ḅẹ apụ ma nwẹnị Hẹbụrọnị ḅụ sakị Dẹbaya mu, tẹ anịjụ ḅụ sime apụ ma na owu sọ. Tarị Dẹbaya mẹ ẹrẹ anie Kiriyati-sẹfa.

¹² Ịn kẹ Kẹlẹbụ sịn gbọrụ owiḅọ nwẹnị ḅẹẹ, “Oriḅe tẹ owu kẹ Kiriyati-sẹfa paka tẹ anị ọkị-ḅo ọkị-ḅo, arị ị̀ ẹrẹḅọtụḅọ Akisa kẹ mḅọ pịrị sime ḅa.”

¹³ Kẹlẹbụ iyimbere ori ọḅụjụ paka Kenazị owiḅọtụḅọ Ọtụnịyẹlị anị ọkịm; tẹ ọ̀ nwẹnị ori ẹrẹḅọtụḅọ Akisa kẹ ọ̀ pịrị sime.

¹⁴ Árị ọ̀ ḍọkụma-ḅo tẹso, á nwẹnị ọ̀ mịẹ tẹ ori á ḍa ḅara ḅụ piri ḅii, tẹ á nwẹnị á yedogi-nama mẹ ọgọnọ koro, tẹ Kẹlẹbụ nwẹnị á gbela, “Í tiye ḅii?”

¹⁵ Á nwẹnị ọ̀ pakịrị, “Ḍiepịrịye kẹ ị̀ pịrịị. Ị́ ị̀ kẹ Kenanị suku-jụ mẹ ḅụ koroma tẹ ḅẹẹ-sakị, minji paka-paka-ḅoarị ngụngụḅa ma sọ kẹ ị̀ pịrịị.” Tẹ Kẹlẹbụ nwẹnị iwo anga ḅụ simearị ngụngụḅa ma na, ideri anga ḅụ simearị ngụngụḅa ma na kẹ á pịrị.

Juda Na Benijamịnị Na Afuro Ma Ḅẹ Owu-ḅara-iḅi Ma

¹⁶ Mozizi fụanḅọ, Keni ḅẹ ḅọ ḅe awọmẹ ma Juda atomi ma ḅụụ sọ tẹ ini na Jeriko — anie pịkị Eneme Ama — wẹrịso tẹ so Juda ḅẹ ịkpa mẹ mum. Ịkpa mẹ anị suku-jụ simearị Aradi ama mẹ kpeki wararị. Ịn nwẹnị anịjụ ama-na-koro wararị atomi ma na anga.

¹⁷ Juda ori iyimbere Simiyọnị kẹ ọ̀ ḅụụ sụa tẹ mum, tẹ Kenanị ḅẹ apụ tẹ Zifatị ḅụ simearị apụ ma nẹngịmam, tẹ ịkatakirikọn-a-ḅara kẹ anị famam. Anieḅụ ịn kẹ opu ama mẹ sịn ẹrẹ Ọma.

¹⁸ Juda, Gaza na, anị ḅẹ ye-yọ na kẹ sụa na, Asịkẹlọnị na, anị ḅẹ ye-yọ na kẹ sụa na, Ẹkịrọnị na, anị ḅẹ ye-yọ na kẹ sụa ọkịm.

¹⁹ KỊNỊNYANAḄỌ ḅe Juda na simem tẹ ọ̀ tụndụ ọgọnọ ḅẹ opu sịẹ mẹ ọkị nyanam, kụma ele mẹ ḅio sime apụ ma ori inetẹ ịn dee pakama-a gbala ini ikulele kẹ mịẹ kirimẹnjị-ọmụarụ nyanam ẹrẹsị.

²⁰ Ịn Hẹbụrọnị kẹ Kẹlẹbụ pịrịm, Mozizi wẹrịtẹ ḅẹẹ tẹ ḅara; tẹ ọ̀ nwẹnị anị ḅio Anakị tẹra owiapụ-awọmẹ ma dee pakama.

²¹ Kụma Benijamịnị atomi ma Jebusayịtị apụ ma tẹ Jeruselemu ḅio sime apụ ma dee pakama-a, anieḅụ Jebusayịtị apụ ma Benijamịnị atomi ma ḅụụ sọ tẹ Jeruselemu ḅụ sime ḅo mịmgba lam.

Iferemu Na, Manasẹ Na Afuro Ma Bẹtẹlị Nẹngịmam

²² Gbọrụ ene ḅụ, Iferemu furo-ḅẹ-apụ na Manasẹ furo-ḅẹ-apụ na (anie Josẹfụ awọmẹ ma) mu Bẹtẹlị na owu sọm tẹ KỊNỊNYANAḄỌ ḅe ḅarasụa ịn pịrịm.

²³ Ịn tomi kẹ fịrịmam ịn mu Bẹtẹlị ẹnyẹ. Tarị tarị Bẹtẹlị ama mẹ anị ẹrẹ Lọzị.

²⁴ Ama ẹnyẹ-apụ ma mu sakị, ama mẹ ḅio ịn gbọrụ owiḅọ ẹrịm mḅọ mẹnjị paka-ḅoarị, tẹ ịn nwẹnị ọ̀ ḅẹẹ, “Wa ị́ tẹkẹm, mẹnjị ama mẹ ḅio sọ-mu etela mẹ kẹ wa ḍie, anịsakị wa iḅi ḅara kẹ ị́nịna mịẹ ḅa.”

²⁵ Owiḅọ ḅe nwẹnị mẹnjị ama mẹ ḅio sọ-mu etela mẹ kẹ ịn ḍiem; tẹ ini ama mẹ ḅaa famam, kụma ini owiḅọ ḅe na ò furo na wẹrịso tẹ ịn som.

²⁶ Owiḅọ ḅe nwẹnị sọ Itayịti apụ ma ama mẹ mu tẹ gbọrụ ama nama pakama, tẹ Lọzị kẹ ẹrẹ kẹ anị kuro; aniemẹ anie anị ẹrẹ ọkị-ḅo mịmgba la.

Tomi Ma Tẹ Izirẹlị Ḅẹ Apụ Ma Dee Pakama-a Apụ Ma

²⁷ Mie Manasẹ furo-ḅẹ-apụ dee pakama-a apụ: Ḅẹtị-seyani na anị ḅẹ kala-ama ma na; Tanakị na anị ḅẹ kala-ama ma na; Dọ na anị ḅẹ kala-ama ma na; Ibilamụ na anị ḅẹ kala-ama ma na; Mẹgido na anị ḅẹ kala-ama ma na. Kenanị ḅẹ apụ ma kụma ịn paa anị ama mẹ ḅio simem.

²⁸ Izirẹlị ḍụḅatẹ ḅo ịnyọ nyana tẹso, ịn nwẹnị Kenanị ḅẹ apụ ma kẹ kụrọ kọrịnama kọrị apụ sọma, kụma ini ịkatakirikọn-a-ḅara kẹ ịn dee pakama-a.

²⁹ Iferemu apụ Kenanị ḅẹ apụ ma tẹ Geza ḅụ sime apụ ma dee pakama-a, anịẹrẹsị Kenanị ḅẹ apụ ma Geza ḅụ ini ogbo-ḅio simem.

³⁰ Zẹbulọnị furo-ḅẹ-apụ ma sọ Kitirọnị na Nahalọlị na ḅụ sime apụ ma dee pakama-a; anịẹrẹsị Kenanị ḅẹ apụ ma ini ogbo-ḅio simem, tẹ ḅo kụrọ kọrịnama-kọrịapụ sọm.

³¹ Asa furo-ḅẹ-apụ ma sọ Akọ na Sahịdọnị na Alabu na Akizibu na Ẹlịba na Afẹkị na Rehobu ḅẹ apụ ma na dee pakama-a.

³² Kụma Asa furo-ḅẹ-apụ ma, ama mẹ ḅio sime Kenanị ḅẹ apụ ma ogbo-ḅio simem, kẹ gotẹ ọkọ ḅẹẹarị, ini ịn dee pakama-a.

³³ Nafutali furo-ḅẹ-apụ sọ Bẹtị-semesi ḅụ sime apụ ma, anịanịa Bẹtenatị ḅụ sime apụ ma dee pakama-a, kụma, Kenanị ḅẹ apụ ma, ama mẹ ḅio sime apụ ma ogbo-ḅio simem; anịsọ, Bẹtị-semesi ḅụ sime apụ ma na, Bẹtanatị ḅẹ apụ na ḅo kụrọ kọrịnama-kọrịapụ sọ ịn pịrịm.

³⁴ Amọrayịtị apụ ma Danị furo-ḅẹ-apụ ma ponoma ọḅụ pịrị tụndụ ọgọnọ ḅẹ opu sịẹ mẹ mum, ịn ḍụkụ tẹ ini ideri ele mẹ ḅo-a.

³⁵ Kụma Amọrayịtị apụ ma paa Heresị Tụndụ ḅụ na, Ahijalọnị ḅụ na, Salibimụ na ḅụ simem. Kụma Josẹfụ furo-ḅẹ-apụ ma ḅara ikutẹ ḅara kẹ ini ọgọnọ gbanam, tẹ ịn ḅo kụrọ kọrịnama-kọrịapụ sọm.

³⁶ Amọrayịtị apụ ma agara mẹ Sẹla kpọlị-iwo anga ḅụ sakị mu Akịrabimu kpọlị-iwo anga mẹ ḅụ ḅọrọm.