Ayịzaya 9 - FỊAFỊA BAỊBỤLỤ

¹ Mị ḅụụ-fụka sakị mẹ ḅio in tolu-ḅọrọ so ḅẹ anga paka ḅịa. Zẹbulọnị na Nafutali na afuro ḅẹ apụ ma angarị amakiri mẹ gbọrụ sakị ḅụụ-jịrịma ḅara simem, kụma tọrọkọ mẹ kụn kẹ ḅo mịẹ ibe mẹ pịrị ḅa, Mẹdịterenanị abajị mẹ ḅẹ ịrụa saakịarị anga mẹ ḅụ ọkị mu Jodanị saḅa koro la, pịrị Galili sọ la, anie jen asịẹ ḅẹ apụ angarị yọ mẹ.

Tọrọkọ jụ Ama-da Ḅarị Ḅọ Ḅe

² Kanakana ḅio mẹnjị sime apụ ma opuma opu bele ẹrị tẹẹ. Kpiti tẹ amakiri ḅụ ini angam, kụma mịọkụ bele ḅịyarị ịna ọgọnọ.

³ KỊNỊNYANAḄỌ, í opu ḍereku kẹ ịn pịrịtẹ, ị́ mịẹ tẹ in ḅioḅẹlẹarị; ị́ kọrị ịn pịrịtẹ ye ḅụ in ḍerekuarị, tomi ịna mbịaka pẹlẹarị sakị in ḍereku ḅara anịanịa ini ọmụ ḅio fọịn ḅo aị ḍiearị sakị ḅụ.

⁴ Gbala ịn kẹ ịna kọngọ kpọ iku ye mẹ ị́ anyịma siin tẹẹ, pịkị ịna apana ma fomu-fomu mkpara mẹ sọ. Ị́yẹrị ị́ atomi ma ponoma tẹ ini inoma sime sịẹ mẹ nẹngịma tẹẹ, anie alatẹ sakị ḅụ ị́ kẹ Midiya ḅẹ apụ nẹngịma gbọrụ ḅara mẹ.

⁵ Ọmụ kẹ ama koro apụ ma ḅụọ ḅẹ okuro ma na ịna ọmbie kpelekitẹ akapa ma na ịn kẹ fịnị ḅio dọkịma fama ḅa.

⁶ Ịn gbọrụ tụḅọ iyi wa pịrịtẹ! Ịn gbọrụ owiḅọtụḅọ kẹ wa pịrịtẹ! Tẹ ori wamịna ḅẹrẹtọnḅọ sọ ḅa. Ịn kẹ ọ̀ sịn ḅarịye, “Ḅụụ-buama Ḅẹrẹ-tolumaḅọ, Opu kụrọ Tamụnọ, Gbamaso Ḍaḅọ, Dein Amanyanaḅọ.”

⁷ Ori ama nyana kụrọ mẹ tọrọkọ-tọrọkọ mu ḅa, Ọ̀ daarị yọ mẹ ḅụ sakị mamgba dein sime ḅa. Ori Ama-da Devidi tọrụ-ḍimaḅọ ḅara kẹ ḅẹrẹtọn ḅa, Ọ̀ kụrọ mẹ kuraye na ọrụḅọ-ọrụḅọ la kiri kẹ mḅọ pịrị na ḅụ sịẹsime ḅa, mịọkụ ọkị mu sakị kunoma la. Kụrọmamgba nyana KỊNỊNYANAḄỌ ḅe tọn pẹlẹ tẹ mịnẹ mie-mẹmgba mịẹ ḅa.

KỊNỊNYANAḄỌ Ḅe Izirẹlị Fomu Ḅa

⁸ KỊNỊNYANAḄỌ ḅe ḅẹrẹ-pẹlẹ Izirẹlị sịẹ ọgọnọ gbanatẹ, Jekọbụ furo-ḅẹ-apụ ma ọgọnọ.

⁹ Izirẹlịapụ mamgba, Sameriya ama mẹ ḅio angarị ḅọ goḅọ-goḅọ, nimi ḅa mịnẹ ò miemẹ mịẹ tẹẹ. Mịọkụ ịn ḅụụ-gelemarị pịkị opu ẹkwẹn kọn-arị. Ini mẹ,

¹⁰ “Biriki kẹ nama awarị ma ḅịkị tẹ, kụma wa ḍụḅarị kẹ nama aị kẹ arị kiri ḍima ḅa. Sịkamọ asịn ma ịn pẹlẹ-gbin tẹ, kụma wa sida asịn kẹ arị kiri ḍima ḅa.”

¹¹ KỊNỊNYANAḄỌ ḅe si kẹ ịn tọn apụ ma jikema tẹ mịnẹ in ḅo owu kẹ ịn paka.

¹² Siriya ịrụa mẹ saakịarị anga mẹ ḅụ, tẹ Filisiteni ịrụa mẹ tuuideriarị pakịrị ḅụ, ịna ḅịḅị finjitẹ Izirẹlị sịẹ mẹnị ḅẹ tẹ. Anị sọ KỊNỊNYANAḄỌ ḅe ịganị paa kunoma-a; ọ̀ ḅara paa sụụn-paka wararị kẹ in fomu.

¹³ Izirẹlịapụ amụ in si ḅụ pịkị-a, KỊNỊNYANAḄỌ ḅe in fomu tẹ sọ, ịn paa pịkịma ọ̀ dama-ḅoa,

¹⁴ Kpọkpọ gbọrụ ene kịngẹ ḅụ KỊNỊNYANAḄỌ ḅe Izirẹlị ḅẹ sịḅịdapụ ma na anị ḅẹ atomi na fomu ḅa, ori ịn pẹlẹ-siin ḅa, sịḅị na etemi na ḅụ.

¹⁵ Omongitẹ kụn kẹ pịrị na-iḅi apụ ma anie sịḅị mẹ — tẹ etemi mẹ nwẹnị iruo aị tolumarị ịkịankoroapụ ma!

¹⁶ Mịna apụ ma kẹ sịḅịdarị apụ ma mịẹ tẹ ini etela-iri tẹẹ, tẹ gbọrsịḅị pikiri fa tẹẹ.

¹⁷ Anieḅụ KỊNỊNYANAḄỌ ḅe ḍụkụ tẹ asambịrịma owiapụ ma ḅẹ gbọrụḅọ sọ pọkọ so ḅịa, anịsakị ọ̀ pịkị sịḅị-kụrụkụrụ nyana diapụ-fịtẹ-ereme ma na ḍapụ anịanịa iyingiapụ na ofori awọmẹ na pịrị ḅịa, tomi mamgba Tamụnọ nimi-a pịkị si-sịḅịḅio-sụa tẹ, in ḍukoarị ye goyegoye siye ẹrẹsị. Mie-mẹmgba gotẹ KỊNỊNYANAḄỌ ḅe ịganị mẹ kunoma ḅịa. Anịsakị ịn fomu ḅụ ọ̀ ḅara paa sụụn-paka ḅa.

¹⁸ Tomi ma si-sịḅịḅio kọrịarị ḅara anie gbala fịnị tẹ nangị na ọmị na piri dọkịmarị ọkụ. Anị kọrịarị ḅara opu-piri ḅio fịnị paka tẹ onwin turee-tureema so, so paka iwo ḅara.

¹⁹ Kụrọ mamgba nyana KỊNỊNYANAḄỌ ḅe ịganịarị ẹrẹsị, Ọ̀ kẹ ori atomi fomuarị ḅara mẹ fịnị kịka tẹ kọrị amakiri mẹ ikelema tẹ tomi ma ḅaa gulugulumarị, ọrụ-tomḅọ-tomḅọ na amịna ḅụụ na.

²⁰ Opu sịẹ mẹ ikelema-koro tomi ini ẹrị fịye kalịye goyegoye pụkọ-pụkọ ọkị fịarị, kụma gbala-gbala ịna furo ḅin-a. Ini furo ḅio iyi awọmẹ kịngẹ sọ ịn pẹịarị!

²¹ Manasẹ ḅẹ apụ na Iferemu ḅẹ apụ na owu kẹ jụmọ-jụmọ pakarị, tẹ ịn pịkị sịḅị gboloma tẹ owu kẹ Juda pakarị. Anịsọ KỊNỊNYANAḄỌ ḅe ịganị paa kunoma-a; ọ̀ ḅara paa sụụn-paka wararị kẹ in fomu.