Ayịzaya 8 - FỊAFỊA BAỊBỤLỤ

¹ KỊNỊNYANAḄỌ ḅe nwẹnị ị̀ ḅẹ, “Opu ḍiri kẹ ye ọkị tẹ anị ọgọnọ badarama kẹ koromaa, ‘Fọnya fọịn ḅo ye. Sara sara ḅara kẹ pọkọ ọkị ye.’

² Maa karakara atomi nyanaḅọ, Yuraya agbamịẹḅọ ḅe na Jeberekaya owiḅọtụḅọ Zẹkaraya na, tẹ ini ḅẹrẹ-kiri sime apụ sọ.”

³ Sakị kẹlẹ ḅọrọ tẹso, ị̀ ta nwẹnị fura. Wamịna tụḅọ ḅe iyi sakị, KỊNỊNYANAḄỌ ḅe ị̀ ḅẹẹm, “Ẹrẹ kẹ ọ̀ sịn, ‘Fọnya fọịn ḅo ye sarasara ḅara kẹ pọkọ ọkị ye.’

⁴ Tẹrẹmẹ tụḅọ ḅe ḍụḅa paka-ḅo tẹ ‘Iyingiḅọ’ na ‘Ḍaḅọ’ na ḅẹẹ ḅẹ sakị la, Damasịkọsị ḅẹ opu ngọ mamgba na Sameriya fọịn ḅo aị mamgba na Asiriya ḅẹ amadaḅọ dogi-so ḅa.”

Asiriya ḅẹ Amadaḅọ ḅe ḅoarị

⁵ KỊNỊNYANAḄỌ ḅe siin ẹkwẹn ị̀ pịrịm.

⁶ Ori mẹ, “Mịna apụ ma Siloha ḅẹ aḍaḅa ma ḅụ deinma mẹnjị ḅoarị minji mẹ sịkị tẹ ẹrẹsị, tẹ Ama-da Rezini na Ama-da Pẹka na tọrọkọ oju sẹkịarị,

⁷ yẹrị KỊNỊNYANAḄỌ ḅe, Asiriya tomikiri mẹ ḅẹ opu ḅẹrẹtọnḅọ ḅe kẹ ḅoarị, ori ọmụ ogbo-ogbo mamgba na, tẹ ini ọmụ kẹ Juda paka ḅa. Ịn tọrọkọ, tọrọkọ mu ḅarị ḅara ẹgẹnẹ-minji sọ tẹ Yuferetisi tọrụ seri sọ-sọ ḅara kịka ḅa, sọ mu akaka mamgba gbaịn fama.

⁸ Ẹgẹnẹ-minji ḅara mẹ mịẹ ịn kẹ Juda gbaịn koro ḅarịye, sun nwenii sịẹ wararị tomḅọ apana la, ye goyegoye gbaịn fama.” Tamụnọ na wamịnị na emi! Ò finji sara wararị apamba ma amakiri mẹ gbaịn ḅọrọmarị.

⁹ Ḅalafa ḅụ ó kobirii, ọmịnị sịẹ-sịẹ! Tomikiri ḅẹ ala-jụ ḅụ sime apụ, ó pokii. Ọ́ tẹlẹma tẹ owu-sọọ, kụma ọ́ ḅalafaa! Inn, ọ́ tẹlẹmaa, kụma ọ́ ḅalafaa.

¹⁰ Ọmịnị ọ́ mịẹ ḅẹ aị tọn wẹrịị! Kụma gbala-gbala arị iḅi kẹ ḅo ọ́ pịrị ḅịa. Ọmịnị ọmịna ḅụụ ḅẹlẹ ḅara ḅẹlẹ ḅara kẹ ẹkwẹn! Kụma anịmgba papaaye sọ ḅa, Tamụnọ wamịnị na emi ẹrẹsị.

KỊNỊNYANAḄỌ ḅe Ịkịankoroḅọ ḅe Ḅeri nụnụarị

¹¹ Ori opu kụrọ ḅụ KỊNỊNYANAḄỌ ḅe ị̀ ḅeri nụnụm, mịnẹ à mịna apụ muarị etela mẹ ḍuka mu ma. Ori mẹẹ,

¹² “Tomi ma ḅụ sọma ịn tọn tẹ mịẹ ḅẹ ḍọkịarị aị ma ḅụ, pịkị in gotẹ ḅalafaarị aị ma ḍiki-ḅalafa ma.

¹³ Kẹ ḅiokoroma mịnẹ yẹrị, Kụrọmamgba nyana KỊNỊNYANAḄỌ ḅe, anie Fịafịa-wararị-ḅọ. Yẹrị anie í mangịma ḅẹ ḅọ.

¹⁴ Yẹrị anie ḅalafama Fịafịa-wararị-ḅọ ḅe ẹrẹsị, à kịkarị ye anie tomina aḅụọ bịan-bịan tẹ ịn pụmbụarị ḍụḅarị. À kịkarị ye anie Juda na Izirẹlị na asịẹ ma na Jeruselemu ḅẹ apụ ma na kun ḅẹ tẹ tuu ḍiein.

¹⁵ Tọnwa apụ pụmbụ ḅa; ịn ḅịkị tẹ gbẹẹ kọsị ḅa. Ḍiein in kun sịẹma ḅa.”

Kẹ Fịtẹ apụ ḅịḅị Ḅiiarị apụ Ḅeri-nụnụye

¹⁶ Ọmịnị ì ḍukamẹnjịapụ ma anie Tamụnọ kẹ ị̀ pịrịtẹ oku ma ẹbị tẹ arị koko kpaịnma ḅẹ apụ.

¹⁷ KỊNỊNYANAḄỌ ḅe amịna ḅụụ kikima ori atomi pịrị tẹẹ, kụma yẹrị arị ọ̀ kẹ ḅiokpọmarị, tẹ ì ḅiokpọ kẹ ori ọgọnọ gbana wararị.

¹⁸ Mie yẹrị, KỊNỊNYANAḄỌ ḅe kẹ ị̀ pịrịtẹ awọmẹ ma na ị̀ na, Kụrọmamgba nyana KỊNỊNYANAḄỌ, Zayọnị tụndụ ọgọnọ ḅụ amịna emine emi ḅọ ḅe, ḍumo pịrịarị oku ma kẹ wa fịrịma tẹ mịnẹ kẹ Izirẹlịapụ pịrịị.

¹⁹ Kụma tomi ḅẹẹ ḅa, mịnẹ ḅịrịapụ na, ḍụẹịn-ḅịḅị-gbelaapụ, tẹ feni pọkọ na, kịnị iḅiọkụ naa-a ḅara na kẹ ẹkwẹn-arị apụ na ḅara oku da ḅo ịn pịrị. Ịn ḅẹẹ ḅa. “Anị ḅẹ kunoma kịnị paa tẹmẹ ma oku-ḅịḅị ḅii tẹ ḍumo wararị apụ sịḅị gotẹ fịtẹ-apụ ḅịḅị gbela ḅarị ya.”

²⁰ Ị́ ịn pakịrị ḅa, “Ọ́ KỊNỊNYANAḄỌ ḅe kẹ ó tolumarị ye pokii — ọ́ ḍụẹịn ḅịḅị ḅiiarị apụ poki ma — in ḍuko ọ́ pịrị ḅarịye gbọrụ iḅi sọ kẹ ọ́ mịẹ ḅịa.”

Ḅụụ-fụka Sakị

²¹ Ini amakiri mẹ mẹnjị ikelekele ḅa, ḅioḅẹngbọ ḅịkị na ḅuru-pọkọtarị na ḅụ. Ḅuru ịn tarị tẹ ini ịganịarị ogbo ḅụ ini ịna amadaḅọ na ịna Tamụnọ na wori ḅa. Ẹbịsịya ịn tọrụ saakị So-tọrụ ḍiki ḅa,

²² anịanịa bio-bioma kiri mẹ ḍiki ḅa, gberie-sọ ini ẹrị ḅịa, kụma ḅụụ-fụka na kanakana na, iḅiọkụ ḅalafamarị kanakana, ini in sukuruma suuarị yọ mẹ.