Ayịzaya 66 - FỊAFỊA BAỊBỤLỤ

KỊNỊNYANAḄỌ Ḅe Sịẹ-sịẹ Ma Kọn Ḅa

¹ KỊNỊNYANAḄỌ ḅe mẹẹ, “So anie ì emine, tẹ Kiri mẹ ị̀ ḅụọ-gbana-ịkasie. Ọkọ kụma ọmịnị inetẹ tọ-ḅara sime warị nama ị̀ pịrị ḅẹ, à tọ-ḅara sime yọ ḅụ sọ tẹ anga ḅẹ?

² Ì ḅioju bebe So mẹ na Kiri mẹ na tẹmẹm! Ini ma tẹ ḅụụ-iderima na si ḅụ pịkị na nyana, tẹ ì mangịma tẹ ị̀ ḅịḅịpokiarị apụ ma ịna mịẹ aị ị̀ ḅụụ-ḅẹlẹarị.

³ Tomi ma ịna ḅụụ ḅẹlẹ ye ḅẹlẹ ye mịẹarị. Ịn nambulo ḅaa kẹ agba mịẹ-o, in tomḅọ kẹ mịẹ-o, ịna ḅụ gberie; ini anana tụḅọ kẹ agbamịẹ-o, obiri kọngọ anyịma tẹ kẹ mịẹ-o, anịanịa ini mgbọlị afịaị kẹ agbamịẹ-o, opuropo ọmbie kẹ mịẹ-o; ịn ḅọrọ kụnụaị agbamịẹ oru pịrị, anịanịa oru tẹkẹ-o. Ḅụụ ḅụ si lama wararị sunsin Tamụnọ pịrị ḅara mẹ nwẹnị ịna ḅio ḅẹlẹmarị.

⁴ Mie ḅụ àrị opu ḅụụ-fụka ọkị-ḅo ịna ọgọnọ gbana ḅa — in gotẹ ḅalafaarị aị ma — à sịn sakị gbọrụḅọ-sọ ḅịḅị-ọkịya ẹrẹsị, anịanịa à ḍuko ye poki. Ini ị̀ ḅịḅị kan na siye mịẹ na sẹlẹ-ọkịm.”

⁵ Ọ́ KỊNỊNYANAḄỌ ḅe ḍukoarị ye mẹ pokii, ọ̀ mangịma tẹ ọ̀ ḅịḅị pokiarị apụ, “Ọmịnị ì minini wararị ẹrẹsị, ọmịna atomi ma ḅẹ jen-apụ ó ḍiki-ḅioḅu tẹ ḅarị ọmịnị na gbọrụ mịẹ ye sọ mịẹ gboloma ḅẹ ḅii-a. Ini ó kombo tẹ ḅẹẹarị, ‘Yee KỊNỊNYANAḄỌ ḅe ori opu ḍie-pakama tẹ ọ́ ḅọrọma, mịẹ tẹ wa ẹrị tẹ ḍereku ḅẹ ḅara.’ Kụma ini ma ḅioju sọ ịna tọrụ-tuu ḅa!

⁶ Pokii! Anị opu yeke-yeke pọkọ mẹ opu ama mẹ ḅio, tẹ Tamụnọ-warị mẹ ḅio fiearị ye mẹ, anie KỊNỊNYANAḄỌ ḅe fomu-ḅara kẹ si kẹ ọ̀ tọn apụ ma pịrịarị ye mẹ ḅẹ pọkọ!”

⁷ “Ị̀ fịafịa opu ama mẹ bẹkẹ-ḅara kẹ tụḅọ iyi koroma ẹrẹḅọ na kịkarị, anie iyi ḅẹ tẹ akụ ye sọ da-a ḅara mẹ.

⁸ Jen sakị ọkọ sime ye ẹrị tẹ anịanịa naa tẹ ḅọ emi? Jene ịn kpọkpọ gbọrụ ene ḅụ sịẹ mịẹ pakama-ḅo tẹ? Zayọnị ḅarị jen kẹ tọrụsiẹrị alama ḅịa, tẹrẹmẹ sịẹ mẹ saakị paka-ḅo.

⁹ Kuroma ma mịnẹ àrị ì atomi kẹ ḅo iyi pakama-ḅo sakị la ḅa, kụma ịn wẹrịso tẹ ini iyi pakama-ḅo ḅịa so ḅa.” KỊNỊNYANAḄỌ ḅe ọkọ ḅẹẹm.

¹⁰ Jeruselemu na sọ tẹ ḍerekuu; á gotẹ ḅioḅẹlẹẹ, ọmịnị mị opu ama mẹ ḅẹlẹmarịapụ mamgba! Mịọkụ á ḅụụ sọ tẹ ḍerekuu, ọmịnị á gotẹ kururu apụ mamgba!

¹¹ Ị́ á lọkọlọkọ ḅẹ iḅi fị ḅa, gbala kalatụḅọ iyingiḅọ kuḅu ḅio emi ye ọkụ.

¹² KỊNỊNYANAḄỌ ḅe mẹẹ, “À lolo tọrọkọ-tọrọkọ mu ọkị-ḅo ọ́ pịrị ḅa; anie sịẹ-sịẹ ma ngọ ma tẹ tọrụ kịka tẹ seri-seri sọ-ḅoarị tẹ gbala-gbala faa kụlụkụlụ-a ye. Ọmịnị iyingiḅọ ḅarana ḍikiḍikiarị kalatụḅọ kịka ḅa, á kuḅu ḅio dogi tẹ ḅẹlẹma ḅara kẹ mịẹarị tụḅọ.

¹³ Jeruselemu ḅio simearị apụ, àrị ó dedema ḅa, iyingiḅọ amịna tụḅọ dedema ḅara.

¹⁴ Miemẹ paka tẹ ọmịnị ẹrị sakị ó ḅioḅẹlẹ ḅa; anị ọ́ mịẹ tẹ ọ́ kụrọ tẹ ịnyọ sụa ḅa. Anịtẹso ó nimi ḅa mịnẹ yẹrị, KỊNỊNYANAḄỌ, ḅarasụa ị̀ ḅịḅịpokiarị apụ pịrịarị, à pịkị ị̀ ịganị kẹ si kẹ ị̀ tọn apụ ma ḍiearị.”

¹⁵ KỊNỊNYANAḄỌ ḅe fịnị kẹ ḅo ḅa. Erise mie ọ̀ kẹ ḅo tẹ fomu-ḅara kẹ ori ịganị pịrịarị apụ ma pịrị ḅarịye.

¹⁶ Fịnị na okologie na mie ọ̀ kẹ fomu-ḅara kẹ tomikiri ḅẹ atomi mamgba pịrị ḅarịye, anie ọ̀ ḅẹrẹ-ḅarasii ḅara kẹ ịn ḍọkị-ẹrị sakị — tẹ ịn tọnwa-apụ ḅaa ḅa.

¹⁷ KỊNỊNYANAḄỌ ḅe mẹẹ, “Amịna aḅụụ wẹrị sikima sunsin oru pịrị-pịrịarị apụ ma kunoma ḅo kpekitẹ, anie ọgbụrụ-sụntẹ oru tẹkẹ tọn-tọn fịlawa aḍụọ ḅio muarị apụ ma, tẹ opuropo na ofunguru na ja si afịaị na fịarị apụ ma.

¹⁸ In kuromarị aị na ịn mịẹarị aị na à nimi wararị. À tomikiri ḅẹ asịẹ mamgba kobiri ḅẹ ḅoarị. In ḅo kobiri sakị ini ị̀ kụrọ inetẹ mịẹ ḅarị aị ẹrị ḅa,

¹⁹ tẹ nimi ḅa mịnẹ yẹrị anie fomu-ḅara kẹ ịn pịrịarị ḅọ ḅe.” “Kụma àrị inimgba ḅaa-fama ḅịa, tẹ fịị-a so apụ ma kẹ sịẹ-sịẹ ma na sụma-jụ simearị amakiri ma na tẹ amụ ì eresoo naa-a, anịanịa ì opu na kụrọ na ẹrị-a apụ ma fịrịma ḅa — Sipeni na Libiya na Lidiya na, anie iboli tẹịn ḅara-ḅaa tẹ apụ ma; pịkị Tubalị na Girisi na sọ àrị ịn kẹ fịrịma ḅa. Mịna asịẹ ma ogboku ḅụ ini ì opu ḍuko wasama ḅa.

²⁰ Ini ọmịna sịẹ ḅẹ apụ ma kẹ pịkị-ḅo ḅa sịẹ-sịẹ ma ḅụ, kẹ ḅo ḍiepịrịye ḅara kẹ ịn pịrị. Ini ịn kẹ Jeruselemu ị̀ fịafịa tụndụ mẹ ḅo ḅa, asụ na, kụrọ-sịḅịsụa-asụ na, ike-sụa-anama na, yedogi-kirimẹnjị-arụ na ọgọnọ ḅụ, anie Izirẹlịapụ mgbọlị afịaị kẹ fịafịa yedogi-aị ḅio sụa tẹ kẹ Tamụnọ-warị ḅo-ḅo gbọrụ ḅara mẹ.

²¹ Àrị ịna ḅụ ḅẹ jen-apụ kẹ agbamịẹapụ na Livayị apụ na mịẹ ḅa.”

²² Ịwọ tomikiri mẹ na ịwọ So mẹ na sime tọrọkọ-tọrọkọ mu ḅarị gbọrụ ḅara mẹ anie ọmịna furo-ḅẹ-apụ ma na ọmịna ẹrẹ na sime tọrọkọ-tọrọkọ mu ḅarị ḅara ị̀ kụrọ ḅụ.

²³ KỊNỊNYANAḄỌ ḍukoarị, “Ịwọ Akalụ Alalị Ene na Ịnyọsara-Ene goyegoye na ḅụ sịẹ goyegoye ḅụ kịnị ḅo sunsin ị̀ pịrị ḅa mị yọ Jeruselemu ḅụ.

²⁴ In soarị sakị ịn fịtẹ-apụ ma oju akpakpa ma ẹrị ḅa, anie kọngọ-kụrọma ị̀ pịrị ḅụ fịtẹ-apụ ma aḍụẹịn ma. Arị pẹịarị angule ma gbala-gbala ịn fịị ḅịa, tẹ ịn dọkịmarị fịnị mẹ sọ gbala-gbala in biinma ḅịa. Tọrụngbọ kẹ ini ẹrị mẹ tomikiri ḅẹ atomi mamgba ḅụ kpọma sii ḅa.”