Ayịzaya 65 - FỊAFỊA BAỊBỤLỤ

Tamụnọ Kẹ Kọngọ-kụrọmarị Apụ Pịrịarị Fomu-ḅara

¹ KỊNỊNYANAḄỌ ḅe mẹẹ, “À tẹlẹma tẹ ì atomi atẹkẹ naa ḅẹm, kụma ịn tẹkẹ-a. À tẹlẹma simem, ini ị̀ ḍọkị-ẹrị ḅẹ ḅara, kụma ḅụụkụrọma kịngẹ sọ ịn ḅụụkụrọma-a. Sịẹ mẹ ị̀ tẹkẹ-a, tomi-juḅẹye sakị mamgba à tẹlẹma tẹ ḅịḅị-ọkịya ḅẹ-yearị sọ. ‘Mie yẹrịị, à ḅarasụa ọ́ pịrị ḅa.’

² Sakị mamgba à tẹlẹma wararị ì atomi da warị suu, anie kọngọ-kụrọma ḅụ kura-aye mịẹ-mịẹ tẹ amịna ḅara-kuḅu ḅẹ etela muarị apụ ma.

³ Ḅụụ-jịrị gbọrụmgbọ-sọ nyana-a ḅara ḅụ ini ị̀ ịganịma-ịganịma-ịganịmarị. Ịn kẹ tọn-tọn ḅara wẹrị wararị fịlawa aḍụọ ḅio ini oru nimi apụ agba ma mịẹarị, tẹ oru nimi apụ agbamịẹ-anga ḅụ kụnụaị dọkịmarị.

⁴ Ḍin ḅụ in fukuru na ḍuḅu na mu-mu tẹ fịtẹ-apụ atẹmẹ ḅịḅị ḅiiarị. Ini opuropo nama na kẹ agbamịẹ oru pịrị tẹ anama ḅụ ḅo aị kẹ sọọ ọḍụ na pẹịarị.

⁵ Anịtẹso ịn jen-apụ ḅẹẹarị, ‘Ọ́ wamịna ḅụụ ḅelee, wa tọn-tọn ḅara sime ḅakam, ọ́ ḅara kẹ wa lama ḅụ!’ Arị inetẹ nwẹn sime apụ inema ḅịa — à nyana ịn pịrị wararị ịganị gbala-gbala biin-biin-a fịnị kịkarị.

⁶ “Kẹ ịn pịrị ḅarị fomu-ḅara à tọn-pẹlẹ ḅọrọma tẹ, ịna ḅẹrẹ-pẹlẹ ḅịḅị kẹẹ koro tẹ. Ịn mịẹ tẹ ye mẹ à kẹ ẹrị-a ye sọma ḅịa, kụma àrị anị ḅẹ gbẹẹ-ye kẹ ịn pịrị ḅa,

⁷ ịna asi ma na ịna elemu aḍapụ ma asi ma na gotẹ. Ịn kụnụaị dọkịma tẹ tụndụ ọgọnọ ḅẹ oru tẹkẹ awarị ḅio, tẹ ị̀ ḅụ siye ḍuko tẹẹ. Mie ḅụ arị ịna ḅọrọ tẹ amịẹaị ma gbẹẹ ḅara kẹ in fomu ḅa.”

⁸ KỊNỊNYANAḄỌ ḅe mẹẹ, “Gbọrụḅọ-sọ iḅi girepu-asịnmgbọlụ guluguluma guluguluma-a, anie nakara ini arị kẹ iru mịẹarị. Anị ḅara ḅụ arị ì atomi mamgba ḅaa guluguluma ḅịa. Fịrịmẹnjị ị̀ pịrịarị apụ ma arị ịn ḅọrọma ḅa.

⁹ Izirẹlịapụ ma tẹ sime Juda furo pịrị apụ ma arị in boma ḅa, tẹ ịna afuro ḅẹ apụ ma ì tụndụ amakiri mẹ nyana ọkị ḅa. À sẹlẹ ọkị tẹ atomi ma tẹ fịrịmẹnjị ị̀ pịrịarị apụ ma anịanga anga ḅa.

¹⁰ In sunsin ị̀ pịrị ḅa, pịkị ịna anana ma na opu anama ma na ḅọrọma pakama mu-mu tẹ ịn Sarọnị Lẹsẹrẹ-kiri mẹ ḅụ ịrụa-ideriarị-anga anga mẹ ḅụ na Ḅụụ-fụka tụndụ-suku nwẹn-sịn anga mẹ tẹ ịrụa-saakịarị-anga anga mẹ na ḅụ osuka fị ḅa.”

¹¹ “Kụma ọmịnị ị̀ sịkịarị apụ ma ye paka ọ́ pịrị ḅarị ḅara kịrị ḅa, anie Zayọnị, ị̀ fịafịa tụndụ mẹ ḍiki-tọrụsin-arị apụ ma, tẹ Gadi na Meni na anie iḅi-fụḅara na iḅi-so na kẹ kịnị pịrịarị nwẹn ḅẹẹ atamụnọ ma tẹkẹarị apụ ma.

¹² Anị ọmịna so ḅo ye sọ ḅa kụrọ-kụrọ fị kọn, anie arị ọ́ sịn sakị ọ́ ḅịḅị ọkị-a, anịanịa à ḍuko ye poki. Ọmịnị ị̀ ḅịḅị kan tẹ siye sẹlẹ ọkị tẹẹ.

¹³ Tẹ mie ḅụ à ḍuko ọ́ pịrịarị mịnẹ sunsin ị̀ pịrị tẹ ị̀ ḅịḅị pokiarị apụ ma tọnwa aị nyana tẹ fị tẹ pịkị ḅuu ḅa, kụma ọmịnị ḅuru ọ́ tarị ḅa, minji ḅuu pịkị ọ́ tarị ḅa. Ini ḅioḅẹlẹ ḅa, kụma ọmịnị tọrụ-tuu ḅa.

¹⁴ In nume-su ḅa ḍereku ḅụ, kụma ọmịnị ḅioḅẹngbọ-si kẹ owu ḅa.

¹⁵ À sẹlẹ ọkị tẹ apụ ma ọmịna ẹrẹ kẹ ye gbo ḅa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe mịẹ tẹ ọ́ fịị ḅa. Kụma arị ịwọ ẹrẹ kẹ ị̀ ḅịḅị pokiarị apụ ma pịrị ḅa.

¹⁶ Ḅẹḅọ-ḅẹḅọ tẹ amakiri mẹ ḅụ emi tẹ boma ḅiiarị ḅọ, mḅọ ḅioḅẹngbọ-kẹ-sịrẹrẹ-niḅi Tamụnọ ḅe ḅara ḅụ ḅii. Ye karịarị ḅọ goḅọ-goḅọ, mḅọ ḅioḅẹngbọ-kẹ-sịrẹrẹ-niḅi Tamụnọ ḅe ẹrẹ ḅụ karịị. Ḅọrọtẹ sakị mẹ ḅẹ ḅụụ-fụka ma ḅọrọ tẹ ḅioḅọrọmatẹ aị sọ ḅa.”

Ịwọma Tẹmẹ Tomikiri Mẹ

¹⁷ KỊNỊNYANAḄỌ ḅe mẹẹ, “Arị ịwọ tomikiri na ịwọ So na tẹmẹarị. Ḅọrọtẹ sakị ḅụ paka aị mamgba ḅioḅọrọma tẹ aị sọ fama ḅa.

¹⁸ À tẹmẹarị ye mẹ ḅụ ḅioḅẹlẹ tẹ ḍereku mu ḅẹẹ-sakị ḅẹẹ-sakị la. Ịwọ Jeruselemu mẹ tẹ à nama ḅarịye mẹ ḍereku anị ḅio ḅin ḅa, tẹ árị ḅẹ atomi ma ḅioḅẹlẹ ḅa.

¹⁹ Yẹrị ḅioju sọ ḍereku ì ḅio ḅin ḅa, Jeruselemu na árị atomi na gotẹ. Owu ḅarị anị ḅio sime ḅịa, pịkị ḅarasụa ḅii sịn-ḅịḅị sọ.

²⁰ Awọmẹ ḅarị kala-sakị kẹ fịị ḅịa, tẹ kịnị mamgba ḍumo mu ịn la ḅẹ sakị la ḅa. Ḍumo mu kụra sọnọa si la apụ ḅẹḅẹ, ini ịn kẹ asambịrịma apụ ọkị ḅa. Amụ anị ọkọ la-a tẹ fịị ḅọ fịị ḅọ anị nwẹnị elekima sọ ḅa mịnẹ à fomu-ḅara kẹ ịn pịrị tẹẹ.

²¹ Ịn warị nama-nama tẹ arị ḅio anga ḅa; ịn kụrọ aḍụọ ḍiḅi-ḍiḅi tẹ arịḅẹ mgbọlụ fị ḅa.

²² Ịn ḅarị jen kẹ warị nama-nama tẹ jen-apụ arị ḅio anga ḅịa, anịanịa ye ḍiḅi tẹ jen-apụ anị fị. Sịn ḍumo-ene ma sime-ḅara, anie ì atomi ene ma sọ sime ḅarị ḅara; yẹrị sẹlẹ ọkị tẹ apụ ma ịna aḅara ḅẹ akọrịnama iḅi fị alama ḅa.

²³ Ịn kọrịarị akọrịnama ma lolo ḅa, tẹ ịna awọmẹ opu ḅụụ-fụka ịn la ḅịa. Arị ini na ịna furo-ḅẹ-apụ na boma mu ḅẹẹ-sakị ḅẹẹ-sakị la ḅa.

²⁴ Ini ị̀ tẹkẹarị sakị ịna ḅịḅị amụ tuu-a ogbo arị ịna atẹkẹ pakịrị ḅa.

²⁵ Anana kun pẹị-pẹị si anama na anana na yefị gboloma ḅa, ọkụkụ amẹẹ asịra fị ḅa, gbala ḍụọ ḅio ḅẹ opu anama ọkụ, tẹ oronwi amẹẹ ḅarịye kẹ kịnị lama-lama-aị sọ ḅịa. Zayọnị, ị̀ fịafịa tụndụ ọgọnọ ḅụ, ye kẹ kịnị lama ḅẹ ye, anịanịa siye nwẹn-sịn gberie-sọ paka ḅịa.”