Ayịzaya 64 - FỊAFỊA BAỊBỤLỤ

¹ Tiye ẹrẹsị í So-tọrụ mẹ kẹ maaịn puu tẹ ideri-ḅoa? Tụndụ ma ị́ ẹrị tẹ ḅalafa ḅụ jike ḅarịya.

² Ịna oju sẹkị ḅarị ḅara ḍarịarị minji wa-wa sara kọrị fịnị ọgọnọ sararị ḅara kịka ḅa. Ḅo tẹ ị́ kụrọ kẹ si kẹ ị́ tọn apụ ma ḍie, tẹ mịẹ tẹ sịẹ-sịẹ ma ị́ tọrọkọ ḅụ oju-sẹkị!

³ Sakị ḅẹ gbọrụ sakị ḅụ í ḅo tẹ wa kẹ ḅiokoroma wẹrị-a tẹmẹ-naịn-naịnma aị mịẹm. Tụndụ ma ị́ ẹrị tẹ ḅalafa ḅụ jikem.

⁴ Gbọrụḅọ-sọ amụ jen sakị ị́ kịka Tamụnọ ẹrị-a, anịanịa í gboloma ye naa; anie ọkọ sime aị mịẹ ị́ kẹ ḅiokpọmarị apụ pịrịarị ḅọ.

⁵ Ị́yẹrị anie kuraye mịẹ ḅụ ḍerekuarị apụ daa-ọkịarị ḅọ, anie í ḅiiarị ịn kẹ ḍumo kọn ḅẹ ḅara kẹ ḅiokoromarị apụ. Ị́ wa ḍiki-ịganịm, kụma wa paa si mịẹ ma tọrọkọ-tọrọkọ mum; í opu ịganị ḅụ sọ wa paa kura-aye mịẹarị elemu sakị kụra ḅio.

⁶ Wamịnị-mgba si-mịẹapụ sọ tẹ, wa mịẹ tẹ kẹ iḅi tẹịn ye sịn-arị aị ma ḅụrụtẹ aị famam; wamịna asi ma ẹrẹsị wa ḅo samụnọtẹ ịnyịnya tẹ fẹrụ kẹ fiin soarị aị kịkarị.

⁷ Gbọrụḅọ sọ pịkị ị́ da-a tẹkẹ ḅụ, ḅarasụa gotẹ ị́ dama-ḅoarị gbọrụḅọ-sọ ofori. Ị́ ị́ ḅụụ ḅọị wa pịrị tẹẹ, tẹ wa kẹ gbin koroma-so tẹ wamịna asi gotẹ.

⁸ Kụma, KỊNỊNYANAḄỌ, wamịna Ḍaḅọọ. Wa ọgbọịn-lịka na kịkam, tẹ aḅaịn-ḅẹlẹ tẹmẹḅọ na kịkam. Ị́yẹrị wa tẹmẹm,

⁹ ọkọ ẹrẹsị ḅarị ịganị wa pịrị ḅaka ma, anịanịa si kịẹn wa pịrị mu ḅẹẹ-sakị ḅẹẹ-sakị la. Wamịnị ị́ atomii; ọkụrụkụrụ nyana wa pịrịị.

¹⁰ Ị́ fịafịa opu ama ma ịkpa kịka tẹ; Jeruselemu anie kan famatẹ koroma mangị tẹ ama,

¹¹ tẹ wamịna Tamụnọ-warị mẹ, fịafịa iḅi yọ mẹ tẹ wamịna elemu-aḍapụ sime tẹ í tokini-tokini anga mẹ, fịnị anị dọkịma guluguluma tẹ. Wa ḅẹlẹma sime anga mamgba sii kọsị tẹ koro-simearị.

¹² KỊNỊNYANAḄỌ, mie mẹmgba í jike-a aro? Í gberie sọ mịẹ ḅịa tẹ wa paa tọrụsiẹrị tọrọkọ-tọrọkọ mu wa inetẹ inema mu la ḅẹ anga saḅa ḅa ọkụ-a?