Ayịzaya 60 - FỊAFỊA BAỊBỤLỤ

Tọrọkọ-jụ Sime Jeruselemu Pịrị Ebube

¹ Jeruselemu, saakị tẹ ịrụa ḅịya ḅara ḅịyaa! KỊNỊNYANAḄỌ ḅe ebube mẹ ḅịya ị́ ọgọnọ sararị!

² Kanakana osi asịẹ ma gbaịn ḅa, Kụma ị́yẹrị kụma, KỊNỊNYANAḄỌ ḅe bele mẹ ị́ ọgọnọ ḅịya ḅa; Ọ̀ tọrụkuḅu ḅẹ ḅịya mẹ ị́ na sime ḅa.

³ Í bele mẹ sịẹ-sịẹ ma nụnụ ḅo ḅa, Tẹ ị́ ịwọ ene mẹ ḅẹ ḅaa mẹ amadapụ nụnụ ḅo ḅa.

⁴ Í simearị anga ḍiki-ikelema tẹ pakarị ye ẹrị! Í atomi ama ḅo ḅẹ tẹ kobiriarị! Í owiapụ-awọmẹ sụma-jụ sime tẹ ḅo ḅa Ịn ḍọkọḍọkọ-awọmẹ dogi ḅara kẹ í eremịna-awọmẹ dogi ḅa.

⁵ Í miemẹ ẹrị tẹ ḍereku ị́ ḅụụ ḅio ḅin ḅa; Anị í ḅioḅẹlẹma ḅarị ḅara mịẹ tẹ í oju jike ḅa Ịn sịẹ-sịẹ ma ngọ ma ọkị-ḅo ị́ pịrị ḅa; Abajị mẹ saḅa ḅụ ịna ngọ ma ḅo ḅa.

⁶ Ike-sụa-nama kẹ ogbo-ogbo ḅụ ye-muarị apụ opu ogbo Midiyanị na Ẹfa na ḅụ sime tẹ ḅo ḅa. Kịnị Sẹba ḅụ sime tẹ golu na kụnụaị agbamịẹ aị na ọkị-ḅo ḅa. Kịnị KỊNỊNYANAḄỌ ḅe kọrị tẹ ye mẹ ḅẹ iḅi-oku mẹ ḍuko ḅa!

⁷ Keda na Nebahọtị na ḅẹ anana mamgba Ịn kẹ ḅo ị́ pịrị tẹ ị́ kẹ agba mịẹ ḅa Anie agbamịẹ-anga mẹ ḅụ, kẹ KỊNỊNYANAḄỌ ḅe ḅioḅẹlẹma. KỊNỊNYANAḄỌ ḅe mịẹ tẹ ọ̀ warị mẹ ebube nyana tarị aḅara mamgba nẹngị ḅa.

⁸ Mịna arụ ma tẹ nwẹn kẹ gbii-gbiima oḅuto ḅara kẹ ḅọrọarị aị ma ḅọrọ tọ-aị, tẹ olosịkịya kịka tẹ pịkị-so ama muarị arụ ma?

⁹ Arị arụ ma anie sụma-jụ ḅẹ amakiri ḅụ sime tẹ ḅoarị aị, Tamụnọ atomi kẹ ama ḅoarị. In golu na seleḅa na kẹ ịna ḅụ sụa ḅoarị Kẹ KỊNỊNYANAḄỌ ḅe ẹrẹ kụn, Izirẹlị tẹkẹarị Fịafịa Ḅọ ḅe, Mịẹ tẹ tomikiri ḅẹ asịẹ mamgba amịna atomi kụn-arị ḅọ ḅe.

¹⁰ KỊNỊNYANAḄỌ ḅe ḍuko Jeruselemu pịrịarị: Tọrụ nimi-a jen asịẹ ḅẹ apụ ḅo siin í onu ma nama ḅa. Tẹ ịna amadapụ fịrịmẹnjị ị́ pịrị ḅa. Ị̀ ịganị ḅụ à fomu-ḅara kẹ ị́ pịrịm, Kụma mịọkụ arị iḅi tọrụ kẹ í ḍiki tẹ ọkụrụkụrụ nyana ị́ pịrị ḅa.

¹¹ Eneḅaka na ḍin na ḅụ í onu aḅọkọ ma finji ḅa, Mịẹtẹ sịẹ-sịẹ ma ḅẹ amadapụ ma ịna ngọ ọkị-ḅo ị́ pịrị ḅẹ ḅara.

¹² Kụma fịrịmẹnjị ị́ pịrị ḅịa asịẹ ma Ịn gbọrsịḅị arị ḅaa guluguluma ḅa.

¹³ Payịnị na, junipa na, Sayịpẹrẹsị na nwẹn sịn asịn ma ḅẹ ḍụḅọ, Lẹbanọnị opu apiri ma ḅio ḅo iḅitẹịn aḍụḅọ ma, Mie ini ọkị-ḅo tẹ kẹ siin ị́ nama ḅarịye Jeruselemu, Kẹ mịẹ tẹ ị̀ Warị mẹ tọrụ-gbẹ, Kẹ mịẹ tẹ ị̀ opu ama ebube nyana.

¹⁴ Í ponoma sime apụ ma owiapụ-awọmẹ ma ḅo ḅa Tẹ tuuideri tẹ kụn kẹ ị́ pịrị ḅa. Gbọrụ sakị í ḍiki-sima sime apụ mamgba ị́ aḅụọ suku sunsin ḅa. Ịn kẹ ị́ sịn ḅarịye: KỊNỊNYANAḄỌ Ḅe Opu Ama. Zayọnị, Izirẹlị Tẹkẹarị Fịafịa Ḅọ Ḅe Opu Ama.

¹⁵ Ị́ ḅarị jen kẹ sịkị tẹ ḍiki-ḅioḅuarị ḅọ ḅara sime ḅịa, Kịnị mamgba mangị-so tẹ gbin koro sime wararị opu ama. Arị mịẹ tẹ ị́ ḍụḅa tẹ iḅi ḅa, Ḍereku anga, mu ḅẹẹ-sakị ḅẹẹ-sakị la.

¹⁶ Sịẹ-sịẹ na amadapụ na í ḍikiḍiki ḅa Gbala iyingiḅọ amịna tụḅọ ḍikiḍikiarị ye ọkụ. Í nimi ḅa mịnẹ yẹrị KỊNỊNYANAḄỌ ḅe ị́ ḅọrọma tẹ, Mịnẹ Izirẹlị opu kụrọ Tamụnọ ḅe omoni ḅara ḅio ị́ pakama-ḅo tẹ.

¹⁷ “Ị́ ojo ḅiiarị anga ḅụ, à golu ọkị-ḅo ị́ pịrị ḅa; ikulele na ḍụḅọ na ḅiiarị anga ḅụ, à seleḅa na ojo na kẹ ị́ pịrị ḅa; tẹ ḍụḅarị kiri ḅụ àrị ikulele kẹ ị́ pịrị ḅa. Ị́ ḅẹrẹtọn-apụ ma ḅarị jen kẹ í ponoma ḅịa; Arị ịn mịẹ tẹ in tomḅọ la kiri kẹ mḅọ pịrị na dein na kẹ ḅẹrẹtọn ḅa.

¹⁸ Kịnị ḅarị jen kẹ kụrọ-kụrọ ḅara kẹ ye-mịẹ pọkọ naa ḅịa; Ḅaa guluguluma ḅarị jen kẹ ị́ sịẹ mẹ ḅẹ ama kiri mẹ kan sara ḅịa. Arị onu ye kikima ḅara kẹ ị́ gbaịn tẹ ị́ ḍụa ḅa; Ị́ ì tokini ḅa yẹrị ị́ ḅọrọma tẹ ẹrẹsị.

¹⁹ Ịrụa ḅarị jen kẹ bele sọ ị́ pịrị ḅịa eneḅaka ḅụ, Anịanịa akalụ mẹ í bele sọ ḍin ḅụ. Yẹrị KỊNỊNYANAḄỌ ḅe í sime gbamaso bele sọ ḅa; Ì ebube mẹ ḅẹ bele ḅịya ị́ sarama ḅa.

²⁰ Í kururu ene ma ḅo kunoma ḅa, yẹrị KỊNỊNYANAḄỌ ḅe í sime gbamaso bele sọ ḅa, Ḅịya tọrọkọ-tọrọkọ mu ịrụa na akalụ na nẹngị ḅa.

²¹ Ị́ atomi mamgba kuraye mịẹ ḅa Tẹ ini amakiri mẹ nyana mu ḅẹẹ-sakị ḅẹẹ-sakị la ḅa. Yẹrị ịn kẹ ḍiḅim, yẹrị ịn tẹmẹm, Ì opu mịẹfinji tomi mamgba ḍie ḅẹ ḅara.

²² Ịrụ tẹịn tẹ iderima tẹịn furo kịngẹ sọ Paka-ḅo opu kụrọ nyana tẹ sịẹ sọ ḅa. Karakara sakị mẹ ḅo la sakị À mịẹ tẹ miemẹ sarasarama paka ḅa, Yẹrị anie KỊNỊNYANAḄỌ ḅee!”