Ayịzaya 6 - FỊAFỊA BAỊBỤLỤ

Tamụnọ Ayịzaya sịn-arị ò ḅo Ịkịankoroḅọ sọọ

¹ Ama-da Uzaya fịị kụra mẹ ḅụ à KỊNỊNYANAḄỌ ḅe ẹrịm. Ò geletẹ opu emine ọgọnọ lẹgị-simem, tẹ ọ̀ vọrọrọ-kapa mẹ ḅẹ suku bebe Tamụnọ-warị mẹ ḅinm.

² Ori ikelema-koro ḅụ fịnị kọrị ḅara kọrịarị Sẹrafịmụ nwẹn-sịn enjẹlịapụ sịẹsimem, gbọrụḅọ gbọrụḅọ sonioa apamba sụam. Ịna ḅụ ọrụḅọ-ọrụḅọ maaịn kẹ amịna tọrụ gbaịnm, maaịn kẹ amịna oju gbaịnm, tẹ maaịn kẹ fiinm.

³ Ịn jụmọ-jụmọ sịn tẹ ḅẹẹm, “Fịafịa, fịafịa, fịafịa! Kụrọmamgba nyana KỊNỊNYANAḄỌ ḅe anie Fịafịa Ḅọ! Ori ebube tomikiri mẹ ḅin wararị.”

⁴ Ịna apọkọ fie ye mẹ mịẹ tẹ Tamụnọ-warị mẹ ḅẹ suku mẹ jikem, tẹ onwin nwẹnị Tamụnọ-warị mẹ ḅioju mẹ ḅin.

⁵ À ḅẹẹm, “Gbọrụ ḅiokpọ sọ ị̀ ḅụụ ofori! À fa tẹẹ. Àrị ẹkwẹn pakama-ḅoarị ẹkwẹn mamgba si-aị famam, tẹ si-aị si-aị ẹkwẹn-arị atomi ogboku mie à pịkị angarị ye. Tẹ anịsọ, à ḅarana ị̀ atọrụngbọ kẹ Amadaḅọ ḅe ẹrị tẹẹ, Kụrọmamgba nyana KỊNỊNYANAḄỌ ḅe!”

⁶ Anịtẹso Sẹrafịmụ-enjẹlị ma ḅẹ gbọrụḅọ nwẹnị fiin ideri ị̀ ḍọkụma-ḅo, ọ̀ ḅara ku-ku-kuma kọrịarị anyịmgbọ emi, anie ori anyịmgbọ kpapụ ikulele kẹ agbamịẹ-anga mẹ ḅụ kpapụ pakama-ḅo ye mẹ.

⁷ Ọ̀ nwẹnị anyịmgbọ mẹ kẹ ị̀ ḅịḅị apakịrị lama tẹ ḅẹẹm, “Miemẹ ị́ ḅịḅị apakịrị la tẹ, tẹ mịọkụ ị́ ḅẹrẹ-ḅarasii mẹ so tẹ, ịn pịkị ị́ asi ma wẹrịso ị́ pịrị tẹ.”

⁸ Anịtẹso KỊNỊNYANAḄỌ ḅe gbelarị tẹ à naam, “À tụḅọ kẹ fịrịma ḅẹ? Tụḅọ wamịna oku-mẹnjịḅọ sọ ḅẹ?” À nwẹnị pakịrị, “À mu ḅa! Ị̀ fịrịmaa!”

⁹ Mie ḅụ ori ị̀ ḅẹẹm à mị oku mẹ da-mu tomi ma pịrịị, “Ó poki ḅara, poki ḅara sọ, anị fiearị ye ọ́ naa ḅịa. Ó ḍiki ḅara, ḍiki ḅara sọ, pakarị ye ó nimi ḅịa.”

¹⁰ Anịtẹso ori ị̀ ḅẹẹm, “Mịẹ tẹ mịna atomi ma akuroma ma oḅoku, ịna aḅeri iningi, tẹ ịna atọrụngbọ pụụn, mịẹ tẹ ịn ḅarị inetẹ ye ẹrị, anịanịa naa, anịanịa ye fie ye naa ḅịa ḅara. Ini ọkọ mịẹ namịna, mimgbe ịn pịkị ị̀ dama-ḅo tẹ gwọọ tẹ.”

¹¹ À nwẹnị gbela, “KỊNỊNYANAḄỌ, ọkị mu tọ-sakị la ye anị nwẹn kẹ mị-ḅara sime ḅẹ?” Ọ̀ nwẹnị pakịrị, “Nwenii ama ma fa tẹ gbin koro-sime; nwenii warị ma kịnị ḅarị anga-a tẹ koro-sime; nwenii amakiri mẹ ḅioju papaa koro-sime.

¹² À tomi ma kẹ ala-lamatẹ yọ fịrịma ḅa tẹ mịẹ tẹ amakiri mẹ papaa koro-sime ḅa.

¹³ Gbọrụḅọ kịngẹ ḅọrọ kọn sọ owiapụ ḅụ ama kiri mẹ ḅio, ori sọ ini ọ̀ ḅaa guluguluma ḅa; opu sịn pẹlẹ-gbin tẹ suku mẹ kọn ḅara anie ọ̀ kịka ḅarịye.” Suku mẹ sịẹ Tamụnọ atomi ma tẹ ịwọma saakị ḅarị apụ ma pịrị ḅa.