Ayịzaya 58 - FỊAFỊA BAỊBỤLỤ

Karakara Ḅuru-ịmọ

¹ KỊNỊNYANAḄỌ ḅe mẹẹ, “Ị́ ine-ḅara ine-ḅara kẹ oloku pakamaa! Ị̀ atomi Izirẹlị asi ma gboloma ye ḍuko ịn pịrịị!

² Ene-ḅaaene-ḅaaene in sunsin ị̀ pịrịarị, tẹ ọkịarị mịnẹ ịn kpọma ḅio-sẹsẹarị ì etela ma nimi pịkị ì oloko ma poki tẹ mịẹ ḅụ. Ini mẹẹ in ḅiiarị à karakara oloko sụa ịn pịrị, tẹ mịẹ tẹ in sunsin ị̀ pịrịarị ye ḅụ tọrụ-ḅẹlẹ nyana ḅarị ḅara.”

³ Tomi ma gbelarị, “Tiye ẹrẹsị wa ḅuru-ịmọ ḅẹ, KỊNỊNYANAḄỌ ḅe gbala-gbala anị kẹ ye-sịn-a kụma? Tiye ẹrẹsị wa fịye fị-a ḅara kẹ sime ḅẹ, ọ̀ gbọrụ ḅọkọ sọ kẹ anị bala-a kụma?” KỊNỊNYANAḄỌ ḅe ịn ḅẹẹarị, “Karakara mẹ anie, ó ḅuru-ịmọarị sakị mie ọ́ pịkị kẹ ọmịna ḅụụ ḅẹlẹ aị ḍọkị-ḍọkị tẹ ọmịna kọrịnama-kọrịapụ inomarị sakị mẹ.

⁴ Ọmịna ḅuru-ịmọ mẹ mịẹ tẹ ọ́ kụrọ-kụrọ amịẹaị mịẹarị, pịkị kamụ na owu na sọarị. Ó kuromarị mịnẹ mị-ḅara kẹ ḅuru-ịmọ mịẹ tẹ arị ọmịna atẹkẹ poki ḅẹ?

⁵ Ó ḅuru-ịmọarị sakị, ọmịnị ọmịna aḅụụ kẹ tọrụsiẹrịmarị; ọmịnị osuka ḅara kẹ sịḅị-tuu iderimarị, tẹ akpa kẹ anya tẹ fọọn kẹ sararị, anị ọgọnọ ḅọlọlọ ḅẹ ḅara. Anie mie ọ́ kẹ ḅuru-ịmọ sịn-arị ye anị-a? Ó kuromarị aniemẹ ị̀ ḅụụ-ḅẹlẹ ḅẹ?”

⁶ “À ḅiiarị ḅuru-ịmọ ḅara anie: Ponoma ikoli ma siin, pịkị tomḅọ la kiri kẹ mḅọ pịrị-pịrị-a kọngọ-kpọọye mẹ sọ, tẹ mịẹ tẹ tomi ponomarị apụ ma pụkọ-paka-so.

⁷ Í fịye kẹ ḅuru-pọkọtarịapụ ma na fịị, tẹ ị́ ḅọkọ finji sime-yọ nyana-a igoin-apụ ma pịrịị. Kapa kẹ sụa ḅẹ ye nyana-a apụ ma pịrị sụa, tẹ ḅarasụa ị́ amịnapụ pịrị mẹ sịkị ma.”

⁸ “Anịtẹso ì boma ị́ ḅụụ ḅịya paka ḅa dede ịrụa ḅịya ḅara, tẹ ị́ ịnọ ma nwẹnị sarasarama gwọ ḅa. Sakị mamgba arị ị́ na sime tẹ ị́ ḅọrọma ḅa, tẹ arị emi ye mẹ nwẹnị anga-anga ḅụ ị́ gbaịn ḅọrọma ḅa.

⁹ Ị́ tẹkẹ sakị arị ị́ pakịrị ḅa. Ị́ ị̀ sịn sakị arị ị́ ḅịḅị ọkị ḅa.” “Ị́ kịnị ponoma na tomḅọ ḍiki-iderima na ḅọkọ goyegoye dasịẹma ḅẹḅẹ, pịkị si ẹkwẹn goyegoye na;

¹⁰ ị́ fịye kẹ ḅuru-pọkọtarịḅọ pịrị fị, tẹ ḅụụ-fụka nyana wararị apụ ḅụụ-fụka mịẹ pẹlẹ ịn pịrịarị ḅẹḅẹ, anịsakị ị́ gbaịn wararị kanakana mẹ ḅo eneḅaka-fịafịa-ogbo ḅịya ḅara ḅịya ḅa.

¹¹ Tẹ sakị mamgba àrị ị́ datụkụma tẹ ị́nịna dein koro ḅẹ iḅi-aị kẹ ị́ pịrị ḅa. À mịẹ tẹ ị́ kụrọ tẹ í oju iḅi ḅa. Í minji nyana lama wararị fịlawa ḍụọ kịka ḅa, ngụngụḅa tẹ minji fa-faa ye ọkụ.

¹² Í atomi ma siin iḅere-iḅerea kụra-ḅio kan-sara tẹ anga ma nama ḅa, elemu sukutarị-aḍụḅarị ma ọgọnọ ḅụ. Kịnị siin onu namarị apụ ḅara kẹ ó nimi ḅa, sitẹ awarị tẹlẹma iḅimarị apụ.”

Ịnyọsara-Ene Mẹ Koko Gbẹẹ Ye

¹³ KỊNỊNYANAḄỌ ḅe mẹẹ, “Ị̀ Ịnyọsara-Ene mẹ wẹrị fịafịama ḅara mịẹ, tẹ anị ene mẹ ḅụ ị́ ḅụụ na-iḅi ḅẹ ye ḍọkị-a ḅẹḅẹ; ị̀ fịafịa ene mẹ kẹ ye-sịn tẹ anị ene mẹ ḅụ ye mu-a, kọrịnama kọrị-a, pịkị papaa ẹkwẹn kọn-a ḅụ anị kụn-arị ḅẹḅẹ,

¹⁴ anị sakị mie ị́ fịrịmẹnjị ị̀ pịrị dogi-ḅoarị ḍereku nyana ḅarịye. À mịẹ tẹ tomi ị́ kụn ḅa bebe tomikiri mẹ ḅụ, tẹ ị́ pịkị à kẹ í elemu ḍaḅọ Jekọbụ pịrị amakiri mẹ ḅụ tọrụ-ḅẹlẹ nyana ḅa. Yẹrị KỊNỊNYANAḄỌ ḅe ọkọ ḅẹẹm.”