Ayịzaya 57 - FỊAFỊA BAỊBỤLỤ

Ori Izirẹlị Oru tẹkẹ Ḅẹrẹ-ḅarasii Ḍukoarị

¹ Iḅi atomi fịịarị, tẹ gbọrụḅọ-sọ anị ḅio sime ye nimi-a, anịanịa anị kẹ ye sịn. Kụma ịn fịịarị sakị, inetẹ ye kẹ ịn lama ḅarị gbọrụ siye sọ ofori.

² Inima tẹ iḅi ḍumo kọn-arị apụ ma, fịị ḅụ in dein na ịnyọsara na nyanarị.

³ Ọmịnị si-mịẹapụ, ó ḅoo ini ọ́ kọn mịangaa! Ọmịnị iḅi arịapụ na, sẹfị-apụ na, ama-mẹnjị-ereme na nẹngị-a.

⁴ Ọ́ kẹ kpọọtiarị ḅọ tụḅọ? Ọmịnị iruo-apụ ma, ọ́ tụḅọ kẹ ḍẹrị-ḍẹrị ḅọ sọmarị?

⁵ Ó fịye pakama oru ma tẹkẹ-tẹkẹ tẹ ọ́ kẹ tọn-tọn ḅara wẹrị wararị asịn suku-ḅio owiapụ na ereme na gboloma mịẹ mịẹarị. Ọmịnị ọmịna ḍọkọḍọkọ-awọmẹ kẹ mẹnjịarị minji akaka ḅẹ ịkụ fukuru ḅio agba mịẹarị.

⁶ Ọ́ nwẹnị anịanga minimini aḍụḅarị ọkị so mu tamụnọ tọnma tẹ sunsin arị pịrị. Ọ́ nwẹnị iru sara arị pịrị tẹ mbịaka agba mịẹ-mịẹ anị pịrị. Ó kuromarị ma mamgba ị̀ ḅụụ-ḅẹlẹ arị aro?

⁷ Ó gele lama tẹ tụndụ ma kpọlị-kpọlị tẹ agba mịẹ-mịẹ tẹ owiḅọ na ẹrẹḅọ na gboloma mịẹ mịẹarị.

⁸ Ọmịnị ẹrị gbẹẹ sọ gbẹẹ-a oru fụḅara ma kẹ ḅọrọ ọmịna warị sọarị opu ḅọkọ mẹ ọḅụjụ wẹrị wararị ye ọgọnọ. Ọmịnị ị̀ sịkịarị; ọ́ ḅịtẹ siin tẹ ọ́ ḅẹlẹmapụ na ọmịna opu iḅila ma kpọlịarị, anie ọmịnị ọkọ tẹ ọmịnị na ḅọlọlọ ḅẹ apụ ma. Tẹ anịanga ọmịnị ọ́ lẹlẹ pịrịarị ye mẹ mịẹ furo ḅinmarị.

⁹ Ọmịnị olo ma ọmbị tẹ sẹntị ma asana tẹ paka mu tẹ sunsin Molẹkị oru ḅe pịrịarị. Paa oru ḍọkị-ḅo tẹ tẹkẹ gotẹ ọ́ kịnị fịrịma mu la-a anga ofori tomikiri ḅụ, anị ḅẹ sụma na finji na, pịkị mu ḍuḅu sọ la.

¹⁰ Ọ́ ḅụụ kọsị ḅara ḅakam, paa ọ́ tẹkẹ ḅẹ oru-atamụnọ ḍọkị ẹrị ḅụ, kụma ọ́ ḅara-siin-a gbala-gbala. Ó kuromarị ọmịna oru-afụḅara ma, tọrụ gbẹẹ sọ gbẹẹ-a aị ma, ịnyọ kẹ ọ́ pịrị ḅa, tẹ anie ḅụ ịnyọ ḅarị gbala-gbala ọ́ ta ḅịa.

¹¹ KỊNỊNYANAḄỌ ḅe mẹẹ, “Ọ́ mịẹ tẹ ọ́ ḅalafaarị atamụnọ ma tọ apụ, mịẹ tẹ ọmịnị iruo-aị ḍuko ị̀ pịrị tẹ gbọrsịḅị ị̀ kẹ ḅioḅọrọmarị aị ma? Ọ́ kụn kẹ ị̀ pịrị mẹ dasịẹma ye mẹ anie à gbọsime tẹ ḅarị jen kẹ ḅịḅị fie-a alama ye mẹ ẹrẹsị mụnọọ?

¹² Ó kuromarị ọ́ mịẹarị aị ma kura-aị, kụma à mịẹ tẹ kịnị ọmịna ye-mịẹ-ḅara mẹ nimi ḅa, anịsakị ọmịna oru-afụḅara ma inetẹ ḅarasụa ọ́ pịrị ḅịa.

¹³ Ọ́ ḅarasụa gotẹ owu sakị, yee arị ọmịna oru-afụḅara ma ọ́ ḅọrọma! Tomḅọ gbọrụ-ḅịḅị ḅụ sara-pakama-ḅo ọwụ ḅara kẹ in dogi-so ḅa! Kụma ini ma tẹ ị́ kẹ ḅiokpọmarị apụ ma ini amakiri mẹ anga tẹ sunsin ị̀ pịrị ḅa ị̀ warị mẹ ḅio.”

Tamụnọ Ḅarasụa Na Gwọọ Na Minini Tẹẹ

¹⁴ KỊNỊNYANAḄỌ ḅe mẹẹ: “Yee ì atomi ma pịkịma ị̀ ḍọkụma-ḅo. Ịna etela kiki ḅẹ aị mamgba saakị siin! Etela mẹ mịẹ tẹ anị tẹlẹma sime!”

¹⁵ “Yẹrị anie gele tẹ fịafịa Tamụnọ ḅe tẹ ḍumo mu ḅẹẹ-sakị ḅẹẹ-sakị laarị ḅọ ḅee. Geletẹ fịafịa yọ ḅụ mie arị angarị, kụma à pịkị ḅụụ-iderima tẹ si ḅụ pịkị tẹmẹ nyana apụ na simearị, mịẹ tẹ arị inetẹ ịn pịkị-ḅo amịna ḅụụ-nimi na ḅiokpọ na ḅụ suu ḅẹ ḅara.

¹⁶ À ḍumo kẹ ì atomi pịrịm, tẹ à ḅarị ḅẹrẹ kẹ ịna sịḅị sịn tọrọkọ-tọrọkọ mu ḅịa, anịanịa ịganị ịn pịrị mu ḅẹẹ-sakị ḅẹẹ-sakị la, anị nwẹnị ọkọ kụma mimgbe ịn fịị tẹ, anie yẹrị ḍumo kẹ pịrịtẹ gbọrụ atomi ma.

¹⁷ Ịna asi na opu-pọkọḅẹngbọ sụa na mie à gotẹ in ḍiki-ịganị tẹ fomu-ḅara kẹ ịn pịrị tẹ ịn kẹ gbin koroma so yee. Kụma ini ma anie kọngọ-kụrọma-apụ, tẹ paa ịna etela mẹnjị ma-muarị.”

¹⁸ Ịn mịẹ tẹ ḅara arị ẹrị tẹ, kụma arị ịn gwọ ḅa. À tọrọkọ-sụn ịn pịrị tẹ ḅarasụa ịn pịrị ḅa, tẹ kururuarị apụ ma dedema ḅa.

¹⁹ À dein kẹ kịnị mamgba kpeki wararị apụ na ḅele wararị apụ na pịrị ḅa! Àrị ì atomi gwọ ḅa.

²⁰ Kụma si-mịẹapụ ma ịnyọsara-a abajị mẹ sime ḅara simem, anie anị ḅẹ ọnụngọ ma gbala-gbala daasịẹ-sịẹ-a tẹ ḅakụ-ḅakụ sọ-sọ ḅoarị ye mẹ, fun na ḅụrụtẹ aị na dogi-dogi sọ-ḅoarị.

²¹ KỊNỊNYANAḄỌ ḅe mẹẹ, “Ye-ḅụụ-la-a sime si-mịẹapụ pịrị-a.”