Ayịzaya 53 - FỊAFỊA BAỊBỤLỤ

¹ Tomi ma pakịrịarị, “Mịọkụ wa ḍukoarị ye mẹ mininim nwẹn ḅẹẹ ḅọ tụḅọ? Tụḅọ inetẹ miemẹ ḅio KỊNỊNYANAḄỌ ḅe kụrọ ẹrị?

² Anie KỊNỊNYANAḄỌ ḅe ḅii ḅara mịnẹ ọ̀ fịrịmẹnjịḅọ ḅe sịn kịka tẹ ḍiḅi tẹ kuno sụa samụnọ kiri ḅụ. Ori opu nyana-a, anịanịa ḍiki-tọrụ ḅẹ iḅi kẹ mịẹ tẹ wa ọ̀ kẹ ye-sịn. Ọ̀ ḅụụ ḅụ kịnị kẹ tọrụ-ḅaama ḅẹ gberie sọ ofori, inetẹ wa nụnụ ọ̀ ḅụụ pịrị ḅẹ gberie-sọ ofori.

³ Wa ò ḍiki-sima tẹ ọ̀ sịkịm; ọ̀ tọrụsiẹrị na akụ na da alamam. Tọrụngbọ kịngẹ sọ kẹ ò ḍiki ḅọ ofori Wa ò ḍiki-tọrụsinm, ori gberie-sọ gberie-a ye ọkụ.

⁴ Kụma wamịnị ẹrị na-iḅi tọrụsiẹrị mie ori ẹrị yee, wamịnị daa na-iḅi akụye mẹ. Anị sakị mamgba wa ọkịm mịnẹ ọ̀ tọrụsiẹrị mẹ, Tamụnọ kẹ ọ̀ fịrịma fomu-ḅara.

⁵ Kụma wamịna asi ma mie ye gotẹ ọ̀ la yee, wamịna mịẹ si mịẹ ye ẹrẹsị ini ò fomu kọsịmam. Ọ̀ da fomu-ḅara mẹ ḅụ wa ḅọrọtẹ gwọọm, ịn kẹ ḅei-ḅeima ò fomu tẹ ọ̀ daa-ọkị aị ma mịẹ tẹ wamịna ḅụụ iḅim.

⁶ Wamịnị-mgba iri-faa tẹ anana kịkam, wamịna ḅụ ọrụḅọ-ọrụḅọ amịna jụ dam. Kụma KỊNỊNYANAḄỌ ḅẹ fomuye mẹ ori ọgọnọ saram, wamịnị-mgba daa na-iḅi fomu-ḅara mẹ.

⁷ Ịn guda-guda ḅara kẹ ọ̀ mịẹm, kụma ọ̀ ḅụụ-lẹgịma ḅara kẹ anị dam, gbala-gbala ẹkwẹn gbọrụmgbọ-sọ ọ̀ kọn-a. Ọ̀ ḅaa ḅẹ-yearị anana kịkam, ini oju ḅụ isuke kịrị siin ḅẹ-yearị anana ọkụ gbala-gbala ẹkwẹn gbọrụmgbọ-sọ ọ̀ kọn-a.

⁸ Ini ò kun tẹ ḅẹrẹ-pẹlẹ ọ̀ sịḅị gbana tẹ ọ̀ ḅaa ḅẹ tẹ ọ̀ kẹ som, tẹ gbọrụḅọ-sọ ọ̀ ḅụ paka ḅẹ ye kẹ ye-sịn-a. Ịn wamịna atomi mịẹ asi gotẹ ọ̀ ḅaam.

⁹ Ini ọ̀ kẹ si-mịẹapụ na gbọrụ ḍuḅu ḅio suum, ini ọ̀ kẹ ngọ-kọnapụ na sụa ḍiḅim, karakaraye gbala-gbala amụ ò siye mịẹ-a sọ anịanịa iruoye ḍuko.”

¹⁰ KỊNỊNYANAḄỌ ḅe mẹẹ: À ḅiim mịnẹ ọ̀ tọrụsiẹrị; Ọ̀ fịị mẹ kẹ si-wẹrịso dogi-ḅo ḅẹ agba tẹ mịẹ ye. Tẹ anie ḅụ ori ò furo-ḅẹ-apụ ma ẹrị ḅa; Ọ̀ nangwọ ḍumo kọn ḅa, tẹ ọ̀ ḅụụ ḅụ mie à mịẹ ḅẹ tẹ tọn ye mẹ ḅọrọtẹ mịẹ tẹ ye sọ ḅarịye.

¹¹ Ọ̀ tọrụsiẹrị ḅọrọtẹ so sakị, ọ̀ pịkị siin jen kẹ ḍereku ḅa; tẹ ò ḅo nimi ḅa mịnẹ ọ̀ papaa tọrụsiẹrị-a. Ị̀ karakara fịrịmẹnjịḅọ, ḅụụ ḅụ à tọrụ-ḅẹlẹ nyanarị ḅọ ḅe, tọnwa-apụ fomu-ḅara da ịn pịrị ḅa, tẹ ọ̀ sịḅị ẹrẹsị à si-wẹrịso ịn pịrị ḅa.

¹² Tẹ anie ḅụ à kụn nyana kẹ ọ̀ pịrị ḅa, kụrọ nyanatẹ opu atomi ogboku ḅụ. Ò minini tẹ ò ḍumo saakị pịrịm, tẹ si-mịẹapụ ḅụ paka-paka ye ọ̀ ḅụ pakam. Ọ̀ nwẹnị tọnwa si-mịẹapụ kiri ọkị tẹ tẹkẹ mịnẹ Tamụnọ ịna si-wẹrịso ịn pịrị.