Ayịzaya 51 - FỊAFỊA BAỊBỤLỤ

Kẹ Jeruselemu Ḅio-deinma Ẹkwẹn Ma

¹ KỊNỊNYANAḄỌ ḅe mẹẹ: Ḅọrọma ḅẹ-ḅiiarị apụ, ọmịnị ì pokii, ọmịnị ḅarasụa gotẹ ị̀ ḍọkụma-ḅoarị apụ. Ọmịnị ini ó puu-pakama-ḅo ịkụ mẹ kẹ ḅiokoromaa, olulu mẹ tẹ ini ó soku-pakamaḅo anga mẹ.

² Ọmịnị ọmịna elemu ḍaḅọ Ebira-amụ kẹ ḅiokoromaa, na Sera na, ḅụụ ḅụ ọ́ paka-ḅo ḅọ ma. Arị Ebira-amụ sịn ọkị sakị, ọ̀ tụḅọ nyana-a kụma arị ò boma tẹ awọ kẹ ọ̀ pịrịm; à mịẹ tẹ ò furo-ḅẹ-apụ kịẹn-kịẹn ọkụ ofori ḅara lam.

³ À sịḅị-jịrị nyana Jeruselemu pịrị ḅa, árị agara ma ḅio angarị apụ ma. Karakaraye árị amakiri mẹ ịkpa sọ tẹẹ sọ, àrị anị kẹ fịlawa ḍụọ mịẹ ḅa, Ideni ḅụ à ḍiḅi ye mẹ kịkaye. Ḍereku na ḅioḅẹlẹ na anị yọ sime ḅa pịkị ịn kẹ ì tokini tẹ ịmịẹtẹ kẹ ị̀ ḅẹẹ ḅarị anume sọ.

⁴ “Ị̀ atomi ọmịnị ì pokii, ọmịnị à ḍukoarị ye pokii; Arị ì tolumaye kẹ sịẹ-sịẹ ma pịrịarị; ì oloko ma bele ọkị-ḅo ịn pịrị ḅa.

⁵ À sarasarama ḅo ịn ḅọrọma ḅa; ì owu-ḅara-iḅi sakị mẹ ḅo kpekitẹ. Ị̀ ḅioju ḅẹrẹtọn sịẹ-sịẹ ma pịrị ḅa. Sụma-jụ sime amakiri ma koruarị à ḅo; in ḅiokpọ nyana ḅara kẹ koruarị arị ịn ḅọrọma ḅẹm.

⁶ Ọ́ tọrụ saakị So ḍikii; ó kiri mẹ ḍikii! Kịnị ḅarị So mẹ ẹrị ḅịa, onwin kaan so ye ọkụ. Kiri mẹ elemutẹ kapa kịka tẹ sịkịrị-faa ḅa, tẹ tomi mamgba ọmọmọ kịka tẹ fịị sara ḅa. Kụma arị ọkị-ḅoarị ḍụa-ḅọrọma mẹ sime gbamaso ḅa; ì owu-ḅara-iḅi mẹ kunoma ye sọ ḅa.

⁷ Kuraye nimi apụ ọmịnị ì pokii, anie ì tolumaye amịna aḅioḅẹngbọ ḅụ nwaịn wararị apụ ma. Ọ́ ḅalafa ma, kịnị ọmịna ḅụụ-sịnịsịnịma ḅẹ aị kẹ ọ́ mịẹ-simarị sakị;

⁸ ini ịmaịn ḅarị ḅara akarakaraḅa pẹị siin tẹ ḅịtẹ kịka ḅa! Kụma àrị ọkị-ḅoarị ḍụa-ḅọrọma mẹ sime gbamaso ḅa; ì owu-ḅara-iḅi mẹ sime mu ḅẹẹ-sakị ḅẹẹ-sakị la ḅa.”

⁹ KỊNỊNYANAḄỌ, saakị tẹ ḅarasụa wa pịrịị! Ị́ kụrọ pakama tẹ kẹ wa ḅọrọmaa; anị kẹ elemu ị́ mịẹ-mịẹ ḅara mịẹẹ. Ị́yẹrị mie minji ḅio ḅẹ mamataḅaye Rehabụ ḅe pẹlẹ kọsịma ye.

¹⁰ Ị́yẹrị mie pịkị tọrụ mẹ samụnọma tẹ minji mẹ ogboku mẹnjị-ḅọrọ-anga mịẹ ye, mịẹ tẹ ị́ ḅọrọmarị apụ ma inetẹ saḅa-ḅọrọ ḅẹ ḅara.

¹¹ Ị́ pụkọ-pakamaḅo tẹ apụ ma ḅioḅẹlẹ kẹ mu Jeruselemu la ḅa, nume-suarị, olokuarị, ḍereku ḅụ. In ḅioḅẹlẹ gbamaso ḅa, gbọrsịḅị kururu na ḅioḅẹngbọ-si na ḅio paka-ḅo.

¹² KỊNỊNYANAḄỌ ḅe mẹẹ: Yẹrị anie ọ́ kụrọmarị ḅo. Ó tiegotẹ fịị-fịị tomḅọ ḍiki-ḅalafa ḅẹ, anie ḅarị ḍumo mu ene la osuka nẹngị-a ḅọ ḅe?

¹³ Ọ́ tẹmẹ KỊNỊNYANAḄỌ ḅe ọmịnị ọ̀ kẹ ḅioḅọrọma tẹ, anie So ma nụnụ finjima tẹ kiri mẹ suku-saakị ḅọ ḅe? Ó tiegotẹ sakị mamgba ḅalafa ḅara kẹ ḍumo kọn ḅẹ ó ponomarị apụ ma owi-ịganị ḅụ, tẹlẹma tẹ ọ́ ḅaa guluguluma ḅẹ-yearị apụ ḅụ? Ịna owi-ịganị mẹ ḅarị jen kẹ ọ́ la ḅịa.

¹⁴ Ikoliapụ ma ala-a ịn paka-ḅo ḅa; ịn nangwọ ḍumo kọn ḅa tẹ in ḅiiarị afịaị mamgba nyana ḅa.

¹⁵ Yẹrị anie KỊNỊNYANAḄỌ ị́ Tamụnọ ḅe; àrị abajị mẹ jikema tẹ anị ḅẹ ọnụngọ ma ḍụrụkụarị. Ị̀ ẹrẹ anie Kụrọmamgba nyana KỊNỊNYANAḄỌ!

¹⁶ Yẹrị So ma nụnụ finjimam tẹ kiri mẹ suku mẹ saakịm; À ḍuko Jeruselemu pịrịarị, “Ọmịnị ị̀ atomii! Arị ì tolumaye kẹ ọ́ pịrị tẹẹ, pịkị ị̀ ḅara kẹ ọ́ gbaịn ḅọrọmarị.”

Jeruselemu Tọrụsiẹrị Kunoma Mẹ

¹⁷ Jeruselemu, saakị! Ị́ ḅụụ jike tẹ saakị sịẹ! Í fomu-ḅara da kọpụ mẹ ḅio ḅuu tẹ anie KỊNỊNYANAḄỌ ḅe ori ịganị ḅụ kẹ ị́ pịrị ḅuu ye mẹ; í ḅuu tẹ anị ị́ mịẹ tẹ ị́ pụmbụma-pụmbụmam.

¹⁸ Gbọrụḅọ-sọ ofori etela kẹ í ḍie, ị́ atomi ma ogboku ḅụ gbọrụḅọ-sọ ofori ḅara kẹ ị́ ọlọ mẹnjị.

¹⁹ Opu ḅụụ-fụka maa ḅọkọ ḅo ị́ la tẹẹ: ị́ amakiri mẹ ọmụ anị fama-fama tẹ, ḅuru pịkị í atomi ma ḅaa tẹ. Gbọrụḅọ sọ ofori ọkụrụkụrụ nyana ị́ pịrị.

²⁰ Etela akaka goyegoye ḅụ í atomi ịnyọ faa ḅụ ḅịkị koro wararị; ịn kịkarị ye piri-deeḅọ ịgbọ ḍiein kun sịẹma wararị ḍuu. Tamụnọ ịganị ḅẹ kụrọ ịna ḅụụ ịnọ tẹ.

²¹ Ọmịnị Jeruselemu ḅẹ tọrụsiẹrị apụ, ọmịnị tẹ iru ḅuu apụ ḅara kẹ pụmbụma-pụmbụmarị apụ.

²² KỊNỊNYANAḄỌ ọmịna Tamụnọ ḅe ọ́ ḍụarị tẹ ḅẹẹarị, “Ị̀ ịganị ḅụ à kẹ ọ́ pịrị kọpụ mẹ arị ọmịna ḅara anị ọkị soarị. Ọ́ ḅarị jen kẹ ó ḅuu tẹ pụmbụma-pụmbụmarị iru mẹ ḅuu nyana-a.

²³ Arị anị kẹ ó ponoma sime apụ ma pịrị ḅa, ọ́ mịẹ tẹ ọmịnị etela akaka ma ḅụ ḅọlọlọ sime apụ ma, tẹ ḅụrụtẹ ye nanga ḅọrọ ḅara kẹ ọ́ nanga apụ ma.”