Ayịzaya 50 - FỊAFỊA BAỊBỤLỤ

¹ KỊNỊNYANAḄỌ ḅe mẹẹ, Í kuromarị à diḅọ na siya tẹ ẹrẹḅọ ḅara kẹ ị̀ atomi ḅẹẹ tẹ in so? Nwẹnị ọkọ kụma ndẹẹ ḅọrọ siya aḍiri ma? Ó kuromarị arị ọ́ kẹ dẹrị tẹ ini tomḅọ amịna awọmẹ kẹ omoni ḅara dẹrị ḅara? Ẹn-ẹn, ọmịna asi mie ó gotẹ kun ḅio sọ yee; ọmịna asi mịẹ-aị ẹrẹsị ini ọ́ kẹ ala-jụ fịrịmam.

² Tiye ẹrẹsị ị̀ atomi ị̀ na gbọrụ-ḅịḅị-fiea so àrị in ḅọrọma ḅẹ mu sakị? Tiye ẹrẹsị ini ị̀ ḅịḅị ọkị-a arị in sịn sakị? Àrị à kẹ in ḅọrọma ḅẹ ịnyọ nyana-a mụnọọ? Àrị inetẹ tọn tẹ abajị mẹ samụnọ ḅa, tẹ tọrụ ma pịkị-ḅo ịkpa sọma ḅa, mie tẹ arị ḅio ḅẹ inji ma minji ofori mẹ kẹ fịị ḅa.

³ Àrị inetẹ mịẹ tẹ So-tọrụ mẹ kanakana ḅa, gbala kịnị fịị apụ ḍuuarị ye ọkụ.

KỊNỊNYANAḄỌ ḅe Fịrịmẹnjịḅọ ḅịḅịpoki mẹ

⁴ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe kẹ ì toluma tẹ à ḍuko ḅẹ ye mịẹ tẹ arị ịnyọ ḅụụ ḅụ fa tẹ ḅọ mẹ mịẹ kụrọma ḅẹ ḅara. Dede goyegoye ori ị̀ mịẹ tẹ à ḅio-sẹsẹarị, ọ̀ kẹ ì toluma ḅẹ ye na ḅẹ ḅara gotẹ.

⁵ KỊNỊNYANAḄỌ ḅe yefieye naa kẹ ị̀ pịrị tẹẹ, amụ à pịkị kọngọ kụrọma-a anịanịa ọ̀ ḅụụ pịkị-so.

⁶ Arị ì oḅukulo finji tẹ kẹ ì fomu apụ ma pịrịm. Àrị in kiki-a ini ị̀ mịẹ-simarị sakị, ini ì ḅekeke ḅẹ mpọrị pịọnị sin-sin tẹ fịla kẹ ị̀ tọrụ isiarị sakị sọ.

⁷ Kụma ịna mịẹ-sima ma ị̀ ịnọ-a Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅarasụa kẹ ị̀ pịrịarị ẹrẹsị. Arị ị̀ ḅụụ mịẹ kụrọma tẹ arị inemam. À nimim ị̀ tọrụ-tuu ḅịa,

⁸ KỊNỊNYANAḄỌ ḅe ị̀ na kpeki wararị gotẹ, ọ̀ pịkị mịẹtẹ à mịẹ ye ofori mẹ giregire ḅa. Tọrụ pakama tẹ ḅẹrẹ ḍuko ị̀ ọgọnọ gbana ḅẹ ḅọ emi? Yee wa gbọrụ ḅụọ kẹ ḅẹrẹkọn-siri mu! Yee mḅọ kẹ ị̀ sịḅị sẹịn ḅẹ ye mẹ ọkị-ḅo!

⁹ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅarana ị̀ ḍụarị, ọkọ kụma ndẹẹ inetẹ ḅẹrẹ ị̀ ḅara siinm ḅẹ ye ḍuko pakama ḅẹ ḅọ? Ḅẹrẹ kẹ ị̀ sịḅị sẹịn-arị apụ mamgba kịnị ḅarị ini ẹrị ḅịa. Ini ịmaịn-faa ḅa akarakaraḅa pẹị sin tẹ ḅịtẹ ọkụ.

¹⁰ Ọmịnị-mgba tẹ KỊNỊNYANAḄỌ ḅe kụn-arị apụ tẹ ọ̀ fịrịmẹnjịḅọ ḅe ẹkwẹn ma poki tẹ mịẹarị apụ, Ọ́ mẹnjịarị etela mẹ kanakana ḅo anị gbaịn ḅarị-o, kụma ọ́ KỊNỊNYANAḄỌ ḅe kẹ ḅiokpọmaa ọmịnị ọmịna Tamụnọ ḅụ sịrẹrẹẹ!

¹¹ Ọmịnị-mgba tẹ jen-apụ ḅaa guluguluma ḅẹ ḅiyarị apụ, ó ḅiya ḅo aị ma ọ́ ḅaa guluguluma ḅa. KỊNỊNYANAḄỌ ḅe ḅioju mịẹ tẹ miemẹ paka ḅa; ó sime ọ́ pịrị sịḅị-jịrịma tọrụsiẹrị ẹrị ḅa.