Ayịzaya 5 - FỊAFỊA BAỊBỤLỤ

Kụrọ Ḍụọ Mẹ Gboloma Nume Mẹ

¹ Pokii, à mị nume mẹ sụarị sakị, ì ikiaḅọ na ọ̀ girepu-ḍụọ na gboloma nume: Ì ikiaḅọ gbọrụ girepu-ḍụọ nyanam, tụndụ ọgọnọ ḅụ, ye pakamarị iḅi kiri ḅụ.

² Ò kiri mẹ soku tẹlẹma tẹ anị ḅio sime aḍụḅarị ma kolokolo siinm; ọ̀ nwẹnị iḅi tẹịn kụrọ kẹ ḍiḅi. Ọ̀ kụrọtẹ geletẹ warị nama anị pịrịm, kịnị sime tẹ tọrụ kẹ anị ḅụụ wẹrị ḅarị anga. Ori mgbọlụ ma nanga tẹ iru paka ḅẹ anga sokum. Ori mgbọlụ ma ḅịya tẹ kaịn ḅẹ sakị korum, kụma aka-ḅumarị mgbọlụ mie arị sụa ye.

³ Mie ḅụ mịọkụ ì ikiaḅọ ḅẹẹarị, “Ọmịnị Jeruselemu na Juda na ḅio angarị apụ ọmịnị ị̀ kụrọ ḍụọ na ị̀ na ogboku simearị ḅẹrẹ mẹ kọn.

⁴ Anị ḅio mịẹ na-iḅi aị mamgba à mịẹ tẹẹ. Anịtẹso tiye ẹrẹsị anị aka-ḅumarị mgbọlụ sụa tẹ ḅarị yẹrị ḅiiarị iḅi mgbọlụ ma sụa-a?”

⁵ “Mie à kẹ ị̀ girepu-ḍụọ mẹ mịẹ ḅarị ḅara: àrị à ḍiḅi anị ikelema wararị asịn ma soku sin ḅa, anị wẹrị kpaịnmarị onu mẹ à sukuruma-gbin ḅa, tẹ piri-ḅio-ḅẹ anama anị ḅio ḍiḅi wararị aị ma fị tẹ nanga kiri pịrị ḅa.

⁶ Àrị anị ḍiki-tọrụsin tẹ osuka anị gbaịn ḅa. À kụrọ ma tẹlẹma ḅịa, anịanịa ọgụ kẹ anị yọ kiri lama; anie nakara à wẹrịso tẹ agarara na ja nangị asịn na anị gbaịn ḅa. Àrị oḅuto so kiki ḅa, eene kẹ anị ọgọnọ sara ḅụ.”

⁷ Izirẹlị anie KỊNỊNYANAḄỌ, Kụrọmamgba Nyanaḅọ ḅe kụrọ ḍụọ mẹ; Juda ḅẹ apụ ma anie ò ḍiḅi kụrọ asịn ma. Ori ini iḅiye mịẹ ḅẹ ḅara kẹ in ḍikim, kụma anie nakara ịn kịnị ḅaam. Ori in kuraye mịẹ ḅẹ ḅara kẹ in ḍikim, kụma ịn ḅaa apụ ma oloku pakamam mịnẹ ịna gbẹẹfị ḅii.

Tomi Mịẹarị Siye Mẹ

⁸ Ọ́ fa tẹẹ! Ọmịnị ja warị, ja warị na ja ḍụọ ja ḍụọ na fẹ-fẹ tẹ kẹ ọ́ nyana wẹrịtẹ aị ḅụ sụarị apụ ma. Japụ anga ḅẹ gbọrụḅọ anga sọ ḅarị, tẹ ọmịnị ngẹrị amakiri mẹ ḅio angarị.

⁹ À naa tẹ Kụrọmamgba Nyana KỊNỊNYANAḄỌ ḅe ḅẹẹarị, “Mịna ḍụḅa tẹ iḅi awarị mamgba papaa koro-sime ḅa.

¹⁰ Nwẹn kẹ wulalama simearị kiri mẹ ḅụ pakarị akụrọ ma, ḅaka ḅaka maa jongo ngẹrị ḅin ḅẹ iru mie arị pakama-ḅo ḅarịye. Mbịaka mgbọlị panị eseni asi tọn pakama-ḅo tẹ ḍiḅi kiri ḅụ, maa panị fa si kịngẹ mie paka-ḅo ḅarịye.”

¹¹ “Ọ́ fa tẹẹ! Dede-funfun mie ọ́ saakị tẹ sakị iru ḅuuarị ye, tẹ ḅoḅiri anga ḅụ ó sime tẹ ḅuu alama tẹ iru ọmịna tọrụ ḅaarị.

¹² Ọmịna alalị ma ḅụ ọbọ na ja farị-farịaị na, ofuro-ofuro aị na emi — iru sọ. Kụma KỊNỊNYANAḄỌ ḅe mịẹarị ọ́ pịrịarị ye tiye-o tiye-o ó nimi-a,

¹³ tẹ mie ḅụ ịn ó kun so ḅa. Ọmịna sịḅịdapụ fịye ẹrị fị-a ḅụ fịị ḅa, tẹ ama ḅẹ atomi ma minji pọkọ-tarị ḅụ fịị ḅa.

¹⁴ Ḍuḅu mẹ ịn sama-mẹnị ḅẹ tẹ koruarị, tẹ anị amịna ḅịḅị finji-sara wararị. Anị Jeruselemu ḅẹ opu atomi ma mẹnị iderimarị, ama ḅẹ atomi ma tẹ ẹkwẹn pẹlẹ, pẹlẹ-a apụ ma kẹ sụa.”

¹⁵ Ḅẹḅọ-ḅẹḅọ tọrụ-tuu ḅa, tẹ ịn ḅụụ-gelemarị apụ mamgba iderima ḅa.

¹⁶ Kụma Kụrọmamgba nyana KỊNỊNYANAḄỌ ḅe ori opu ḍie-pakamarị kuraye mịẹ ḅụ, pịkị ọ̀ fịafịa mẹ mịẹfinjiarị ori atomi kọn ḅụ.

¹⁷ Kaan gulugulutẹ ama ma ḅio anana awọmẹ osuka fị ḅa, asambịrịma oḅori ma pịkị anị yọ ye kọn fị ḅa.

¹⁸ Yei, ọ́ fa tẹẹ! Ọmịnị inetẹ ọmịna asi ḅụ pụkọ-so-a.

¹⁹ Ọ́ ḅẹẹarị, “Yee KỊNỊNYANAḄỌ ḅe fọnya ḅo tẹ ọ̀ ḅẹẹarị ọ̀ mịẹ ḅẹ ye mẹ mịẹ-mịẹ tẹ wa inetẹ tọrụngbọ kẹ anị ẹrị ḅẹ ḅara. Yee Izirẹlịapụ tẹkẹarị Tamụnọ ḅe ọ̀ tọn koroma tẹ aị ma mịẹẹ; yee wa ò kuroma simearị ye ẹrị.”

²⁰ Yei, ọ́ fa tẹẹ! Ó siye kẹ iḅiye sịn tẹ iḅiye kẹ siye sịn-arị. Ọ́ kanakana kẹ bele kiri ḍima tẹ bele kẹ kanakana kiri ḍimarị. Ọmịnị akụye kẹ ḅẹlẹ ye sọma tẹ ḅẹlẹ ye kẹ akụye sọmarị.

²¹ Yei, ọ́ fa tẹẹ! Ọmịnị ọkịarị ó ye-nimi wararị, nimi ḅụra.

²² Yei, ọ́ fa tẹẹ! Iru ḅuu ḅụ ḅara-gbanatẹ apụ! Iru gwa ḅụ ḅiokpọ tẹ ḅalafa-fa-a apụ!

²³ Kụma ọḅụ-fị kalịye ḅụ ọ́ mịẹ tẹ si mịẹ ḅọ mẹ ḅẹrẹ-ḅarasii-a ḅara kẹ mẹnjị soarị, tẹ ḍụkụ tẹ mịẹ si ofori ḅọ mẹ amịna karakara nyana-a.

²⁴ Ọkọ ẹrẹsị mịọkụ, asịra na samụnọtẹ osuka na fịnị ḅio dọkịarị gbọrụ ḅara mẹ, anie ọmịna akuno ma sọ ḅụrụ tẹ ọ́ sụa sara wararị mgbọlụ ma samụnọ tẹ fẹrụ arị fọnọ so ḅarị ḅara, ọ́ Kụrọmamgba nyana KỊNỊNYANAḄỌ, Izirẹlị tẹkẹarị Fịafịa Tamụnọ ḅe kẹ wa toluma tẹ ye mẹ sịkị tẹ ẹrẹsị.

²⁵ KỊNỊNYANAḄỌ ḅe ịganị ori atomi pịrịarị tẹ ọ̀ ḅara sụn pakama tẹ, kẹ in fomu, tụndụ ma jike ḅa, tẹ ḍụẹịn-ḍụẹịn-ḍụẹịn etela ma ḅụ sara-sime ḅa, fun sara ḅara. Anị nwẹnị ọkọ mịẹ tẹso, KỊNỊNYANAḄỌ ḅe ịganị kuno ḅịa, kụma ọ̀ ḅara paa sụn paka ḅa, kẹ in fomu.

²⁶ KỊNỊNYANAḄỌ ḅe elekima pịrịarị kẹ ala-jụ simearị sịẹ sịn-ḅo. Ori ọfịọn kẹ ịn sịn-arị in ḅoo, kiri mẹ kunoma ḅụ. Anịsakị mie ini, in ḅoarị — nwana-nwana ḅara na fọnya ḅụ na!

²⁷ Ịna ḅụ ịnyọ pọkọ-tarị ḅọ ofori; ịna ḅụ pụmbụarị ḅọ ofori. Gbala-gbala ịn sịngẹ-a, anịanịa mono. Ịna ḅiri-ponoye sọ foo-foo-a; ịna okuro ḍiki sọ pẹlẹ-a.

²⁸ Ịna aḍịẹịn oḅuarị, tẹ ịna iboli ma tẹlẹma wararị, tẹịn pakama. Ịna asụ ma ḅụọ ḅẹ okuro ma, kụrọ-tẹịn ḍụḅarị kụrọ-ḅara nẹngị wararị, tẹ ịna kirimẹnjị-ọmụarụ ogbo ma aḅụọ ma pịkị-pịkị koroarị ḅara, nume-naowu ọkụ.

²⁹ Ọmụapụ ma, nama ḅaa tẹ ọkụkụ ma ekire ḅara ekirearị, anie in dogi-so kịnị inetẹ ịna ḅara ọkị ḅịa anga muarị ye.

³⁰ Anị ene mẹ ḅụ, ini ekire Izirẹlị pịrị ḅa, tẹ anị abajị fie ḅara fie ḅa. Paa mị ama mẹ ḍikii! Kanakana na ḅụụ-ḅalaḅala na! Kanakana bele mẹ mẹnị ọkị tẹ.