Ayịzaya 44 - FỊAFỊA BAỊBỤLỤ

KỊNỊNYANAḄỌ Ḅe Kịngẹ Anie Tamụnọ Ḅee

¹ KỊNỊNYANAḄỌ ḅe mẹẹ: Mịọkụ poki, Izirẹlị, ị̀ fịrịmẹnjịḅọ, yẹrị sẹlẹ ọkị apụ, Jekọbụ furo paka apụ.

² Yẹrị anie KỊNỊNYANAḄỌ tẹ ọ́ tẹmẹ ḅọ ḅe; í iyi kụra-ḅio à ḅarasụa ị́ pịrịarị. Ḅalafa ma, ị́yẹrị ị̀ fịrịmẹnjịḅọọ, à sẹlẹ ọkị tẹ ḅẹlẹmarịapụ.

³ À minji kẹ kpakịkịtẹ kiri mẹ pịrị ḅa tẹ samụnọ kiri mẹ ḅụ okolo puu-puu ḅọrọ ḅa. À ḅaka ḅara kẹ ị̀ Tẹmẹ kẹ ị́ awọmẹ ma aḅụụ ḅio su ḅa, tẹ ì bomaa, ḅo ị́ furo-ḅẹ-apụ ọgọnọ gbana ḅa.

⁴ In brebrema so-paka ḅarị ḅara minji ḅo-ḅo laarị osuka ọkụ, in wilo nwẹn-sịn asịn tẹ mẹnjịarị minji akaka ḍiḅi-aị kịka ḅa.

⁵ “Gbọrụḅọ-gbọrụḅọ ḅẹẹ ḅa, ‘Yẹrị KỊNỊNYANAḄỌ ḅe nyee.’ In ḅo Izirẹlịapụ ma ḅụ sọ ḅa. Ọrụḅọ-ọrụḅọ KỊNỊNYANAḄỌ ḅe ẹrẹ kẹ amịna ḅara-kọngọ kẹẹ ḅa, elekima ḅara ḅụ tẹ ori Tamụnọ atomi ma ḅẹ gbọrụḅọ kẹ amịna ḅụụ sịn ḅa.”

⁶ KỊNỊNYANAḄỌ, ḅẹrẹtọn Izirẹlị pịrị, pịkị à gbaịn-arị ḅọ ḅe, Kụrọmamgba nyana KỊNỊNYANAḄỌ ḅe ḅẹẹm: Yẹrị anie Tarị, pịkị Kunoma, kpọkpọ gbọrụ Tamụnọ ḅẹ; jen tamụnọ ofori, kụma yẹrịị.

⁷ Inetẹ à kọrị ye kọrị ḅẹ jụmọ emi? Tẹ paka tẹ ye mamgba ḍuko tẹrẹmẹ arị paka ḅọ tụḅọ, sukuyọ-saakị ọkị mu kunoma la?

⁸ Ọ́ ḅalafa ma, ị̀ atomi! Ó nimi wararị mịnẹ elemu sakị kụra ḅio ọkị-ḅo mịọkụ la paka ḅẹ ye mamgba à ḍuko wẹrịm, ọmịnị mie ị̀ ḅẹrẹ-kiri sime apụ. Jen tamụnọ emi? Kụrọ nyana lama wararị tamụnọ tẹ gbala-gbala amụ àrị ẹrẹ naa-a ḅọ emi?

Ịkịankoroḅọ Ḅe Tomḅọ Ḅara Kẹ Tẹmẹ Aị Tẹkẹ Mịẹ-simarị

⁹ Oru-afụḅara mịẹarị apụ mamgba papaa apụ, tẹ ịn kẹ ye sịn lamarị atamụnọ ma mịẹ ḅụ sọ-a ḅara ḅakam. Mịna atamụnọ ma tẹkẹarị apụ ma tọrụngbọ-pụụntẹ, gberie-sọ nimi-a apụ ịna atọrụ-tuu ḅa.

¹⁰ Ye fụḅara tẹmẹ tẹ sunsin anị pịrị mẹ gbọrụ iḅi sọ nyana-a!

¹¹ Sunsin arị pịrịarị-ḅọ pịrịarị-ḅọ iderima ḅa. Oru-afụḅara mịẹarị apụ ma tomi nwẹn ḅẹẹ sakị, ịn mịẹ ḅaka ḅẹ jen ye ofori. Yee ịn ḅẹrẹkọn ḅo — ịn tẹmẹ-naịn-naịn ḅa tẹ pịkị tọrụ-tuu ḅa.

¹² Tẹmẹḅọ ḅe ikulele ikiḅa ọkị tẹ kẹ fịnị ḅio fọịarị. Ọ̀ kụrọtẹ ḅara-kọngọ mẹ amana kẹ anị ḅakụ ḅo ye sọmarị. Ọ̀ kọrịnama mẹ kọrịarị sakị ḅuru ọ̀ tarịarị, minji sọ, tẹ ịnyọ ọ̀ taarị.

¹³ Akanịḅọ ḅe sịn mẹ tọn pakama-ḅoarị. Ọ̀ tarị ye ọgọnọ tọrụ kẹ anị sime na-iḅi ḅara mị pakamarị ori ọ̀ namakọrịaị kẹ anị kara tomḅọ kịkamarị, tọrụ-gbẹtẹ tomḅọ kịkaye, kẹ ọ̀ warị ḅio koroma ḅẹm.

¹⁴ Ẹbịsịya sida sịn-arị sịn, anịanịa oku sịn, anịanịa Sayịpẹrẹsị nwẹn-sịn asịn mie ọ̀ pẹlẹ-gbin ye opu piri mẹ ḅio tẹ kẹ anị mịẹ. Anịanịa ọ̀ lọrẹlị nwẹn-sịn sịn mẹ ḍiḅi tẹ koru tẹ eene mịẹ tẹ anị so-paka ḅa.

¹⁵ Tomḅọ sịn ọkị tẹ anị ḅẹ gbọrụ pakịrị kẹ fịnị-tọnọarị, tẹ gbọrụ pakịrị kẹ oru-fụḅara mịẹarị. Ọ̀ gbọrụ pakịrị kẹ fịnị-sụkama tẹ anị kọrị tẹ ò temi tẹ kẹ ori oju ọfịrịmarị, pịkị kẹ fịturu fọịarị; ori asi pakịrị kẹ tamụnọ mịẹ tẹ sunsin anị pịrịarị.

¹⁶ Sịn mẹ ḅẹ jaị ọ̀ kẹ fịnị tọnọarị, ọ̀ nama fọị pẹị tẹ anị ọ̀ ḅụụ na iḅiarị. Ọ̀ fịnị mẹ temi-temi tẹ ḅẹẹarị, “Anị kpọma iḅi tẹ ọfịrịarị ḅara ḍiki! Iḅi ḅụra tẹ fịnị!”

¹⁷ Sịn mẹ ḅẹ kọn ye mẹ ọ̀ kẹ oru-fụḅara mịẹarị, anị tẹso, ò tuu ideri-koro tẹ sunsin anị pịrịarị. Ori anị tẹkẹ-tẹkẹ tẹ ḅẹẹarị, “Ị́yẹrị anie ị̀ tamụnọọ, ị̀ ḅọrọmaa!”

¹⁸ Ọkọ sime apụ ma ini oḅori-sọ ḅụra tẹ ḅarị ịn mịẹarị ye nimi-a. Ini ịna atọrụngbọ na ịna akuroma na gbaịn karakara mẹ pịrịarị.

¹⁹ Oru-afụḅara mịẹarị ḅọ ḅe nimi kala ye anịanịa sịḅịḅio nyana tẹ ḅa, “À sịn mẹ ḅụ jen anga dọkịmam. Àrị anyịmgbọ mẹ ọgọnọ fịturu fọịnm, pịkị nama fọị pẹịm. Tẹ sịn mẹ ḅụ kọn ye mẹ à kẹ oru-fụḅara mịẹm. Mie yẹrịị, à tuu ideri-koro sịn ikiḅa pịrịarị!”

²⁰ Ọ̀ fọọn kẹ fịye sọma tẹ fịarị; Ori oḅori akuroma ma ọ̀ da irima mu ọ̀ ḅarasụa nyana ḅẹ yọ saḅa tẹẹ. Ò minini ḍụkụ ḅịa mịnẹ ori ọlọ-sịẹma wararị oru-fụḅara mẹ gbala-gbala tamụnọ-a, ḅọkọ-ḅọkọ mamgba ḅụ.

KỊNỊNYANAḄỌ Ḅe Tẹmẹḅọ Pịkị Ḅọrọmaḅọ

²¹ KỊNỊNYANAḄỌ ḅe mẹẹ, “Izirẹlị, miemẹ kẹ ḅiokoroma; ḅiokoroma mịnẹ ị̀ fịrịmẹnjịḅọọ. Arị ị́ tẹmẹm ị́ ị̀ fịrịmẹnjịḅọ sọọ, anị sakị gbala-gbala arị ị́ kẹ ḅioḅọrọ ḅịa.

²² Oḅuto So-tọrụ kaan-so ḅara arị ị́ asi ma ọfịn siin tẹ. Pịkị ị̀ ḍọkụma-ḅoo; yẹrị anie ị́ ḅọrọmarị ḅọ ḅee.”

²³ So, ḍereku ḅụ olokuu! Tomikiri mẹ ḅẹ pokolo ayọ, ọmịnị olokuu! Tụndụ amẹẹ, ó ḍereku ḅụ olokuu; opu piri mẹ ḅio simearị sịn goyegoye sọ! KỊNỊNYANAḄỌ ḅe ọ̀ kụrọ ḍie-pakama tẹ ori atomi Izirẹlị ḅọrọma ḅụ.

²⁴ “Yẹrị anie KỊNỊNYANAḄỌ ḅee, ị́ ḅọrọmaḅọ; Yẹrị anie ị́ tẹmẹḅọ ḅee. Yẹrị anie KỊNỊNYANAḄỌ ḅe, ye mamgba Tẹmẹḅọ ḅee. Yẹrị ngẹrị So mẹ nụnụ finjimam à kiri mẹ tẹmẹ sakị, ḅarasụa gbọrụḅọ-sọ ofori.

²⁵ Ḅịrị-ẹrịapụ ma arị ịn kẹ oḅori apụ sọmarị tẹ lolia ḍiki apụ tọrọkọ paka ḅẹ tẹ ḍukoarị aị ma mịẹ tẹ arị gbarịarị. Ye-nimiapụ ma ẹkwẹn ma à ḍuko kan-siin-arị tẹ mịẹ tẹ kịnị ẹrịarị mịnẹ ịna nimi mẹ oḅori.

²⁶ Kụma ị̀ fịrịmẹnjịḅọ tọrọkọ paka ḅẹ ye ḍuko arị sakị, arị ì oku-mẹnjịḅọ fịrịma mu à tọn wẹrị aị mịẹfinji ḅẹ sakị, à mịẹ tẹ à tọn wẹrị aị ma na tọrọkọ paka ḅẹ tẹ ò ḍuko aị na ò ḍuko ḅara pakarị. À ḍuko Jeruselemu pịrịarị mịnẹ kịnị siin anị anga anga ḅa, tẹ Juda ḅẹ opu ama ma in siin arị nama ḅa. Arị opu ama ma sara ma ḅio saakị paka-ḅo ḅa.

²⁷ Ẹkwẹn ḅịḅị mie à kẹ abajị samụnọmarị.

²⁸ À Sayịrọsị ḅẹẹarị, ‘Ị́yẹrị anie ḅẹrẹtọn tomi pịrị ị̀ pịrị ḅarị ḅọ; à ḅii ye mie ị́ mịẹ ḅarịye; ị́ tọn tẹ in siin Jeruselemu nama ḅa pịkị Tamụnọ-warị mẹ ḅẹ suku mẹ saakị ḅa.’ ”