Ayịzaya 43 - FỊAFỊA BAỊBỤLỤ

Tamụnọ Mininim Ori Ori Atomi Pụkọ-pakamaḅo ḅa

¹ Izirẹlị, ị́ tẹmẹ KỊNỊNYANAḄỌ ḅe ḅẹẹarị, “Ḅarị ḅalafa ma — àrị ị́ ḅọrọma ḅa. Àrị ẹrẹ kẹ ị́ sịn tẹẹ — yẹrị ị́ nyanam.”

² Í owolo minji ḅio ḅọrọarị sakị, arị ị́ na sime ḅa; ị́ ḅụụ-fụka í ḅilema fama ḅịa. Ị́ kọrị-fịnị ḅio tolu-ḅọrọarị sakị, ị́ dọkị ḅịa; ḅo ị́ laarị kụrọtẹ daaḍiki ma ye kẹ ị́ lama ḅịa.

³ Kẹ gotẹ ọkọ ḍukoarị, yẹrị anie KỊNỊNYANAḄỌ ị́ Tamụnọ ḅe. Izirẹlị tẹkẹarị Fịafịa Ḅọ ḅe, ị́ ḅọrọmarị ḅọ ḅe. Arị Ijiputi ḅụ ḅara-siin tẹ ị́ ḅọrọma ḅa; à Sudanị na Sẹba na ḅụ ḅara-siin ḅa.

⁴ À tomikiri ḅẹ asịẹ mamgba ḅụ ḅara-siin tẹ í ḍumo ḅọrọma ḅa, ị́ ị̀ ḅụụ yela wararị ẹrẹsị, à pịkị ị́ ḅẹlẹma tẹ ị́ kẹ kụn nyana kiri ḅụ koromarị gotẹ.

⁵ Ḅalafa ma — yẹrị na ị́ na emi! “Sụma-jụ ịrụa saakị paka-ḅoarị yọ mẹ na anị tuuideriarị ala-tẹịn yọ mẹ na ḅụ arị í atomi ma ọkị ama ḅo ḅa.

⁶ Arị ọgọnọ-jụ mẹ ḅẹ tẹ anị ịn wẹrịso tẹ in so ḅa tẹ suku-jụ mẹ ini ọlọ ọḅụ pịrị ḅịa. Yee ị̀ atomi sụma-jụ ḅẹ amakiri ma ḅụ pịkị-ḅo, tomikiri mẹ ḅụ ḅẹ pakịrị-pakịrị goyegoye ḅụ.

⁷ Ini ị̀ atomii, tẹ yẹrị ịn tẹmẹm ini ebube kẹ ị̀ pịrị ḅẹ ḅara.”

Izirẹlị Anie KỊNỊNYANAḄỌ Ḅe Ḅẹrẹ-kiri sime-ḅọ

⁸ Tamụnọ mẹẹ: Ị̀ atomi sịn ḅẹrẹkọn ḅoo!; ịn tọrụngbọ nyana wararị, kụma in ye ẹrị-a; in ḅeri nyana wararị, kụma in ye-naa-a.

⁹ Tomikiri ḅẹ asịẹ ma sịn ḅẹrẹkọn mẹ ḅo; Ịna atamụnọ ma ḅụ ndẹẹ inetẹ tọrọkọ-jụ paka ḅẹ ye ḍuko ḅẹ ḅọ? Ịna ḅụ mịọkụ pakarị ye mẹ ḍuko wararị ḅọ tụḅọ? Yee mịna atamụnọ ma ịna ḅẹrẹ-kiri sime apụ ọkị sọ-ḅo tẹ ḍuko tẹ kịnị nimi mịnẹ ịn karakaram, kẹ ịna ẹkwẹn ma ḅẹ karakara mẹ ḍuko pakama.

¹⁰ Izirẹlịapụ, ọmịnị anie ị̀ ḅẹrẹ-kiri sime apụ; Yẹrị ị́ sẹlẹ ọkịm ị́ ị̀ fịrịmẹnjịḅọ sọ, mịẹ tẹ ọmịnị ì nimi tẹ ị̀ ḅụụ ḅụ minini nyana ḅẹ ḅara tẹ lekiri ḅa mịnẹ yẹrị kịngẹ anie Tamụnọọ. Kẹ ị̀ na pii-pii ḅẹ jen tamụnọ ofori; gbala-gbala jen sakị amụ paka-a, tẹ gbala-gbala pịkị paka ḅịa.

¹¹ “Yẹrị kịngẹ anie KỊNỊNYANAḄỌ ḅee, kpọkpọ gbọrụḅọ ḅe tẹ inetẹ ọ́ ḅọrọma ḅẹ ḅọ ḅee.

¹² À tọrọkọ paka ḅẹ ye ḍukom, anị tẹso, à ḅo ḅarasụa ọ́ pịrịm. Jen sịẹ ḅẹ oru-tamụnọ jene amụ miemẹ mịẹ-a; Ọmịnị anie ị̀ ḅẹrẹ-kiri sime apụụ.

¹³ Yẹrị anie Tamụnọọ, tẹ sakị mamgba ọkọ sime ḅa. Ị̀ kụrọ ḅụ pụkọ-so ḅẹ ḅọ ofori; gbọrụḅọ-sọ inetẹ à mịẹarị ye ḍima ḅịa.”

Babịlọnị Ḅara Ḅio Pụkọ-paka-so

¹⁴ Yẹrị Izirẹlị tẹkẹarị Fịafịa Ḅọ ḅe, KỊNỊNYANAḄỌ ḅe, tẹ ị́ ḅọrọmarị ḅọ ḅe ḅẹẹm, “Kẹ ọ́ ḅọrọma ḅụ, àrị ọmụ-ogbo kẹ fịrịma tẹ Babịlọnị na bịama ḅa. Àrị ama mẹ ḅẹ ogigo-aḅọkọ ma kan-sara ḅa, tẹ tomi ma oloku pọkọ mẹ pịkị-ḅo owu pọkọ sọ ḅa.

¹⁵ Yẹrị anie KỊNỊNYANAḄỌ, ọmịna Fịafịa Ḅọ ḅe. Izirẹlị, yẹrị ị́ tẹmẹm, tẹ yẹrị ị́ amadaḅọọ.”

¹⁶ Iḅere-iḅerea kụra ḅio mie KỊNỊNYANAḄỌ ḅe opu tọrụ ḅio etela puu ḅọrọma ye, ofion-minji ḅio ọ̀ mẹnjị-ḅọrọ-anga puu ḅọrọmam.

¹⁷ Ọ̀ nwẹnị opu kụrọtẹ ọmụ-ogbo tọrọkọ-sụn tẹ ịn ḅaa guluguluma ḅẹ mu, ikulele kirimẹnjị-ọmụarụ na asụ na ọmụ-ogbo. Ịn ḅịkị korom, gbala-gbala jen kẹ saakị ḅịa ḅara, ịn nwẹnị yaụ-sime, kọrịarị kịangịlị ofuro biinma ye ọkụ!

¹⁸ Kụma KỊNỊNYANAḄỌ ḅe ḅẹẹarị, “Ọ́ mịẹ ḅọrọtẹ aị fịnama sịẹma ma, anịanịa iḅere-iḅerea sakị ḅụ paka ye ḅụ sịrẹrẹ.

¹⁹ Ọmịnị à mịẹ ḅẹ-yearị ịwọ ye mẹ ẹbịị. Anị saakị tẹẹ, mịọkụ — ọmịnị inetẹ anị ẹrị ḅa! Ịkpa mẹ ḅio arị etela mịẹ toluma ḅa, tẹ anịanga ḅụ mẹnjịarị minji kẹ ọ́ pịrị ḅa.

²⁰ Piri-ḅio-ḅẹ anama kịngẹ sọ ị̀ kụn ḅa; Piri-obiri ma na okpo amẹẹ na ì tokini ḅa à mịẹ tẹ ịkpa mẹ ḅio minji mẹnjị sakị, kẹ minji kẹ à sẹlẹ ọkị tẹ apụ ma pịrị.

²¹ Ini anie à tẹmẹ ị̀ ḅụụ pịrị apụ ma, tẹ in nume su-su ì tokini-tokini-tokini ḅa!”

Izirẹlị Si

²² KỊNỊNYANAḄỌ ḅe mẹẹ: Izirẹlị, àrị ịnyọ kẹ ọ́ tama tẹ; ó sunsin ị̀ pịrị-a.

²³ Anana kẹ mịẹarị dọkịma-agba mẹ í ọkị-ḅo ị̀ pịrị-a; ị́ ị́ agba ma kẹ ị̀ kụn-a, À ḍiepịrị-aị ịgbanị ikuye kẹ ó ponoma-a anịanịa kụnụaị ḅii-ḅii-ḅii kẹ ịnyọ kẹ ị́ tama-a.

²⁴ Ị́ kụnụaị fẹ ị̀ pịrị-a anịanịa ị́ anama ḅẹ ḅẹlẹkị kẹ ị̀ pịrị ḅụụ. Anie nakara ị́yẹrị rẹ ị́ asi kẹ ị̀ jịjịmam; ị́ mịẹ-mịẹ sara sime kura-a aị ma mie ị́ kẹ ị̀ ḅụụ ịnyọ fama yee.

²⁵ Tẹ anịsọ, yẹrị anie ị́ asi wẹrịsoarị Tamụnọ ḅe, Yẹrị anie yẹrị ẹrẹsị mie à gotẹ mie mịẹarị. Arị ị́ asi kẹ ị́ ọgọnọ gbana ḅịa.

²⁶ Ḅo wa ḅẹrẹkọn mu, ị́ kẹ ị̀ sịḅị sịn ḅẹ aị kẹ ḅoo! ị́ ḅịḅị ḍuko tẹ ị́ karakara paka-ḅo

²⁷ Ị́ atẹngịapụ ma ḅẹ tarị ḅọ ḅe si mịẹm; Ị́ sịḅịdapụ ma si kẹ ị̀ mịẹm,

²⁸ tẹ ị́ ḅẹrẹtọn apụ ị̀ fịafịa-yọ pilemam. Mie ḅụ à ḅaa guluguluma ọkị-ḅo Izirẹlị ọgọnọ gbanam; À wẹrịso tẹ kịnị ḅo sime ị̀ pịrị apụ mịẹ-simam.