Ayịzaya 41 - FỊAFỊA BAỊBỤLỤ

Tamụnọ Mịẹ Tẹ Izirẹlị Ò Mininiye Ḅụ Ḅiokpọarị

¹ Tamụnọ mẹẹ: Ọmịnị ala-jụ simearị ama ọ́ gbọsime tẹ ì pokii! Ọ́ ḅụụ tẹlẹma tẹ ḅẹrẹkọn-siri ḅụ ọmịna ḅịḅị ḍukoo; ịn sakị kẹ ọ́ pịrị tẹ ọmịnị ẹkwẹn ḅa. Yee wa ḅo kobiri tẹ kọn pẹlẹ tẹ kuraye mịẹ ḅọ nimi.

² Ịrụa saakị pakarị anga mẹ ḅụ ḅo owu-ḅara-iḅi-ḅi-ḅiarị ḅọ ḅe kẹ ḅo ḅọ tụḅọ? Tẹ mịẹ tẹ ò mu anga mu anga ori owu-ḅara-iḅi ḅioḅẹlẹ kọn-arị ḅọ tụḅọ? Tụḅọ amadapụ na sịẹ-sịẹ ma na ḅụ owu-ḅara-iḅi kẹ ọ̀ pịrịarị? Ori ori okologie kẹ ịn pẹlẹ sara ḅara fọọn ọkụ. Ori ori aḍịẹịn kẹ ịn gala-galamarị ḅara fẹrụ asịra kẹ fiin ḅara.

³ Ori in ḍuka-ḍuka mẹnjị muarị tẹ gberie-sọ ọ̀ la-a. Ọ̀ sarasarama mu ḅaka ḅara mẹ mịẹ tẹ kẹlẹ kọn tẹ ori aḅụọ kiri la-a sọ tẹẹ!

⁴ Tụḅọ mịẹ tẹ miemẹ paka? Tomikiri ḅẹ atomi ogboku ḅụ ye mịẹ-mịẹ ḅọrọarị ḅara mẹ tọn-pẹlẹ ḅọ tụḅọ? Yẹrị, KỊNỊNYANAḄỌ ḅẹ, ye suku-saakị ḅụ à simem, tẹ yẹrị, KỊNỊNYANAḄỌ ḅe, pịkị sime ḅa kunoma ḅụ.

⁵ Sụma-jụ ḅẹ ama ma ḅụ ḅẹ apụ ma à mịẹ tẹ ye ẹrị tẹẹ, ịn tẹmẹ-naịn-naịntẹ oju sẹkịarị ḅalafa ḅụ. Mie ḅụ inimgba kobiri tẹ ḅoarị.

⁶ Ḅara-ḍịn apụ ma ḅarasụa jụmọ-jụmọ pịrịarị pịkị jụmọ-jụmọ ḅiokpọmarị.

⁷ Akanịḅọ ḅe golu-tẹmẹḅọ ḅe ḅẹẹarị, “Mịẹ ḅaka!” Oru-fụḅara mẹ ḅakụ miniminimarị ḅọ ḅe ngbọ kẹ anị ḅakụ-ḅakụ gbolomarị ḅọ ḅe ḅiokpọmarị. Ini mẹẹ, “ikulele sanị-sanị tẹ kẹ oḅoloarị kọrịnama mẹ iḅim” tẹ ịn nwẹnị ngọ kẹ oru-fụḅara mẹ ḅakụ kụrọma arị sime ḅẹ anga ḅụ.

⁸ Kụma, Izirẹlị, ị̀ fịrịmẹnjịḅọ, ọmịnị mie à sẹlẹ ọkị tẹ apụ ma, Ebira-amụ, ì ikiaḅọ ḅe furo-ḅẹ-apụ ma.

⁹ Tomikiri ḅẹ ịkọlị ma ḅụ àrị í ọkị-ḅom; sụma tẹịn ịkọlị ma ḅụ í simearị tẹ àrị ị́ sịn tẹ ị́ ḅẹẹm, ị́yẹrị ị̀ fịrịmẹnjịḅọọ. Àrị ị́ sịkị-a, kụma àrị ị́ sẹlẹ ọkịm.

¹⁰ Ḅalafa ma — àrị ị́nịna emii! Yẹrị ị́ Tamụnọọ, ḍụkụ tẹ gberie-sọ ị́ tẹmẹ-naịn-naịnma ma! Àrị ị́ mịẹ tẹ ị́ kụrọ ḅa, pịkị ḅarasụa ị́ pịrị ḅa Àrị ị́ gbaịn tẹ ị́ ḅọrọma ḅa.

¹¹ “Ịganị nyana ị́ pịrị wararị apụ ma owu-ḅara-sii ḅẹ ḅụụ-jịrị nimi ḅa. Owu kẹ ị́ pakarị apụ ma fịị ḅa,

¹² Ị́nịna ịgbanịarị apụ ma ị́ ịn ḍọkị ḅa, kụma ị́ ịn ẹrị ḅịa; ị́nịna owu sọarị apụ ma tomikiri mẹ ḅụ ịmaịn-faa ḅa.

¹³ Yẹrị ị́ nyana Tamụnọọ; Àrị ị́ kụrọma tẹ ḅẹẹarị, Ḅalafa ma; à ḅarasụa ị́ pịrị ḅa!

¹⁴ KỊNỊNYANAḄỌ ḅe ḅẹẹm: Izirẹlị, ị́ ịrụ wararị, pịkị ịnyọ nyana-a sọ, ḅalafa ma, à ḅarasụa ị́ pịrị ḅa. Yẹrị Izirẹlị tẹkẹarị Fịafịa Ḅọ ḅe, anie ị́ ḅọrọmarị ḅọ ḅe.

¹⁵ Àrị ị́ mịẹ tẹ ị́ mbịaka fomu saratẹ fun siin arị ḍụḅọ sọ ḅa, ịwọ tẹ pịọ-pịọtẹ anangị simearị ḍụḅọ mie à kẹ ye ḅarịye. Í tụndụ ma fomu sara tẹ arị guluguluma ḅa; tụndụ ma kọsị ḅo fọọn sọ ḅa.

¹⁶ Ị́ arị kẹ So-tọrụ wakị ḅa; fẹrụ mẹ arị kẹ fiin so ḅa, tẹ erise nwẹnị arị gala-galama ḅa. Anịtẹso í ḅioḅẹlẹ ḅa, yẹrị ị́ Tamụnọ ẹrẹsị; í ì tokini ḅa, yẹrị Izirẹlị tẹkẹarị Fịafịa Ḅọ ḅẹ.

¹⁷ Ị̀ atomi minji ḅụụ-fụka ḅụ minji ḍọkịarị sakị, minji ḅuu pọkọ-tarị ḅụ ịna apọkọ ḅẹ ololo kpakịkị sakị, anị sakị ḅụ, yẹrị, KỊNỊNYANAḄỌ ḅe, ịna tẹkẹ pakịrị ḅa, Yẹrị, Izirẹlịapụ tẹkẹarị Tamụnọ ḅe gbala-gbala ịn kẹ gbin koroma so ḅịa.

¹⁸ Gberie-sọ so-paka-a atụndụ ma ọgọnọ à tọrụ pakama tẹ minji mẹnjị ḅa tẹ ngụngụḅa minji sara ideri-ḅo tụndụ ma suku la ḅa. À mịẹ tẹ ịkpa mẹ ḅo ḍaḅa-ḍaḅa yọ sọ ḅa tẹ samụnọ kiri mẹ kẹ mẹnjịarị ngụngụḅa minji mịẹ ḅa.

¹⁹ À mịẹ tẹ ịkpa mẹ ḅio sida sịn-arị so-paka ḅa, akasiya na, matụlụ na, olivu na asịn ma sọ. Gberie sọ paka-paka-a kiri ḅụ opu piri so-paka ḅa, payịnị na, junipa na, Sayịpẹrẹsị na asịn opu apiri.

²⁰ Tomi mie ẹrị tẹ nimi ḅa mịnẹ yẹrị, KỊNỊNYANAḄỌ ḅe, anị mịẹm. Ịn nwẹnị anị fiearị ye naa ḅa mịnẹ Izirẹlị tẹkẹarị Fịafịa Ḅọ ḅe mịẹ tẹ anị pakam.”

KỊNỊNYANAḄỌ Ḅe Owu Kẹ Papaa Atamụnọ Ma Sịn-arị

²¹ KỊNỊNYANAḄỌ ḅe, Izirẹlị amadaḅọ ḅe, miemẹ nyana tẹ ḍuko ḅẹẹm: Ọmịnị sịẹ-sịẹ ma oru-atamụnọ ma, ọmịnị ọ́ nyana tẹ ḍuko ḅẹ ye ḍukoo. Ọmịnị iḅi tẹịn aị tẹ ọ́ kẹ anị mịẹ kụrọma ḅẹ aị ọkị-ḅoo!

²² Ọ́ mịanga ḅoo, tẹ tọrọkọ-jụ paka ḅẹ ye ḅịrị ẹrịị, mịẹ tẹ anị kiri ọkị sakị wa nimi ḅarị ḅara. Ḍuko giregirema ḅẹrẹ-siri mẹ pịrị ḅọrọtẹ sakị ḅụ mịẹ-aị ma, pịkị arị fiearị ye ḍuko wa pịrị.

²³ Ó ḍuko wa pịrịị, tọrọkọ mẹ ọlọ wararị ye anịsakị wa nimi tẹ mịnẹ ọmịnị tamụnọ! Ọ́ gbọrụ iḅiye, anịanịa opu fa ọkị-ḅoo; ọ́ ḅalafa na ḅụụ gwẹ-gwẹ na kẹ wamịna-aḅụụ ḅio suu ḅinmaa!

²⁴ Ọmịnị na ọ́ mịẹarị aị mamgba na papaa aị; sunsin ọ́ pịrịarị apụ ma ịn kịnị ḅụụ sịẹarị!

²⁵ Ịrụa mẹ saakịarị pakịrị anga mẹ ḅụ à gbọrụ tomḅọ sẹlẹ pakama-ḅo tẹ; Arị ori ọkị-ḅo ḅa ọgọnọ-jụ mẹ ḅụ, tẹ ori owu paka ḅa. Ọ̀ ḅẹrẹtọn apụ nanga ḅọrọ ḅa, lịka ọkụ, aḅaịn-ḅẹlẹ tẹmẹḅọ ọgbọịn-lịka nanga ḅara kịka ḅara.

²⁶ Ọmịna ḅụ tụḅọ mie paka ḅẹ ye mẹ ḍuko wẹrị, mịẹ tẹ ọmịnị inetẹ ḅẹ ḅẹẹm mịnẹ ó kuraye ḍukom? Ọmịna ḅụ gbọrụḅọ-sọ anị ḅụ gbọrụ ẹkwẹn sọ kọn-a, gbọrụḅọ-sọ ó ḍuko gberie sọ naa-a!

²⁷ Yẹrị, KỊNỊNYANAḄỌ ḅe, anie tarị oku mẹ ḍuko Zayọnị pịrị ye; Àrị oku kẹ Jeruselemu fịrịma tẹ ḅẹẹm in ḍuko, “Ọmịna atomi ḅoarị! Ini ama ḅoarị!”

²⁸ À oru-atamụnọ ma ogboku ḅụ ḍiki sakị, ịna ḅụ ḅẹ gbọrụḅọ-sọ ḍuko ḅẹ gberie sọ nyana-a; gbọrụḅọ-sọ à gbela aị ma pakịrị-a.

²⁹ Ma oru-atamụnọ mamgba in ye ḅụ sọ-a; gbala-gbala ini inetẹ mịẹ-mịẹ gberie-sọ ofori ma mḅudu ma ini ịnyọ na kụrọ na nyana-a.