Ayịzaya 4 - FỊAFỊA BAỊBỤLỤ

¹ Anị sakị mẹ ḅụ, sọnọma ereme gbọrụ owiḅọ kun sịẹma tẹ ḅẹẹ ḅa, “Wa inetẹ wamịna ḅụụ koko tẹ wamịna kapa sụa ḅa, kụma sisi minini wa pịrị wa ḅẹ wamịna diḅọ, mịẹ tẹ wa ḅarị owiḅọ sime-a ḅụụ-jịrị mẹ da tọrọkọ mu ḅịa ḅara.” Jeruselemu ḅo anị sime, sime-ḅara sime ḅa.

² Anị ene mẹ ḅụ, KỊNỊNYANAḄỌ ḅe mịẹtẹ amakiri mẹ ḅụ ḍiḅi wararị sịn goyegoye, opuye-o kalaye-o, ḍụḅa ḅaka ḅa, pịkị iḅi ḅa. Izirẹlịapụ mamgba tẹ fịị-a so apụ ma, anị goo ḅioḅẹlẹ ḅa pịkị kẹ ḅụụ-tọn ḅa, amakiri mẹ pakama-ḅoarị afịaị ma ḅụ.

³ Jeruselemu ḅụ kirikọnḅọ goḅọ-goḅọ, tẹ KỊNỊNYANAḄỌ ḅe sẹlẹ-ọkịm fị ma nwẹn ḅẹ ḅọ mẹ, ịn kẹ mḅọ sịn ḅarịye “fịafịa”.

⁴ Ọ̀ kụrọ ḅụ KỊNỊNYANAḄỌ ḅe sịẹ mẹ kọn tẹ anị mịẹ kpaịnma ḅa, tẹ Jeruselemu ḅẹrẹ-ḅarasii mẹ sịkịrị siin ḅa, pịkị anị anga ọsụ tẹ ọmbie mẹ sọ.

⁵ Anịtẹso So-tọrụ ḅụ Zayọnị tụndụ mẹ kana-koro ḅụ, pịkị anịanga kobiri wararị apụ mamgba gbaịn koro ḅụ, KỊNỊNYANAḄỌ ḅe oḅuto kẹ fịrịma ḅa eneḅaka ḅụ, pịkị onwi na kọrị lamarị fịnị na ḍin ḅụ. Tamụnọ ebube bebe ama mẹ gbaịntẹ anị wẹrị kpaịnma ḅa.

⁶ Ori ebube sịḅị-kikima-yọ sọ ama mẹ pịrị ḅa eneḅaka ḅẹ ọfịrị ḅụ, pịkị mịẹ tẹ ye anị ḅio sime apụ la ḅịa, eene na erise na ḅụ.