Ayịzaya 38 - FỊAFỊA BAỊBỤLỤ

Amadaḅọ Hẹzịkaya Obim Tẹ Pịkị Gwọọm

¹ Mị sakị pembe sakị ḅụ Ama-da Hẹzịkaya obi tẹ kẹlẹ kọnm fị tẹ. Ịkịankoro Ayịzaya Emọzị tụḅọ ḅe ori ẹrị tẹ ọ̀ ḅẹẹm, “KỊNỊNYANAḄỌ ḅe ḍuko ị̀ pịrịarị mịnẹ í ye goyegoye kẹ ọrụtọn nyanam, í oju iḅi ḅịa ẹrẹsị. Ḅụụ tẹlẹma tẹ fịị.”

² Hẹzịkaya nwẹnị ọ̀ tọrụ pịkị warị akaka mẹ da tẹ tẹkẹ:

³ “KỊNỊNYANAḄỌ, kẹ ḅiokoromaa, mịnẹ à ḅioḅẹngbọ-kẹ-sịrẹrẹ-niḅi ḅara na sịḅị-tuu ị́ pịrị ḅara na kẹ fịrịmẹnjị ị́ pịrị tẹẹ, à pịkị sakị mamgba ḅụụkụrọma tẹ í ḅiim à mịẹ ḅẹ ye mịẹm.” Tẹ ọ̀ nwẹnị saakị ḅioḅẹngbọ-si ḅara kẹ owu lama.

⁴ Anịtẹso KỊNỊNYANAḄỌ ḅe tọn Ayịzaya pịrịm

⁵ ọ̀ pịkịma mu tẹ Hẹzịkaya ḅẹẹ, “Yẹrị KỊNỊNYANAḄỌ ḅe, í elemu ḍaḅọ Devidi Tamụnọ ḅe, ị́ tẹkẹ naa tẹ, pịkị ị́ tọrụ ḅẹ owu-minji mẹ ẹrị tẹ. À minini tẹ í jei akụra kẹ ḍumo tọrọkọ mu ḅa.

⁶ Arị na Jeruselemu mẹ na pọkọ pakama-ḅo ḅa Asiriya tomikiri mẹ daarịḅọ ḅe ḅara-ḅio ḅụ, tẹ ama mẹ gbaịn ḅọrọma tọrọkọ, tọrọkọ mu ḅa.”

⁷ Ayịzaya nwẹnị pakịrịm, “KỊNỊNYANAḄỌ ḅe elekima kẹ ị̀ pịrị ḅa, kẹ ḍie pakama mịnẹ ori ò minini ye mịẹ ḅa.”

⁸ Ama-da Ehazi nama ḅekin-warị kpọlị ye mẹ ọgọnọ KỊNỊNYANAḄỌ ḅe mịẹ tẹ tẹmẹ mẹ oyi aḅụọ kẹ ọḅụ da ḅa.

⁹ Hẹzịkaya ori obi ḅụ kụrọma tẹso, ọ̀ mị tokini nume mẹ kẹẹ kuromam:

¹⁰ À kuromam ị̀ asambịrịma sakị ḅụ à so ḍuḅu ḅio muarị ḅoto, À gbala-gbala ì ḍumo-ene mamgba kẹ anga fama ḅịa ḅara.

¹¹ À kuromam mịẹ ḍumo wararị apụ ma tomikiri ḅụ À ḅarị gbala, gbala KỊNỊNYANAḄỌ ḅe ẹrị ḅịa Anịanịa ḍumo wararị tomḅọ goḅọ-goḅọ sọ.

¹² Ì ḍumo pẹlẹ-so tẹ kunomam, Akpụrụ-warị paịn-sara ḅara, Ḅịtẹ pẹlẹ-siin ḅara ḅịtẹ ḍoriye ḅụ. À kuromam Tamụnọ ì ḍumo kẹ ḅo kunoma lamarị.

¹³ Bebe ḍin mẹ à kẹ owum fụka ye ḅụ, ọkụkụ ì mgbe ma anyịmarị ye ọkụ. À kuromam Tamụnọ ì ḍumo kẹ ḅo kunoma lamarị.

¹⁴ Ị̀ pọkọ ḅarị paka-a, tẹ anị ḅụ ịnyọ fa tẹẹ, Tẹ à nwẹnị olosịkịya ḅio-fiema ḅara kẹ ḅara kẹ ḅio-fiema. Ịnyọ ị̀ atọrụngbọ tanm so ḍiki ḅụ. KỊNỊNYANAḄỌ, mịẹ ḅụụ-fụka mẹmgba ḅụ ị̀ pọkọ pakama-ḅo.

¹⁵ Àrị inetẹ tiye ḍuko ḅẹ? KỊNỊNYANAḄỌ ḅe miemẹ mịẹm, Ì ḅioḅẹngbọ akụarị, tẹ arị inetẹ mono-a.

¹⁶ KỊNỊNYANAḄỌ, à ḍumo-sime ị́ pịrị ḅa, ị́yẹrị ngẹrị; Ị̀ gwọọ, tẹ à ḍumo.

¹⁷ Ị̀ tẹmẹ ḅẹ akụ mẹ pịkị-ḅo dein sọ ḅa. Ị́yẹrị ì ḍumo ḅọrọmarị ye kẹ anị lama ḅẹ ye mẹmgba ḅụ, Ị́ ị̀ asi mamgba wẹrịsoarị.

¹⁸ Ḍuḅu ḅio ḅụ inetẹ í tokini ḅẹ gbọrụḅọ-sọ ofori; fịtẹ-apụ inetẹ ḅioḅẹngbọ kẹ ị́ ḅụụ ḅụ gbana na-iḅim mẹ kẹ ḅiokpọma ḅịa.

¹⁹ Ḍumo wararị apụ mie í tokiniarị, Mịọkụ arị í tokiniarị ḅara mẹ. Ḍapụ ḍuko ịna awọmẹ pịrịarị í ḅioḅẹngbọ kẹ ḅụụ ḅụ gbana na-iḅi ḅara simearị mẹ.

²⁰ KỊNỊNYANAḄỌ, ị́ ị̀ gwọ tẹẹ. Wa ọbọ farị, farị tẹ su í tokini ḅa, Nwẹnị ị́ Warị mẹ ḅio nume su tẹ kẹ í tokini, wa ḍumo mu la ḅiri, la ḅiri ḅụ.

²¹ Ayịzaya ḍuko amadaḅọ ḅe pịrịm mịnẹ ori ịla sịn mgbọlụ ḅẹ ye temi tẹ kẹ ọpọpọlị mẹ ḅụ gbanaa, ori oju iḅi ḅa.

²² Anịtẹso Hẹzịkaya gbelam, “Ndẹẹ à kẹ nimi ḅarị elekima mịnẹ arị inetẹ Tamụnọ warị mẹ mu ḅẹ?”