Ayịzaya 32 - FỊAFỊA BAỊBỤLỤ

Karakara Amadaḅọ

¹ Ene ḅẹ gbọrụ ene ḅụ karakara kẹ ama-da ḅarị amadaḅọ paka ḅa, tẹ sịẹ ḅẹ ḅẹrẹtọn-apụ ma tomḅọ la kiri kẹ mḅọ pịrị ḅara kẹ ḅẹrẹtọn ḅa.

² Ịna ḅụ ọrụḅọ-ọrụḅọ fẹrụ ḅụ ḅụụ kikima yọ sọ ḅa, pịkị erise fie sakị, fie sakị ḅụ ḅọị ḅẹ anga na. Ịkpa ḅio puu puu ḅọrọarị kuroro mie ịn kịka ḅarị ye, gbala gele lamatẹ ịkụ tẹ ịrụa kikima kịnị pịrịarị ye, piri ofori kiri ḅụ.

³ Ịna atọrụngbọ na ịna aḅeri na finji tomi ma ḅiiarị aị pịrị ḅa.

⁴ Ịn ḅarị jen kẹ ye-inema-a ḅara sime ḅịa, kụma yefieye naa ḅara mie ịn kẹ ye mịẹ, tẹ pịkị ịna ḅioḅẹngbọ sime tẹ in ḍuko ḅẹ ye mẹ tọrụngbọ ḍuko ḅarịye.

⁵ Gbọrụḅọ sọ ḅarị kuroma ḅịa mịnẹ oḅori-ḅọ anie kụn kẹ pịrị ḅẹ ḅọ, anịanịa ḅẹẹ mịnẹ ngoro-ngoro-tomḅọ anie kịnị mingirima-mingirima-a ḅọ.

⁶ Oḅori-ḅọ oḅori aị ḍuko tẹ si-aị kuroma ḅo tẹ mịẹarị. Ọ̀ mịẹarị aị na ò ḍukoarị aị na ọ̀ kẹ KỊNỊNYANAḄỌ ḅe fie-simarị, tẹ gbala, gbala ò fịye kẹ ḅuru pọkọ-tarịarị apụ ma pịrị fị fị-a, anịanịa minji kẹ minji ḅuu pọkọ-tarị gbọrụḅọ-sọ pịrị ḅuu-a.

⁷ Oḅori tomḅọ anie si ḅọọ, tẹ ọ̀ pịkị si-aị mịẹarị. Ọ̀ jen-apụ na ḅiya tẹ iruo-aị kẹ igoin-apụ ma warị famarị, pịkị in kikiarị ịna akarakara nyana ḅụ.

⁸ Kụma kụn nyana ḅara kẹ ḍumo kọn-arị ḅọ mẹ mḅọ kịnị mingirima, mingirima-a ḅara kẹ ye mịẹarị, pịkị sịẹ kụrọ kuraye mẹ pịrịarị.

Ḅẹrẹkọn Na Ye Kẹ Tarị Anị Sime Ḅara Wẹrị Na

⁹ Ọmịnị ḅụụ ḅaa ḍumo kọn-arị ereme, gberie-sọ gotẹ ḅalaḅala-a apụ, ọmịnị à ḍukoarị ye pokii.

¹⁰ Mịọkụ ó ye ọmịnị na iḅi wararị ḅara simearị, kụma jen kụra mị sakị pembe sakị ḅụ ọ́ mịẹ-mịẹ ḅara ofori ḅara sime ḅa, anie kụrọ mgbọlụ paka ọ́ pịrị tẹ ó kobiri warị suu ḅịa ẹrẹsị.

¹¹ Ọ́ ḅụụ ḅaa-a ḅara kẹ anga simem, gberie-sọ ḅụụ fụkama-a ḅara ḅụ, kụma mịọkụ ọ́ ḅalafa ḅụ oju sẹkị! Ọ́ kapa siin fama tẹ akpa kẹ ḅiri ọkị.

¹² Ọ́ ḅara kẹ ekpe fomu kururu ḅụ, ọmịna fịaị pakamarị aḍụọ na kụrọ aḍụọ na gulugulu fama tẹ ẹrẹsị,

¹³ agarara na ja nangị asịn na ị̀ atomi akiri ḅụ so-pakarị. Tomi sime tẹ ḅioḅẹlẹ sime awarị mamgba na ḅin tẹ ḍumo sime, sime ama mẹ na gotẹ owuu.

¹⁴ Ama-da warị mẹ so ini anị kuroma mangị ḅa, tẹ sịḅịda opu ama mẹ ḅio kpọkpọ gbọrụḅọ-sọ kọn ḅịa. Sime yọ na ọmụ-aị koko awarị ma na tẹ ịn gbaịn sime aị ma kan sara gbamaso ḅa. Piri ḅio ḅọ anama ma anịanga mẹnjị-mẹnjị ḅọrọ ḅa, tẹ anana ma anịanga osuka fị ḅa.

¹⁵ Kụma KỊNỊNYANAḄỌ ḅe pịkị siin jen gbọrụ sakị kẹ ọ̀ tẹmẹ kẹ wa fịrịma ḅa. Papaa koro simearị si tẹ kiri mẹ ḅo fịye pakamarị ye ḍiḅi iḅi kiri sọ tẹ tọnwa iḅi afịaị pakama ḅa.

¹⁶ Ḅẹ anga, ḅẹ anga, ama kiri mẹ ḅụ karakara na jụmọ la kiri kẹ mḅọ pịrị na mie mịẹ ḅarịye.

¹⁷ Anị goo ọkọ mịẹ ḅarịye anie ḅẹḅọ-ḅẹḅọ kuraye mịẹ ḅa ẹrẹsị, dein na ye ḅụụ la-a na nwẹnị anịanga sime gbamaso ḅa.

¹⁸ Tamụnọ atomi ḅarị ḅioḅẹngbọ-lokoloko nyana ḅịa, tẹ ịna sime yọ ma dein tẹ kpaịn sime ḅa.

¹⁹ Kụma mgbọlị eene opu apiri ma ḅụ sara ḅa, tẹ ịna ama mẹ kan koroma ḅa.

²⁰ Ḅẹḅọ-ḅẹḅọ kpọma ḅioḅẹlẹ ḅa minji tọnwa ḅara kẹ ḍiḅi aị ma la ḅarị mẹ, tẹ anga mamgba osuka paka saratẹ asụ ma na opu anama ma na ye ịn la-a ḅara kẹ arị fị ḅa.