Ayịzaya 31 - FỊAFỊA BAỊBỤLỤ

Tamụnọ Jeruselemu Gbaịn Ḅọrọma Ḅa

¹ Ḅarasụa gotẹ Ijiputi muarị apụ ma ịn fa tẹ! Ijiputi nyana wararị ḅakatẹ ọmụgbin aị ma ḅụ mie ịn sịrẹrẹarị — asụ ma na, kirimẹnjị-ọmụarụ ma na, ọmụapụ na, kụma ịn KỊNỊNYANAḄỌ ḅe ḅụ sịrẹrẹ-a, Izirẹlị tẹkẹarị Fịafịa Ḅọ ḅe, anịanịa ọ̀ ḅara ḅarasụa ḅii.

² Ọ̀ mịẹarị ye ò nimi wararị! Ori opu ḅụụ-fụka kẹ fịrịmarị. Ori ẹrẹmam mịnẹ ò si-mịẹapụ na ịn gbaịn ḅọrọmarị apụ na fomu ḅa ḅẹ ye mẹ ọ̀ mịẹarị.

³ Ijiputi-ḅẹ-apụ ma ini tamụnọ-a, ini tomii. Ịna asụ ma tẹmẹ ḅụ ḅẹ asụ. KỊNỊNYANAḄỌ ḅe ori amịẹaị mịẹarị sakị, kụrọ sịẹ mẹ kọsị-sara tẹ ịnyọ nyana-a tẹ anị ḅarasụa pịrị sime ye mẹ ḅịkị ḅa. Ini maa apụ ma gulugulu fa ḅa.

⁴ KỊNỊNYANAḄỌ ḅe ị̀ ḅẹẹm, “Anana-ḍikiḍikiapụ oloku ḅara oloku ḅara sọ, ini inetẹ ọkụkụ mịẹ tẹ ọ̀ ḅụụ-gbiripu tẹ ọ̀ ḅaa tẹ nama kuroma mangị-so ḅịa; anị gbọrụ ḅara mẹ ḅụ gberie-sọ inetẹ yẹrị Kụrọmamgba nyana KỊNỊNYANAḄỌ ḅe kiki ḅịa Zayọnị tụndụ gbaịn ḅọrọma ḅụ.

⁵ Feni fiin ọ̀ warị ikelema-ikelema tẹ amịna awọmẹ gbaịn ḅọrọmarị gbọrụ ḅara mẹ, mie yẹrị, Kụrọmamgba nyana KỊNỊNYANAḄỌ ḅe, kẹ Jeruselemu gbaịn tẹ anị ḍụa ḅarị ḅara.”

⁶ KỊNỊNYANAḄỌ ḅe ḅẹẹm, “Izirẹlịapụ, ó si kẹ ị̀ mịẹtẹ ị̀ na tụḅụrụ tẹ. Kụma mịọkụ, ọ́ pịkịma ị̀ ḍọkụma-ḅoo!

⁷ Gbọrụ ene ḅụ, ọmịnị-mgba ọ́ kẹ si mịẹarị oru-afụḅara ma tẹ seleḅa na golu na kẹ mịẹ aị ma kẹ wakị-nguma ḅa.

⁸ Asiriya faa ḅa ọmụ ḅio, kụma tomina kụrọ ḅụ-a. Asiriya ḅẹ apụ ma owu kiri mangị ḅa, tẹ jen-apụ ịna asawọ ma kẹ omoni sọma ḅa.

⁹ Ịna tomikiri mẹ daarịḅọ ḅe opu ḅalafa ḅụ mangị faa ḅa, tẹ ọmụ alapụ ma tẹmẹ-naịn-naịn tẹ ịna ọmụ-arụ pike aḅịtẹ ma kuroma so ḅa.” KỊNỊNYANAḄỌ ḅe, ḍuko tẹẹ, Jeruselemu ḅụ in sunsin pịrịarị KỊNỊNYANAḄỌ ḅe, tẹ agbamịẹ ḅụ amịna fịnị anịanga kọrịarịḅọ ḅe.