Ayịzaya 30 - FỊAFỊA BAỊBỤLỤ

Ijiputi Na Nyana Ye ḅụ sọ-a Ḅịḅị-kẹ-ogbosọ

¹ KỊNỊNYANAḄỌ ḅe ḍuko tẹ, “Juda daarị apụ ma ịn fa tẹ, ịn kọngọ kụrọma ị̀ pịrịarị ẹrẹsị. Yẹrị tọn ịn pịrị-a aị mie in ḍukamẹnjịarị, tẹ ḅara pono ị̀ ḅịḅị-kẹ-ogbosọ ma pịrịarị, tẹ si kẹ si ọgọnọ gbana kpolimarị.

² In mu Ijiputi ḅara ḅarasụa ḅiiarị ị̀ ḅịḅị gbela-a ḅara ḅụ. In ḅiiarị Ijiputi ịn gbaịn ḅọrọma. Mie ḅụ ini Ijiputi ḅẹ amadaḅọ kẹ ḅiokpọmarị.

³ Kụma amadaḅọ ḅe kụrọ nyana tẹ kẹ ḅarasụa ịn pịrị ḅịa, tẹ Ijiputi ịn gbaịn ḅọrọma ḅarị mẹ opu ḅụụ-fụka kẹ kunoma ḅa.

⁴ Karakaraye ịna tọrụ ḍima tẹ mu apụ ma Ijiputi ḅẹ maa opu ama, Zohanị na Hanisi na la tẹ sọ,

⁵ Juda ḅẹ apụ tiye-ì-gbo ḅẹẹ ḅa, mịnẹ in ḅioḅẹngbọ-kẹ-sịrẹrẹ-niḅi-a sịẹ ḅụ sịrẹrẹ tẹ, sịẹ tẹ ịn ḅarasụa nyana ḅẹ tẹ kẹ ḅiotọn-arị sakị ḅụ in pikirimarị apụ.”

⁶ Mie suku-jụ ḅẹ ịkpa mẹ ḅio ḅẹ anama ma gboloma oku mẹ tẹ Tamụnọ ḅara ḅo ye mẹ: “Ịna ama tọrụ ḍima tẹ sịẹ apụ ma ye kẹ kịnị lama ḅẹ aị simearị sịẹ ogboku mẹnjị-ḅọrọ muarị, ọkụkụ na kịnị-ḅaaḅa oronwi na fiin-arị mamataḅaye ma na angarị yọ. Ini ịna igbigi la lamatẹ ḍiepịrị-aị ma kẹ opu anama oḅukulo gbana tẹ kẹ mu inetẹ gbọrụ ḅarasụa sọ nyana ịn pịrị ḅịa sịẹ pịrị ḅẹ muarị.

⁷ Ijiputi pịrịarị ḅarasụa mẹ ye ḅụ sọ-a. Mie ḅụ arị ịwọ ẹrẹ kẹ Ijiputi koro tẹ: ‘Ye kẹ kịnị lama, lama-a opu pamba-sụa oronwi.’ ”

Ḅịḅịpoki-a Apụ Ma

⁸ Tamụnọ ị̀ ḅẹẹ tẹ mịnẹ à tomi ma kịkarị ye mẹ kẹ ḍiri ḅio kẹẹ koroma, mịẹ tẹ ịna si sime-ḅara mẹ ḅẹ ḍukoye sime mu ḅụọ, ḅụọ la ḅẹ ḅara.

⁹ Sakị mamgba ịn kọngọ kụrọma Tamụnọ pịrịarị, sakị mamgba ini iruoarị, sakị mamgba ịn ḍụkụ tẹ KỊNỊNYANAḄỌ ḅe toluma-aị ma poki-a.

¹⁰ Ini ịkịankoroapụ ma ḅẹẹarị ịn ḅịḅị gbaịn. Ịn ḅẹẹarị, “Ó kuraye gboloma ẹkwẹn kọn wa pịrị ma. Ọ́ wa naa ḅiiarị aị ḍuko wa pịrịị. Yee wa wamịna papaa aị ma minini tọrọkọ, tọrọkọ mu.

¹¹ Ọ́ wamịna etela ḅụ ḅelee, tẹ wa mẹnjị-ḅọrọarị anga kiki wa pịrị ma. Wa ọmịna Izirẹlị tẹkẹarị Fịafịa Ḅọ ḅe gboloma ye naa ḅẹ ḍọkị-a.”

¹² Kụma mie Izirẹlị tẹkẹarị Fịafịa Ḅọ ḅe ḅẹẹ ye, “Ọmịnị à ḍuko ọ́ pịrịarị ye kẹ ye-sịn-a tẹ kụrọ-kụrọ amịẹaị na oḅori-kẹ-kịnịsịn aị na ḅụ sịrẹrẹarị.

¹³ Ḅẹrẹ ọmịna aḅara si tẹẹ. Ọ́ kịkarị ye anie gele wararị onu akaka tẹ ọgọnọ gẹẹ ideri-ḅo suku la wararị ye; ḅiotọn-a sakị ḅụ ọ́ ḅịkị gbere-gedeima sara ḅa.

¹⁴ Ọ́ gẹrẹgẹrẹ ḅarị ḅara, aḅaịn-ḅẹlẹ kịka ḅa; ọ́ gẹrẹgẹrẹ saratẹ kẹ anyịmgbọ tan-tan ye sọ paka-ḅo ḅịa, anịanịa kẹ minji ọngịọ-ọngịọ ye ḅio sụa ḅara la ye sọ paka ḅịa.”

¹⁵ Tẹịn ḅẹrẹtọn KỊNỊNYANAḄỌ ḅe, Izirẹlị tẹkẹarị Fịafịa Ḅọ ḅe, tomi ma ḅẹẹarị, “Ọ́ pịkị-ḅo tẹ sịḅị yaụma tẹ ị̀ kẹ ḅiokpọmaa. Anịtẹso ọ́ kụrọ sịẹ tẹ ye ḅarị ọ́ la ḅịa.” Kụma ọ́ ḍụkụ tẹ anị mịẹ-a!

¹⁶ Anie nakara, ó kuromarị ye fọnya mangịarị asụ ọgọnọ ọmịnị na fịya-a apụ ḅụ mangị-so; anịsakị ọmịnị na fịya-a apụ ḅụ mangị-so mẹ ó kuraye mịẹm — mangị-so mẹ anie ọ́ mịẹ na-iḅi yee! Ó kuromam ọmịna asụ ma iḅiọkụ mangịarị, kụma ó ḍukarị apụ ma sarama mangị ọ́ nẹngị ḅa.

¹⁷ Ọmịna ḅụ ḅẹ kịnị maa ẹndẹ oyia asi finji ọmịnị na fịya-a apụ ma ḅẹ gbọrụ ọmụḅọ ẹrị tẹ mangị fa ḅa, tẹ sọnọ ọmụapụ ngẹrị ḅo tẹ, mịẹ tẹ ọmịna atomi mamgba mangị fa ḅa. Ọmịna ọmụ-ogbo ḅụ gberie-sọ kiri kọn ḅịa, tụndụ ọgọnọ-jụ ngẹrị pike wararị arụ pike ḅịtẹ sịn sikima.

¹⁸ Anịsọ KỊNỊNYANAḄỌ ḅe paa koruarị ori ọkụrụkụrụ nyana ọ́ pịrị. Ọ̀ tẹlẹma wararị ò ḍiki sịḅị-jịrị, sakị mamgba ò kuraye mịẹarị ẹrẹsị. Ḅioḅẹlẹ sime KỊNỊNYANAḄỌ ḅe kẹ ḅiokpọmarị apụ ma pịrịm.

Tamụnọ Ori Atomi Boma ḅa

¹⁹ Ọmịnị Jeruselemu ḅụ angarị apụ ọ́ ḅarị jen kẹ owu ḅịa. KỊNỊNYANAḄỌ ḅe anie kịnị ḍiki sịḅị-kụrụkụrụarị ḅọ, tẹ ọ́ ḅarasụa gotẹ owu ọ̀ pịrị sakị ori ọ̀ pakịrị ḅa.

²⁰ KỊNỊNYANAḄỌ ḅe mịẹ tẹ ọ́ ḅụụ-fụka sakị ḅụ sọ tolu-ḅọrọ ḅa, kụma ò ḅioju ọmịnị na anị ḅio sime tẹ ye kẹ ò toluma ḅa, tẹ ọ́ ḅarị jen kẹ ọ̀ ḍọkị ḅalaḅala ḅịa.

²¹ Ọ́ nwẹnị etela-iri tẹ ama-ḅara anịanịa ere-ḅara sọ-sọ ọmịna oḅukulo ọmịnị ọ̀ pọkọ naa ḅa, ḅẹẹarị, “Mie etela mẹẹ: anị ḍuka muu.”

²² Ọmịnị ọmịna oru-afụḅara ma tẹ seleḅa kẹ sara gbaịn wararị aị ma na, golu kẹ sara gbaịn wararị aị ma na dogi so ḅa, tẹ arị kẹ gbin nguma, nguma tẹ ḅẹẹ ḅa, “À ḅarị jen kẹ ọmịnị ẹrị ma!”

²³ Ó ye ḍiḅiarị sakị goyegoye ḅụ KỊNỊNYANAḄỌ ḅe eene kẹ fịrịma tẹ ḍiḅi aị ma so-paka tẹ tọnwa afịaị pakama sara ḅa soku sakị ḅụ. Anị ene mẹ ḅụ, ọmịna opu anama ma tọnwa osuka nyana tẹ fị ḅa.

²⁴ Nambulo ma na kala asụ ma na tẹ ọmịna aḍụọ ma ḅẹ kiri soku aị ma fọnọ-mẹnjịarị aị ma nwẹnị iḅitẹịn nama afịaị nyana tẹ fị ḅa.

²⁵ Ọmịnị na fịya-a apụ ma ọmụ-aị kobiri wẹrị tẹ, sime tẹ ọmụgbin-arị ayọ ma ọmịna aḅara-ḅio sọ tẹ ọmịnị ịn ḅaa-fama ḅarị ene mẹ ḅụ, tụndụ goyegoye na kiri gele anga goyegoye na ḅụ, ọtọḅọ paka-pakatẹ minji mẹnjị-mẹnjị paka-ḅo ḅa.

²⁶ Akalụ mẹ ịrụa ḅịya ḅara ḅịya ḅa, tẹ ịrụa mẹ ḅịya sọnọma sakị kẹ ḅịya anị ḅịya, ḅịya ḅara nẹngị ḅa gbala gbọrụ kiri ḅụ ịrụa mẹ sọnọma aḍin ḅẹ ḅịya kẹ ḅịyarị ye ọkụ. Mie paka ḅarị sakị anie KỊNỊNYANAḄỌ ḅe ọ̀ kẹ ori atomi lama aị ma ḅẹ ịnọ ma fịna tẹ arị gwọ ḅarị sakị mẹ.

Tamụnọ Fomu-ḅara Kẹ Asiriya Pịrị ḅa

²⁷ Kịnị inetẹ ala anga sime tẹ KỊNỊNYANAḄỌ ḅe kụrọ na ebube na ẹrị ḅa. Kọrị fịnị na onwin na ori ịganị ḍie-pakamarị. Ori ẹkwẹn-arị, tẹ ori ẹkwẹn pakama ḅoarị sịẹ ma nwẹnị kọrị fịnị kịkarị.

²⁸ Ọ̀ fẹrụ kẹ ọ̀ tọrọkọ tarị fịrịmarị, gbala opu minji tẹ ye goyegoye dogi soarị ye ọkụ. Anị tomikiri ḅẹ asịẹ ma ọfịn mu gulugulu-faa ḅio suuarị, tẹ ịn tọn tẹ mịẹ ḅẹ si ma mịẹ tẹ arị daasịẹarị.

²⁹ Kụma ọmịnị, Tamụnọ atomi, ó ḅioḅẹlẹ tẹ nume su ḅa, anie fịafịa alalị fị ḍin ḅụ ó su su ḅara mẹ. Ó ḅioḅẹlẹ ḅarị ḅara, KỊNỊNYANAḄỌ, Izirẹlị ḍụa ḅọrọmarị ḅọ ḅe warị sọ muarị apụ ofuro-ofuro aị ḅụ ḅioḅẹlẹ ma mẹnjị-mẹnjị ḅara.

³⁰ KỊNỊNYANAḄỌ ḅe mịẹtẹ ḅẹḅọ-ḅẹḅọ ori opu kụrọ nyanatẹ pọkọ mẹ naa ḅa, tẹ ori ịganị mḅọ ḅụụ ịnọ ḅa. Fịnị aḅẹlẹ kọrị, kọrị paka ḅa, oḅuto turee-tureema paka ḅa, mgbọlị eene na, wọị-wọịma sararị eene na so.

³¹ Asiriya ḅẹ apụ ma KỊNỊNYANAḄỌ ḅe pọkọ naa tẹ ò fomuye mẹ ḅẹ kụrọ mẹ ịna ḅụụ fụka sakị ịn tẹmẹ-naịn-naịn ḅa.

³² KỊNỊNYANAḄỌ ḅe in fomu, siin in fomuarị sakị ori atomi anị sakị mẹ kẹ akwa na ọbọ na farịarị. Tamụnọ mie ḅarana Asiriya na owu mẹ sọ ḅarịye.

³³ Ala tẹ sakị ḅụ ịn gbọrụ yọ tẹlẹma wẹrịm, ini orumo kẹ Asiriya tomikiri mẹ dọkịma fama ḅẹ yọ. Anị pokolo tẹ finjima wararị, tẹ ịn pakịrị tan-tan anị ḅio sara tunduruma wararị. KỊNỊNYANAḄỌ ḅe ọwụ sara tẹ anị fịnị-ḅẹlẹ sọ tẹ veremuma anị kọrịma ḅa.