Ayịzaya 29 - FỊAFỊA BAỊBỤLỤ

Jeruselemu Ḅụ Paka Ḅẹ Ye

¹ Tamụnọ ḅe agbamịẹ-anga mẹ, anie Jeruselemu mẹ ḅioju, anị fa tẹẹ! Devidi anga opu ama mẹ anị fa tẹẹ! Yee jen gbọrụ kụra anịanịa maa akụra ḅo ḅọrọ, anị ḅẹ alalị asakị ma na arị na.

² Anịsọ, Tamụnọ opu ḅụụ-fụka ọkị-ḅo ḅa ama mẹ ọgọnọ, anie ịn kẹ “Tamụnọ ḅe Agbamịẹ-anga” sịn anga mẹ. Anị anga tomi lee-leema owu ḅa, tẹ ama mẹ agbamịẹ-anga kịka ḅa, anga mamgba ọmbie-ọmbie-ọmbie.

³ Tamụnọ owu kẹ ama mẹ paka ḅa, ọmụapụ kẹ anị ikelema-koro tẹ anị ọkị ḅẹ ḅara kẹ koru ḅa.

⁴ Jeruselemu kiri suku-ḅio simearị ḍụẹịn kịka tẹ ḅụụkụrọma tẹ ẹkwẹn ḅẹ ḍọkị ḅa, ḅaịntẹ pọkọ ḅụ, fọọn mẹ ḅio.

⁵ Jeruselemu!, kịnị tọrụ nimi-a apụ tẹ owu kẹ ị́ pakarị apụ mamgba ini ịna ofuro siin ḅa, fẹrụ fọọn ofuro siin ḅara pembe ḅara, tẹ ịna ọmụ-ogbo-ogbo ma tẹ tẹmẹ-naịn-naịnmarị aị ma fẹrụ asịra dogi so ḅara kẹ fiin-so ḅa. Anị-gbọrụ-kirikiri, gbọrụḅọ-sọ kuroma-a ḅara ḅụ,

⁶ Kụrọmamgba nyana KỊNỊNYANAḄỌ ḅe ọ́ pọkọ pakama-ḅo ḅa, kụrọtẹ so-alagba erise ma na kiri-jike ma na ḅụ. Ọ̀ kụrọtẹ opu erise na opu orumo na kẹ fịrịma ḅa;

⁷ anịtẹso sịẹ-sịẹ ma ọmụ-ogbo-ogbo mamgba tẹ owu kẹ Jeruselemu, anie Tamụnọ ḅe agbamịẹ-anga mẹ pakarị apụ ma, ịna owuna-aị mamgba na ịn kẹ ḅụụ-palị mu aị mamgba na — ye goyegoye ḍawọ-jụ kịka tẹ ịmaịn-faa ḅa; ḍin ḅụ tẹmẹ tọrụngbọ kẹ ẹrị sime ye kịka ḅa.

⁸ Sịẹ-sịẹ mamgba tẹ owu kẹ Jeruselemu pakarị apụ ma ḅuru-ḅaarị tomḅọ tẹ ḍawọ-jụ fịye fị tẹ naa saakị tẹ ḅuru paa pọkọ-tarị ḅọ kịka ḅa, anịanịa minji ḅuu pọkọ-tarị-ḅaarị tẹ ḍawọ-jụ minji ḅuu tẹ naa-saakị tẹ pọkọ paa kpakịkị wararị tomḅọ ọkụ.

Kẹ Ye-sịn-a Ḅeri nụnụ Ẹkwẹn Ma

⁹ Ị́ mịẹarị ye mịẹ ma-muu, tẹ oḅori tomḅọ sọọ! Ị́ mịẹarị ye mịẹ ma-muu, tẹ tọrụngbọ-pụụntẹḅọ sọọ! Gbọrụ iru sọ ḅụ ḅuu-a ḅara kẹ iru ị́ tọrụ ḅa! Tọịn-koro iru sọ ḅịḅị la-a ḅara kẹ pụmbụma-pụmbụmaa.

¹⁰ KỊNỊNYANAḄỌ ḅe mịẹ tẹ í mono ḅụụ-lọkọ nyana tẹẹ, ị́ tẹlẹma fama tẹ mono ḅọrọ-so. Ịkịankoroapụ ma anie tomi ma tọrụngbọ sọ ḅẹ apụ, kụma Tamụnọ ịna tọrụ fịna tẹẹ.

¹¹ Ịkịankoroḅọ ẹrị-ẹrị ịkịan goyegoye fiearị ye ọmịna ḅụ kikima ḅa. Anị kịka ḅarịye gbaịn oḅolotẹ ḍiri. Ọmịnị anị kẹ ḍiri go ḍịn-ḅọ ḍọkụma-mu tẹ ọ̀ ḅẹẹ mịnẹ ò goo ọ́ pịrị ḅẹẹ kụma, ọ́ ḅẹẹ ḅa ori inetẹ goo ọ́ pịrị ḅịa, in ye kẹ anị oḅolo wararị ẹrẹsị.

¹² Ọmịnị anị kẹ ḍiri go ḍin-a ḅọ pịrị tẹ ḅẹẹm mịnẹ ò goo ọ́ pịrị ḅẹ kụma, ori ọ́ pakịrị tẹ ḅẹẹ ḅa mịnẹ ò ḍiri go ḍin-a.

¹³ KỊNỊNYANAḄỌ ḅe ḅẹẹm, “Mịna apụ ma ọkịarị in sunsin ị̀ pịrịarị, kụma ịna ẹkwẹn ma ye fie-a, tẹ ịna aḅioḅẹngbọ ma pịkị jen yọ ḅụ emi. Ịna Tamụnọ nimi mẹ gberie-sọ gberie-a, tomina oloko na ama-anganga-ḅara na kịngẹ, tẹ ịn papaa ḍawọ sịḅị ḅio suu aị.

¹⁴ Mie ḅụ arị ịna ḅụụ-gbiripuma ḅa, in fomu sin, in fomu sin ḅụ. Ye-nimiapụ pịkị ḅo oḅori apụ sọ ḅa, tẹ ịna aka mamgba ḅo mịẹye ḅụ sọ-a ye sọ ḅa.”

Tọrọkọ-jụ Ḅẹ Ḅiokpọmaye

¹⁵ Tọn tẹ mịẹ ḅẹ aị kẹ KỊNỊNYANAḄỌ ḅe ḅọịmarị apụ ma ịn fa tẹ! Ḅọị anga mie ini ịn tọn wẹrị aị ma mịẹarị, tẹ kuromarị mịnẹ gbọrụḅọ-sọ ini ẹrị-a, anịanịa ịn mịẹarị aị ma nimi.

¹⁶ In ye goyegoye pịkị iḅoarị. Ndẹẹ kụrọ-nyana tẹịn ye, tẹmẹḅọ ḅe anịanịa aḅaịn mẹ? Tomḅọ tẹmẹ ye inetẹ ọ̀ ḅẹẹ ḅẹ, “Ị́yẹrị ị̀ tẹmẹ-a?” Anịanịa anị inetẹ ọ̀ ḅẹẹ ḅẹ, “Ị́ mịẹarị ye í nimi-a?”

¹⁷ Ẹkwẹn mẹ koroarị ḅara ḅụ, ala-a sakị ḅụ kpititẹ opu piri mẹ ḅo ḍụọ ḍiḅi ye-yọ sọ ḅa, tẹ ḍụọ ḍiḅi ye-yọ mẹ ḅo opu piri sọ ḅa.

¹⁸ Anị ene mẹ ḅụ, ḅeri-iningiapụ ma inetẹ ḍiri ḅio goo pakama ye naa ḅa, tẹ tọrụngbọ-pụụntẹ-apụ ma, tẹ kanakana ḅio angarị apụ ma, ịna atọrụngbọ finji tẹ kẹ ye ẹrị ḅa.

¹⁹ Igoin tẹ ḅụụ-iderimarị apụ ma pịkị sin KỊNỊNYANAḄỌ, Izirẹlị tẹkẹarị Fịafịa Ḅọ ḅe pịrịarị ḅioḅẹlẹ mẹ ḍọkị ẹrị ḅa.

²⁰ Anị nwẹnị ja apụ ponomarị tẹ Tamụnọ ḍiki iderimarị apụ kunoma sọ ḅa. Tamụnọ si-mịẹḅọ goḅọ-goḅọ ḅaa sin ḅa.

²¹ Tamụnọ ja atomi ḍuko simarị apụ ma ḅaa guluguluma ḅa, si amịẹaị mịẹ kẹ mịẹ-mịẹye sọma tẹ mịẹarị apụ kikima tẹ in fomu-ḅara da-a apụ ma na, iruo aị ḍuko tẹ kẹ kịnị mingirima, mingirima-a apụ ma dasịẹma tẹ ịn ḅarị ịn la kiri nyana-a apụ ma na.

²² Mịọkụ mie ḅụ KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, tẹ ḅụụ-fụka ḅio Ebira-amụ pụkọ-pakama ḅo ḅọ ḅe, tẹ ḅẹẹm, “Ị̀ atomi, ọ́ ḅarị jen kẹ tọrụ-tuu ḅịa, tẹ ọmịna atọrụ-kuḅu ma ḅarị jen kẹ obiapụ tọrụkuḅu kịka ḅịa, ḅụụ-jịrị ḅụ.

²³ Ọmịnị à kẹ ọ́ pịrị ḅarị awọ ma ẹrị sakị, anịsakị mie ó minini ḅarịye mịnẹ yẹrị anie Izirẹlị tẹkẹarị Fịafịa Ḅọ ḅee. Ọmịnị ị̀ kụn tẹ ì ḍiki-ḅalafaa ḅa.

²⁴ Oḅori atomi ḍawọ tẹ anị fiearị ye naa ḅa, tẹ sakị mamgba kẹ mbụrụmbụrụarị apụ ma ḅioḅẹlẹ ḅa, ye kẹ in toluma ḅụ.”