Ayịzaya 28 - FỊAFỊA BAỊBỤLỤ

Kẹ Ọgọnọ-jụ ḅẹ Ama-da Kiri Mẹ Ḅẹ Apụ Ḅeri Nụnụ Ye

¹ Izirẹlị ḅẹ ama-da kiri mẹ fa tẹ! Anị ḅẹ ebube mẹ iru ḅuu tọrụ-ḅaamatẹ ḅẹrẹtọn apụ asịḅị ḅụ sime tẹ fịlawa ama-da sun kịka tẹ ḍisiarị. Ịna ḅụụ-gelema asịḅị ma ḅụ ịn kụnụaị kẹ sara lama wararị, kụma anịanga iru ịn ḅaa ḅọlọlọma wararị.

² KỊNỊNYANAḄỌ ḅe gbọrụ kụrọtẹ opuḅọ nyana wararị tẹlẹma tẹ owu kẹ ịn paka, gbọrụḅọ tẹ eene mgbọlị saramarị erise kịka tẹ ḅo ḅa, tẹ anị ọsụma sararị eene ḅara ḅụ kụrọma mẹnjịarị opu minji kịka tẹ bebe amakiri mẹ gbaịn ḅa.

³ Arị iru ḅuu tọrụ-ḅaama tẹ sịḅịdapụ ma ḅụụ-gelema mẹ ịn nanga kiri pịrị ḅa.

⁴ Arị ḅụụ-gelema sịḅịdapụ ma ebube mẹ tẹ ḍisiarị ye mẹ kịnị ḅarị anị ẹrị ḅịa, anị kụra mẹ ḅụ tarị sụarị ịla mgbọlị kịka ḅa, anie ḅịyarị, ḅịyarị ịn kaịn fịarị aị ma.

⁵ Gbọrụ ene ḅoarị, Kụrọmamgba nyana KỊNỊNYANAḄỌ ḅe fịlawa kịka ebube ama-da sun sọ fịị kọnma apụ ma pịrị ḅarị sakị.

⁶ Ọ̀ karakara ḅẹrẹkọn nimi kẹ ḅẹrẹkọn fịrị mẹnjịarị apụ ma pịrị ḅa, pịkị ḅiokpọ kẹ ama mẹ onu aḅọkọ ma ḍụarị apụ ma pịrị ḅa, ama-koru apụ ḅo ḅẹ sakị ḅụ.

Ayịzaya Na Juda Ḅẹ Iru Ḅuu Ịkịan koro Apụ Ma Na

⁷ Ịkịankoroapụ ma agbamịẹapụ na kịngẹ sọ iru ḅuu nwenii tẹ pụmbụma-pụmbụmarị. Ịn waịnị na kụrọ iru na pikiri ḅuu ḅụrama tẹ pụmbụ tẹ. Ịkịankoroapụ ma iru ḅuu ḅaka tẹ ḅarị Tamụnọ kẹ fịrịmarị ịkịan ma fiearị ye naa-a, tẹ agbamịẹapụ ma sọ iru ḅuu ḅaka tẹ ḅarị inetẹ ịn kẹ ịna tọrọkọ ḅo aḅẹrẹ kọn-pẹlẹa.

⁸ Ịn lẹgị wararị anga mẹ ḅẹ adẹbịlẹ ma ọsụ-aị, ọsụ-aị arị gbaịn wararị, tẹ fịafịa gbọrụ yọ sọ ofori.

⁹ Ini ì gotẹ ḍuko-sụa nyanarị. Ini mẹẹ, “Ḅieḅe kuromarị ò ye kẹ tolumarị apụ tọ apụ? Tụḅọ ori oku ḅiiarị? Ḍọkọḍọkọ-awọmẹ tẹ mịọkụ ndo-kụmarị apụ kịngẹ mie anị iḅi pịrị ye.

¹⁰ Ọ̀ ḅụụkụrọma tẹ ẹkwẹn-ngbọ-ngbọ na, ọrụ-ọrụ na, gbọrụ ḍawọye, ḍawọye na kẹ wa tolumarị.”

¹¹ Ọmịnị ì poki ḅịa ḅẹḅẹ, ọmịnị ẹrị ḅa mịnẹ Tamụnọ ọ́ tọrụ nimi-a apụ ọkị-ḅo kịrị pọkọ fiearị ẹkwẹn kẹ ye kẹ ó toluma ḅa.

¹² Ori ịnyọsara na ḅio dein na kẹ ọ́ pịrị ḅẹ tẹ kẹ ọ́ dam, kụma ọmịnị ò poki ḍụkụ-a.

¹³ Anie mie KỊNỊNYANAḄỌ ḅe gotẹ ẹkwẹn-ngbọ-ngbọ na, ọrụ-ọrụ na, ḍawọye, ḍawọye ḅụ ye kẹ ó toluma ḅẹ-yearị. Anịtẹso ó siin ḅụọ, ḅụọ ḅụ ọ́ pụmbụ ḅa. Ye ọ́ la ḅa, ḍiein ó kun sịẹma ḅa, tẹ ini ikoliapụ ḅara kẹ ó kun so ḅa.

Zayọnị Ịkọlị Ḅẹ Ḍụḅarị Ḅeriye

¹⁴ Mịọkụ ọmịnị opu ẹkwẹn kọn-arị atomi tẹ mị yọ Jeruselemu ḅụ ḅẹrẹtọn mịna apụ ma pịrịarị apụ, ọ́ KỊNỊNYANAḄỌ ḅe ḍukoarị ye pokii.

¹⁵ Ọ́ ḅụụ boma tẹ ḅẹẹarị mịnẹ ọ́ fị na ḅara kẹ ḍiri pono tẹ ḍuḅu na ḅịḅị-kẹ-ogbosọ tẹẹ. Ó minini lama wararị mịnẹ opu ḅụụ-fụka ḅo ḅarị sakị anị ọ́ kọkọrọ ḅa, ọmịnị iruo-aị na oḅori-kẹ-kịnịsịn na ḅụ sịrẹrẹ tẹ mịẹtẹ ye ḅarị ọ́ la ḅịa ẹrẹsị.

¹⁶ Mie mịọkụ Tẹịn ḅẹrẹtọn KỊNỊNYANAḄỌ ḅe ḍukoarị ye, “À Zayọnị ḅụ jike ḅịa kụrọtẹ suku-saakịarị. Anị ḅụ arị anyị-anyị-a ḍụḅarị kẹ ịkọlị mẹ ḅụ sụarị, anie ma ẹkwẹn-aḅịḅị ma tẹ kẹ wararị aị ma, jike-jike-a minini mẹ pịkị ye-inemarị!

¹⁷ Tomḅọ la kiri kẹ mḅọ pịrị anie kiri tọn ḍiki sọ suku-saakị mẹ pịrị ḅarịye, tẹ kịnị mingirima-a nwẹnị akaka mẹ pengearị ḅoto tọn ḍiki sọ ḅa.” Eene mgbọlị erise ḅo ọ́ ḅụụ ḅụ sịrẹrẹarị iruo aị mamgba fọnọ so ḅa, tẹ opu minji nwẹnị ọ́ ḍụa ḅọrọma ḅẹ tẹ ọ́ kẹ ḅiokpọmarị ye mẹ guluguluma ḅa.

¹⁸ Ọ́ fị na ḅara pono wararị ḍiri mẹ kaan ḅa, tẹ ó ḍuḅu na nyana wararị ḅịḅị-kẹ-ogbosọ mẹ sọ sii ḅa. Opu ḅụụ-fụka ḅo ó ponoma sakị anị ọ́ nẹngịma ḅa.

¹⁹ Anị ḅo ọ́ bịan siin ọ́ bịan ḅa, dede-ḅio goyegoye. Ọmịnị anị dogi ḅa eneḅaka na ḍin na ḅụ, gbarị-a ḅara. Ịwọ oku tẹ Tamụnọ ḅara ḅo ye, ḅo ye ịwọ tẹmẹ-naịn-naịnmaye kẹ ḅo ḅa!

²⁰ Ọ́ kịnị kẹ egberi gbaa-gbaa tomḅọ ḅe kịka ḅa, anie ḅụụkụrọma tẹ kpụlụ amịna nẹngị tanda ọgọnọ monoarị, tẹ ọ̀ ḅụụ gbaịn bịlangịdị sọ ịrụ ḅaka tẹ ọ̀ gbaịn ikelema-a ḅọ ḅe.

²¹ KỊNỊNYANAḄỌ ḅe owu sọ ḅa, Pẹrazimu tụndụ ọgọnọ na Gibiyọnị tụndụ suku ḅụ na ọ̀ sọ ḅara mẹ, mịẹ tẹ ori ọ̀ tọn tẹ mịẹ ḅẹ ye mẹ mịẹ ḅẹ ḅara — ori amịẹaị ma tomina tọrọkọ kịrị aị kịka lamarị sọ. Ori ọ̀ kọrịnama mẹ kọrị fama ḅa, ọ̀ ḅọị tẹ kọrị kọrịnama mẹ.

²² Ọmịnị à kẹ ọ́ pịrị ḅeri nụnụ ẹkwẹn mẹ kẹ ḍẹrị-ḍẹrị ye sọma ma! Ọmịnị ọkọ mịẹ kụma, ọ́ pụkọ-pakaḅo ḅarị mẹ kpọma ḅụụ-fụkama ḅaka ḅa. Kụrọmamgba nyana KỊNỊNYANAḄỌ ḅe tọn-pẹlẹ tẹ mịnẹ ò bebe sịẹ mẹ fama ḅarị mẹ à naa tẹ.

Tamụnọ Nimi

²³ Ọmịnị à ḍukoarị ye pokii; ọmịnị à ḍuko ọ́ pịrịarị ye kẹ ye sịn.

²⁴ Gbọrụ ḍụọ ḍiḅi ḅọ sọ ofori sịkọpẹlẹ-a ḅara kẹ ọ̀ ḍụọ ḍiḅi kiri sokuarị, anị tẹlẹma tẹ kẹ ye ḍiḅi ḅẹ ḅara.

²⁵ Ò kiri mẹ tẹlẹma fama gbọrụ sakị, ọ̀ saakị ḍiḅi aị ma ḍiḅiarị, ẹbịsịya ịn kẹ dili na kumini na sịn asịn mgbọlị ma. Ori mbịaka na bali nwẹn-sịn ye na kẹ ọrụ-ọrụ ḅụ ḍiḅiarị, tẹ ḍụọ mẹ akaka mẹ ḅụ ọ̀ pịkị jen mgbọlị ḅara ḍiḅiarị.

²⁶ Ori ọ̀ kọrịnama kọrị, kọrị ḅara nimi wararị, Tamụnọ kẹ ò toluma tẹ ẹrẹsị.

²⁷ Gbala-gbala ori ikuarị asịn ikiḅa kẹ dili anịanịa kumini mgbọlị ma fomu sarasara-a; anie nakara feke-fekearị asịn ikiḅa tẹ kẹ fomu na-iḅi aị mie ọ̀ kẹ fomu sararị.

²⁸ Ori mbịaka mgbọlị mẹ sima-a, anie ọ̀ sịkọpẹlẹ-a ḅara kẹ anị fomu kọsịma ḅụ; ori anị fomu pakama-ḅo tẹ mgbọlị ma kọsịma ḅịa ḅara ò nimi wararị, yedogi-kirimẹnjị-arụ kẹ anị ḅụ fọnọ ḅọrọ ḅụ.

²⁹ Mie-mẹmgba Kụrọmamgba nyana KỊNỊNYANAḄỌ ḅe ḅara ḅoarị. Tamụnọ tọn-arị aị ma nimiarị ḅụ emi, tẹ sakị mamgba arị pịkị ọ̀ tọn ḅara mịẹarị.