Ayịzaya 27 - FỊAFỊA BAỊBỤLỤ

¹ Anị ene mẹ ḅụ, KỊNỊNYANAḄỌ ḅe ọ̀ kụrọtẹ kịnị-ḅaaḅa okologie mẹ kẹ fomu-ḅara kẹ mamataḅaye pịrị ḅa; anị fangalatẹ kpịkịma-kpịkịmarị daragọnị nwẹn-sịn opu nama ḅe, tẹ abajị ḅio angarị ye ḅe ḅaa ḅa.

² Anị ene mẹ ḅụ, KỊNỊNYANAḄỌ ḅe ori iḅitẹ girepu-ḍụọ mẹ gboloma ye ḅụ ḅẹẹ ḅa,

³ “Àrị anị ḍikiḍikiarị, pịkị sakị mamgba minji kẹ anị sararị. Àrị anị gbaịn-arị ḍin na eneḅaka na ḅụ mịẹ tẹ gbọrụḅọ-sọ ye kẹ anị lama ḅịa ḅara.

⁴ À ḅarị ịganị nyana girepu-ḍụọ mẹ pịrị tọrọkọ mu-a. Nangị na agarara na kịngẹ ḅọrọ sime-sime, arị owu kẹ arị paka tẹ gbọrsịḅị arị dọkịma sin ḅa.

⁵ Kụma ị̀ atomi na fịya-a apụ emi ḅẹḅẹ, yee ini arị ịn gbaịn ḅọrọma ḅẹ ḅọkọ ḍọkị; yee ini ị̀ na dein mịẹ. Inn, yee ini ị̀ na dein mịẹ.”

⁶ Ḅo ḅarị ene ma ḅụ Izirẹlịapụ, Jekọbụ furo paka apụ ma, sịn kịka tẹ kuno sụa ḅa, ịn pịkị mgbọlụ sụa ḅẹ ḅara kẹ panga-ḅaa ḅa. Ịn sụa ḅarị mgbọlụ ma tomikiri mẹ gbaịn ḅa.

⁷ KỊNỊNYANAḄỌ ḅe kẹ Izirẹlị na fịya-a apụ ma mịẹ asi gotẹ kụrọma in fomu kụrọ ḅara, ọ̀ kẹ Izirẹlị fomu-ḅara nẹngịm; Izirẹlị ḅụ fa tẹ atomi kịẹn-ḅịḅị sọ ḍụḅa ịna nye na gbasị-a.

⁸ KỊNỊNYANAḄỌ ḅe fomu-ḅara kẹ ori atomi pịrịm, mịẹ tẹ ini in kun so ḅụ. Ịrụa mẹ saakịarị pakịrị anga mẹ ḅụ mie ò si kụrọ fẹrụ fịrịma ḅo ịn dogi-so ye.

⁹ Kụma ịn Tamụnọ nimi-a apụ ḍụḅarị agbamịẹ-anga ma kẹ toru gbẹẹ ḅara gbẹẹ kọsịma, tẹ ịn kẹ kụnụaị dọkịmarị ayọ ma na, anịanịa ere-oru fụḅara tẹ ịn kẹ Asịra sịn ye mẹ na ḅarị ofori tẹrẹmẹ, mie arị Izirẹlị asi ma wẹrịso ḅarịye.

¹⁰ Mịẹ kụrọma opu ama mẹ kaan-sara tẹ koro-simearị. Tomi gberie sọ ofori ịkpa kuroma so tẹ anga apụ ofori ḅara mie anị simearị ḅara. Anị opu anama osuka fị ḅẹ anga sọ tẹ, in sime ịnyọsara sara tẹ osuka fị ḅẹ anga.

¹¹ Sịn ma aḅara kpatụ tẹ anyị sara tẹ, tẹ ereme arị kolokolo tẹ kẹ fịnị sọmarị. Anị gotẹ ọkọ pakarị ye, tomi ma gberie-sọ fiearị ye naa-a, ịn Tẹmẹ Tamụnọ ḅe in ḍiki-sịḅịjịrị ḅịa, anịanịa ọkụrụkụrụ kalịye kẹ in ḍie.

¹² Anị ene mẹ ḅụ, Yuferetisi tọrụ ḅụ ọkị mu Ijiputi kiri mẹ kunoma anga la, KỊNỊNYANAḄỌ ḅe ori atomi sịn kobiri ḅa, gbọrụḅọ-gbọrụḅọ, gbala tomḅọ mbịaka mgbọlị ḅụ fun sẹlẹ-siin ḅara.

¹³ Anị ene mẹ ḅụ, ọdụ fie tẹ Asiriya na Ijiputi na ḅụ Izirẹlịapụ mamgba sin pịkị-ḅo ḅa, kun-ḅara ḅio simearị apụ ma. In sunsin KỊNỊNYANAḄỌ ḅe pịrị ḅa Jeruselemu ḅụ; ọ̀ fịafịa tụndụ mẹ ọgọnọ.