Ayịzaya 25 - FỊAFỊA BAỊBỤLỤ

Tokini Anume

¹ KỊNỊNYANAḄỌ, ị́yẹrị anie ị̀ Tamụnọọ; Arị ị́ kụn tẹ ị́ ẹrẹ tokini ḅa. Ị́ ḅụụ-buama-aị mịẹ tẹ; ala lamatẹ sakị ị́ tọn aị ma ị́ mịẹ tẹ, ḅioḅẹngbọ-kẹ-sịrẹrẹ-niḅi ḅara ḅụ.

² Ị́ ama ma pịkị-ḅo kan-saratẹ aị sọma tẹ, pịkị ịna ḅụụ-ḍụaaị ma guluguluma tẹ. Si kẹ wa tọn apụ ma nama amada-awarị ma fa gbamaso tẹ.

³ Kụrọ nyana asịẹ ma ḅẹ apụ ma í tokini ḅa; kụrọ-kụrọ ḅara kẹ kịnị na mịẹarị asịẹ ma í ḍiki-ḅalafaa ḅa.

⁴ Igoin-apụ ma na ḅarasụa-pịrịḅọ nyana-a apụ ma na ḅụụ-fụka asakị ḅụ mangị ị́ dama-ḅo tẹ ye ịn la-a so tẹ; ị́ in kikimarị, erise sakị ḅụ, pịkị kịnị dọkịmarị ọfịrị ḅụ na. Kụrọ, kụrọ-ḅara kẹ kịnị na mịẹarị apụ oḅoku sakị ḅẹ erise kịka tẹ owu pakarị

⁵ eene koro-a alatẹ sakị ḅẹ samụnọ kiri ọkụ. Kụma, KỊNỊNYANAḄỌ, mịẹ tẹ si kẹ wa tọn apụ ma yaụ-sime tẹ; tọrụ guda-guda atomi ma oloku mẹ ị́ yaụma tẹ, oḅuto ọfịrị eneḅaka deinma ḅara.

Tamụnọ Opu Alalị Tẹlẹmarị

⁶ Mị anga Zayọnị tụndụ ọgọnọ ḅụ Kụrọmamgba nyana KỊNỊNYANAḄỌ ḅe opu alalị tẹlẹma tomikiri ḅẹ asịẹ mamgba pịrị ḅa — yela tẹịn fịye na iḅi tẹịn iru na kẹ fị ḅẹ alalị.

⁷ Mịanga ḅụ ọ̀ kịnị ḅiotọn-a ḅara kẹ sịẹ mamgba ọgọnọ gbana wararị kururu oḅuto mẹ kan sin ḅa.

⁸ Tẹịn ḅẹrẹtọn KỊNỊNYANAḄỌ ḅe fịị ḅaa guluguluma gbamaso ḅa! Tọrụngbọ goyegoye ḅụ simearị owu-minji mẹ ò sin ḅa, ọ̀ pịkị bebe tomikiri mẹ ḅụ ori atomi ma nyanatẹ tọrụ-tuu mẹ sọ siin ḅa. KỊNỊNYANAḄỌ ḅe ḅioju ḍuko tẹ!

⁹ Anị paka sakị, ḅẹḅọ-ḅẹḅọ ḅẹẹ ḅa, “Ori anie wamịna Tamụnọọ! Wa ọ̀ kẹ ḅiokpọma tẹ ọ̀ wa pọkọ pakama-ḅo tẹ. Ori anie KỊNỊNYANAḄỌ ḅee! Wa ọ̀ kẹ ḅiokpọma tẹ mịọkụ wa ḅioḅẹlẹarị, pịkị ḍerekuarị, ọ̀ wa ḅọrọma tẹ ẹrẹsị.”

Tamụnọ Fomu ḅara Kẹ Mohabụ Pịrị ḅa

¹⁰ KỊNỊNYANAḄỌ ḅe Zayọnị tụndụ gbaịn ḅọrọma ḅa, kụma in Mohabụ ḅẹ apụ ma nanga kiri pịrị ḅa, anie wẹrị ḅụrụma tẹ kẹ ye ḍiḅi tẹ asịra nanga kiri pịrị, pịrị gbọrụ ḅara mẹ.

¹¹ Ini ịna aḅara sụn pakama ḅa, minji ḅio okin ḅẹ-yearị apụ ọkụ, kụma Tamụnọ ịna ḅụụ-jịrịma ḅa, tẹ ịna aḅara kpịlasaịma sin sara ḅa.

¹² Mohabụ kẹ ḅụụ-ḍụa ḅẹ aị ma na ịna geletẹ onu ma na ò guluguluma tẹ ḅụụ-jịrị ḅụ ịn kẹ ḅo fọọn ḅio gbin kuroma ḅa.