Ayịzaya 23 - FỊAFỊA BAỊBỤLỤ

Fonisiya Gboloma Oku

¹ Mie Taya gboloma oku mẹ. Ọ́ dasịẹma-a ḅara kẹ kururu ḅụ owu pakama, ọmịnị abajị ḅio dọkụarịapụ! Taya, ọmịna ama ḅẹ arụ-agba anga mẹ ịn kan guluguluma tẹ; anị ḅẹ awarị ma na, arụ sọ ḅo lụmọ gbin, gbin ayọ ma na in sima fama tẹ. Ọmịna arụ ma Sayịpụrọsị ḅụ pịkịma-ḅo sakị ọ́ pakaye naa ḅa.

² Ó lee-leema owuu, ọmịnị Sayịdọnị ḅẹ atuḅoni! Ó tomi fịrịma,

³ tọrụ saḅa mu Ijiputi ḅụ ḍiḅi pakama-ḅo mbịaka fẹ tẹ dẹrị ḅẹm, pịkị sịẹ, sịẹ mamgba na tuḅokọn ḅẹm.

⁴ Sayịdọnị opu ama, ị́ tọrụ-tuu tẹ! Tọrụ mẹ na opu abajị ma na ị́ sịkị tẹ ḅẹẹarị, “Gbala-gbala arị awọ iyi-a, gbala-gbala ì furo ḅio paka-ḅo owiapụ anịanịa eremịna-awọmẹ ofori.”

⁵ Ijiputi-ḅẹ-apụ kịngẹ sọ ḅụụ-gbiripu tẹ ḅalafaa ḅụ ḅụụ lọkọ ḅa ịn Taya ama kan guluguluma tẹ ye mẹ nimi sakị.

⁶ Ó kururu ḅụ owu pakamaa, ọmịnị Fonisiya ḅẹ apụ. Ọ́ ḅụụkụrọma tẹ mangị-so Sipeni muu!

⁷ Mie inetẹ Taya ḍereku ama mẹ sọ ḅẹ aro, ala lamatẹ sakị ḅụ paka ama mẹ? Mie tomi fịrịma, fịrịma pakama mu tọrụ saḅa tẹ iwo sime ayọ pakama, pakama ama mẹ anị?

⁸ Tụḅọ ḅọrọ tọn tẹ mie mẹmgba Taya ḅụ paka, anị tomikiri mamgba sịḅịda opu ama mẹ, anị ḅẹ atuḅoni ma amadapụ awọmẹ kịka tẹ tomikiri ḅụ kịnị kụn kẹ pịrị tẹịn atomi ma ini-a?

⁹ Kụrọmamgba nyana KỊNỊNYANAḄỌ ḅe anị tọnm. Ò gotẹ anị tọn ye, mịẹ tẹ ịn kọrị tẹ aị ḅụ in gelemarị ḅụụ mẹ kunoma, tẹ ịna ḅụ kụn nyana atomi kẹ ḅo iderima kiri ḅụ wẹrị.

¹⁰ Ọmịnị Sipeni ḅụ sime-yọ pakama tẹ angarị apụ ó so mu ḍụọ ḍiḅi! Ọ́ gbaịn ḅọrọma ḅẹ gbọrụḅọ sọ ḅarị ofori.

¹¹ KỊNỊNYANAḄỌ ḅe ọ̀ ḅara sụn-pakama tọrụ mẹ da tẹ, kẹ amadapụ daarị ayọ fama ḅẹm. Ọ̀ tọn tẹ mịnẹ Fonisiya ḅẹ tuḅo-akiri mamgba in gulugulumaa.

¹² Sayịdọnị opu ama, í ḅioḅẹlẹ kunoma tẹ, ịn pịkị ị́ atomi ma ponomarị. Ịn nwẹnị mangị-so Sayịpụrọsị mu sọ, ịn paa ḅọrọ ḅịa.

¹³ (Babịlọnị ḅẹ apụ, Asiriya ḅẹ apụ-a, anie mịẹ tẹ piri-ḅio-ḅẹ anama ma Taya fama ye. Babịlọnị ḅẹ apụ mịẹ ama kan ḅẹ apụ gele awarị ma nama ama mẹ ikelema, tẹ Taya kẹ ḅụụ ḍụa ḅẹ tẹ nama aị ma kan sara ye, tẹ fa tẹ ama ḅara kẹ anị koroma-so ye).

¹⁴ Ó kururu ḅụ owu pakamaa, ọmịnị abajị dọkụarịapụ! Ọ́ kẹ ḅiokpọma sime ama mẹ ini anị guluguluma tẹ.

¹⁵ Sakị ḅoarị, ịn kụra atesi oyi finji kẹ Taya kẹ ḅioḅọrọma ḅarị sakị, gbọrụḅọ kẹ ḍumo sime tẹ ama-da ḅẹ sakị. Arị akụra ma ḅọrọ sakị, Taya kịka ḅarịye, ịn kẹ nume su-su ama-mẹnjị-ẹrẹḅọ ma.

¹⁶ Ị́ ọbọ ọkị tẹ mẹnjị ama mẹ ikelemaa, mịẹ-mịẹ ọkụ ofori tẹ kịnị kẹ ḅioḅọrọma tẹ ama-mẹnjị-ẹrẹḅọ! Sin ị́ anume ma farị, tẹ sin owiapụ ọkị-ḅo ị̀ ḅụụ pịrị.

¹⁷ Kụra tesi oyi finji ma ḅọrọ sakị, KỊNỊNYANAḄỌ ḅe mịẹ tẹ Taya pịkị-ḅo árị elemu tuḅo mẹ kọn ḅa, tẹ mịẹ tẹ tomikiri ḅẹ amadapụ ma daarị anga mamgba á nimi ḅa.

¹⁸ Tuḅo ḅụ á nyana ḅarị igbigi mẹ á wẹrị sikima KỊNỊNYANAḄỌ ḅe pịrị ḅa. Árị anị kẹ koko ḅụụ pịrị fama ḅịa, kụma sunsin KỊNỊNYANAḄỌ pịrịarị apụ igbigi mẹ kẹ in ḅiiarị fịye na ḅịtẹ na kapa na fẹẹ ḅa.