Ayịzaya 19 - FỊAFỊA BAỊBỤLỤ

Tamụnọ Ijiputi Fomu Ḅa

¹ Mie Ijiputi gboloma oku mẹ. KỊNỊNYANAḄỌ ḅe Ijiputi ḅoarị, oḅuto ọgọnọ mie ọ̀ dọkụ ma-ḅoarị sarasara ḅara ḅụ. Ijiputi oru-afụḅara ma oju-sẹkịarị ọ́ tọrọkọ, tẹ Ijiputi-ḅẹ-apụ ma ḅarị ḅiokpọ nyana-a.

² KỊNỊNYANAḄỌ ḅe ḅẹẹarị, “Ijiputi ḅụ à mịẹ tẹ ama owu kuro ḅa, tẹ mịnaḅọ pịkị tẹ ọ̀ mịnaḅọ na tụḅụrụ ḅa, tẹ kpeki tẹ anga apụ jụmọ-jụmọ na tụḅụrụ ḅa. Pikiyarị ama ma owu kẹ jụmọ-jụmọ paka ḅa, tẹ pikiyarị amadapụ kụrọ nyana jụmọ-jụmọ nẹngị ḅẹ ḅara ḍọkị ḅa.

³ Arị Ijiputi-ḅẹ-apụ ma tọn-arị aị ma pikirima tẹ ịn ḅarị tẹmẹ nyana ḅịa. Ini ịna oru-afụḅara ma tẹkẹ ḅa ịn ḅarasụa ịn pịrịị. In mu tọrụ tolu apụ ḅara ye ḅii ḅa, pịkị fịtẹ-apụ atẹmẹ ḅịḅị ḅii ḅa.

⁴ Arị Ijiputi-ḅẹ-apụ kẹ gadapụ-gadapụ ḅara kẹ kịnị na mịẹarị kụrọ ḅọ ḅara-ḅio suu ḅa, tẹ kụrọ, kụrọ-ḅara kẹ kịnị na mịẹarị amadaḅọ ḅẹrẹtọn ịn pịrị ḅa. Yẹrị Kụrọmamgba nyana KỊNỊNYANAḄỌ ḅe ḍuko tẹ.”

⁵ Nayịlị tọrụ mẹ ḅẹ minji mẹ ideri ḅa, tẹ tọrụ mẹ kẹlẹkẹlẹ kụlụkụlụ-kpaịkpaị tẹ samụnọ ḅa.

⁶ Tọrụ mẹ ịkpangị mamgba nini la ḅa, minji mẹ kẹlẹkẹlẹ faarị ye mẹ gotẹ. Asịra ma na abajị-okporo ma na kpatụ ḅa,

⁷ tẹ Nayịlị tọrụ mẹ akaka ḍiḅi aị mamgba samụnọ fama tẹ fẹrụ arị dogi so ḅa.

⁸ Ḅẹḅọ-ḅẹḅọ tẹ Nayịlị tọrụ mẹ ḅụ inji ḅaa kẹ angarị ḅọ ḅio-fiema ḅa pịkị owu ḅa; ịna arị ma na ịna ịgbọ ma na ḅarị mịẹye ḅụ sọ ḅịa.

⁹ Afalafa kẹ mịẹ iri kẹ ḅịtẹ ḍoriarị apụ ḅioḅẹngbọ lọkọ ḅa;

¹⁰ ḅịtẹ-ḍoriapụ na ḅara-ḍịntẹ kọrịnama-kọrịapụ na ḅarị mịẹ-mịẹ ọkụ ofori tẹ ḅụụ-ḅalaḅala ḅa.

¹¹ Zohanị opu ama mẹ ḅẹ ḅẹrẹtọn-apụ ma oḅori atomi! Ijiputi ḅụ ye-nimi tẹịn apụ ma kẹ kịnị tolumarị ye ḅụ nimi ofori! Ndẹẹ in ḅiokpọ tẹ ḍuko amadaḅọ ḅe pịrị ḅẹ ḅara mịnẹ ini anie elemu sakị ḅẹ ḍiri-nimiapụ ma na amadapụ ma na akiri ḅụ lẹgị apụ?

¹² Ijiputi ḅẹ Amadaḅọ, ị́ ye-nimi ḅeri nụnụ apụ ma ndẹẹ ini? Ẹbịsịya ini inetẹ ḍuko ị́ pịrị ḅa Kụrọmamgba nyana KỊNỊNYANAḄỌ ḅe tọn wẹrị Ijiputi pịrị aị ma.

¹³ Zohanị na Mẹmụfịsị na ḅẹ ḅẹrẹtọn-apụ ma oḅori atomi. Ini mie sịẹ mẹ tọrọkọ tarị ḅẹ apụ, kụma ịn mịẹtẹ anị etela-iri tẹ.

¹⁴ KỊNỊNYANAḄỌ ḅe ịn mịẹtẹ in pikiri, pikiri aị kẹ in toluma tẹ. Anị dogi-ḅo ye anie, Ijiputi mịẹarị ye goyegoye kura-aye, tẹ ịn nwẹnị iru ḅuu tọrụ-ḅaamatẹ tomḅọ amịna ọsụ aị ḅio ḅụọ sịnịnị ḅara kẹ sịnịnịarị.

¹⁵ Ijiputi ḅụ gbọrụḅọ-sọ, ngọ-kọnḅọ-o, igoinḅọ-o, kẹ mịẹ ḅụ suu-suu tomḅọ-o, kịnị nimi-a ḅọ sọ, inetẹ ḅarasụa-a.

Ijiputi Sunsin KỊNỊNYANAḄỌ Ḅe Pịrị ḅa

¹⁶ Gbọrụ ene ḅụ, Ijiputi-ḅẹ-apụ ma ereme ịnyọ ofori ḅalafa kọn-kọn ḅara kẹ ḅalafaa ḅa. Ịna oju sẹkị ḅa opu tẹmẹ-naịn-naịn ḅụ, anie ịn KỊNỊNYANAḄỌ ḅe sụn-pakama tẹ kẹ in fomu ḅẹ ḅara mẹ ẹrị sakị.

¹⁷ Ijiputi-ḅẹ-apụ ma tẹmẹ-naịn-naịn ḅa Juda gotẹ, ịn KỊNỊNYANAḄỌ ḅe tẹlẹma ịn pịrị wararị tẹ ịna ḅụụ-paka ḅẹ ye mẹ kẹ ḅiokoroma sakị-sakị.

¹⁸ Anị ene mẹ ḅụ, Hiburu ḅịḅị mẹ Ijiputi ḅẹ sọnọa ama ḅụ ini anị fie ḅa. Anị anga ḅẹ apụ ma Kụrọmamgba nyana KỊNỊNYANAḄỌ ḅe ẹrẹ mie ịn kẹ ye karị ḅarịye. Ama ma ḅẹ gberie ini anị sịn ḅa, “Ịrụa mẹ Ama.”

¹⁹ Anị ene mẹ ḅụ, Ijiputi amakiri mẹ ḅụ ini agbamịẹ-anga nama KỊNỊNYANAḄỌ ḅe pịrị ḅa, tẹ ḍụḅarị ḅeriye nama sịẹma tẹ kẹ ori ẹrẹ go ḅa Ijiputi na jen-apụ na oke ḅụ.

²⁰ Ma ma nwẹnị Kụrọmamgba nyana KỊNỊNYANAḄỌ ḅe Ijiputi ḅụ emi ye mẹ ḅẹ elekima sọ ḅa. Kịnị nwẹnị anịanga simearị apụ ma ponomarị tẹ ịn ḅarasụa gotẹ oloku pakama tẹ KỊNỊNYANAḄỌ ḅe sịn-sịn, ọ̀ kịnị kẹ fịrịma tẹ ịn pụkọ-pakamaḅo ḅa.

²¹ KỊNỊNYANAḄỌ ḅe amịna ḅụụ kẹ Ijiputi-ḅẹ-apụ ma ḍie ḅa; anịtẹso ini ọ̀ kẹ Tamụnọ sịn tẹ sunsin ọ̀ pịrị ḅa, tẹ agbamịẹ-aị na ḍiepịrị-aị na ọkị-ḅo ọ̀ pịrị ḅa. Ịn tẹmẹ-la aị minini ọ̀ pịrị tẹ in minini ye mịẹ ḅa.

²² KỊNỊNYANAḄỌ ḅe Ijiputi-ḅẹ-apụ ma fomu ḅa; kụma anịsọ ori ịn gwọ ḅa. Ịn pịkị ọ̀ dama-ḅo tẹ ori ịna atẹkẹ naa tẹ ịn gwọ ḅa.

²³ Anị ene mẹ ḅụ, opu etela Ijiputi na Asiriya na ogboku paka ḅa. Arị maa asịẹ ma ḅẹ apụ ma mẹnjịma, mẹnjịma ḅa ịna ogboku, tẹ maa asịẹ ma gboloma tẹ sunsin Tamụnọ pịrị ḅa.

²⁴ Anị ene mẹ ḅụ, Izirẹlị na Ijiputi na Asiriya na gbasị ḅa; tẹ mịna tẹra asịẹ ma boma sọ tomikiri mamgba pịrị ḅa.

²⁵ Kụrọmamgba nyana KỊNỊNYANAḄỌ ḅe in boma tẹ ḅẹẹ ḅa, “Ijiputi, arị ì boma ḅa, ọmịnị ị̀ atomii; Asiriya, yẹrị ị́ tẹmẹm; anịsakị Izirẹlị, anie à sẹlẹ-ọkị apụ.”