Ayịzaya 17 - FỊAFỊA BAỊBỤLỤ

Tamụnọ Siriya Na Izirẹlị Na Fama Ḅa

¹ KỊNỊNYANAḄỌ ḅe ḅẹẹm, “Damasịkọsị ḅarị jen kẹ ama ẹrẹ fị ḅịa. Si fama tẹ aị tan kpolima wararị yọ mie anị sọ ḅarịye.

² Siriya ḅẹ ama ma tomi arị ḅio mangị-so fama tẹ arị koro-sime gbamaso ḅa. Arị anana na opu anama na osuka fịarị yọ sọ ḅa, tẹ gbọrụḅọ-sọ in dee siin ḅịa.

³ Izirẹlị ḅo ḍụa ḅẹ ye ofori apụ ḅara sime ḅa, tẹ Damasịkọsị ḅarị amịna sịḅị nyana ḅịa. Siriya ḅụ fịị-a so apụ ma tọrụ-tuu ḅa Izirẹlịapụ sime-ḅara. Yẹrị, Kụrọmamgba nyana KỊNỊNYANAḄỌ ḅe ọkọ ḅẹẹm.”

⁴ KỊNỊNYANAḄỌ ḅe ḅẹẹm, “Gbọrụ ene ḅụ, Izirẹlị opu mẹ ḅo kunoma ḅa, tẹ igoin ḅo anị ḅẹ ngọ kiri mẹ ḍima ḅa.

⁵ Izirẹlị kịka ḅarịye anie ini mbịaka pẹlẹ fama tẹ tan so warị mu tẹ ḍụọ, Refemụ iderima kiri ḍiḅi ḍụọ tẹ in ḍiḅi aị mamgba kolokolo ọkị fama tẹ ḍụọ mẹ papaa gbin kuro simearị ḅara mẹ.”

⁶ “Boowa kala apụ kịngẹ mie fịị-a so ḅarịye, tẹ Izirẹlị ḅo olivu sịn kịka ḅa, anie ini olivu mgbọlụ mamgba kaịn tẹ maaịn anịanịa tẹrẹị kịngẹ ọgọnọ-jụ ḅio kirikọn-ye, anịanịa boowa aị tẹ suku-jụ ḅẹ aḅara ma ḅụ ịn kaịn-a so aị. Yẹrị KỊNỊNYANAḄỌ, Izirẹlịapụ tẹkẹarị Tamụnọ ḅe ḍuko tẹ.”

⁷ Anị ene mẹ ḅụ, kịnị ḅarasụa gotẹ pịkị ịna Tẹmẹḅọ, Izirẹlị tẹkẹarị Fịafịa Ḅọ ḅe ḍọkụma-ḅo ḅa.

⁸ Ịn ḅarị jen kẹ ini ḅarana nama agbamịẹ-anga ma ḅụ sịrẹrẹ ḅịa, anịanịa ịna ḅara-kuḅu ḅẹ kọrịnama kẹ ḅiokpọma, anie Asiriya oru ma na kụnụaị dọkịma agbamịẹ-anga ma na elekima ma.

⁹ Anị ene mẹ ḅụ, kịnị iḅiọkụ ḍikiḍikiarị opu ama ma ini arị koroma mangị-so tẹ kịnị arị kan sara ḅa, anie Hivayịtị apụ na, Amọrayịtị apụ na, ịna ama ma koroma mangị ḅara pembe ḅara, Izirẹlị gotẹ.

¹⁰ Izirẹlị, ị́ ị́ pụkọ-pakamaḅo tẹ opu ḍụḅarị kịka tẹ ị́ gbaịn-arị Tamụnọ ḅe kẹ ḅioḅọrọma tẹ. Anie nakara í oru aḍụọ ḍiḅiarị, ị́ ja asịẹ ḅẹ tamụnọ tẹkẹ ḅẹ ḅara.

¹¹ Kụma í ḍiḅi gbọrụ dede-ḅio ḅụ ḍiḅi aị ma puu-paka tẹ panga-ḅaa sọ, fịye soku sakị ḅụ í soku ḅẹ ye paka ḅịa. Ḅụụ-fụka na gwọ gwọ-a fụka-ye na kịngẹ mie paka ḅarịye.

Si Kẹ Ọ́ Tọn Asịẹ Ma Owu Ịna Ḅara Si Tẹ

¹² Opu kụrọ nyana asịẹ ma gboloki ḅụ ḍụrụkụarị, tẹ anị abajị fiearị ye kịkarị, opu ọnụngọ ḅakụarị ye famam.

¹³ Sịẹ, sịẹ ma ḅoarị ye mẹ ọnụngọ mbelembelema ḅoarị ye kịkarị, kụma Tamụnọ ịganị ịn pịrị tẹ ini ọḅụ daarị, gbala fẹrụ tụndụ akaka fọọn dogi fiin ḅara, anị nume-naowu fẹrụ asịra kẹ fiin ḅara kịkarị.

¹⁴ Ḅoḅiri-so ḅụ ịn kịnị tẹmẹ-naịn-naịnmaye mịẹarị, tẹ ene ḅaa ḅẹ sakị in so tẹ. Anie wamịna amakiri mẹ fọịn-arị ḅọ goḅọ-goḅọ ḅụ paka ḅarịye.