Ayịzaya 15 - FỊAFỊA BAỊBỤLỤ

Tamụnọ Mohabụ Fama Ḅa

¹ Mie Mohabụ gboloma oku. Kpọkpọ gbọrụ ḍin ḅụ A-a na Ka-a na opu ama ma ini arị famarị, tẹ Mohabụ sịẹ mẹ yaụ-sime tẹ.

² Dibọnị ḅẹ apụ kpọlị iwo tụndụ mẹ ḅẹ tẹkẹ anga mẹ ḅụ owu ḅẹ mu tẹ. Mohabụ ḅẹ apụ kururu ḅụ Nebo na Medeba na opu ama ma gotẹ owuarị. In kururu ḅụ ịna asịḅị na mpọrị na sịn siin tẹ.

³ Etela ogbo sime apụ akpa ḅiri wararị. Opu ama goyegoye ḅẹ nụngọ ma na warị isun ma na ḅụ tomi kururu ḅụ owuarị.

⁴ Hẹsịbọnị na Ẹlsisi na ḅẹ apụ ma oloku-oloku owuarị, tẹ ini owuarị ye mẹ ala-jụ Jahazi ḅụ kịnị naarị. Ọmụapụ ma kịngẹ sọ oju sẹkịarị; ịna ḅiokpọ ịna ḅụụ ḅio so tẹ.

⁵ Ị̀ ḅioḅẹngbọ owu pakama Mohabụ pịrịarị. Tomi ma mangị-so Zoha ama mu tẹ, pịkị Sẹlisiya ḅẹ Egilati na. Japụ owu-owu tẹ etela mẹ kpọlị iwo Luhiti muarị; jen-apụ pụkọ-pakaḅo Horona-imu muarị, owu-owu pakama ḅụ.

⁶ Nimirimu ḅẹ ḍaḅa mẹ samụnọ wararị, anị ikelema wararị osuka ma fịị tẹ. Ịwọ gberie-sọ ofori.

⁷ Tomi ma tụndụ mẹ lẹsẹrẹ-kiri, ịn kẹ Wilo sịn ye mẹ mẹnjị saḅarị, ịna asịḅị paa paka-ḅo ḅẹ ḅara, na ịn nyana aị na.

⁸ Mohabụ ikelema kuroma mamgba ḅụ owu pọkọ fiearị. Igilahịmu na Biya-elimu ḅụ sọ anị fiearị.

⁹ Dibọnị ama mẹ ḅụ ḅẹ tọrụ mẹ ḅụ ọmbie-ọmbie-ọmbie, tẹ Tamụnọ pịkị sii ọkọ nẹngị ye kẹ anị anga ḅẹ atomi ma wẹrịma wararị. Ọkọọ, ọmbie kpọma ọsụ ḅa ḅẹḅọ-ḅẹḅọ oju ḅụụ Mohabụ ḅụ.