Ayịzaya 14 - FỊAFỊA BAỊBỤLỤ

Kun so Ja anga mu apụ Pịkị-ḅo Mẹ

¹ KỊNỊNYANAḄỌ ḅe pịkị siin jen kẹ ọkụrụkụrụ nyana ori atomi Izirẹlị pịrị tẹ ịn sẹlẹ ọkị tẹ kẹ ò nye sọma ḅa. Ọ̀ mịẹ tẹ ịn pịkị jen kẹ ịna amakiri ḅụ anga ḅa, tẹ jen asịẹ ḅẹ apụ ḅo anịjụ ini na anga ḅa.

² Tọnwa asịẹ ḅarasụa Izirẹlịapụ ma pịrị tẹ ịn pịkị-so KỊNỊNYANAḄỌ ḅe kẹ ịn pịrị amakiri mẹ mu ḅa, anị anga sịẹ-sịẹ ma omoni fịrị mẹnjị Izirẹlị pịrị ḅa. Mịọkụ gbọrụ sakị Izirẹlị kun-soapụ, Izirẹlị in kun so ḅo ḅa, tẹ Izirẹlịapụ ma ḅẹrẹtọn gbọrụ sakị in ponoma sime apụ ma pịrị ḅa.

Babịlonịya Ḅẹ Amadaḅọ ḅe Ḍuḅu ḅio Emi

³ KỊNỊNYANAḄỌ ḅe Izirẹlị pakama-ḅo ḅa ịna akụye na ḅụụ-fụka na ḅụ, pịkị kụrọ kọrịnama tẹ ini in ponoma tẹ ịn kọrị sime ye mẹ ḅụ na.

⁴ Ò miemẹ mịẹarị sakị, ịn Babịlonịya ḅẹ amadaḅọ ḅe kombo tẹ ḅẹẹ ḅa: “Kụrọ-ḅara kẹ kịnị na mịẹarị amadaḅọ ḅe ḅịkị tẹẹ! Ọ̀ ḅarị jen kẹ gbọrụḅọ-sọ ponoma ḅịa.

⁵ KỊNỊNYANAḄỌ ḅe si ḅẹrẹtọn-apụ ma kụrọ mẹ dasịẹma tẹ,

⁶ anie ịganị ḅara kẹ tomi ma ponoma tẹ gbala-gbala dasịẹma-a tẹ ḅaa-ḅọkọ kẹ sịẹ, sịẹ ma tẹ ịn nẹngịma tẹ apụ ma kẹ tọrụsiẹrịmarị apụ ma.

⁷ Mịọkụ kunoma ḅụ bebe tomikiri mẹ ḍerekuarị ịnyọsara na dein na ḅụ, tẹ ọrụḅọ-ọrụḅọ ḍereku nume sụarị.

⁸ Lẹbanọnị ḅẹ Sayịpẹrẹsị asịn ma na, sida asịn ma na ḅịkị tẹ amadaḅọ ḅe gotẹ ḍerekuarị, mịọkụ ò so tẹ mẹ gotẹ ḅarị ịn pẹlẹ-pẹlẹ-gbin ḅẹ gbọrụḅọ-sọ ḅarị ofori ẹrẹsị.”

⁹ Ḍuḅu mẹ tẹlẹmarị anị alụa! kẹ Babịlonịya ḅẹ amadaḅọ ḅe ḅẹẹ ḅarị ḅara. Tomikiri ḅụ kụrọ nyana sime apụ ma atẹmẹ ma amịna aḅụụ jikemarị. Amadapụ atẹmẹ ma ịna emine ma ḅụ saakịarị.

¹⁰ Inimgba oloku pakama ọ̀ pịrịarị, “Mịọkụ í ḅo wa ịnyọ nyana-a ḅara mẹ sime tẹ! Ị́ wamịna ḅụ ḅẹ gbọrụḅọ-sọ tẹ!

¹¹ Tomi ọbọ kẹ nume kẹ í boma, bomam, kụma mịọkụ mị yọ í ḍuḅu ḅio emi. Angule iḅila ọgọnọ mie ị́ ḅọlọlọ wararị, tẹ atangbalịgbalịḅa amẹẹ nwẹnị ḅụụ gbaịn bịlangịdị sọ ị́ pịrị wararị.”

¹² Babịlonịya ḅẹ amadaḅọ, ḅịyarị dede lolia, So-tọrụ ḅụ í siin kuro tẹ! Ḅọrọtẹ sakị ḅụ ị́ sịẹ ma nẹngịma simem ọmụ kiri ḅụ, kụma mịọkụ ini í sukuruma kiri gbin tẹ.

¹³ Ị́ tọn kụrọmam ị́ kpọlị mu so la tẹ í emine kẹ iwo Tamụnọ alolia ma ḅọrọ ḅụ kuroma ḅa. Í kuromam ị́ amadaḅọ ḅara kẹ tomikiri mẹ ḅẹ ọgọnọ-jụ ḅẹ tụndụ mẹ ḅụ yaụ-sime ḅa, oru-atamụnọ kobiri mẹ ḅụ.

¹⁴ Ị́ ḅẹẹm mịnẹ ị́ kpọlị iwo mu oḅuto ma ọgọnọ jụ sime tẹ Kụrọmamgba nyanaḅọ ḅe kịka ḅa.

¹⁵ Kụma anie nakara, ini ị́ sịn iderima-ḅo ḍuḅu ḅio ḅụ pokolo-tẹịn yọ lama tẹẹ.

¹⁶ Fịị tẹ apụ ma ḅịḅị finji sara tẹ bio-bioma í ḍiki ḅa. In gbela ḅa, “Ḅie tomikiri mẹ jike tẹ sịẹ, sịẹ ma mịẹ tẹ ịna oju sẹkị tomḅọ ḅe ori?

¹⁷ Ḅie opu ama ma kan guluguluma tẹ tomikiri mẹ kẹ ịkpa mịẹ tomḅọ ḅe ori? Ḅie amịna ikoliapụ ḅụ ḅara sin-sin-a, anịanịa ḍụkụ tẹ in so ama mu mu-a tomḅọ ḅe ori?”

¹⁸ Tomikiri ḅụ simearị amadapụ mamgba ịna iḅi aḍuḅu ḅio koro-simearị,

¹⁹ kụma í ḍuḅu nyana, tẹ í oju akpakpa mẹ ịn kẹ wakị pakama tẹ anị ḅụrụ tẹẹ. Ini anị kẹ wakị suuarị ḍụḅarị olulu ḅio ịn kẹ anị na wakị suuarị ọmụ kiri fịtẹ-apụ ma oju akpakpa na anị ponoma wararị.

²⁰ Ị́ ị́ ama mẹ daarị sakị ị́ ị́ atomi ḅaam ẹrẹsị, ịn ja amadapụ ḍiḅi, ḍiḅi ḅara kẹ í ḍiḅi ḅịa. Í si furo mẹ ḅụ ḍumo sime ḅarị gbọrụḅọ-sọ paka ḅịa.

²¹ Yee ḅaa-fama mẹ saakị mịọkụ! Ḅị amadaḅọ ḅe owiapụ awọmẹ ma ịn fịị ḅa, ịna elemu aḍapụ ma asi ẹrẹsị. Ịna ḅụ gbọrụḅọ-sọ jen kẹ tomikiri mẹ da tẹ anị ḅio opu ama nama, nama sara ḅịa.

Tamụnọ Babịlọnị Fama Ḅa

²² Kụrọmamgba nyana KỊNỊNYANAḄỌ ḅe ḅẹẹm, “Àrị owu kẹ Babịlọnị paka tẹ anị guluguluma ḅa. À ye kọnma ḅịa — awọmẹ sọ ḅọrọ ḅịa, gbala-gbala kiri kọn apụ paka ḅịa. Yẹrị KỊNỊNYANAḄỌ ḅe ọkọ ḅẹẹm.

²³ À Babịlọnị pịkị-ḅo minji-minji kiri sọma ḅa, tẹ mgbukumgbuku anịanga anga ḅa. Àrị ọfịnye kẹ Babịlọnị ọfịn ḅa, ye mamgba ọfịn siin ḅarị ọfịnye. Yẹrị Kụrọmamgba nyana KỊNỊNYANAḄỌ ḅe ọkọ ḅẹẹm.”

Tamụnọ Asiriya Fama ḅa

²⁴ Kụrọmamgba nyana KỊNỊNYANAḄỌ ḅe karị tẹ. “Yẹrị tọn tẹ ye mẹ paka ḅa. À mịẹ ḅẹ tẹ kẹ ḅioḅẹngbọ sụa kụrọmatẹ ye mẹ mịẹ ḅa.

²⁵ Arị Asiriya apụ ma ḅaa-guluguluma ḅa Izirẹlị amakiri ḅụ, tẹ ị̀ tụndụ ma ọgọnọ ịn nanga ḅọrọ ḅa. Asiriya kẹ ị̀ atomi ma kọngọ kpọọ wararị ḍigi mẹ à fima sin ḅa, tẹ in dogi ḅẹ ikuye mẹ sọ à siin-koroma ḅa.

²⁶ Mie à kẹ ye tọn tomikiri mẹ pịrị ḅara, tẹ ị̀ ḅara-kọngọ paa sụụn-paka wararị kẹ sịẹ-sịẹ ma fomu.”

²⁷ Kụrọmamgba nyana KỊNỊNYANAḄỌ ḅe miemẹ mịẹ ḅẹ tẹ tọn kụrọmatẹ; ori ọ̀ ḅara-kọngọ sụn-pakamatẹ, kẹ in fomu, inetẹ ọ̀ dasịẹma ḅẹ gbọrụḅọ-sọ ofori.

Tamụnọ Filisiteniapụ Ma Fama Ḅa

²⁸ Mie Ama-da Ehazi fịị kụra mẹ ḅụ Ayịzaya ḍuko wasa oku mẹ.

²⁹ Filisiteniapụ, ó fomu sime sịn-ikiḅa mẹ anyị tẹ, kụma ó gotẹ ḅioḅẹlẹ ḅẹ ye ofori. Gbọrụ oronwi fịịarị sakị, sii ọ̀ nẹngị ye ọ̀ tọrụ ḍima tẹ paka-ḅoarị. Oronwi anyị kẹngẹ kụma, anị fiin-arị opu ẹfẹrẹfẹ sụa mamataḅaye, tẹ kọrị fịnị sara-pakama-ḅoarị si nama pakama-ḅoarị.

³⁰ KỊNỊNYANAḄỌ ḅe anana-ḍikiḍikiḅọ sọ ori atomi ma ḅẹ igoin-apụ ma pịrị ḅa, tẹ mịẹ tẹ in ye ḅụụ la-a ḅara kẹ anga ḅa. Kụma ọmịnị Filisiteniapụ ma, ọ̀ ḅalafama ḅuru-ḅa kẹ ọ́ fịrịma ḅa, tẹ anị ḅụụ ḅụ ḅara-siin tẹ ḍumo ḅẹ ḅọ sọ ofori ọmịna ḅụ.

³¹ Ọmịnị Filisiteniapụ opu ama mamgba, ọ́ ḅarasụa gotẹ oloku-oloku owu! Ọ́ tẹmẹ-naịn-naịn, ọmịnị-mgba! Tomikiri mẹ ḅẹ ọgọnọ-jụ ḅụ fọọn oḅuto ḅoarị — anie ọmụ-ogbo, ịna ḅụ tẹmẹ lọkọarị ḅọ ofori.

³² Ndẹẹ wa kẹ Filisiteni ḅụ wa dama-ḅo oku-mẹnjịapụ ma pakịrị ḅẹ ḅara? Wa ḍuko ịn pịrị ḅa mịnẹ KỊNỊNYANAḄỌ ḅe Zayọnị nama sịẹma kụrọma tẹ, tẹ ori atomi tẹ tọrụsiẹrịarị apụ ma anịanga ye ịn la ḅịa yọ ḍọkị-ẹrị ḅa.